वंगु चान्ह्यः मदिक्क वा वया खुसि बा वया यलय् थीथी थासं २४ म्हेसित प्रहरीं उद्धार याःगु दु। प्रहरीं बागमती करिडोरं स्वम्ह मस्त, च्याम्ह मिसा व झीस्वम्ह मिजंपियाना २४ म्हेसित उद्धार याःगु दु।

प्रहरीया कथं यूएन पार्कं छम्ह मिजं व छम्ह मिसायाना निम्ह, सुन्दरीघाटं प्यम्ह मिजं व प्यम्ह मिसायाना च्याम्ह, बालकुमारी त्वाँय् छम्ह, महालक्ष्मी नगरपालिका–७ चागाथलीइ निम्ह मस्त व निम्ह मिसा नाप स्वम्ह मिजंपियाना न्ह्यय् म्ह, सानेपास्थित राम मन्दिर नापं छम्ह मिसा व छम्ह मचा नाप प्यम्ह मिजंयाना खुम्हेसित उद्धार याःगु दु।

प्रतिभा समाजया ३० क्वःगु दँमुज्याँ व प्रतिभा बुक बैकया दँमुज्या नाप सातोआकी इटो स्मृति दिवसया लसताय् छगु ज्याझ्वः जूगु दु।

उगु ज्याझ्वलय् योङ पिकासोया प्राविधिक ग्वाहालि छगू चित्रकला कासा ज्याझ्वः जूगु खः। उगु कासाय् ३६ गू ब्वनेकुथिया ४० म्ह मस्तय्सं ब्वति काःगु खः। कासाय् बालकिशोर चौधरी, सीतु मास्के व राजकुमार महर्जनं निर्णायकया रुपय् ज्या यानादीगु खः।

सिनियरपाखे न्हाप– नोरिन श्रेष्ठ, ल्यू– पालिजा महर्जन, लियांल्यू जेनिसा बज्राचार्य व प्यंगुगु थासय् प्रजना श्रेष्ठ लागु खः। अथेहे जुनियरय् न्हाप उत्सव चौधरी, ल्यू श्रीजल अधिकारी, लियांल्यू आशिर्य देसार, हःपाः सिरपा मैत्री शाक्य व सिरपा नुसला श्रेष्ठयात बिशेष सिरपाः इन्द्रेणी प्रधानं त्याकादीगु खः। ज्याझ्वःया मूपाहाँ यल महानगरपालिकाया उप मेयर मन्जली शाक्यं हना पौ, प्रतिभा समाजया नायः डा.बज्रराज शाक्यं नगद सिरपा व सचिवं किरणनरसिं शाक्यं मेडल लःल्हानादीगु खः।

अथे हे प्रतिभा बुक बैकं झीनिगु तःगिमय् ब्बनिइपिन्त सफू लःल्हायेगु ज्या न जूगु खः। शोभा बज्राचार्यं न्ह्याकादीगुलि समाजया नायः डा.बज्रराज शाक्यया सभाध्यक्षताय् जूगु उगु ज्याझ्वलय् डा.चुन्दा बज्राचार्य, शाक्य सुरेन त्रिरत्न कोषया अध्यक्ष सुदन रन्त बज्राचार्य व अजय देशारपिनिगु न ब्बति दुगु खः।

दँ मुज्याँया लसताय् बोधिबृक्ष सिमाक्व (बुद्ध धर्म सम्वन्धी) व साहित्य फल्चा साहित्य सम्वन्धि अन्तरक्रिया ज्याझ्वः न जूगु खः।

बल्खु खुसिइ छम्ह मनू सीउगु दु। थौ चान्ह्यः तसकं वा वःगुलि बल्खु खुसि बा वया उम्ह मनू सीउगु जुइ अनुमान यागु दु धका उपत्यका प्रहरी कार्यालय, रानीपोखरीं धाःगु दु।

उम्ह मनू बाँके छेँ दुम्ह सुकुम्बासी वस्तीइ च्वना च्वम्ह ४५ दँ दुम्ह राम सरुप महतो खः। थौ सुथय् ७ः३० बजेति बल्खु ताँ क्वय् थाना च्वंगु अवस्थाय् लुगु धका प्रहरीं धाःगु दु।दिल्लागा एकादशी ११४४, सावन १६ बुधवाः

शेयर बजाः थौ ३५ ल्याखं थहावःगु दु। न्हिच्छियकं थहाक्वहा जुयाच्वंगु शेयर बजाः परिसूचक नेप्से ३५ दशमलव ५५ ल्याखं थहावना २ हजार ६ सय ९६ दशमलव ६५ विन्दुइ थ्यःगु दु।

थौ बैंकिङ, म्युचल फन्ड व निर्जीवन बीमा बाहेक दक्को समूहया शेयर थहावंगुलि होटल, फाइनान्स, विकास बैंक समूहया शेयर यक्को कुहावःगु दु। थौ प्रोग्रेसिभ फाइनान्स, वरुण हाइड्रोपावर, सान्जेन जलविद्युत्, नेपाल वेयरहाउजिङ, सीईडीबी हाइड्रोपावर, नेपाल फाइनान्स कम्पनीया शेयर १० प्रतिशतं थहावःगु दु।

अथेहे खुगु कम्पनीया शेयर ९ प्रतिशत स्वया अप्पो थहावःगु दु। समग्र बजाः थहावःगु दु सा एशियन हाइड्रोपावर कम्पनीया शेयर १० प्रतिशत स्वया अप्पो कुहावःगु दु। ३२९ गु कम्पनीया ४ करोड ३ लाख कित्ता शेयर १७ अर्ब २६ करोड रुपैयाँया कारोबार जूगु दु।

दकलय् अप्पो हिमालयन रिइन्सुरेन्स कम्पनीया ६० करोड रुपैयाँ स्वया अप्पो शेयर कारोवार जूगु दु।

थेरवादी प्रवजितपिन्त क्षत्रपाति निःशुल्क चिकित्सालय (अस्पताल)य् निःशुल्क स्वास्थ्य उपचार यायेगु नितिं नीस्वंगु धम्मावती गुरुमां स्वास्थ्य उपचार कोषया नितिं थीथी दातापिनिगु पाखें मुंकूगु न्हापांगु चरणय् २७,९९, ३,६५ तका थौं मंगलवाः धर्मकीर्ति विहारय् चिकित्सालयया नायः डा. मनोजमान श्रेष्ठयात लःल्हाःगु दु।

श्रद्धेय धम्मवती गुरुमांपाखें तयाः बिज्याःगु १०,००,००० तका लिसें मेपिं गुरुमांपिं नापनापं श्रद्धालु उपासक उपासिकापिन्सं थुगु कोषयात सश्रद्धा आर्थिक ग्वाहालि यानादीगु दां थौं मंगलवाः लःल्हाःगु खः। वंगु श्रावण ६ गते गुरु पुन्हीया दिं धम्मावती गुरुमां स्वास्थ्य उपचार कोष घोषणा याःगु खःसा थुग दिं श्रद्धेय धम्मावती गुरुमांया ९१ दँय् च्वनाः बिज्याःगु खः।

क्षत्रपाति निःशुल्क चिकित्सालयपाखें धर्मकीर्ति विहार व धर्मकीर्तिया शाखा विहारया गुरुमांपिं, थ्वया लिपा बुलुहुँ नेपाःया सकल गुरुमांपिन्त क्षत्रपाति निःशुल्क चिकित्सालयस निःशुल्क स्वास्थ्य उपचार सेवा बीगु नितिं थुगु कोष नीस्वंगु खः। थुगु कोषपाखें गुरुमांपिन्त सेवा बिइगु नितिं संचालक समिति नीस्वंगु दु।

उगु संचालक समितिइ धर्मकीर्ति विहारपाखें खेमावती गुरुमां, धर्मकीर्ति बौद्ध अध्ययन गोष्ठीपाखें अरुणसिद्धि तुलाधर, क्षत्रपाति निःशुल्क चिकित्सालयपाखें डा. मनोजमान श्रेष्ठ, कृष्णप्रसाद मानन्धर व सामाजिक क्षेत्रपाखें सुजीव बज्राचार्य च्वनादीगु दु।

थुगु कोषय् ग्वाहालि निरन्तर रुपं म्हयेगु खँ धर्मकीर्ति विहारं जानकारी ब्यूगु दु। विहारं थुगु कोषय् ग्वाहालि यायेगु मन दुपिन्सं श्रद्धा कथं आर्थिक ग्वाहालि यानादीत इनाप याःगु दु।