Display Style:
Column Style
पहिचानया स्थापना व भ्रष्टाचार विरुद्ध संघीय गठबन्धनया शान्तिपूर्ण धर्ना
लहना संवाददाता | ने.सं. ११३९ बछलागा अष्टमि (२७ मे, २०१९), सोमबाः
येँ / पहिचानया स्थापना भ्रष्टाचार विरुद्धया थीथी माग तयाः ‘पहिचानमा आधारित संघीय गठबन्धन’पाखें म्हिगः आइतवाःनिसें न्हूबानेश्वरय् छवाःया शान्तिपूर्ण धर्ना च्वंगु दु ।
विशेष यानाः प्रदेशया नामाकरण याय्गु इलय् पहिचानया आधारय् नेवाः, ताम्सालिङ, शेर्पा, लिम्बुवान, किरात÷खम्बुवान, मधेश व दलित शिल्पीया गैर भौगोलिक प्रदेश घोषणा, गण्डक, कर्णाली व सुदूरपश्चिम खारेज यानाः छसिकथं तमुवान–मगरात, थरुहट व खसान नां तय्माःगु, स्वनिगलय् जुयाच्वंगु नेवाःतय्गु भूमि, भाषा व सम्पदाय् जुयाच्वंगु दमन व अतिक्रमण बन्द याय्त माग याःगु दु ।
गठबन्धनपाखें नेपाः राष्ट्रिय पार्टीपाखें डा. विजय सैंजु, नेवाः राजनैतिक अभियानपाखें श्रीकृष्ण मानन्धर, नेपाल साँस्कृतिक पुनःजागरण अभियानपाखें असोज महर्जन, खशान राष्ट्रिय संघर्ष समितिपाखें प्रेम बहादुर खाती, आदिवासी जनजाति पार्टी, नेपाल सम्बद्ध तामाङसालिङ–नेवाः संघर्ष समितिपाखें बुद्धराज तामाङलिसें संघीय लोकतान्त्रिक राष्ट्रिय मञ्चय् आबद्ध थीथी संघसंस्थापाखें ल्हाःचिं तयाः पिथनातःगु वक्तब्यय् संविधान संशोधन यानाः १० प्लस १ प्रान्त कायम याय्माःगु, माननीय सांसद रेशम चौधरीयात तत्काल त्वःतेमाःगुलिसें स्वनिगलय् अप्वया वनाच्वंगु जनसंख्याया चाप नियन्त्रण यासें अब्यवस्थित शहर विकास व न्हूगु शहर दय्केमाःगु माग यानातःगु दु ।
थौंकन्ह्य लय् पौया बुदिं हन
नृपेन्द्रलाल श्रेष्ठ | बछलागा षष्ठी ११३९ (मे २५ २०१९)
नेपालभाषाया लय् पौ थौंकन्हेया ६९दँ बुदिं क्यगु लसताय् छगु ज्याझ्वः यासे थी थी भाषासेवीपिन्त सिरपाः नाप ग्वाहालियापिन्त हने ज्या याःगु दु ।
थौं प्रज्ञा भवनय् जूगु छगू जयाझ्वलय् येँ महानगरपालिकाया मेयर विद्यासुन्दर शाक्यं प्रयागमान लुमन्ति नेपालभाषा सिरपाः समालोचक पूर्ण ताम्राकारयात व रेवतिरमणानन्द लुमन्ति
नेपालभाषा सिरपाः कवि पुष्परत्न तुलाधरयात लःल्हानादिगु खः । वय्कःपिन्त सिरपाःया दाता लुमिन श्रेष्ठं म्हतिं झिद्वः तका नगद नं लःल्हानादिगु खः । दिपंकरमुनि ताम्राकार, मोतिलाल शिल्पकार व सुरेन्द्र भक्त श्रेष्ठयात न हनादिगु खः ।
अथेहे उगु हे ज्याझ्वलय् थौंकन्हेया सम्पादक व प्रकाशक रुक्मिणी श्रेष्ठं च्वयादीगु सफूया नसात्वँसा वासः नं खः नांगु सफूया उलेज्या मेयर शाक्य व समाजसेवी पंचवीरसिं तुलाधरं यानादिगु खः ।
उगु ज्याझ्वल मूपाहाँ मेयर शाक्य, पुष्परत्न चित्रकार समाजसेवी पंचवीरसिं तुलाधर, पिन्स थौं कन्ह्य लय् पौ यात भिंतुना बियादिगु खः ।
थौंकन्हेया सम्पादक व प्रकाशक रुक्मिणी श्रेष्ठया सभाधक्ष्यताय् जुगु उगु ज्याझ्वः प्रा.प्रेमहिरा तुलाधर न्ह्याकादिगु खःसा सुभाय् तिलकप्रकाश कायश्थ बियादिगु खः ।
निक्वःगु पटक पत्रकार कल्पना महर्जन सगरमाथाय् थ्यन
लहनान्युज | बछलागा षष्ठी ११३९ (मे २५ २०१९)
सरगमाथा आरोही पत्रकार कल्पना महर्जनं सर्वोच्च शिखर सगरमाथाया निगुलिं मोहडां सफल आरोहण यायेत ताःलागु दु । उत्तरी मोहडां २०७६ जेष्ठ ९ गते बिहीबाः सुथसिया १० बजे जुया २० मिनेटय् सफल आरोहण यायेत ताःलागु खः ।
पत्रकार महर्जनं दक्षिण मोहोडां २० मे २०१८ अर्थात २०७५ जेठ ९ गते न्हापां सगरमाथाया सफल आरोहण याःगु खःसा उत्तर मोहडां २३ मे २०१९ स सफल आरोहण यानाः किर्तीमानी तकं तयेत सफल जूगु दु ।
थुगु दँय् पत्रकार महर्जनं शिक्षाया माध्यमं बालविवाह रोकथाम अभियान( २०१९ या नारा ज्वना चीनया ल्हासापाखें २०७५ चैत्र २८ गते प्रस्थान याःम्ह मय्जुं ४३ न्हूया दिनय् निक्वःगु खुसिइ पलाः तयेत ताः लाःगु खः ।
यल महानगरपालिका स्थापनाया १०० दँया लसताय् व संस्कृतिविद् सत्यमोहन जोशीया १०० दँया बुन्हिया लसताय् महर्जनं यल महानगरपालिकाया नां, लोगो व जोशीया किपाः दूगु ध्वाँय् सगरमाथाया च्वकाय् ब्वयेकेगु ग्वसाःयात नं सफल याःगु दु ।
मदुम्ह ज्यापु महागुथिया पुलांम्ह नायः विपेन्द्र महर्जनया बिचाः मुँज्या
लहनान्युज | ने.सं. ११३९ बछलागा षष्ठि (२५ मे, २०१९), सञ्चरवाः
ज्यापु महागुथि नेपाःया संरक्षक, संस्थापकलिसें पुलांम्ह नायः, बौद्ध विद्वान, नेवाः समाजया अन्वेषक, संस्कृतिविद् विपेन्द्र प्रकाश महर्जन मदुगु दुःखय् थौं सञ्चरवाः बिचाः मुँज्या जुल ।
ज्यापु महागुथि, नेपाःया ग्वसालय् जूगु उगु विचाः मुँज्या ज्याझ्वलय् नेवाः न्ह्यलुवा मल्ल के. सुन्दर, प्रतिनिधिसभाया दुजः कृष्णगोपाल श्रेष्ठ, पुलांम्ह राज्यमन्त्री दिलीप महर्जन, येँ महानगरपालिकाया प्रमुख विद्यासुन्दर शाक्य, प्रदेशसभाया दुजः जीवन डंगोल, नेवाः देय् दबूया नायः नरेश ताम्रकार, नेवाः राष्ट्रिय मुक्ति मोर्चाया नायः पवनमान श्रेष्ठ, महागुथि बहुउद्देश्यीय सहकारी संस्थाया कार्यावाहक नायः मचाराजा महर्जन, राजभाइ ज्यापु आदिपिन्सं मदुम्ह विपेन्द्र प्रकाश महर्जनया ब्यक्तित्वयात कयाः संस्मरण यानादीगु खः । लिसें धर्मगुप्त महास्थविरपाखें गुणास्नुमरण व मरणानुस्मरण पाठ याना बिज्याःगुु खः ।
ज्यापु महागुथिया नायः लोककवि राजभाई जकःमिया सभाध्यक्षताय् न्ह्याःगु उगु ज्याझ्वलय् मदुम्ह महर्जनं च्वयादीगु थीथी अनुसन्धानमूलक च्वसूयात मुंकाः सफूया रुपय् नेपालभाषाया नापनापं खस नेपाली भासं पिथनेमाःगु बिचाः तयादीगु खः ।
मदुम्ह महर्जनया किपातय् स्वां देछाय्गु नापं छगू मिनेटतक मौनधारण यानाः श्रद्धाञ्जली देछाय्गु ज्या जूगु उगु ज्याझ्वलय् थीथी ख्यःया व्यक्तित्वपिं व थीथी खलः पुचः संघसंस्थाया प्रतिनिधिपिनिगु उपस्थिति दुगु खः ।
विपेन्द्र महर्जन वंगु जेठ १ गते बुधवाः ८३ दँया उमेरय् मदुगु खः ।
सगरमाथाया जाः खुलालिपि सार्वजनिक जुइगु
ने.सं. ११३९ बछलागा षष्ठि (२४ मे, २०१९), शुक्रवाः
हलिमय् दकलय् तःजाःगु च्वापुगुँ सगरमाथाया वास्तविक जाः खुलाया दुने सार्वजनिक यायेगु सरकारया तयारी जुयाच्वंगु दु ।
भूमि व्यवस्था, सहकारी तथा गरिबी निवारण मन्त्री पद्माकुमारी अर्यालं सगरमाथाया जाः नापे यायेगु नितिं च्वकाय् थ्यंकाः लिहांवःगु पुचःयात लसकुस यानादिसें ऐतिहासिक सफलता प्राप्त जूगु धयादिल ।
वि.सं. २०७२सालया विनाशकारी भुखाचं सगरमाथाया जाः थाहाँकुहाँ जूगु खँ पिहांवःगु खँयात ध्यानय् तयाः नापी विभागं थःगु हे श्रोत साधनया ग्वाहालिं जाः नापे यायेगु ज्या न्ह्याकूगु खः ।
नापी विभागया प्रमुख नापी अधिकृत खिमलाल गौतमया संयोजकत्वय् प्यम्हेसिगु पुचलं वंगु जेष्ठ ८ गते सर्बोच्च शिखर सगरमाथाया सफल आरोहण याःगु खः । संयोजक गौतमलिसें नापी अधिकृत रविन कार्की, विभागया नापी अमिन सर्वेक्षक युवराज धिताल, सर्वेक्षक सुरज सिंहया पुचलं बैशाख २८ गतेनिसें सगरमाथाया आरोहण यात्रा न्ह्याकूगु खः । उगु पुचः थ्यंमथ्यं निघौतक च्वकाय् हे च्वनाच्वंगु खः । उगु पुचलं १घौ व २०गू मिनेटतक जि.एन.एस. व जि.पी.एस जडान यानाः सर्वेक्षण याःगु खः ।
सगरमाथाया वास्तविक तथ्याङ्क मुंकेगु ज्या जुइधुंकूगु व मेमेगु स्थलगत सर्वेक्षणपाखें तथ्याङ्क वयाच्वंगुलिं फुक्क तथ्याङ्क वयेधुंकाः थुकिया वास्तविक जाः सार्वजनिक यायेगु विभागया तयारी दु ।
