Display Style:
Column Style
छठया तयारी न्ह्यात
लहनान्यूज सम्वाददाता | कछलाथ्व चौथि ११३७ (नोभम्बर ३ २०१६)
नेपाःमिपिनिगु तःजिगु नखः स्वन्ति क्वचायाकथं न्ह्याइगु छठ पर्वया तयारी न्ह्याःगु दु ।
छठ पर्वया लागिं धकाः राजधानीया पुखूत यचुपिचुकेगु ज्या न्ह्याःगु खः । छठ पुजा समारोह समितीं यचुपिचुया ज्या न्ह्याकूगु खः ।
राजधानीया कमलपुखू, तिसापुखू लिसेंया पुखुलिइ छठ पूजाया ग्वसाः ग्वइ । न्हापा न्हापा येँय् न्हुपुखुलिइ छठया पुजा याना वयाच्वंगुलइ न्हुपुखुलिइ भुखाचं क्षति याःगुलिं थुगुसी मेमेगु पुखुलिइ छठ पूजाया तयारी याःगु खः ।
छठ पर्व वइगु आईतबाः लाःगु दु ।
छठया नितिं तराइ झःझः धायेकल
तराइ लागाय् नं छठया चहलपहल न्ह्याःगु दु ।
प्यन्हुतक्क हनीगु छठ तराइ लागाय् कन्हयनिसें न्ह्यायेत्यंगु खः । धनुषा, महोत्तरी, सिरहा, सप्तरी, बारा, पर्सा, रौतहटलिसेंया पूर्वी तराईया जिल्लाय् छठया चहलपहल न्ह्याःगु खः ।
जनकपुरया गंगा सागर, अरगजा सर, धनुष सागर, रुक्मिणी सर, दशरथ तलाउलिसेंया दर्जनौं पुखू छायेपीगु ज्या न्ह्याःगु दु । भारतीय राष्ट्रपति प्रणव मुखर्जी जनकपुर झाइगु जूगुलिसें थुगुसी जनकपुरय् विशेष यचुपिचु याःगु दु ।
पारिवारिक सुख, शान्ति, कल्याण, ल्वचं मुक्ति अले थीथी मनंतुना पूवनेमा धइगु आज्जुं सुद्र्यःया उपासना यानाः थुगु नखः हनेगु याइ । महाभारतया कथं द्रौपतिलिसें पाण्डवतय्सं अज्ञातवासय् च्वंबलय् उगु गुप्तबास ताःलायेमा धकाः सुद्र्यःया आराधना याःगु व व हे इलंनिसें छठ हनेगु परम्परा न्ह्याःगु धापू दु ।
तराईया बजारय् छठया ज्वलं न्यायेत आः सर्वसाधारणत म्वःम्वः मुंगु दु ।
चारुमति बुद्धविहारय् कथिन चीवर दान
लहनान्यूज सम्वाददाता | कछलाथ्व चौथि ११३७ (नोभम्बर ३ २०१६)
भिक्षु तपस्सी धम्म व समित भन्तें चारुमती बुद्ध विहारय् स्वलाया वर्षावास क्वचायेकूगु अवसरय् थौं कथिन चीवर दान महोत्सव क्वचाःगु दु ।
चारुमती बुद्धिस्ट मिसन नेपाल चाबहीया ग्वसालय् याःगु महोत्सवय् थाइल्याण्डया धम्मकाय व वल्र्ड फेलोसिप अफ बुद्धिष्ट युथया नायः डा. पोर्नचाइ पिनयापोंगं कथिन चीवर व अष्ट परिस्कार दान याःगु खः ।
महोत्सवय् स्वास्थ्यमन्त्रि गगन थापां भगवान बुद्धया उपदेशयात सकसिनं आत्मसात यायेमाःगु धयादिल ।
ज्याझ्वलय् थाइल्यान्डं हःगु भगवान बुद्धया अस्थिधातु चारुमति बुद्ध विहारय् प्रतिस्थापन याःगु खः । अस्थिधातु दँयदसं स्वांया पुन्हिकुन्हु सार्वजनिक यायेगु न्ह्यथंगु दु ।
ज्याझ्वःया मेपिं वक्तातय्सं चारुमती स्तुपायात विश्व सम्पदा धलखय् दुथ्याकेत माग याःगु खः ।
अमेरीकाय् नं न्हूदँ तःजिक न्यायेकल
अमेरीकां नरेश शाक्यपाखें | कछलाथ्व चौथि ११३७ (नोभम्बर ३ २०१६)
न्हूदँ नेपाल संवत ११३७या लसता अमेरीकाय् च्वनाच्वंपिं नेवाःतयसं तःजिक न्यायेकूगु दु ।
न्हूदँया हे दिं कछलाथ्व पारुकुन्हु नेवाः नखः न्यूयोर्कया ग्वसालय् न्यूयोर्क शहरया एम्हर्सत धइगु थासय म्हपूजा व न्हूदँ तःजिक न्यायेकूगु खः । ज्याझ्वलय् सच्छिम्हं मल्याक्क नेवाःत व थीथी नेपाली पुचःया प्रतिनिधितलिसें विदेशीतयसं तकं ब्वति कागु खः ।
उगु हे ज्याझ्वलय् नेवाः नखः न्युयोर्कया न्ह्यब्वया कथं नेपाल संवत ११३७या क्यालेन्डर न पितब्वज्या याःगु खः ।क्यालेन्डरया उलेज्या ज्याझ्वःया मूपाहाँ न्यूयोर्कय च्वंगु नेपाली महावाणिज्यदूतावासया वाणिज्यदूत कृसु क्षेत्रीं यानादीगु खः ।
म्हपुजा ज्याझ्वःया लिसें नेपाल व नेपाली समुदायया निम्ति महत्वपुर्ण योगदान व ज्या यानादीपिं नेपाली व गैरनेपालीपिन्त नं हंगु खः । ज्याझ्वलय् जोली अमात्य, कञ्चन अमात्य, अलेक्जेण्डर गर्गिल, शेरी ओना हाडलिन, नातासा ओजनाइक, लुना रञ्जित, सन्जिता प्रधान, एलेन कून व नखःया पुलांम्ह नायः बिरेन्द्र प्रधानयात हंगु ख ।
नेवाः नखः न्यूयोर्कया नायः राजा शाक्यं म्हपूजाय् ब्वति काःपिन्त लसकुस यानादिलसा संस्थाया न्वकू विष्णुमान प्रधानं सुभाय् देछानादिल ।
पुजाविधि धाःसा अजय छोचूंनं न्ह्याकादीगु खः ।
कलाकार रिद्धिबहादुर बज्राचार्य मन्त
लहनान्यूज सम्वाददाता | कछलाथ्व चौथि ११३७ (नोभम्बर ३ २०१६)
चर्या प्याखं ख्यलय् नांजाःम्ह पुलांम्ह कलाकार लिसें स्यनामि रिद्धिबहादुर बज्राचार्य मन्त ।
क्यान्सर ल्वचं कयाच्वंम्ह बज्राचार्य वासः यायेगु झ्वलय् हरिसिद्धि क्यान्सर अस्पतालय् म्हिगः बहनी मदुगु खः ।
कलाकार राजेन्द्रमान शाक्यं लहनान्यूजयात कनाद्यूकथं लच्छि ति न्ह्यः गःपःया नसाय् घाः खनेदयाः वयकःयात न्यूरो अस्पतालय् अपरेसन याःगु खः । तर अपरेसन धुंकाः नं घाः मलंसेँलि वयकःयात भारतया न्हू दिल्लीइ मेदान्त अस्पताल यंकूगु खः ।
मेदान्त अस्पतालया चिकित्सकतयसं उगु घालं क्यान्सरया हे रुप कायेधुंकूगु व ई आपाः ल्यं मदयेधुंकूगु धायेधुंकाः वयकःयात म्हिगः नेपालय् लित हःगु खः । म्हिगः नेपालय् थ्यनाकथं तप्यंक हे हरिसिद्ध क्यान्सर अस्पताल यंकूगुलिइ अन हे वयकः मदुगु खः ।
मदुम्ह बज्राचार्य पुलांम्ह नांजाःम्ह कलाकार कान्छा गुरुजुया काय् खः । वयकःया अन्त्येष्टि थौं यलया नखुइ क्वचाःगु दु ।
कन्हय् गुइलय् गनगन बन्द ?
लहनान्यूज सम्वाददाता | कछलाथ्व तृतीया ११३७ (नोभम्बर २ २०१६)
भारतीय राष्ट्रपति प्रणव मुखर्जीया नेपाल भ्रमणयात सहज व व्यवस्थित दयेकेगु धकाः कन्हय् नं येँया थीथी थासय् सडक अवरुद्ध जुइगु जूगु दु ।
कन्हय् बिहिबाः सुथय् ९ताः इलंनिसें ११ताः ईतक्क बौद्ध, मित्रपार्क, चाबही, गौशाला, एअरपोर्ट, तीनकुने, न्हूबानेश्वर,माइतीघर, सिंहदरवार, थापाथली, जोरपाटि क्षेत्रतक्क सडक खाली याकी ।
अथे हे सुथय् ९ः४५ताः इलंनिसें न्हिनसिया १ः४५ताः इलयतक्क बौद्ध, मित्रपार्क, चाबही, गौशाला, एअरपोर्ट, तीनकुने, न्हूबानेश्वर, माइतीघर, सिंदरवार, भद्रकाली, थापाथली, कोटेश्वर, पुलां बानेश्वर, शंखमूल, नागस्थान, न्हूसतक क्षेत्रय् सवारी वयेवने बन्द याइ ।
व हे कथं न्हिनय् ४ताः इलंनिसें ६ताः ईतक्क बौद्ध, मित्रपार्क, चाबही, गौशाला, एअरपोर्ट, तीनकुने, न्हूबानेश्वर, माइतीघर, सिंहदरवार, भद्रकाली, पुलां बानेश्वर, थापाथली, जोरपाटि, कोटेश्वर, पुतलीसडक, प्रदर्शनीमार्ग दुने सवारी ज्वलं न्ह्याकेगुलिइ पनी ।
सनिलया ५ताः इलंनिसें बहनी ७ताः ईतक्क सिंहदरवार, भद्रकाली, न्हूसतक गेट, जमल, केशरमहल, लैनचौर, लाजिम्पाट, पानीपोखरी, सोर्हखुट्टे, जयनेपाल, कोटेश्वर, नागस्थान, थँबहि दुने लँ बन्द जुइ सा सनिलया ३ः३०ताः इलंनिसें बहनीसिया ८ः३०ताः ईतक्क बौद्ध, मित्रपार्क, चाबही, गौशाला, एअरपोर्ट, तीनकुने, न्हूबानेश्वर, माइतीघर, सिंहदरवार, केशरमहल, लैनचौर, लाजिम्पाट, दरवारमार्ग, घण्टाघर, पुलां बसपार्क, थापाथली, जोरपाटि, सोर्हखुट्टे, जय नेपाल, कोटेश्वर, पुलां बानेश्वर, शंखमूल क्षेत्रतक्क सडक अवरुद्ध जुइ ।
अथे हे बहनी ७ः४५ताः इलंनिसें बहनी ९ः४५ताःतक्क बौद्ध, मित्रपार्क, चाबही, गौशाला, एअरपोर्ट, बत्तीसपुतली क्षेत्रय् वयेवने बन्द जुइ ।
