Display Style:
Column Style
थौं पृथ्वीलिसे तिमिला दक्कले सतीगु दिं
लहनान्यूज सम्वाददाता | कछलाथ्व पुन्हि ११३७ (नोभम्बर १४ २०१६)
थौं ६८दँ लिपा तिमिला पृथ्वीलिसे दक्कले सतिकवःगु दिं खः ।
थौं सनिलय् ५ताः ई जुयाः ७ मिनेटय् तिमिला पृथ्वीलिसे ३ लख ५६द्वः, ५सः व ९ किलोमिटर जक तापाःगु खः । थौं मेमेगु दिं स्वयां तिमिला १४ प्रतिशतं तचाः खनेदुगु खःसा मेमेबलय् स्वयां ३० प्रतिशत आपाः जहां थीगु खः ।
आः तिमिला पृथ्वीलिसे मेगु १८दँ लिपा सन् २०३४ नोभम्बर २५य् जक सतिकः वइगु खगोलविदतयसं धाःगु दु ।
थुकथं पृथ्वीलिसे सतिकः वइगु मिलायात महाचन्द्र अथवा सुपर मुन धायेगु चलन दु । थौंया सुपर मुन स्वयेत यक्व हे मनूत पल्लिइ पल्लिइ व लँय् लँय् मुनाच्वंगु खनेदुगु ख: ।
हलिमलि ब्वयाः सकिमना पुन्हि हन
लहनान्यूज सम्वाददाता | कछलाथ्व पुन्हि ११३७ (नोभम्बर १४ २०१६)
थौं स्वनिगलय् थायथासय् हलिमलि ब्वयाः सकिमना पुन्हि हंगु दु ।
सकिमना पुन्हिया दिनय् छुस्यामुस्या, कःनिलिसें थीथी बूबः तयाः कलात्मक रुप बियाः हलिमलि ब्वयेगु चलन नेवाः समाजय् दु । लिपा व हे ब्वयातःगु हलिमलियात घाराघुरु यानाः ल्वाकछ्यानाः इनाः नयेगु चलन दु ।
बर्षां त्वःताः चिकुलां थियाहइगु इलय् म्हयात बल्लाका तयेत थुकथं पौष्टिक तत्वं जाःगु हलिमलि नयेगु यानातःगु विज्ञतय् धापू दु । व हे कथं नयेगु नसायात नये न्ह्यः कलात्मक रुपं स्वये हे यइपुसेच्वंक ब्वयेगु नं छगू न्ह्यइपूगु तजिलजि खः ।
उकिया लिसें थौं हे स्वनिगःया प्यम्ह नारायणद्यः सीकः वनेगु धकाः प्यम्ह नारायणद्यः दर्शन याःवनेगु परम्परा दया वयाच्वंगु दु । थौं छन्हुं ख्वपया चाँगु नारायण, हल्चोक इचंगुया इचंगु नारायण, फंपिया शेष नारायण व गोदावरीया विशंखु नारायणया दर्शन यानाः पुज्यायेगु याइ ।
नापनापं थौं हे चोभारय् माय् अपसं च्वनाच्वंपिं थःगु अपसं नं क्वचायेकूगु दु ।
ताम्रकार समाजं भिन्तुना बिल
लहनान्यूज सम्वाददाता | कछलाथ्व त्रयोदशि ११३७ (नोभम्बर १२ २०१६)
ताम्रकार समाज यलं थौं यलय् न्हूदँ नेपाल सम्बत ११३७ या भिन्तुना व कौला ज्याझ्वःया ग्वसाः ग्वःगु दु ।
ज्याझ्वलय् नेपालभाषा मंकाः खलः यलया नायः ऋषिप्रसाद श्रेष्ठं यल नगरपालिकाय् नं नेपालभासं निवेदन कायेगु व्यवस्था यायेमाःगु धयादिल । लिसें वयकलं नगरपालिका, जिल्ला प्रशासन ज्याकू लिसेंया स्थानीय निकायया प्रमूखपिन्सं स्थानीय मांभाय् सयेकेगु अथवा स्थानीय भाषा सःपिं मनूतयत लजगालय् तःसा बांलाइगु छ्याता बियादिल ।
ज्याझ्वलय् न्हूदँ समारोह समिति ११३७ यलया नायः मोतिलाल शिल्पकार, नेवाः देय् दबूया नायः नरेश ताम्रकारलिसें थीथी जातीय खलःपुचःया प्रतिनिधिपिन्सं न्हूदँया भिन्तुना देछासें नेपाल सम्वतयात हे छ्यला यंकेमाःगु खँय् बः बियादिल ।
यल जिल्लाया प्रमूख जिल्ला अधिकारी ऋषिप्रसाद शर्र्मा त्वाःदेवाय् मत च्याकाः ज्याझ्वःया उलेज्या यानाद्यूगु खः ।
ज्याझ्वलय् कलाकारपिनिगुपाखें सांस्कृतिक न्ह्यब्वया नं न्ह्यब्वःगु खः ।
महासंघया न्हूम्ह नायः मोहन सुनार
लहनान्यूज सम्वाददाता | कछलाथ्व द्वादशि ११३७ (नोभम्बर ११ २०१६)
नेपाल सुनचाँदि व्यवसायी महासंघया निक्वःगु महाधिवेशनं तनहुँया मोहन सुनारयात महासंघया न्हूम्ह नायः ल्यःगु दु ।
थौं येँय् क्वचाःगु महासंघया प्यक्वःगु दँमुँज्या व निक्वःगु महाधिवेशनं सुनारया नेतृत्वय् २८म्ह दुजःया न्हूगु कार्यसमिति निर्विरोध चयन याःगु खः । महासंघया न्हूगु कार्यसमितिइ मू छ्यान्जे धर्मसुन्दर बज्राचार्ययात ल्यःगु दु ।
नायः पदय् ल्यःगु लिसें महासंघया न्हूम्ह नायः मोहनकुमार सुनारं लहनान्यूजलिसे खँ ल्हासें महासंघयात अझ बल्लाक, अझ धिसिलाक्क न्ह्यःने यंकेगु नितिं थम्हं पलाः न्ह्याकेगु धयादिल । पुलांगु नेतृत्वं न्ह्यःने यंकाच्वंगु ज्यायात हे अझ सशक्त रुपं निरन्तरता बीगु वयकःया धापू खः ।
सुनारं न्हापा हे दयाच्वंगु चोरीजन्य समस्या, कच्चा ज्वलंया समस्या, निर्देशिका जारी मजुयाच्वंगु समस्या आदिया समाधान यायेगु नितिं थम्हं थम्हं राज्यया थीथी तगिमय् माःकथं सहलह व वहसयात तच्वयेकेगु धयादिल । लिसें वयकलं लुँवहः, तिसा व्यवसाय ख्यलय् छगू जक महासंघ जुल धाःसा सशक्त रुपं वनेफइगु धासें नेपाल सुनचाँदि, रत्न तथा आभूषण महासंघलिसे कार्यगत एकता जक मखु, संस्थागत एकता हे यायेगु नितिं पहल यायेगु नं धयादिल ।
न्हूगु कार्यसमितिइ न्वकू पदय् न्याम्हेसित ल्यःगु दुसा छ्यान्जे, दांभरिं व ल्यू दांभरिं पदय् छम्ह छम्हेसित निर्विरोध ल्यल । व हे कथं जिल्ला दुजः कथं १४, नगर दुजः अन्तर्गत ३ व एशोसिएट्स दुजः कथं छम्हेसित ल्यल ।
व स्वयां न्ह्यः महाधिवेशनया उलेज्या ज्याझ्वलय् उपप्रधान लिसें गृहमन्त्री विमलेन्द्र निधिं व्यापारीं राजश्व व कानुन छले याइगु व सरकारं पायछि कानुन दयेकामब्यूगु धकाः निखें कुंखिना दुगु अवस्थाय् निगुलिं पक्षपाखें अध्ययन यानाः समाधानया लागिं जायेमाःगु धयादीगु खः ।
अथे हे सभां महासंघया तत्कालीन मू छ्यान्जे दियेशरत्न शाक्यं न्ह्यब्वयादीगु वार्षिक प्रतिवेदन व तत्कालीन दांभरिं ज्ञानकाजी शाक्यं न्ह्यब्वयादीगु आर्थिक प्रतिवेदन नं पारीत याःगु खः ।
लिसें थौंया हे सभां महासंघया विधानय् माःकथं संशोधन यायेगु नितिं विधान संशोधन संकल्प प्रस्ताव पारीत याःगु दु । आः विधान संशोधन यायेधुंकाः विशेष साधारण सभा यानाः न्हूगु कार्यसमितिइ माःकथं व सहमति जूकथं थीथी पदय् दुजःत थप जुइगु धाःगु दु ।
नृपेन्द्रया मांया अन्त्येष्टि क्वचाल
लहनान्यूज सम्वाददाता | कछलाथ्व द्वादशि ११३७ (नोभम्बर ११ २०१६)
लहना मिडियाया नायः लिसें लहना वाःपौया प्रकाशक नृपेन्द्रलाल श्रेष्ठया मां कृष्णवदन श्रेष्ठया अन्त्येष्टि क्वचाःगु दु ।
मदुम्ह श्रेष्ठया अन्त्येष्टि पशुपतिया विद्युतीय शव दाह गृहस याःगु खः । अन्त्येष्टि याये न्ह्यः परीवारया अनुमतिइ मदुम्हेसिया मिखादान नं याःगु खः ।
मदुम्हेसित काय् नृपेन्द्रलाल श्रेष्ठं मि तयादीगु खः । मि तयेगु ज्या सुथय् ९ः३०ताः पाखे जूगु खः ।
अन्त्येष्टि थःथितिपिंलिसें नेवाः पत्रकारत व नेवाः ख्यलय् सक्रियपिनिगु तःधंगु ल्याखय् उपस्थिती दुगु खः ।
थुगु बुखँ नं ब्वनादिसँ : लहना मिडियाया नायः नृपेन्द्रया मांं मन्त
