थापाथली चुक नापं मेलम्ची पाइप तज्यागु दु। पाइप तज्याना लः बाः वया सतक तक अवरुद्ध जूगु दु।

थापाथलीइ छु जुया पाइप तज्यागु धाःसा सिइ मदुनि। थापाथली चुकय् नर्भीक इन्टरनेशनल अस्पताल नापतु सतकय् पाइपया लाइन तज्यागु दु।

थ्व स्वया न्ह्यः बबरमहल क्षेत्रय् लःया मुख्य पाइप लाइन तज्याना लः बा वःगु खः।

जन्मदर्ताया हःपाः बिइत भिरकोट नगरपालिका–८ पाखें मचा बुइ धुंकाः बैंकय् खाता चायेका न्याद्वः दां जम्मा बिइगु अभियान न्ह्याकूगु दु।

वडा ज्याकुथिं न्ह्याका च्वंगु आर्थिक दँनिसें थुजागु अभियान न्ह्याकूगु खः।मचा बुइ धुंकाः वडा ल्याः ८ ज्याकुथिं जन्मदर्ता याःपिं फुक्क हे मचातय्गु हकय् लागू जुइगु कथं वडा ज्याकुथिं न्याद्वः व मां अबुं न्याद्वः यानाः मुक्कं झिद्वः ध्यबा जम्मा याना बिइगु वडा अध्यक्ष नन्दलाल खनालं धयादिल।

मचाया खाताय् मुना च्वंगु ध्यबा मचा १८ दँ पूवने धुंका छेँजःपिंसं लिकाये फइगु व्यवस्था जूगु वय्कलं धयादिल। न्ह्यानाच्वंगु आर्थिक दँया साउननिसें आःतक वडा ज्याकुथिइ ३१ म्ह मस्तय्गु जन्मदर्ता जुइ धुंकूगु दु। खाता चायेकेगु अभियान नापनापं वडा ज्याकुथिं गोंगः नापं मचाबुम्ह नापलावनेगु, लुमुगु पुतलं वितरण थेँजागु ज्यायात निरन्तरता बियाच्वंगु दु।

”लुँथेँ जाःगु द्वःछि न्हुया मां व मचाया स्वास्थ्य व पोषणय् ध्यान बिसें वडाया जनप्रतिनिधि व स्वास्थ्यकःमित छेँ छेँय् वनी”, वय्कलं धयादिल, “स्वास्थ्य सम्बन्धी परामर्श नं बियाः वयाच्वनागु दु।

विश्व सम्पदा धलखय् लानाच्वंगु स्वयम्भूइ च्वंगु प्रतापपुर व अनन्तपुर देगःया जीर्णोद्धार पूवंगु दु।

स्वयम्भूया संरक्षण यानावया च्वंगु स्वयम्भू व्यवस्थापन नापं संरक्षण महासमितिं निगुलिं देगः चिरिबानाः ग्यानापुया वःगुलिं थ्यंमथ्यं दँच्छिया दुने माःगु मर्मतसम्भार नापं जीर्णोद्धार याःगु खः।

पुरातत्व विभागं पुलांगु हे स्वरुपय् मर्मत यायेत महासमितियात अनुमति बिइ धुंकाः न्हूगु प्रविधि छ्यलाः मर्मतसम्भार नापं रङ्गरोहनया ज्या पूवंकूगु महासमितिया छ्याञ्जे चन्द्ररत्न बुद्धाचार्यं कनादिल। विसं २०७२ सालया भुखाचं उगु देगलय् क्षति जूगु खः। प्रताप मल्लं निर्माण यानाथकूगु उगु सम्पदा ऐतिहासिक नापं पुरातात्विक महत्त्वया सम्पदास्थल खः।

जुजु प्रताप मल्लं थःगु नामं उगु देगःयात प्रतापपुर तःगु खः धाःसा लानी अनन्तप्रियाया लुमन्तिइ अनन्तपुर देगः निर्माण याकूगु इतिहास दु। उगु लागाया चैत्य नापं प्राचीन महत्त्वया मेमेगु सम्पदा जीर्णोद्धार यायेत पुरातत्व विभाग व महासमितिं अध्ययन यानाच्वंगु महासमितिया महासचिव महेन्द्ररत्न बुद्धाचार्यं कनादिल।

उगु सम्पदायात थ्वस्वयांन्ह्यः मिँ च्यानाः व ल्हाप्सा जुयाः क्षति जुगुलिं जिर्णोद्धार याःगु खः।महासमितिं स्थानीय जात्रा नखः मेला सञ्चालन नापं स्वयम्भू लागाया जङ्गल संरक्षणया निंतिं स्वांसिमा पिइगु नापं पार्कया छायेपियाः वयाच्वंगु दु।

महासमितिया इञ्जिनियर राजेश सुवालं थ्यंमथ्यं २० लखया लागतय् उगु सम्पदाया जीर्णोद्धार जूगु धयादिसें महाचैत्य जःखःया थासय् च्वंगु मेमेगु सम्पदा मर्मत यायेत अध्ययन जुयाच्वंगु धयादिल।

नागरिक लगानी कोषय् दुथ्यानाच्वंपिं, सेयरधनी व कर्मचारीपिंत सहिद गङ्गालाल राष्ट्रिय हृदय केन्द्रय् ‘पेइङ क्लिनिक, सिल्भर, गोल्डेन व प्लेटेनियम कर्पोरेट कार्डियक प्याकेज’य् १० प्रतिशत छुट दइगु जूगु दु।

थूगु छुट सम्झौताय् आइबाः कोषया कार्यकारी निर्देशक पर्वतकुमार कार्की व केन्द्रया कार्यकारी निर्देशक डा रबी मल्लं ल्हाचिं तयादीगु खः। सम्झौतानापं आः कोषया दुजः, दुथ्यानाच्वंपिं, सेयरधनी, कर्मचारीं उगु छुट कायेखनीगु जूगु खः।

छुटया निंतिं कोषया म्हसिका पौ बाय् कोषय् दुथ्यानाच्वंगु म्हसिका पौ अनिवार्य पेस यायेमाःगु व्यवस्था यानातःगु दु।(रासस)