शाक्य महाविहार संघया स्वक्वःगु तःमुन्ज्यां श्रीघः श्रीशान्तिघट बज्रधातु चैत्य महाविहारया शुभकाजी शाक्ययात हाकनं छक्वः नायः ल्यःगु दु।

उगु संघया गुक्वःगु साधारण सभा व स्वक्वःगु तःमुन्ज्यापाखें शुभकाजी शाक्य लगायतया कार्यसमितिया पदाधिकारी व दुजःपिं सर्वसम्मत प्रक्रियां ल्यज्या जूगु खँया घोषणा संघया कानूनी सल्लाहकार ज्ञानरत्न शाक्यं घोषणा यानादीगु खः।

उगु कार्यसमितिइ न्वकू निम्ह अमीरमान शाक्य व गौतमरत्न शाक्य, मूछ्याञ्जे संघरत्न शाक्य, छ्याञ्जे राजेश शाक्य, दांभरी चैतन्यराज शाक्य, ल्यू दाभरी दीलिपरत्न शाक्ययात सर्वसम्मतं ल्यःगु खः। अथेहेतुं दुजः पदय् आनन्दरत्न शाक्य, चन्द्रलोक शाक्य, लेखरत्न शाक्य, मणिकर शाक्य, रोशन बहादुर शाक्य, विजयरत्न शाक्य असंबरे, सुरेश शाक्य, अनित बहादुर शाक्यं, तिर्थरत्न शाक्य, सुजेन्द्र शाक्य, दुर्गादेवी शाक्य, अमिरमैंया शाक्ययात नं सर्वसम्मत प्रक्रियां ल्यःगु खः।

शनिवाः छत्रपाटी पार्टी प्यालेसय् जूगुु शाक्य महाविहार संघया स्वक्वःगु तःमुँज्या व गुक्वःगु दँ मुँज्या ज्याझ्वलय् शाक्यवंश व झिगू शाक्य महाविहारया संक्षिप्त इतिहास शीर्षकया सफू विमोचन व झिगु शाक्य महाविहारया मू थायपा ९६ दँया पुष्परत्न शाक्यजुयात धु््रवतारा सम्मान नं लःल्हायेगु ज्या जूगु खः।

उगु ज्याझ्वलय् संघया मूछ्याञ्जे संघरत्न शाक्यं च्वयादीगु खस नेपाली भायया “शाक्यवंश र दश महाविहारको संक्षिप्त इतिहास” सफू व उकियात देवकाजी शाक्यं अंग्रेजी भासं भाय् हिलादीगु “शर्ट हिस्टोरिकल बाएकग्राउण्ड अफ डाइनास्टि एण्ड टेन शाक्यज बहाः” सफूया नं पितब्वज्या जूगु खः।

युक्रेनया राष्ट्रपति भोलोदिमिर जेलेन्स्कीं अमेरिकालिसे खनिज सम्झौता यायेत युक्रेन तयार जूगु धयादीगु दु।

बेलायतय् युरोपेली नेतालिसे शिखर वार्ता लिपा जेलेन्स्कीं अमेरिकालिसे दुर्लभ पृथ्वी सम्बन्धी सम्झौता यायेत तयार जूगु धाःगु दु।सम्मेलनय् बेलायती प्रधानमन्त्री केयर स्टार्मरं युक्रेनय् शान्तिया ग्यारेन्टीया निंतिं प्यंगू चरणया योजना न्ह्यब्वये धुंकाः जेलेन्स्कीया थुज्वःगु प्रतिक्रिया वःगु खः।स्टार्मरं फ्रान्स व मेमेगु छुं युरोपेली देय्लिसे जाना युक्रेन युद्धविरामया प्रस्ताव तयार यायेगु धाःगु दु। वय्कलं थ्व प्रस्ताव अमेरिकाया राष्ट्रपति डोनाल्ड ट्रम्पया न्ह्यःने न्ह्यब्वयेगु धयादीगु बीबीसीं न्ह्यथंगु दु।

ह्वाइट हाउसय् जूगु विवादास्पद वार्ता लिपा बेलायती प्रधानमन्त्री स्टार्मरं युक्रेन युद्धया बारे सहलह यायेत व युक्रेनयात सुरक्षा ग्यारेन्टी बीगु निंतिं युरोपेली देय् व क्यानाडाया नेतातय्गु बैठक सःतूगु खः।इटाली, फ्रान्स, जर्मनी, क्यानाडाया राष्ट्र प्रमुख तय्सं उगु बैठकय् ब्वति काःगु खः।

अथे हे नेदरल्याण्ड्स, डेनमार्क, नर्वे, पोल्याण्ड, स्पेन, फिनल्याण्ड, स्वीडेन, चेक गणराज्य, रोमानियाया नेतातय्सं नं ब्वति काःगु खः। पोल्याण्डया प्रधानमन्त्री डोनाल्ड टस्कं बैठकयात सम्बोधन यासें युरोप जागृत जूगु धाःगु दु।अथेहे बेलायत व युक्रेन दथुइ डेढ अर्ब पाउण्ड बराबरया त्यासा सम्झौता जूगु दु। युक्रेनं थ्व ध्यबां सैनिक हलंज्वलं न्यायेत छ्यलेगु खँ धाःगु दु।

थ्व स्वया न्ह्यः वंगु शुक्रवाः  युक्रेनया राष्ट्रपति जेलेन्स्की व अमेरिकाया राष्ट्रपति ट्रम्प दथुइ तच्वःगु ल्वापू जुइवं रुसलिसे शान्ति सम्झौता व खनिज सम्झौताया बैठक विना निष्कर्ष क्वचाःगु खः।

नेकपा एमालेया पार्टीे प्रचार लिसे प्रकाशन विभागया सचिवय् गणेश पाण्डेयात मनोनयन यायेगु निर्णय जूगु दु।

विभागया सचिव गगन विष्ट सूचना आयोगया सदस्य नियुक्त जुइवं उगु पद खाली जूगु खः।पाण्डे आः.पार्टी निकट पत्रकार संगठन प्रेस चौतारीया उपाध्यक्ष खः।

पाण्डेयात प्रचार विभागया सचिवय् मनोनयन याःगु धका महासचिव शंकर पोखरेलं जानकारी बियादीगु खः। आइतवाः च्वंगु सचिवालय बैठकय् खाली जूगु विभागया सदस्य पूर्णता बिइगु कार्यसूचीइ दुगु खः।

कोशी प्रदेशया मुख्यमन्त्री हिक्मतकुमार कार्कीं प्रदेशय् मैथली र लिम्बू भाय्यात प्रदेश सरकारया कामकाजया भाय् दयेकेगु खँय् सरकार गम्भीर दूगु धयादीगु दु।

सार्वजनिक सेवा प्रसारण सेवा नेपाल, रेडियो नेपालपाखें थौं थन ग्वसाः ग्वःगु ‘नेपाःया समावेशी सः रेडियो नेपाल, राष्ट्र भाषाया समाचार व कार्यक्रम प्रसारण ः सवाल व भूमिका’ विषयया छगू ज्याझ्वलय् वय्कलं थथे धयादीगु खः।मुख्यमन्त्री कार्कीं भाषाया छ्यलाबारे माःगु सहलह, कानुन निर्माण, लिपि खोजबिन, विकास र प्रवद्र्धन यायेगुपाखें सरकार प्रतिबद्ध दूगु खँ न्ह्यथनादिल।

फुक्क जातजातिया धर्म, संस्कृति व भाय्या संरक्षण याना राष्ट्रिय छवाः दयेकाः तयेमाःगुलि बः बिसें वय्कलं गुंगू निसें १२ तगिंतकया ब्वँनामितयेत नैतिक शिक्षा, अनुशासन र दुव्र्यसन क्वपालेगु ज्याया निंतिं रेडियो नाप स्वायेमाःगु सुझाव बियादिल। प्रदेशया आन्तरिक मामिला व कानुनमन्त्री रेवतीरमण भण्डारीं विपद्या इलय् सरकारी सञ्चारमाध्यमं समाजयात सुसूचित यायेगु महत्वपूर्ण भाला पूवंकेमाःगु धासें सञ्चारमाध्यम तयेगु ज्यायात च्वछायादिल।

सार्वजनिक सेवा प्रसारण नेपालया अध्यक्ष डा महेन्द्र विष्टं देय्या थी थी जातजातिं न्ववाइगु भाय्या संरक्षणय् रेडियों तःधंगु भाला क्वबिना वयाच्वंगु दु धयादिल। ज्याझ्वः संयोजक ताराप्रसाद वस्ती व तारणीप्रसाद कोइराला स्मृति सञ्चारगृह विराटनगरया निर्देशक पुष्करराज गौतमं सञ्चार गृहं याना वयाच्वंगु ज्याया बारे कनादीगु खः।

ज्यापु महागुथि येँ महानगर समितिं थुगु दँय् उच्च शिक्षा कायेत ताःलाःपिं ब्वमिपिन्त हंगु दु। थौ शनिवाः येँ छगु ज्याझ्वः दथुइ राष्ट्रिय सभागृहय् हःगु खः।

उगु हने ज्याझ्वलय् येँ महानगरपालिकाया उपप्रमुख सुनिता डंगोलया मूपाहाँ कथं झायासिदगु खःसा अथे हे पाहाँ कथं येँ महानगरपालिकाया पुलांम्ह मेयर बिद्यासुन्दर शाक्य, ज्यापू महागुथिं येँ नेपाःया नांयः सत्यनारायण डंगोल लिसें थीथी ब्यक्तिपिं उपस्थित जुगु खः।

ज्याझ्वलय् येँ दुने उच्च शिक्षा कायेत ताः लाःपिं ज्यापू समुदायया थीथी शैक्षिक स्तरं निसें एमफिल तकया ब्वमिपिन्त हना– पौं लः ल्हासें हंगु खः। ज्यापु महागुथि येँ महानगर समितिंया नायः पंच नारायण महर्जनं लसकुस यानादिगु खः।