Display Style:
Column Style
गुथिलिसे स्वनिगःया भावना स्वानाच्वंगुलिं खेलवाड मयायेत डा. जोशीया इनाप
लहनान्युज | ने.सं. ११३९ तछलाथ्व त्रयोदशि (१८ जुन, २०१९), सञ्चरवाः
वाङमय शताब्दी पुरुषनापं वरिष्ठ संस्कृतिविद् डा. सत्यमोहन जोशीं संसदय् प्रस्तावित गुथि विधेयक गथे खः अथे हे पारित जुल धाःसा स्वनिगःया संस्कृति व सम्पदा न्हनावनीगु धयादीगु दु ।
थौं सञ्चरवाः किपू नगरपालिकाया नगामय् डा. जोशीयात याःगु नागरिक अभिनन्दन ज्याझ्वलय् वय्कलं उगु खँ धयादीगु खः । डा. जोशीं गुथिलिसे स्वनिगःया भावना स्वानाच्वंगुलिं अनया मनूतय्गु भावनालिसे खेलवाड मयायेत नं इनाप यानादिल ।
ज्याझ्वलय् संघीय सांसद राजेन्द्र के.सी., प्रदेश सांसद पुकार महर्जन, किपू नगरपालिकाया प्रमुख रमेश महर्जन व किपू वडा ल्याः ९या वडाध्यक्ष गंगाराम महर्जनं किपूमिपिनिगुपाखें नागरिक अभिनन्दन याःगु खः ।
सत्यमोहन हना खलःया ग्वसाः व नेवाः एफ.एम. अनक मिडिया संयोजनय् जूगु उगु ज्याझ्वलय् अभिनन्दन यायेगु नितिं किपूया लोकतान्त्रिक चुकपाखें साँस्कृतिक बाजंलिसे नगर परिक्रमा याकूगु खः । वय्कःयात अमल्सि, न्हूबजाः, तगःवःपि, जुयाः नगांया बाघभैरव ब्याङ्केट थ्यंकाः अभिनन्दन याःगु खः ।
ज्याझ्वलय् किपुली क्रियाशील सामाजिक संघसंस्था, परम्परागत गुथि, दाफा गुथिलिसें मिसा पुचःपिनिगु उपस्थिति दुगु खः ।
गुथि विधेयक विरुद्ध ¥यालीइ
नृपेन्द्रलाल श्रेष्ठ | तछलाथ्व त्रयोदशी ११३९ (जुन १५ २०१९)
गुथि विधेयक विरुद्ध थौं सुथय् ज्यापु महागुथि नेपाःया आह्वानय् द्वलंद्वः नेवाःतय् सतकय् कुहां वःगु दु ।
थौं या ज्याझ्वलय् ज्यापु महागुथिया आह्वानय् सुथय् जुद्ध शालिकं बसन्तपुरं न्ह्याःगु उगु जुलुसय् झिद्वलं मल्याक नेवाःतय् ब्बति काःगु खः ।
उगु ¥यालीइ कुमारी चाःहिलीगु रुटय् चाःहिगु खः । थौंया विरोध ¥यालीइ गुथि विधेयक खारेज याः, नेवाः संस्कृति न्हंके दइमखु, भूमाफिया होशियार, नेवाः एकता जिन्दावाद, त्वाः त्वालं नेवाःत फुक्कं कुहां वयेमाल धयागु नारा थ्वयेकाः खः ।
नेवाः न्ह्यलुवाः नेवाः कार्यकर्तात नाप येँया थीथी परम्परागत ज्यापु त्वाःया गुथियारपिंनगु सहभागीता दुगु खः ।
अथेहे थौंया विरोध ¥यालीइ गुथि विधेयक खारेज यायेमाःगु माग यासें सोमवाः माइतीघर मण्डलाय् सुथय् ११ बजे मुनेत आह्वान न याःगु खः ।
गुथि बिधेयक विरुद्ध धर्ना
नृपेन्द्रलाल श्रेष्ठ | तछलाथ्व त्रयोदशी ११३९ (जुन १५ २०१९)
थौं महाद्यः पार्वती देगलय् गुथि बिधेयक विरुद्ध थौं सुथय् धर्ना च्वंगु दु ।
उगु धर्ना थौं सुथय् ८ ताः निसे न्ह्याःगु खः ।
थौंया धर्ना ज्याझ्वः गुथि बिधेयक २०७५ खारेजी अभियानया ग्वसालय् उगु ज्याझ्वः जुगु खः ।
उगु धर्ना ज्याझ्वलय् नेपाली कांग्रेसया नेता नबिन्द्रराज जोशीं धर्ना च्वना दिगु खः ।
मंगलबजारय् मसाल जुलुस पिहा वल
नृपेन्द्रलाल श्रेष्ठ | तछलाथ्व द्धादशी ११३९ (जुन १४ २०१९)
गुथि विधयेक लितः काये माःगु माग यासें यलया मंगलबजारय् थौं तःधंगु मसाल जुलुस पिहा वःगु दंगु दु ।
थौं शुक्रवाः सनिलया ६ः३० ताः इलय् पिहा वःगु उगु मसाल जुलुुस मंगलबजारं सलंसःया ल्याखय् पिदंगु खः ।
उगु मसाल जुलुसय् गुथि विधयेक लितकाय् माःगु नारा थ्वय्कूगु खः ।
नेपाःया सम्पदा, संस्कृति गुगुं नं हालतय् न्ह्यके दैमखु धासें गुथि विधयेक हःगु सरकार प्रधानमन्त्री व सञ्चारमन्त्री व गृहमन्त्रीया विरुद्ध मसाल जुलुसय् नाराबाजी नं याःगु खः ।
गुथि विधेयकया विरुद्ध जनकपुरया साधुसन्त सतकय् कुहां वइगु
लहनान्युज | ने.सं. ११३९ तछलाथ्व द्वादशि (१४ जुन, २०१९), शुक्रवाः
जानकी मन्दिरया महन्थ रामतपेश्वर दासं सरकारं विधेयक लित मकाःसा जनकपुरया फुक्क साधु सन्त सतकय् कुहां वयेगु ख्याच्वः बियादीगु दु ।
थौं शुक्रवाः पत्रकारतलिसे खँल्हानादिसें महन्थ दासं संघर्षया नितिं समिति दयेकाः थःपिं सतकय् कुहां वयेगु ख्याच्वः बियादीगु खः ।
दासं देगलय् सुथय् पूजापाठ यानाः न्हिच्छि तालं ग्वयाः सतकय् संघर्ष यायेगु नं धयादिल । गुथि विधेयक साधुसन्तयात ख्याना छ्वयेगु तातुनां वःगु धयादिसें महन्थ दासं बरु साधु सन्तयात थ्व देसय् च्वनेगु अधिकार मदु धकाः च्वयाबीत नं हाथ्याः बियादिल ।
विधेयक लित मकाःसा थुकिया विरुद्ध जुइगु आन्दोलन सरकारं कयेच्याये मफइगु महन्थ दासया धापू खः । ‘सरकारं थ्व विधेयक लित मकाःसा तःधंगु दैवी प्रकोप वइ । गुकियात सरकारं कयेच्याये फइमखु ।’
आः हे विधेयक पारित जूसा जनकपुरया अप्वः धइथें देगः व मूतिं संरक्षण जुइमफइगु नं महन्थ दासं धयादिल ।
