Display Style:
Column Style
लहना मिडियाया नायः नृपेन्द्रया मांं मन्त
लहनान्यूज सम्वाददाता | कछलाथ्व द्वादशि ११३७ (नोभम्बर ११ २०२६)
लहना मिडियाया नायः लिसें नेवाः पत्रकार राष्ट्रिय दबूया न्वकू नृपेन्द्रलाल श्रेष्ठया मां कृष्णबदन श्रेष्ठ आकाझाकां थौं सुथय् मन्त ।
५८ दँया श्रेष्ठ थौं सुथय् ४ः३०ताः इलय् हृदयघात जुयाः मदुगु खः । श्रेष्ठयात म्हिगः चान्हय् ल्हाः स्यात धकाः टिचिङ अस्पलातय् यंकूगु खः सा वयकः अस्पतालय् हे मदुगु खः ।
मदुम्ह श्रेष्ठया लिपांगु संस्कार पशुपति आर्यघाटय् थौं हे याइगु जूगु दु ।
मदुम्हेसिया जहानलिसें काय् छम्ह व म्ह्याय् छम्ह दु ।
‘शंखधरया ऐतिहासिकता जक छाय् पुष्टि यायेमाःगु’
लहनान्यूज सम्वाददाता | कछलाथ्व दशमि ११३७ (नोभम्बर १० २०१६)
शंखधरयात राष्ट्रिय बिभूति घोषणा याःगु लसताया दिंयात लुमंकुसें काष्ठमण्डप मंकाः स्यना दबूया ग्वसालय् थौं येँया शंखधर पार्कय् छगू ज्याझ्वः जूगु दु ।
दबूया नायः रजिन स्थापितया सभानायकय् जूगु ज्याझ्वलय् न्हूदँ राष्ट्रिय समारोह समितिया नायः भीमसेनदास प्रधानं पार्कय् दुगु शंखधरया झ्वाताय् स्वांमाः कोखायेकादिल ।
ज्याझ्वलय् संस्कृतिविद् डा.चुन्दा बज्राचार्यं शंखधरया खँय् संचार माध्यमं म्वाःमदूगु खँ प्रचार यानाजूगु धकाः दुःख प्वंकादिल । सीता, जनकया ऐतिहासिकताया खँय् विवाद मदुसा शंखधरया ऐतिहासिकता जक छाय् पुष्टि यानाच्वनेमाःगु धकाः डा.बज्राचार्यं न्ह्यसः तयादिल ।
अथे हे समारोह समितिया नायः भीमसेनदास प्रधानं तत्कालीन प्रधानमन्त्री कृष्णप्रसाद भट्टराईया नेतृत्वया सरकारं शंखधरयात राष्ट्रिय बिभूति घोषणा याःगु ज पुष्पकमल दाहाल नेतृत्वया न्हापाया सरकारं नेपाल सम्वतयात राष्ट्रिय सम्वत घोषणा याःगु लुमंकादिल । व हे कथं उद्योगमन्त्री जोशीं नेपाल सम्वतया विषयस प्रधानमन्त्रीलिसे नं सहलह जुयाच्वंगु व थुगु संवत व्यवहारीक रुपं छ्यले अःपुकेत ज्योतीष व पंचाग निर्णायक समितिलिसे नं सहलह यायेत्यनागु जानकारी बियादिल ।
संघीय समाजवादि फोरम नेपालया ल्यू नायः राजेन्द्र श्रेष्ठ, पुलांम्ह नायः लक्ष्मिदास मानन्धर, डा. रत्नकमल बैद्य, कबि बुध्द सायमि, तीर्थराम डंगोल, सांसद रामबीर मानन्धर, सांसद रुपा महर्जन, दिलिप महर्जन, हनुमानध्वाखा दरवार संरक्षण ज्याझ्वःया प्रमूख उदय पसःखलःलिसें नं नेपालय् विक्रम सम्वत स्वयां नेपाल सम्वतयात हे न्ह्यःने यंकेमाःगु खँय् बः ब्यूगु खः ।
लौहपुरुषया बुदिंया लसताय् थीथी ज्याझ्वः
लहनान्यूज सम्वाददाता | कछलाथ्व नवमि ११३७ (नोभम्बर ९ २०१६)
सर्वमान्य नेता व लौहपुरुष गणेशमान सिंहया १०२दँ बुदिंया लसताय् थौं थीथी ज्याझ्वः जूगु दु ।
व हे झ्वलय् गणेशमान सिंह तथा जनआन्दोलन सहिद स्मृति शान्ति प्रतिष्ठानं येँया रत्नपार्कय् छगू ज्याझ्वः याःगु दु ।
ज्याझ्वलय् जनआन्दोलन २०६२/६३ व नेपालया शान्ति प्रक्रियाय् महत्वपूर्ण भूमिका निर्वाह याःगु धासें थुगुसीया जनआन्दोलन लुँया तक्मां नेपाली कांग्रेसया नेता कृष्णप्रसाद सिटौलायात विभूषित याःगु खः । राष्ट्रपति विद्यादेवी भण्डारीं सिटौलायात तक्मा लःल्हानादिल ।
नुगः खँ तयेगु झ्वलय् राष्ट्रपति भण्डारीं गणेशमान सिंह गुगुं छगू पार्टीया जक मखसें देयया हे सर्वोच्च नेता खःगु धयादिल । राणा शासन विरुद्धया विद्रोहस वय्कःया योगदान लुमना हे च्वनीगु धासें संविधानया प्रभावकारी कार्यान्वयन यायेफुसा लौहपुरुष गणेशमान सिंहप्रति सच्चा श्रद्धाञ्जली जुइगु वयकलं धयादिल ।
लिसें सर्वोच्च नेता सिंहया १०२दँ बुदिंया हे लसताय् गणेशमान सिंह फाउन्डेसनं धाःसा येँया लुतिइ च्वंगु सिंहया झ्वाताय् स्वांमाः कोखायेकूगु दु । ज्याझ्वलय् गणेशमानया काय् लिसें नेपाली कांग्रेसया नेता प्रकाशमान सिंहं सर्वमान्य नेता सिंहं राणा शासन विरुद्धया आन्दोलन व जनआन्दोलनया कमाण्डरया रुपय् मूवंगु भूमिका म्हितादीगु धासें नेता सिंहं नेपालया राजनीतिइ वय्कःया सिद्धान्त थौं नं उलि हे सान्दर्भिक दनिगुलिइ बः बियादिल ।
शंखधर दिवस हन
लहनान्यूज सम्वाददाता | कछलाथ्व नवमि ११३७ (नोभम्बर ९ २०१६)
दँयदसं थें थुगुसी नं न्हूदँ राष्ट्रिय समारोह समितिं नेपाल सम्वतया पलिस्था लिसे स्वापू दुगु थाय् लखतीर्थय् शंखधर दिवस हंगु दु ।
नेपाल सम्वतया प्रवर्तक शंखधर साख्वाःयात राष्ट्रिय विभूति घोषणा याःगु दिंया लुमन्तिइ हना वयाच्वंगु शंखधर दिवस थुगुसी लखतीर्थ सुचुपिचु यायेगु लिसें शंखधरया किपाय् स्वांमाः कोखायेकाः हंगु खः । शंखधरया किपाय् समारोह समितिया नायः भीमसेनदास प्रधानलिसें सकलसिनं स्वांमाः कोखायेकूगु खः ।
नायः प्रधानं कृष्णप्रसाद भट्टराई नेतृत्वया तत्कालीन सरकारं शंखधरयात राष्ट्रिय विभूति घोषणा याःगु थुगु दिंयात अझ तःधंक व तःजिक हनावनेमाःगु धयादिल ।
अथे हे न्हूदँ समारोह समिति व्यवस्थापन कमिटिया दुजः उमेश स्थापितं कामपां लखतीर्थया लागिं बजेट फ्यायेधुंकूगु अवस्थाय् लखतीर्थय् शंखधरया झ्वाता तयाः अन पार्क दयेकेमाःगु धयादिल । मुक्कं राष्ट्रया ऋण मोचन यानाब्यूम्ह शंखधरया दिवसयात व्यवस्थित व तःजि दयेकेत पलाः न्ह्याकेमाःगु स्थापितया धापू खः ।
ज्याझ्वलय् व्यवस्थापन कमिटिया दुजःपिं राजेश शाक्य, सुजीब बज्राचार्य, मनरत्न शाक्यलिसें नं थःथःगु नुगःखँ लिसें शंखधर दिवसयात व्यवस्थित दयेकेत सुझाव ब्यूगु ख ।
अरनिकोया सितिकं स्वास्थ्य शिविर क्वचाल
लहनान्यूज सम्वाददाता | कछलाथ्व अष्टमि ११३७ (नोभम्बर ८ २०१६)
अरनिको समाजं रसुवा जिल्लाय् स्वन्हुयकंया सितिकं स्वास्थ्य शिबिर संचालन सफलतापूर्वक क्वचायेकूगु दु ।
समाजं रसुवा जिल्लाया स्याफ्रुवेसिइ निन्हु व कालिकास्थानय् छन्हु यानाः, स्वन्हु सितिकं स्वास्थ्य शिविर न्ह्याकूगु खः । मिसा ल्वय्, छ्यंगू, हाडजोर्नी, मचा ल्वय्, नसा ल्वय् विशेषज्ञलिसें नर्सत नापं मुक्कं २२म्हेसिया पुचः उखे वनाः मुक्कं सेवा सितिकं ब्यूगु खः ।
समाजं न्ह्यथं कथं स्याफ्रुबेसिइ १३सः स्वयां आपाः स्थानीयं स्वास्थ्य सेवा काःगु खःसा कालिकास्थानय् ३सः स्वयां आपाःसिनं सेवा काःगु खः । समाजं ल्याब सेवा, अल्ट्रासाउन्ड सेवा लिसें वासः तक नं सितिकं हे ब्यूगु खः ।
समाजया व्यवस्थापन व ग्वसालय् जूगु स्वास्थ्य शिविरय् ल्याब सेवा सम्झना ल्याबरेटोरी व अल्ट्रासाउन्ड सेवा काठमाडौं अल्ट्रासाउन्ड क्लिनिकं ग्वाहालि याःगु खः । शिविरय् थःगु स्वास्थ्य जाँच याकः वःपिं आपाःसिके पिसाबया संक्रमण आपाः खनेदुगु समाजं धाःगु दु ।
लहनान्यूजलिसे खँ ल्हासें समाजया न्वकू डा.मनोजमान श्रेष्ठं हिमाली भेगया बासिन्दाया स्वास्थ्य स्थिती उलि बांलाः खनेमदुगु धयादिल । आपाः पहाड गयेमाःगु व लः म्ह्वः हे जक त्वनेगु बानीं यानाः उखेया बासिन्दायाके आपाः हे पिसाबया समस्या खनेदुगु डा. श्रेष्ठया धापू खः ।
