Display Style:
Column Style
मन्त्रीया गाडी खुसिइ दुन
लहनान्युज | ने.सं. ११३९ तछलाथ्व नवमि (११ जुन, २०१९)
भौतिक पूर्वाधार तथा यातायात मन्त्री रघुवीर महासेठ च्वनावंगु गाडी खुसिइ दुंगु दु ।
स्याङ्गजा जिल्लाया अर्जुन चौपारी ३, घट्टेय् च्वंगु दरौ खुसिइ मन्त्रीया झण्डावाल गाडि दुंगु खः । सहरे खुसिया ताँया शिलान्यास यानाः लिहां वयेगु झ्वलय् मन्त्री च्वनावःगु बा २ झ ४०२९ ल्यांया गाडी खुसिइ बच्छि दुंगु खः । मन्त्रीयात धाःसा सुरक्षाकःमितसें उद्दार याःगु खः ।
खुसिइ गाडी दुंगुलिं गाडीया इन्जिन हे बन्द जूगु दुसा क्रेनया ग्वाहालिइ गाडी पितहयेगु ज्या जूगु खः । मन्त्री धाःसा मेगु गाडीइ लिहांवःगु प्रमुख जिल्ला अधिकारी कोशहरी निरौलां जानकारी बियादीगु दु ।
जनताया धार्मिक साँस्कृतिक आस्थाय् प्रहार याःगु : राजेन्द्र श्रेष्ठ
नृपेन्द्रलाल श्रेष्ठ | बछलाथ्व अष्टमी ११३९ (जुन १० २०१९)
समाजवादी पार्टी, नेपालया सहअध्यक्ष राजेन्द्र प्रसाद श्रेष्ठं गुथि विधेयकया नामं जनताया धार्मिक साँस्कृतिक आस्थाय् प्रहार याना तधःगु गल्ती याःगु धका धयादिगु खः ।
छगु ज्याझ्वलय् सहअध्यक्ष श्रेष्ठं गुठी सम्बन्धी कानुनया एकीकरण व संशोधन याये त्यःगु विधेयकया सन्दर्भय् संघीय समाजवादी नेवाः संघ व नेवाः राष्ट्रिय परिषदया मंकाः ग्वसालय् ‘गुुठी विधेयक व नेवाः सरोकार’ विषयलय् विचार गोष्ठीइ अथे धयादिगु खः ।
उगु ज्याझ्वःया मूपाँहा श्रेष्ठं जेठ २६ गते येँया माइतीघर मण्डलाय् गुथि विधेयकया विरुद्धय् जुगु शान्तिपूर्ण जनप्रदर्शनय् प्रहरी हस्तक्षेप व अन्धाधुन्ध लाट्ठीचार्ज, लःया फोहरां छ्वाकां राज्य आतंक याःगु द्धपः न बियादिगु खः।
सहअध्यक्ष श्रेष्ठं गुठी संस्थान तक खारेज याये माःगु माग जुया च्वंगु इलय् प्राधिकारयुक्त संस्था दयेका संयुक्त राष्ट्रसंघ व आइ.एल.ओ. १६९ या प्रदत्त परम्परागत कानुन छ्यले दइगु आदिवासी पिनिगु अधिकारया विरुद्ध खः धका धयादिगु खः ।
उगु ज्याझ्वलय् पंचलाल महर्जन, केदारभक्त माथेमा, हिसिला यमि व नरेशवीर शाक्य न थःथःगु नुँगः खँ तयादिगु खः ।
लोकसेवा आयोगं पिथंगु लिपांगु विज्ञापन रद्द यायेत निर्देशन
लहनान्युज | ने.सं. ११३९ तछलाथ्व अष्टमि (१० जुन, २०१९), सोमबाः
प्रतिनिधिसभा राज्य व्यवस्था समितिं स्थानीय तहया थीथी पदया नितिं लोकसेवा आयोगं पिथंगु लिपांगु विज्ञापन रद्द यायेत निर्देशन ब्यूगु दु ।
समितिया थौं सोमबाः च्वंगु मुँज्यां उगु विज्ञापन संविधानया मर्म व भावनाकथं खनेमदुगु न्ह्यथसें विज्ञापन तत्काल रद्द यायेत याकेत संघीय मामिला तथा सामान्य प्रशासन मन्त्रालय व लोकसेवा आयोगयात निर्देशन ब्यूगु खः ।
थ्व स्वयां न्ह्यः मुँज्याय् संघीय मामिला तथा सामान्य प्रशासन मन्त्री लालबाबु पण्डितं संविधान व कानून दुने च्वनाः बिधि व प्रकृया पूवंकाः आवश्यकता व औचित्यया लिधंसाय् विज्ञापन यानागु धकाः उकिया प्रतिरक्षा यानादीगु खः ।
समितिं प्रदेश व स्थानीय तहया कार्यक्षेत्र, आवश्यकता, विशिष्टता, अपनत्व व पूर्ण सहभागिताय् प्रदेशनापं स्थानीय तगिंया संगठन व व्यवस्थापनया सर्वेक्षण यानाः वास्तविक दरबन्दी ल्याः यकीन जुइधुंकाः जक समानुपातिक समावेशी सिद्धान्तया लिधंसाय् प्रचलित कानूनकथं प्वनाच्वंगु पद पूर्ति यायेत फुक्क प्रकृया न्ह्याकेत मन्त्रालययात निर्देशन ब्यूगु खः ।
लोकसेवा आयोगं वंगु जेठ १५ गते स्थानीय तहया थीथी ९,१६१गू पदया नितिं विज्ञापन चायेकूगु खः ।
थ्व स्वयां न्ह्यः मुँज्याय् सांसदतसें प्रदेश लोकसेवा आयोगं यायेमाःगु ज्या संघीय लोकसेवापाखें याकेत स्वयेगु नापं संविधानं आत्मसात याःगु समानुपातिक व समावेशी सिद्धान्त अःखः वनाः तःधंगु ल्याखय् स्थानीय तगिमय् कर्मचारी भर्ना यायेगु ज्यां सरकार संघीयता व संविधानया भावना अःखः जक वनेत्यंगु खःला धइगु भान जूगु टिप्पणी याःगु खः ।
सांसद देवेन्द्रराज कँडेल, महेश्वरराज गहतराज, रेखा शर्मा, जनार्दन शर्मा, डिला संग्रौला, पम्फा भुषाल, रामसहायप्रसाद यादव, प्रेम सुवाल, छक्कबहादुर लामापिन्सं लोकसेवा आयोगया लिपांगु विज्ञापन संविधानया मर्म व भावनाकथं मजूगुलिं रद्द यायेगुया विकल्प मदुगु सुझाव बियादीगु खः ।
हुलाप्याखं कासाय् अनुषा गिरी उत्कृष्ट
लहनान्युज | तछलाथ्व सप्तमी ११३९ (जुन १० २०१९)
ख्वपया मध्यपुर थिमिइ ग्वसाः ग्वःगु ‘एकल नृत्य प्रतियोगिता–२०७६’या उपाधि इम्मानुअल स्कूलया अनुषा गिरीं त्याकूगु दु ।
सरस्वती कला केन्द्रं ग्वसाः ग्वःगु उगु कासा त्याकूम्ह गिरीयात मध्यपुर थिमि नगरपालिकाया प्रमुख मदनसुन्दर श्रेष्ठं दसिपौ, शिल्ड व मेडल लःल्हानादीगु खः । गिरी १५०म्ह प्रतिस्पर्धीयात ल्यूने लाकूसें उगु उपाधि त्याकूगु खः ।
स्वंगू चरणय् याःगु उगु कासाया फाइनलय् वेलफायर एकेडेमिया स्वस्तिका जीसी ल्यू, ख्वप उच्च माध्यामिक विद्यालयया प्रिया प्रजापति लियांल्यू लाःगु खःसा हःपाः सिरपाःकथं सिर्जना कार्की व अजय केसीं त्याकूगु खः ।
अथे हे जुनियरपाखें सुप्रभा कार्की न्हाप, आशिका बोहरा ल्यू, आर्य अर्याल लियांल्यू व अणु श्रेष्ठं हःपाः सिरपाः त्याकल ।
नेपाल संगीत तथा नाट्य प्रतिष्ठानया प्राज्ञ कृष्णभक्त महर्जन, वरिष्ठ कलाकार मणिराम केसी व अनिता श्रेष्ठया निर्णायक पुचलं प्रतियोगीपिनिगु हुलाप्याखंयात कयाः मूल्यांकन याःगु खः ।
स्थानीय भाय् छ्यलीगु इलय् अपराध न्यूनीकरण याय्त ंसहयोगात्मक भूमिका जुइफूगु न्ह्यथंगु खः ।
दल्लु ल्वहंहितिया पुनःनिर्माणया शिलान्यास
लहनान्युज | तछलाथ्व सप्तमी ११३९ (जुन १० २०१९)
येँ महानगरपालिका वडा नं. १५ डल्लु चोताराय् च्वंगु दलु ल्वहंहितिया पुनःनिर्माणया नितिं प्रतिनिधिसभाया दजः जीवनराम श्रेष्ठं शिलान्यास यानादीगु दु ।
स्थानीय जनसमुदायया मागकथं उगु दय्केज्याया नितिं येँ क्षेत्र नं. ८ स्थानीय पूर्वाधार विकास साझेदारी कार्यक्रम अन्तर्गत १५गू लखतका बजे बिनियोजन याःगु खः ।
उगु ल्वहंहिति हनुमानध्वाखा विश्वसम्पदा निसें स्वयम्भू विश्वसम्पदातक वनीगु सम्पदा लँपुइ लाः । थुगु बजेटपाखें ल्वहंहिति पुनःनिर्माणलिसें सार्वजनिक चःबि दय्केज्या जुयाच्वंगु दु ।
उगु शिलान्यास ज्याझ्वः समितिया कजि अमरबहादुर रञ्जितया अध्यक्षताय् जूगु खः ।
ज्याझ्वलय् वडाया दुजःपिं आनन्दराम गौतम, मैंयालक्ष्मी महर्जनलिसें नव जागृति क्लबया पदाधिकारिपिं व स्थानीय जनसमुदायपिनिगु उपस्थिति दुगु खः ।
