Display Style:
Column Style
नागरिकया नैसर्गिक अधिकारया सम्मान व संरक्षण यायेत मानव अधिकार आयोगया इनाप
लहनान्युज | ने.सं. ११३९ बछलागा अष्टमि (२७ मे, २०१९), सोमबाः
राष्ट्रिय मानव अधिकार आयोगं ग्याचिकु मदुगु लकसय् म्वाय् दइगु नागरिकया अधिकार संरक्षण यायेत सरकारयात इनाप याःगु दु ।
येँलिसें देशया थीथी थासय् म्हिगः व थौं जूगु विष्फोट, आगजनी व तोडफोडया घटनापाखें जूगु धनजनया क्षतियात कयाः थःपिनिगु गम्भीर ध्यानाकर्षण जूगु न्ह्यथसें आयोगं स्वतन्त्र व निर्भयपूर्वक वये वनेदइगु लकस दयेकेत सरोकारवालाया ध्यानाकर्षण याकूगु दु ।
आयोगं थौं सोमबाः विज्ञप्ति पिथसें देशया थीथी थासय् लूगु विष्फोटक पदार्थया हुनिं नागरिकयाके ग्याचिकुंया लकस ब्वलनाः स्वतन्त्र व निर्भयपूर्वक वये वनेत थाकुयाच्वंगु नं न्ह्यथनातःगु दु । नापं विप्लव पुचलं याःगु बन्दं जनजीवन झन्झन् थाकुया वनाच्वंगु न्ह्यथसें आयोगं थ्वपाखें मानवाधिकारया विश्वव्यापी घोषणापौ, नागरिक नापं राजनीतिक अधिकार सम्बन्धि अन्तर्राष्ट्रिय अनुबन्ध, अन्तर्राष्ट्रिय महासन्धि व नेपाःया संविधानय् न्ह्यथनातःगु सम्मानपूर्वक म्वायेदइगु नागरिकया अधिकार उल्लघंन जूगु ठहर याःगु दु ।
छुं नं विमति, द्वन्द्व वा संघर्षया स्थितियात संवाद व सहलहपाखें ज्यंकेफइगु धासें आयोगं बन्द निषेध व हिंसायात पूवंक हे वर्जित यानाः शान्तिपूर्ण लकसय् म्वाये दइगु नागरिकया नैसर्गिक अधिकारया सम्मान व संरक्षण यायेत सम्बन्धित पक्षयात इनाप याःगु दु ।
नापं बम विष्फोटय् लानाः सीपिनिगु छेँजःपिन्त पाय्छिकथंया राहत बीत, घाःपाः जूपिनिगु निःशुल्क व प्रभावकारी वासःया व्यवस्था यायेत व क्षति जूगु सम्पत्तिया मूल्यांकन यानाः राहत नापं क्षतिपूर्ति बीत तकं आयोगं सरकारयात इनाप याःगु दु ।
चिकित्सालययात पूवंक हे डिजिटलाइज याइगु
लहनान्युज | बछलागा नवमी ११३९ (मे २७ २०१९)
छत्रपाटी निःशुल्क चिकित्सालय व सयपत्री टेक्नोलोजी दथुइ चिकित्सालययात पूवंक हे डिजिटलाइज याय्गु विषयस सहमति जूगु दु ।
चिकित्सालयस थौंकन्हय् न्ह्यानाच्वंगु आइ.टी. व्यवस्थायात विस्तार यानाः पूवंक हे डिजिटलाइज याय्त्यंगु खः । थुगु सम्झौता कथं सफ्टवेयर, तालिम आदि यानाः मुक्कं ५८ गू लखतका चिकित्सालययात ग्वाहालि याःगु दु ।
सम्झौताय् चिकित्सालयपाखें नायः विजयबहादुर माली व ग्वाहालि याइगु संस्थापाखें श्याम सुन्दर शर्मां ल्हाःचिं तयादीगु खः । सम्झौता कथं न्यान्हु लिपा हे न्यागू लखतका बराबरया हार्डवेयर श्यामसुन्दर शर्मां नयाः मालीयात लःल्हानादीगु खः ।
मदुम्ह ज्यापु महागुथिया पुलांम्ह नायः विपेन्द्रया बिचाः मुँज्या
लहनान्युज | बछलागा नवमी ११३९ (मे २७ २०१९)
ज्यापु महागुथि नेपाःया संरक्षक, संस्थापकलिसें पुलांम्ह नायः, बौद्ध विद्वान, नेवाः समाजया अन्वेषक, संस्कृतिविद् विपेन्द्र प्रकाश महर्जन मदुगु दुःखय् थौं सञ्चरवाः बिचाः मुँज्या जुल ।
ज्यापु महागुथि, नेपाःया ग्वसालय् जूगु उगु विचाः मुँज्या ज्याझ्वलय् नेवाः न्ह्यलुवा मल्ल के. सुन्दर, प्रतिनिधिसभाया दुजः कृष्णगोपाल श्रेष्ठ, पुलांम्ह राज्यमन्त्री दिलीप महर्जन, येँ महानगरपालिकाया प्रमुख विद्यासुन्दर शाक्य, प्रदेशसभाया दुजः जीवन डंगोल, नेवाः देय् दबूया नायः नरेश ताम्रकार, नेवाः राष्ट्रिय मुक्ति मोर्चाया नायः पवनमान श्रेष्ठ, महागुथि बहुउद्देश्यीय सहकारी संस्थाया कार्यावाहक नायः मचाराजा महर्जन, राजभाइ ज्यापु आदिपिन्सं मदुम्ह विपेन्द्र प्रकाश महर्जनया ब्यक्तित्वयात कयाः संस्मरण यानादीगु खः । लिसें धर्मगुप्त महास्थविरपाखें गुणास्नुमरण व मरणानुस्मरण पाठ याना बिज्याःगु खः ।
ज्यापु महागुथिया नायः लोककवि राजभाई जकःमिया सभाध्यक्षताय् न्ह्याःगु उगु ज्याझ्वलय् मदुम्ह महर्जनं च्वयादीगु थीथी अनुसन्धानमूलक च्वसूयात मुंकाः सफूया रुपय् नेपालभाषाया नापनापं खस नेपाली भासं पिथनेमाःगु बिचाः तयादीगु खः ।
मदुम्ह महर्जनया किपातय् स्वां देछाय्गु नापं छगू मिनेटतक मौनधारण यानाः श्रद्धाञ्जली देछाय्गु ज्या जूगु उगु ज्याझ्वलय् थीथी ख्यःया व्यक्तित्वपिं व थीथी खलः पुचः संघसंस्थाया प्रतिनिधिपिनिगु उपस्थिति दुगु खः ।
विपेन्द्र महर्जन वंगु जेठ १ गते बुधवाः ८३ दँया उमेरय् मदुगु खः ।
किपू नगरपालिकापाखें प्रगति विवरण न्ह्यब्वल
नृपेन्द्रलाल श्रेष्ठ | बछलागा नवमी ११३९ (मे २७ २०१९)
किपू नगरपालिकां छगू पत्रकार सम्मेलनयासें बैसाख महिनाय् जूुगु ज्याया प्रगति बिवरण न्ह्यब्बःगु दु ।
किपू नगरपालिकाया उप–मेयर नाप प्रबक्ता सरस्वती रिजाल खड्कां किपू नगरया गौरव योजनाकथं चम्पादेवी केबुलकार याकनं हे निर्माण जुइगु धयादीगु दु ।
छु न्ह्य जक नमूनाकथं याःगु प्लाष्टिकया पिचयात कयाः नं जानकारी बियादीगु खः ।
बैसाख दुने जक किपुलि ३७६म्हेसिया प्रधानमन्त्री रोजगार कार्यक्रमया नितिं आवेदन वःगु न जानकारी बियादीगु खः । थुगु ज्याझ्वःया नितिं ३९गू लख तका वय्धुंकूगु नं उगु पत्रकार सम्मेलनय् कनादीगु खः। याकनं हे युवा सम्मेलन याय्गु ग्वसाः दुगु नं जानकारी बियादिल ।
दफ्तर क्लब भवनया शिलान्यास
लहनान्युज | बछलागा नवमी ११३९ (मे २७ २०१९)
येँ महानगरपालिका वडा नं. २३य् च्वंगु दफ्तर क्लब भवन पुनःनिर्माणया नितिं वंगु शुक्रवाः शिलान्यास जूगु दु । प्रतिनिधिसभाया दुजः जीवनराम श्रेष्ठ व वडाध्यक्ष मचाराजा महर्जनं मंकाःकथं उगु भवनया शिलान्यास यानादीगु खः ।
थ्यंमथ्यं ११गू लख ७५द्वः तका तुइगु निगू तल्लाया भवन दय्केगु नितिं स्थानीय पूर्वाधार विकास कार्यक्रम अन्तर्गत सांसद श्रेष्ठया संसद विकास कोषपाखें धेबा बीगु जूगु दु ।
क्लबया नायः राकेश शाहीं भवन पुनःनिर्माण जुइधुंकाः सामाजिक, स्वास्थ्य, भाषा, कला व साँस्कृतिक ज्याझ्वःयात न्ह्यःने यंकेगु धयादिल । ज्याझ्वलय् प्रतिनिधिसभाया दुजः जीवनराम श्रेष्ठ व वडाध्यक्ष मचाराजा महर्जन नं थःथःगु नु्गःखँ तयादीगु खः ।
