Display Style:
Column Style
न्हूदँया लसताय् सुवर्ण शाक्यया सफू
लहनान्यूज सम्वाददाता | कौलागा दशमि ११३६ (अक्टोबर २५ २०१६)
न्हूदँ नेपाल सम्वत ११३७ या लसताय् समाजसेवी प्रा.सुवर्ण शाक्यया सफू ‘मांबौया ख्वाः स्वये’ पिदनीगु जूगु दु ।
वइगु कौलागा चतुर्दशि (अक्टोबर २९) शन्चरबाःकुन्हु ओलम्पस क्लबपाखें छगू ज्याझ्वः यासें उगु सफूया उलेज्या यायेत्यंगु दु । न्हूदँया लसताय् भिंतुना कालबिल ज्याझ्वःया ग्वसाः ग्वयाः उगु हे ज्याझ्वलय् सफूया नं उलेज्या जुइगु क्लबं न्ह्यथंगु दु ।
ज्याझ्वः शन्चरबाः ओमबहालय् ओलम्पस ख्यलय् जुइत्यंगु दु ।
थुगुसी नं मचा ब्वज्या जुइगु
लहनान्यूज सम्वाददाता | कौलागा दशमि ११३६ (अक्टोबर २५ २०१६)
न्हूदँया लसताय् भिंद्यःत्वाःया न्हूपुचःपाखें दँयदसं ग्वसाः ग्वयाच्वंगु मचा ब्वाज्या कासा थुगुसी नं यायेत पुचलं तयारी न्ह्याकूगु दु ।
वंगु २०दँ न्ह्यःनिसें पुचलं न्ह्याका वयाच्वंगु मचा ब्वाज्या थुगुसी नं न्ह्याकेत मयजु रीतु स्थापितया कजिसुइ ५ दुजःया तयारी कमिति नीस्वनेगु ज्या जुल ।
वइगु कौलागा आमै लक्ष्मी पूजाया दिनय् बसन्तपुलिं २०क्वःगु मचा ब्वाज्या न्ह्याइगु न्हू पुचलं न्ह्यथंगु दु । ग्वसाः खलकं सुथसिया ७ः३०ताः इलय् ब्वाज्या न्ह्याकेगु धाःगु दु ।
ब्वाज्या बसन्तपुलिं न्ह्यानाः जुद्ध शालिक, ओमबहाः, लगं, ज्याःबहाः, न्हूघः क्वहिति जुयाः भिंद्यःत्वालय् थ्यंकाः क्वचाइ । कासाय् ५दँनिसें १०दँ तक्कया मचातयसं ब्वति कायेफइगु पुलचं न्ह्यथंगु दु ।
मुदिता सेवा गृहया संस्थापिकायात मातृशोक
लहनान्यूज सम्वाददाता | कौलागा नवमि ११३६ (अक्टोबर २४ २०१६)
ज्याथःपिं नागरिक, याकः मिसा अले असहाय, अनाथ मचातयगु सेवाय् समर्पित मुदिता सेवागृहया संस्थापिका नायः अले समाजसेवी राज्यलक्ष्मी बज्राचार्ययात मातृशोकं कःगु दु ।
नायः बज्राचार्यया मां लक्ष्मीदेवी बज्राचार्य ९०दँया वैंशय् आइतबार चान्हय् वासः यायेगु झ्वलय् मदुगु खः । ताः इलंनिसें ओष्टोपोरोसिस ल्वचं कयाच्वंम्ह मदुम्ह बज्राचार्यया थौं शंखमुलस्थित घाटय् दाहसंस्कार याःगु दु ।
मदुम्हेसिया आत्माया चीरशान्तिया कामना यासें सामाजिक, धार्मिक ख्यलय् ज्या यानाच्वंपिं मनूत, उद्यमीलिसें थीथी ख्यःया व्यक्तित्वपिं शंखमुलय् थ्यंकाः मदुम्हेसित लिपांगु श्रद्धाञ्जली प्वंकूगु खः ।
ओष्टोपोरोसिस ल्वचं कयाच्वंम्ह थः मांया सुसाःकुसाःलिसें महत्वबोध यानाः वयकःया हे हःपालं समाजसेवी राज्यलक्ष्मी बज्राचार्यं मेपिं ज्याथःपिं नागरिकतयगु संरक्षणया लागिं मुदिता सेवागृह स्थापना यानाद्यूगु खः ।
थः मांया लागिं जक मखसें थीथी परिवेशय् लाःपिं असहायपिन्त पारिवारीक लकस दयेकेगु आज्जुं याकः मिसा व असहाय, अनाथ मचातयगु कल्याण यायेत बज्राचार्यं थःगु हे नीजि भवनय् संस्थायात थाय् बिया वयाच्वनादीगु खः ।
झीत नेवाः स्वायत्त राज्य हे माः
लहनान्यूज सम्वाददाता | कौलागा नवमि ११३६ (अक्टोबर २४ २०१६)
शताब्दि पुरुष, संस्कृतिविद् डा. सत्यमोहन जोशीं राज्यपाखें हे नेपाःया आदिवासी जनजातितयगु मांभाय् न्हंकेगु ज्या जुयाच्वंगुलिं हे झीत नेवाः स्वायत्त राज्य माःगु धयादीगु दु ।
नेपालभाषा एकेदमिपाखें थौं यलय् ग्वसाः ग्वःगु दान्यहिरा सिरपाः लःल्हायेगु ज्याझ्वलय् संस्कृतिविद् लिसें एकेदमिया संरक्षक जोशीं राज्यया एक भाषा नीतिं यानाः नेपाःमिपिन्सं थःगु मांभाय् त्वःतेत बाध्य जूगु अवस्थाय् आः थःगु भाय्, संस्कृति ल्यंकेत स्वायत्त राज्य हे माःगु खँय् बः बियादिल । राज्यपाखें करोडौंया बजेट बियाः स्वंगू स्वंगू प्रतिष्ठान यानातःगु अवस्थाय् नेपालभाषा एकेदमि धाःसा जनता थम्हं हे गठन यायेमाःगु अवस्था नेवाःतयगु लागिं छखें गौरव खःसां राज्यं जनजाती समुदाययात वास्ता मयाःगुया दसु नं खःगु जोशीया धापू खः ।
थौंया ज्याझ्वलय् दान्यहिरा हःपाः सिरपाःपाखें सम्मानित साहित्यकार नारद बज्राचार्यं थन नेवाः स्वायत्त राज्य धकाः हालाजूपिं गुलिखे न्ह्यलुवाःतयसं थः कायम्ह्याययात विदेशय् छ्वयेगु अवस्थां हे नेवाः आन्दोलन सफल मजुयाच्वंगु धयादिल । न्ह्यलुवाःतयसं नेवाः आन्दोलनय् ल्यायम्ह पुस्तायात सालेगुपाखे बिचाः यायेमाःगु बज्राचार्यं धयादिल ।
दान्यहिरा सिरपाःपाखें सम्मानित साहित्यकार, उपन्यासकार मथुरा सायमिं न्हापा न्हापा द्वःछिपाः सफू पिकायेगु यानाच्वनागुलिइ आः वयाः ५सःपाः जक पिकायेगु यानागु खँ कनादिल । साहित्यया ब्वँमि झं झं पाः जुयावंगुलिं न्हूपिं पाठक गुकथं सालेगु धकाः गम्भीर जुयाः बिचाः यायेगु अवस्था वःगु सायमिया धापू खः ।
अथे हे दान्यहिरा विज्ञान प्रविधि सिरपाः त्याकादीम्ह वैज्ञानिक रमेशमान सिंहं थम्हं सितिं वनाच्वंगु घाँय्, सिमाया हः आदिं वैकल्पिक उर्जा कथं व्रिकेटया विकास यानागु खँ कँसें थथे हे सितिं वनाच्वंगु ज्वलंयात हाकनं छ्यलाः नं झीसं इन्धनप्रतिया परनिर्भरता चीके फइगु बिचाः तयादिल ।
थुगु बुखँ नं ब्वनादिसँ
प्रचार प्रसारया अभावय् ने.सं. छ्यलेमफुत
लहनान्यूज सम्वाददाता | कौलागा नवमि ११३६ (अक्टोबर २४ २०१६)
नेपाःया हे गौरव खयाः नं प्रचार प्रसारया अभावं यानाः थम्हं यक्व कुतः यानागु खःसां नेपाल सम्वतयात व्यवहारीक रुपं छ्यले मफूगु प्रधानमन्त्री पुष्पकमल दाहालं धयादीगु दु ।
नायः भीमसेनदास प्रधानया नेतृत्वय् थःत नापलाःवःगु न्हूदँ राष्ट्रिय समारोह समितिया प्रतिनिधि मण्डलयात प्रधानमन्त्री दाहालं देययात हे त्यासा मुक्त दयेकूगु घटनावलिलिसे स्वानाच्वंगु नेपाल सम्वत नेवाःया जक मखु देयया हे गौरव खः धयादिल । देयया नामं स्वनातःगु सम्वतयात सकल नेपाःमिया गौरव तायेकाः थम्हं राष्ट्रिय सम्वत घोषणा यानागु खःसां प्रचार प्रसारया हे अभावं व्यवहारय् छ्यलेत थाकूगु दाहालं धयादिल ।
नेवाःतयसं जक प्रचार यानाच्वंगु व न्हूदँ न्यायेका वयाच्वंगुलिं थौंकन्हय् नेपाल सम्वत नेवाःतयगु थें जक खने दयाच्वंगु धासें प्रम दाहालं आः थुकियात व्यवस्थित रुपं प्रचार प्रसार याना वनेमाःगु धयादिल । थःगु न्हापाया कार्यकालय् सुयागुं दवाव वा प्रभावं मखसें थम्हं अध्ययन यानाः हे नेपाल सम्वतयात राष्ट्रिय सम्वत घोषणा यानागु दाहालया धापू खः ।
न्हूदँ राष्ट्रिय समारोह समितिया नायः भीमसेनदास प्रधानं धाःसा राज्यं राष्ट्रिय सम्वत घोषणा याःसां सरकारी स्तरं हे व्यवहारय् मछ्यलाच्वंगु खँ तयादिल । लिसें नायः प्रधानं समितिपाखें नेपाल सम्वतयात बैंकया चेकय् छ्यले दयेमाःगु, नोटय् छ्यलेमाःगु, नेपाल सम्वत अध्ययन प्रतिष्ठान दयेकाः थुकिया अध्ययन न्ह्याकेमाःगु, राष्ट्रिय विभूति शंखधर साख्वाःया व नेपाल सम्वतया विषय पाठ्यक्रमय् दुथ्याकेमाःगु, नेपाल सम्वत न्हूदँ राज्य स्तरं हनेमाःगु, कोषया व्यवस्था यायेमाःगु लिसेंया माग दुथ्याःगु ज्ञापनपौ प्रम दाहालयात लःल्हानाद्यूगु खः ।
प्रम दाहालयात नापलायेत थौं प्रधानमन्त्री ज्याकू, सिंहदरवारय् न्हूदँ राष्ट्रिय समारोह समितिया नायः प्रधान, दुजःपिंलिसें सल्लाहकारपिं लक्ष्मीदास मानन्धर, डा.रत्नकमल वैद्य, पूर्वमन्त्रीपिं कृष्णगोपाल श्रेष्ठ, राजेन्द्र महर्जन, दिलिप महर्जन लिसेंया पुचः थ्यंगु खः ।
