Display Style:
Column Style
प्रा.शाक्यया मांया १००दँ बुदिं
लहनान्यूज सम्वाददाता | कछलाथ्व अष्टमि ११३७ (नोभम्बर ८ २०१६)
प्रा. सुवर्ण शाक्य व नेवाः आन्दोलनया सक्रिय कार्यकर्ता ज्योति शाक्यया मां अष्टमाया शाक्यया सच्छिदँया बुदिं थौं हंगु दु ।
थौं मुखः अष्टमिया दिनय् मयजु शाक्यया बुदिं नेवाः परम्परा कथं ख्येँय् सगं बियाः हंगु खः । वयां लिपा पचलीइ शाक्यया कायम्ह्याय् लिसें छय्, छुइ, उइ सकसितं मुंकाः केक तायेगु ज्या नं जूगु खः ।
मयजु शाक्यया काय् ज्योति शाक्यं नेवाः परम्परा कथं छेँय् बुदिं हनेधुंकाः थौंकन्हयया ल्यायम्हतय् इच्छायात नं पूवंके कथं केक तायेगु ज्या नं जूगु धयादिल । ओलम्पस क्लबया न्वकू तकं खःम्ह भाजु शाक्यं थुकथं थः मांया सच्छि दँया बुदिं न्यायेके खनाः थःपिं तसकं लयताःगु धयादिल ।
लिसें मयजु शाक्यया तःधिकःम्ह काय प्रा. सुवर्ण शाक्यं छुं दिं न्ह्यः थःगु सफू ‘मांबौया ख्वाः स्वये’ पिदंगु ई लुमंकाः थम्हं थुगु दिंयात हे लुमंकाः उगु सफू पिकयागु धयादिल । थः मेगु हे सफू च्वयेगु तयारीइ दुगुलिइ थः मांया सच्छि दँ बुदिंया लसताय् हे मांबौया नामय् उगु सफू पिकयागु प्रा.शाक्यं लहनान्यूजयात धयादिल ।
न्यागू पुस्ता छथासं हे स्वयेखनीगु छगू दुर्लभ कथंया लु अन खनेदुगु खः । मयजु शाक्यया कायम्ह्याय् लिसें उइतक्क सकलें थः मां, अजिया बुदिंया लिसें थुकथं दुर्लभ कथंया लकसय् अतिकं हे लयतायाच्वंगु खनेदुगु खः ।
शंखधर दिवस हनीगु
लहनान्यूज सम्वाददाता | कछलाथ्व अष्टमि ११३७ (नोभम्बर ८ २०१६)
नेपाल संवतया प्रवर्तक शंखधरया साख्वाःया लुमन्तिइ वइगु कछलाथ्व दशमि बुधबाः कुन्हु शंखधर दिवस हनीगु जूगु दु ।
राष्ट्रिय विभूति शंखधर साख्वाःया लुमन्तिइ कन्हय् बुधवाः नेपाल संवत राष्ट्रिय न्हूदँ समारोह समिति ११३७ या ग्वसालय् थुगुसी नं शंखधर दिवस येँया १५ वडा चागः लखुतिर्थय् विशेष ज्याझ्वः यासें हनेत्यंगु खः ।
नेपाल संवत पलिस्था जूगु ऐतिहासिक थाय् लखुतिर्थय् कन्हय् सुथय् सुचुपिचु ज्याझ्वः तयातःगु दुसा शंखधरया किपाय् स्वांमाः कोखायेकेगु ज्याझ्वः नं दु । लिसें वयकःया योगदानयात कयाः थीथी वक्तापिन्सं सम्बोधन याइगु ज्याझ्वः नं तयातःगु दु ।
लिसें, कछलाथ्व एकादशी बिहिवाःकुन्हु येँया २० वडाया परोपकार शंखधर पार्कय् नं शंखधर दिवसया लसताय् कौला ज्याझ्वः तयातःगु दु । ज्याझ्वः सुथसिया ८ताः इलय् काष्ठमण्डप सामुदायिक अध्ययन केन्द्रया ग्वसालय् जुइत्यंगु खः ।
नेपाल संवतया प्रवर्तक शंखधर साख्वाःयात सरकारं ने.सं. ११२०य् राष्ट्रिय विभूति घोषणा याःगु लसता लुमंकाः दँयदसं थुगु हे दिनय् शंखधर दिवस न्यायेकाः वयाच्वंगु दु ।
जँलास्येँ ल्वगियात कोरियापाखें ग्वाहालि
लहनान्यूज सम्वाददाता | कछलाथ्व षष्ठी ११३७ (नोभम्बर ६ २०१६)
नेवाः पुच दक्षिण कोरियां छम्ह जँलास्येँ ल्वगि नेपाःमिया वासः योत आर्थिक ग्वाहालि ब्यूगु दु ।
टोखा नगरपालिका ६ पुरोक्वय् च्वंम्ह वीरलक्ष्मी श्रेष्ठयात दक्षिण कोरियाय् ज्या यानाच्वंम्ह नेवाः पुचःया दुजलं १ लख ६०द्वः तका ग्वाहालि कथं लःल्हाःगु खः ।
निगलं जँलास्यें ज्या मयानाः वासः याकाच्वंम्ह श्रेष्ठया वासः यायेत कोरियाय् क्रियाशिल नेवाः पुचया पुचलं वयकःया हे छेँय् वनाः ग्वाहालि धेबा लःल्हाःगु खः ।
दक्षिण कोरियां लिहांवःम्ह टोखायाम्ह स्थानीय निकायका टोखा नगरपालिकाया प्रतिनिधि प्रकाश डंंगोल, वडा ५ व ६या प्रतिनिधि कृष्ण बहादुर सुर्खेति व स्थानीयया उपस्थितिइ नेवाः पुचः कोरियाया छ्यान्जे राजकुमार डंगोलं धेबा लःल्हानादीगु खः ।
नेवाः मिसा दबू गठन
लहनान्यूज सम्वाददाता | कछलाथ्व षष्ठी ११३७ (नोभम्बर ६ २०१६)
नेृवाः देय् दबूया विषयगत संगठन कथं ‘नेवाः मिसा दबू’ गठन जूगु दु ।
थौं येँय् दबूया प्रारम्भिक अधिवेशन यासें रश्मिला प्रजापतिया अध्यक्षताय् मिसा दबू गठन याःगु खः । थौं क्वचाःगु अधिवेशनं ३३ दुजःया केन्द्रिय समिति नं ल्यःगु दु ।
पारिवारीक व सांस्कृतिक ज्याखँय् जक तक्यनाच्वंपिं नेवाः मिसातय् दथुइ नेतृत्वदायी भुमिका दयेकेगु आज्जुलिसें दबू गठन जूगु न्ह्यथंगु दु ।
राष्ट्रिय व अन्तराष्ट्रिय रूपं नेवाः मिसातयत एकिकृत यासें नेतृत्व विकास यानावनेगु आज्जु दुगु दबूया नकिं प्रजापतिं धयादीगु दु । लिसें नेवाः मिसातयगु आर्थिक, सामाजिक व राजनैतिक सशक्तिकरण दबूया तातुनां खःगु प्रजापतिया धापू खः ।
अधिवेशनं केन्द्रिय समितिपाखें प्रदेश समिति व जिल्ला समिति गठन यानाः खुलाया दुने राष्ट्रिय अधिवेशन यायेगु क्वःछित ।
नेदरलायन्दय् न्हूदँ व म्हपूजा ज्याझ्वः
लहनान्यूज सम्वाददाता | कछलाथ्व पंचमि ११३७ (नोभम्बर ५ २०१६)
न्हूदँ नेपाल संबत ११३७या लसताय् वल्र्ड नेवाः अर्गनाइजेशन नेदरलायन्ड च्याप्टरं नेपाल मंकाः म्हपूजालिसें भिंतुना कालबिल ज्याझ्वः याःगु दु ।
मंकाः म्हपुजा ज्याझ्वलय् आमस्तरदम, रोटरदम, दहेग, उतरेख्त, लाइदनया लिसें नेदरलायन्डया थीथी थासं नेवाःतलिसें मेमेगु जातिया नेपाःमिपिनिगु नं ब्वति दुगु खः ।
नितु श्रेष्ठ व अणु श्रेष्ठया ग्वाहालिइ श्रीलक्ष्मी श्रेष्ठं सकसितं म्हपुजा यानादिल । च्याप्टरया दुजःपिं सुदर्शन बज्राचार्य, बिरेन्द्र श्रेष्ठ, बिनोद श्रेष्ठ, झलक श्रेष्ठ, सुरेश श्रेष्ठ, जितेन्द्र श्रेष्ठ, कृष्णहरि महर्जन, नितु श्रेष्ठ व श्रीलक्ष्मी श्रेष्ठया संयोजनय् ज्याझ्वः जूगु खः ।
ज्याझ्वः न्ह्याके न्ह्यः वल्र्ड नेवाः अर्गनाइजेशनया संस्थापक नायः व सल्लाहकार डाक्टर बालगोपाल श्रेष्ठं नेपाल संबत व म्हपूजाया महत्वया बारे नवानादीगु खः । म्हपुजा क्वचायेकाः गंगा नेमकुलं दयेकादीगु संकिपा टेम्पो चालकया क्यने ज्या नं जूगु खः ।
ने.सं. ११३३स शरद जोशीया कजिसुइ नेदरलायन्ड च्याप्टरया गठन धुंकाः वंगु ने.सं. ११३४निसें थुगु संस्था मदिक्क मंकाः म्हपूजा ज्याझ्वः यानावयाच्वंगु दु ।
