Display Style:
Column Style
मल्ल के. सुन्दरया ‘शंखधर’ पिदन
लहनान्युज | कौलागा त्रयोदशी ११३७ (अक्टुवर १७ २०१७)
नेवाः न्ह्यलुवाः मल्ल के. सुन्दरं च्वयादीगु ‘शंखधर’या छगू आख्यानात्मक परिकल्पना उपन्यास पिदगु दु ।
नेवाः जागरण मञ्चया ग्वसालय् जुगु थौं छगु ज्याझ्वः दथुइ मूपाहाँ वाङमय शताब्दी पुरुष डा. सत्यमोहन जोशीं बिमोचन यानादीगु दु ।
थौंया उगु ज्याझ्वलय् पाहाँ कथं नेपाल संवत राष्ट्रिय न्हूदँ समारोह समितिया नायः चित्तरञ्जन नेपाली, जनकवि दुर्गालाल श्रेष्ठ, नेवाः न्ह्यलुवाः नेपाल संवत आन्दोलनया न्हयलुवा पद्मरत्न तुलाधर, नेवाः न्ह्यलुवाः लक्ष्मीदास मानन्धर झयादीगु खः ।
दान्यहिरा सिरपा लःल्हात
लहनान्युज | कौलागा एकादशी ११३७ (अक्टुवर १५ २०१७)
संगीत ख्यलय् न्हापा छम्ह छम्हेसित बिया वया च्वंगु दान्यहिरा सिरपा थूगुसी निसें संगीतया स्वंगुलिं बिधा संगीतकार, गीतकार व म्येहालामियात बिइगु याःगु खःसा थूगुसी गीतकार काजीराज शाक्य , संगीतकार बिरेन शाक्य व म्येहालामि ईश्वर अमात्ययात थ्व सिरपा लःल्हागु खः । म्हतिं झिंन्हय्द्वतकाया थ्व सिरपा दाता यज्ञरत्न धाख्वाः खः ।
अथेहे संगीत साधक भिमबहादुर नकःमियात थूगुसीया दान्यहिरा जीवंकाछी सिरपा लःल्हागु दु । न्यय्द्वतका व हनापौ नापंया थ्व सिरपा मूपाहाँ कथं झायादीम्ह नेपालभाषा एकेडेमीया संरक्षक वाङ्गमय शताब्दी पुरुष डा. सत्यमोहन जोशीं लःल्हानादीगु खः ।
नेपालभाषा एकेडेमीया ग्वसालय् झिंप्यदँ न्ह्यवं निसें नियमित रुपं बियावया च्वंगु नेपालभाषाया साहित्य व संगीत ख्यःया छगु प्रतिष्ठित सिरपा कथं कया तःगु दान्यहिरा सिरपा ज्याझ्वः थौं
आइतबार यलय् क्वचाःगु दु ।
निदँय् छक्वः साहित्य व वाङ्गमय ख्यः व छगु दँय् संगीत ख्यःयात थ्व सिरपा बिइगु याना वया च्वंगु खःसा थूगुसी संगीत ख्यःया पाः कथं संगीत ख्यलय् थःगु जीवन अर्पण यानादीम्ह एकेडेमीया चान्सलर चित्तरञ्जन नेपालीया सभानायसुइ जूगु थौंया ज्याझ्वलय्् एकेडेमीया सदस्य सचिव मल्ल के सुन्दरं लसकुस न्वचु तयादीगु खःसा एकेडेमीया प्राज्ञ दुजः विजयरत्न असंबरे दान्यहिरा सिरपा न्हूगु प्रावधानयाबारे न्ववाना दीगु खः ।
थौंया ज्याझ्वलय् एकेडेमीया भाइस चान्सलर व दान्यहिरा सिरपाया दाता बाखं च्वमि यज्ञरत्न धाख्वाःया झिंनिगु बाखं सफू “हारां मैंचा” या पित ब्वज्या नं जूगु खःसा उगु सफूयात कया एकेडेमीया प्राज्ञ दुजः प्रा. प्रेमशान्ति तुलाधरं समालोचना यानादीगु खः ।
एकेडेमीया प्राज्ञ दुजः साहित्यकार शशीकला मानन्धरं न्ह्याकादीगु थुगु ज्याझ्वलय् लःल्हागु दक्वं हनापौ एकेडेमीया दाँभरीं डा. पुष्पराज राजकर्णिकारं ब्वना न्यंकादीगु खः ।
शताब्दी पुरुष डा. जोशीयात “लाइफटाइम एचिभमेण्ट” अवार्ड
लहनान्युज | कौलागा एकादशी ११३७ (अक्टुवर १५ २०१७)
मेत्तागारया न्हापांगु लाइफटाइम एचिभमेण्ट अवार्ड वाङ्गमय शताब्दी पुरुष डा. सत्यमोहन जोशीयात लःल्हाःगु दु । वय्कःयात दबुली हे ह्याउँ तपुलि, जामा व तासया वसतं पुंकाः कजि शान्तरत्न शाक्यं अवार्ड लःल्हानादीगु खः ।
अथेहे उगु ज्याझ्वलय् कवयित्री नाराणदेवी श्रेष्ठयात “पामिला” उपाधि व भिक्षु कोण्डन्य महास्थविरयात अग्रधर्मदेशक उपाधिं सम्मानित याःगु खः ।
नीन्याप्वाः बोधिमत च्याकाः उलेज्या यासें न्ह्याःगु उगु ज्याझ्वलय् निवर्तमान कुमारी माजु मतिना शाक्यया नं उपस्थिति दुगु खःसा ज्याझ्वलय् भृगुराम श्रेष्ठ, पूर्णबहादुर शाक्य व अन्नपूर्ण
ज्ञानमाला भजन खलःपाखें भजन न्ह्यब्वय्गु ज्या जूगु खः ।
ललितपुर उद्योग बाणिज्य संघया ६०० मतगणनाया लिच्वः
लहानान्युज | कौलागा दशमी ११३७ (अक्टुवर १४ २०१७)
ललितपुर उद्योग बाणिज्य संघया ९ः३० बजे तकया ६०० मतगणनाया लिच्वः थुकथं दु।
नायो सबिन श्रेष्ठ २८१, कृष्णलाल महर्जन ३०९
उद्योग समूहया कार्यसमिति दूजः या ९ः३० बजे तकया कुल ४१७ मतमध्ये ४०० मतगणनाया लिच्वः
सविन श्रेष्ठका प्यानल
कृष्ण श्रेष्ठ २५७, भूषण नाथ शर्मास् १९२, मिलन शाक्य २६१, श्रीजेश लाल शिल्पकार २१६, सजन श्रेष्ठ १९०, सुनील शाक्य (हान्ताई) २९६
कृष्णलाल महर्जन प्यानल
रमेश सिं महर्जन २४७, सुरेन्द्र अवाले २१५,सुसन महर्जन२६२, हरि सेन्चुरी वि.क. १५६
स्तन क्यान्सर विरुद्ध जनचेतनानितिं लच्छिया ज्याझ्वः घोषणा
राजेश बज्राचार्य | ने.सं. ११३७, कौलागा षष्ठी, (११ अक्टूबर, २०१७), यल
“स्तन क्यान्सरयात इलय हे पहिचान याना न्हंकेफई” धैगु नारासहित नेपाल क्यान्सर हस्पिटल एण्ड रिसर्च सेन्टर, हरिसिद्धिं पत्रकार सम्मेलनमार्फत लच्छियंकया थःगु जनचेतनामूलक ज्याझ्वःत पितब्वःगु दु ।
पत्रकार सम्मेलन यासें नेपाल क्यान्सर हस्पिटल एण्ड रिसर्च सेन्टरया नायो एवं कार्यकारी निर्देशक डा. सुदिप श्रेष्ठजुं स्तन क्यान्सर विरुद्ध जनचेतनामूलक ज्याझ्वःया लिच्व कथं इलय् हे क्यान्सर परीक्षण यायेगुक्रम उप्वयाच्वंगु सबल पक्षयात अझ थपुकेगु तातुनां लच्छिया ज्याझ्वः यायेत्यनागु जानकारी बियादिल । अस्पतालया अनुसन्धान केन्द्रपाखें जूगु अध्ययन प्रतिवेदन न्ह्यब्वसें वयेकल धयादिल, “न्हापा अस्पतालय् स्वंगूगु चरणय् थ्यंका वैपिं विरामी पिनिगु Tumor आकार ६.५ सेन्टिमिटर जुयाच्वंगु थासय थौकन्हे २ निसे ४ सेन्टिमिटर थ्यंगु दु । जनचेतनामूलक ज्याझ्वःया प्रभाव अझ उप्वयेका प्रारम्भिक चरणय् पहिचान यायेत ग्वाहाली जुइकथं लच्छियकंया ज्याझ्वः थुगुसी नं न्ह्याकागु खः।”
डा. श्रेष्ठं हरिसिद्धिस्थित नेपाल क्यान्सर अस्पतालय् मेमेगु अस्पतालसिबें उप्व विरामीपिनिगु सफल उपचार जूगु खनेदु धयादिल । सन २०१४य् २७०म्ह व २०१५य् १७३म्ह विरामीपिनिगु उपचार जुुगु न्ह्यथंसे वयेकलं धयादिल, “ल्वय् लंकेत ताःलापिं विरामीपिं सार्वजनिक रुपं न्ह्योने वया नेपालय् क्यान्सरया उपचार सम्भव दु धैगु ध्वाथुइके फःसा थुगु ल्वय् न्हापांगु चरणय् उपचार यायेगु सम्भावना उप्वइ ।” वयेकलं क्यान्सर ल्वय्दुपिं गरीवपिनित तकं समानकथं उच्चस्तरीय उपचारय् पहुँच दयेकेत राज्यपाखे १लख अनुदान मगागु धयादिसें हालया व्यवस्थाय् विपन्न नागरिकया परिचय पत्र व सार्वजनिक रुपं अस्पतालय् फोटो अनिवार्य तयेमाःगु व्यवस्थां विरामीया गोपनियताया अधिकार हनन जुयाच्वंगु बिचाः तयादिल ।
इलय् क्यान्सरया परीक्षण यायेगु प्रचलन उप्वकेत ग्वाहाली जुइकथं वयेकलं ताः ई निसें राज्यपाखें म्होतिइ नं १०लखया स्वास्थ्य विमाया नीति माःगुलिइ बः बिया च्वनादिइगु दु । अस्पतालपाखें मस्तयेत ल्वयया पहिचान व उपचारय् ग्वाहाली विइकेत कान्ति बाल अस्पताललिसे जाना दँय् ५०म्ह मस्तयेत निशुल्क परीक्षण व बायोप्सी व्यवस्था यायेत “प्रोजेक्ट सारथी” नं न्ह्याकाच्वंगु दु ।
निदँया तथ्यांक कथं थुगु अस्पतालय् स्तन क्यान्सरया दकसिबें उप्व विरामीपिनिगु उपचार जुगु खनेदुसा थन दूगु फ्रोजन शेक्सन लगायतया अत्याधुनिक प्रविधिं स्तन शल्यक्रिया नं देय्न्यंकया अस्पतालसिबे उप्व ३५ निसे ४० प्रतिशत खनेदु ।
पत्रकार सम्मेलनपाखें लच्छियंकया जनचेतनामूलक ज्याझ्वःत सार्वजनिक यासें नेपाल क्यान्सर हस्पिटलया डा. कपेन्द्र शेखर अमात्यजुं अन्तर्राष्ट्रिय तथ्यांकय् मेमेगु देशय् स्तन क्यान्सर ६०दँ लिपा जक उप्व खनेदु तर नेपालय् स्तन क्यान्सर दकले उप्व ४०दँ निसें ५०दँ या उमेर वर्गय दूगु न्ह्यथनादिल । “नेपाःया सन्दर्भय् थुगु उमेरय् पारिवारिक जिम्मेवारी व योजना दकसिवें उप्वइगु जुया उपचार खर्च गुलि उप्वइ उलि सामाजिक व पारिवारिक चिन्ता जुइगु स्वभाविक खः ।” वयेकलं धयादिल, “झीगु मंकाः कुतलं दयँदसं परीक्षणपाखें न्हापाँगु अवस्थाय् उपचार याकेत ताःलासा खर्च म्हो जुया पारिवारिक योजना नं पूवनी । थौंकन्हेया प्रविधिपाखें स्वपरीक्षणबाहेक मामोग्राम, अल्ट्रासाउण्डपाखें लुकुबिनाच्वंगु गिर्खातकं नं पहिचान जुइगुलिं ३०दँ वा वसिबे न्ह्यो परीक्षण यायेगु बाँलाइ ।”
छु दु लच्छिया ज्याझ्वःलय् ?
१४ अक्टोबर २०१७ (शनिबार)
स्तन क्यान्सर सम्बन्धि जनचेतनामूलक पदयात्रा (Walkathon) सुथसिया ७ः३० निसें ११ ताःइ तक, रुटः – येँ दरबार मार्ग निसें माइतिघर मण्डला ।
१६ अक्टोबर २०१७ (सोमबार)
स्तन क्यान्सरलिसे संघर्ष याना ल्वय् लंकुपिं विरामीपिनिगु भेला २०१७
(सुथसिया ९ ताः निसें न्हिनेसिया ४ ताःई तक, थायः नेपाल क्यान्सर हस्पिटल एण्ड रिसर्च सेन्टर परिसर, हरिसिद्घि, ललितपुर)
नारा “Keeping our Mothers and Sisters Cancer Free”
७, १४, २८ अक्टोबर २०१७ (शनिबार)
स्तन क्यान्सर सम्बन्धि निशुल्क परामर्श व ओपिडि सेवा: सुथसिया ९ ताः निसें प्रारम्भ, थाय्ः नेपाल क्यान्सर हस्पिटल, हरिसिद्धि, ललितपुर ।
११ र १२ अक्टोबर २०१७ (बुधबार व बिहिबार) Flash Mob
स्तन क्यानसरबारे जनचेतना ब्वलंकेत यल व येँ लायकूलिइ (बुधवाः), ख्वपःया लाय्कुइ (बिहिवाः) मंकाः दबू प्याखँ Flash Mob
अक्टोबर महिना निसें नोभेम्बर ८ तारिख २०१७ तक
स्तन क्यान्सर स्क्रिनिंग (Digital Mammography & Ultrasound) य् ५० प्रतिशत छुट ।
लच्छिया जनचेतनामूलक ज्याझ्वःसं रोटरी क्लव, सम्झना ल्यावोरेटोरी लगायत सामाजिक संस्थापिनिगु नं ग्वाहाली याइगु जूगु दु ।
क्यान्सर ल्वय् विरुद्ध सक्रिय सामाजिक अभियन्ता यल पूर्णचण्डीया रेजिना मुल्मीजुं क्यान्सर विरुद्ध “उपचारकालागि सहयोगी हात” संस्थापाखें थीथी ज्याझ्वःया संयोजन यानादिइगु दु । स्तन क्यान्सर ल्वय्यात त्याकादिइम्ह वयेकलं बुधवाः व बिहिवाःया Flash Mob नापं १६ तारिखया विरामी भेलासं सामाजिक परामर्शय् नं सक्रिय जुयादि । वयेकलं क्यान्सर रेजिष्ट्री अभिलेखिकरणमार्फत स्वास्थ्यसम्बन्धि तथ्यपरक अवस्था सार्वजनिकिकरणलिसें गुलि न्हापां ल्वय पहिचान यायेफै उलि हे खर्च नं म्होः जुइगुबारे सर्वसाधारणयात थुइकेत जनचेतनामूलक ज्याझ्वःया प्रचार प्रसार गाँगामय् थ्यंकेत संचारक्षेत्रयात अपिल यानादिल ।
अक्टूबर महिनायात अन्तर्राष्ट्रिय स्तन क्यान्सर विरुद्ध जनचेतना ब्वलंकेत हलिन्यंक थीथी गतिविधी न्ह्याइ । नेपालय् थुगुकथंया व्यवहारिक जनचेतना ज्याझ्वः सरकारी अस्पताल व राज्यपाखें प्रभावकारी जूगु खनेमदु अवस्थाय् नीजि क्षेत्रया अस्पतालपाखें न्ह्याःगु थुजोगु ज्याझ्वःयात च्वछाय्मागु खनेदु ।
