Display Style:
Column Style
भारतीय राष्ट्रपति नेपालय्
लहनान्यूज सम्वाददाता | कछलाथ्व तृतीया ११३७ (नोभम्बर २ २०१६)
भारतया राष्ट्रपति प्रणव मुखर्जी स्वन्हुया राजकीय भ्रमणया लागिं बुधबार येँय् थ्यंकः झाःगु दु ।
भारतीय वायुसेनाया विशेष विमानं राष्ट्रपति मुखर्जी येँय् झाःगु खः । राष्ट्रपति विद्यादेवी भण्डारीं त्रिभुवन अन्तर्राष्ट्रिय विमानस्थलया अति विशिष्टकक्षय् भारतीय समकक्षीयात लसकुस यानादिल ।
उपराष्ट्रपति नन्दबहादुर पुन, प्रधानमन्त्री पुष्पकमल दाहाल, परराष्ट्रमन्त्री डा. प्रकाशशरण महतलिसेंया मन्त्रीतयसं नं भारतीय राष्ट्रपतिया विमानस्थलय् हे वनाः लसकुस याःगु खः । भारतीय राष्ट्रपतियात लसकुस यायेत नेपाली सेनाया टुकडीं विमानस्थलय् २१ तोपया सलामी ब्यूगु खः ।
विमानस्थलय् कुहां वयाकथं भारतीय राष्ट्रपति मुखर्जी राष्ट्रपति विद्यादेवी भण्डारीलिसें हे राष्ट्रपति भवन शीतल निवास झाःगु खः । राष्ट्रपति भवन थ्यंकाःलि राष्ट्रपतिद्वय दथुइ द्विपक्षीय हित व थवंथवयया ग्वाहालिया विषयस करिब सवा घन्टा सहलह जूगु खः ।
राष्ट्रपति भण्डारीयात नापलायेधुंकाः भारतीय राष्ट्रपति मुखर्जी येँस्थित भारतीय दूतावासय् ग्वसाः ग्वःगु लसकुस ज्याझ्वलय् झाःगु खः ।
न्हूपुखू थुगुसी नं बन्द हे
लहनान्यूज सम्वाददाता | कछलाथ्व दुतिया ११३७ (नोभम्बर १ २०१६)
दच्छिइ छकः किजापुजा कुन्हु छन्हु जक चायेकीगु येँया जमलय् दुगु बालगोपालेश्वर देगः थुगुसी नं सर्वसाधारणया नितिं बन्द हे जुल ।
वंगु २०७२ बैसाख १२या भुखाचं दुंगु बालगोपालेश्वर देगः पुनर्निर्माण मजूबलय् सर्वसाधारणं दर्शन व पूजा यायेमखंगु खः । देगः पुनर्निर्माणया ज्या छुं ई न्ह्यःतिनि न्ह्याकूगु जूगुलिं सर्वसाधारणयात देगः चायेकामब्यूगु खः ।
भुखाय् न्ह्यः दाजुकिजा व तताकेहेँ मदुपिनि किजापुजाया दिनय् थन हे देगलय् दर्शन व पूजा यानाःलि अन हे किजापुजाया सिन्हः तीगु नं याइगु खः । तर पुनर्निर्माण मजूगु हुनिं न्हूपुखू मचायेकूबलय् सर्वसाधारणया ध्वाखा पिने हे किजापुजाया सिन्हः तिनाः लिहांवयेत बाध्य जुल ।
येँ महानगरपालिकां स्वन्ति न्ह्यः हे पुनर्निर्माणया ज्या क्वचायेकेगु धाःसां मापदण्ड अःखः दयेकेज्या जूबलय् पुरातत्व विभागं दयेकेज्या दिकेत उजं ब्यूगु खः । आः थुकिया पुनर्निर्माणया भाला पुरातत्व विभागं हे काःगु दु ।
वंगु २०७२ बैसाख १२ या भुखाचं उगु देगः दुंगु खः । उबलेनिसें थुगु देगः सर्वसाधारणया नितिं चाःगु मदुनि ।
थौं स्वन्तिया लिपांगु दिं, किजापुजा
लहनान्यूज सम्वाददाता | कछलाथ्व दुतिया ११३७ (नोभम्बर १ २०१६)
थौं स्वन्तिया लिपांगु, सकल तताकेहेँपिन्त छेँय् छेँय् थः दाजुकिजायात पुज्यानाः किजापुजा हनाच्वंगु दु ।
थौंया दिनय् लः व चिकनं च्वयाः उकी आखेय्, ताय्, हाकुमुस्या, माय् आदि नं तयाः मन्दः दयेकाः किजापुजा यायेगु याइ । तःकेहेँनं थः दाजुकिजायात ह्याउँ सिन्हः तिकेगुलिसें ग्वय्स्वांमाः व जजंका कोखायेकाः, साःसाःगु मरिचरिलि, लिसें भोगत्या, तःसि आदि लिसेंया सिसाबुसा नं बियाः, ख्वःसिं नं तयाः किजापुजा याइ ।
थुकथं किजापुजा यायेबलय् चिकंमन्दः मगंतल्ले, ग्वयस्वांमाः झ्वाः मजूतल्ले, ख्वःसिं ध्वमगीतल्ले कालं थः दाजुकिजायात यंके दइमखूगु कामना तःकेहेँ नं याइ । थ्व हे खँ लिसे स्वानाः थः किजायात ततां यमराजया ल्हातं बचेयाःगु किम्बदन्ति झीगु समाजय् प्रचलित दु ।
थुगु दिनय् यमलोकया जुजु यमराज नं थः दूततलिसे केहेँ यमुनायाथाय् किजापुजा याकः वनीगु पौराणिक विश्वास दु ।
किजापुजा यायेधुंकाः दाजुकिजां थः तःकेहेँयात फुकथं धेबा, वसः व मेमेगु देछात नं बीगु चलन दु ।
थौं म्हपुजा, दँया न्हापांगु दिं
लहनान्यूज सम्वाददाता | कछलाथ्व पारु ११३७ (अक्टोबर ३१ २०१६)
थौं स्वन्तिया झ्वलय् सकलसिया छेँय् छेँय् म्हपुजा हनाच्वंगु दु ।
थौं सकल नेवाःतय् छेँय् छेँय् मन्दः दयेकाः म्हपुजा याइ । लः व चिकनं च्वयातःगु मन्दलय् आखय्, ताय्, हाकुमुस्या, वा तयाः म्हपुजा यायेगु याइ ।
म्हपुजा यायेबलय् छेँजः सकलें झ्वःलाक च्वनाः छेँया नकिम्हं यायेगु याइ । छेँजः सुं पिहां वनाच्वंगु वा म्हपुजा याःवये मफइगु अवस्थाय् उम्ह छेँजःया नामय् मन्दः जक सां पुज्यायेगु याइसा गुलिसिया थःगु छेँय् लःहिनातयापिं पशुपंक्षीयात तकं म्हपुजा यायेगु याइ ।
सुस्वास्थ्य व ताःआयूया कामना यासें पंचतत्वयात नं त्याकातये फयेमाः धइगु आशिका कथं पंचतत्वया प्रतीक ख्येँय् सगं बियाः म्हपुजा याइ । दँया दक्कले लिपांगु दिं लक्ष्मीपुजा कुन्हु मेगु दँया आर्थिक ल्याःचाः कथं लक्ष्मीपूजा याइगु खःसा दक्कले न्हापांगु दिं म्हपुजाकुन्हु दच्छियंकं बल्लाक ज्या यानाच्वने फयेमा धइगु ल्याखं म्हपुजा याइ ।
थःगु शरीरया प्रतीक कथं मन्द दयेकाः मन्दःयात पुज्यासें थम्हं थःयात हे पुज्यायेगु नेवाः परम्परा म्हपुजा हलिंया हे अनुपम व दर्शनं जाःगु तजिलजि खः ।
‘संविधान संशोधन यानाःसां व्यवहारय् छ्यले’
लहनान्यूज सम्वाददाता | कछलाथ्व पारु ११३७ (अक्टोबर ३१ २०१६)
प्रधानमन्त्री पुष्पकमल दाहालं संविधान संशोधन यानाः हे जूसां नेपाल सम्वतयात व्यवहारय् छ्यलेगु नितिं थम्हं कुतः यायेगु धयादीगु दु ।
न्हूदँ नेपाल सम्वत ११३७ या लसताय् थौं न्हूदँ राष्ट्रिय समारोह समितिया ग्वसालय् येँया बसन्तपुलिइ जूगु सभायात सम्वोधन यासें प्रम प्रचण्डं न्हापाया कार्यकालय् थम्हं हे नेपाल सम्वतयात राष्ट्रिय सम्वत घोषणा याःसां थीथी कथंया प्राविधिक लिसें प्रशासनिक परिस्थितीं यानाः व्यवहारय् छ्यलेमफूगु धयादिल । आःया पालय् संविधान संशोधन हे यानाः हे जूसां थुकियात व्यवहारय् हयेगु प्रम दाहालया दाबी खः ।
नेपाल नेपाल सम्वतयात व्यवहारीक रुपं छ्यलेत तिथिमितिया ल्याःचाः थाकु धाइगु जूगुलिं थुकियात छ्यले अःपुकेगु नितिं थम्हं पंचाग सम्बन्धि विज्ञतलिसे नं सहलह यानाच्वनागु दाहालं धयाद्यूगु खः । आः देयया नामं स्वनातःगु नेपाल सम्वतयात नेवाःतयसं नं थःगु जक धकाः बिचाः यायेगु व गैर नेवाःतयसं नं नेवाःतयगु सम्वत धकाः बिचाः यायेगु त्वःतेमाःगु दाहालया धापू खः ।
नुगः खँ तयेगु झ्वलय् समारोह समितिया नायः भीमसेनदास प्रधानं नेपाल सम्वतयात नोटय् नं छ्यलेमाःगु, बैंकया चेकय् छ्यले दयेमाःगु, नेपाल सम्वत अध्ययन प्रतिष्ठान दयेकाः थुकिया बारे अध्ययन, अनुसन्धान न्ह्याकेमाःगु, राष्ट्रिय विभूति शंखधर साख्वाः व नेपाल सम्वतया विषय पाठ्क्रमय् दुथ्याकेमाःगु लिसें म्ह्वतिं नं प्रधानमन्त्रीया लेटर पायडय् नेपाल सम्वतयात छ्यलेमाःगु थःपिनिगु माग यथावत हे दुगु धयादिल । नायः प्रधानं थुगु मागत थःपिनिगु पहिचानलिसे हे स्वानाच्वंगु जूगुलिं थुगु माग पूमवंतल्ले थम्हं सः थ्वयेका हे च्वनेगु धयादिल ।
उगु हे ज्याझ्वलय् कवि लिसें पूर्व सभासद् बुद्ध सायमियात नेपाल सम्वत इमेज सिरपालं हंगु खः । कवि सायमियात प्रम दाहालं सिरपालं सम्मानित यासें खादां कोखायेकेगु लिसें हनापौ व सिरपाःया राशि २५द्वः तका लःल्हानादिल ।
व स्वयां न्ह्यः थीथी बाजंखलः लिसें क्लब संघसंस्थाया ब्यानरलिसें येँया थःने व क्वःने लागाय् न्हूदँया र्यालि चाःह्यूगु खः । र्यालिइ समारोह समितिया नायः भीमसेनदास प्रधान, नेवाः न्ह्यलुवा लिसें पूर्वमन्त्री तीर्थराम डंगोल, समाजसेवी लक्ष्मीदास मानन्धर लिसें कलाकार, पत्रकार, साहित्यकार, उद्योगी, व्यापारीलिसें तःधंगु ल्याखय् सर्वसाधारणया नं ब्वति दुगु खः ।
