Display Style:
Column Style
ज्यापु समाजया ल्यायम्हतय् भिंतुना ज्याझ्वः
लहनान्यूज सम्वाददाता | कौलागा आमै ११३६ (अक्टोबर ३० २०१६)
न्हूदँ नेपाल सम्वत ११३७या लसताय् ज्यापु समाज यल, यूवा उप समितिं भिंतुना कालबिल लिसें कौला ज्याझ्वः याःगु दु ।
स्वास्थ्यमन्त्री गगन थापा मू पाहां कथं झायादीगु ज्याझ्वः समितिया नायः बाबुराजा ज्यापुया सभापतित्वय् जूगु खः । ज्याझ्वलय् यल जिल्लाया सांसदपिं लिसें थीथी राजनैतीक दलया नेता, जिल्ला प्रतिनिधि, पूर्वमन्त्री, यल जिल्लाया थीथी प्रशासनिक प्रमूख, उद्योग वाणिज्य ख्यःया प्रतिनिधिलिसें थीथी जातीय खलःपुचः, नेवाः ख्यःया संघसंस्थाया प्रतिनिधिलिसेंया ब्वति दुगु खः ।
ज्याझ्वलय् समाजया प्रथम उपाध्यक्ष बेखारत्न महर्जनं लसकुस न्वचु बियादिल । अथे हे मू पाहां स्वास्थ्यमन्त्री थापां त्वाःदेवाय् मत च्याकाः लिसें नेपाल सम्वतया प्रवर्तक शंखधर साख्वाःया किपाय् स्वांमाः नं कोखायेकाः ज्याझ्वःया उलेज्या यानादिल ।
उलेज्याया झ्वलय् मू पाहां थापा, यूवा उप समितिया नायः बाबुराजा, ज्यापु समाजया नायः प्रेम महर्जनलिसें सांसद्, थीथी राजनैतीक दलया नेता, प्रतिनिधि, ज्यापु समाजया पुलांपिं नायःपिं, पदाधिकारीलिसें नं बखुं नं ब्वयेकूगु खः ।
औपचारीक ज्याझ्वः क्वचायेकाः कौला लिसें सकसिनं थवंथवय् भिन्तुना कालबिल याःगु खः ।
‘मां–बौया ख्वाः स्वये’ पिदन
लहनान्यूज सम्वाददाता | कौलागा चतुर्दशि ११३६ (अक्टोबर २९ २०१६)
पार्टिइ दुहां वनेधुंकाः नेवाःत पार्टिया कार्यकर्ता जक जुयावनीगु प्रवृत्तीं यानाः नेवाःत राजनैतीक व प्रशासनिक क्षेत्रय् ल्यूने लानावंगु नेवाः न्ह्यलुवा पवित्र बज्राचार्यं धयादीगु दु ।
थौं ओलम्पसं क्लबं येँय् ग्वसाः ग्वःगु प्रा. सुवर्ण शाक्यं मांबौया ख्वाः स्वयेगु नेवाः तजिलजियात कयाः च्वयादीगु बिश्लेषणात्मक च्वखँ सफू ‘मां–बौया ख्वाः स्वये’ उलेज्या ज्याझ्वलय् बज्राचार्यं नेवाः राजनैतीक कार्यकर्तातयसं पार्टि दुने थःगु समुदायया हक अधिकारया लागिं सः थ्वयेके फःसा जक नेवाः आन्दोलन ताःलायेफइगु धयादिल । नेवाः कार्यकर्तातयके नेवाः भावनाया विकास यायेत नेवाः न्ह्यलुवातयसं विशेष ध्यान बीमाःगु ई वःगु वयकलं धयादिल ।
ज्याझ्वलय् न्हूदँ राष्ट्रिय समारोह समिति ११३७ या नायः भीमसेनदास प्रधानं उगु सफूया उलेज्या यानादिल । उलेज्या धुंकाः नुगः खँ तयेगु झ्वलय् प्रधानं जीवनय् मांया थाय् मेपिं स्वयां तःधं हे जुइगु धासेंं नेवाः समाजया सांस्कृतिक ज्याखँय् मिसातयत हे न्ह्यःने तयातःगु धयादिल ।
ज्याझ्वलय् त्रिरत्न मानन्धर, साहित्यकार शशिकला मानन्धरं सफूया समीक्षा यानादीगु खः ।
ओलम्पस क्लबया न्वकू ज्योति शाक्यं लसकुस यानादीगु ज्याझ्वः क्लबया नायः पवित्र बज्राचार्यया सभानायकय् जूगु खः ।
‘नेपाल संवत्यात व्यवहारिक रुपं छ्यलेमाः’
लहनान्यूज सम्वाददाता | कौलागा चतुर्दशि ११३६ (अक्टोबर २९ २०१६)
राष्ट्रिय मान्यता ब्यूकथं नेपाल संवत्या व्यावहारिक छ्यलाबुला व मौलिकता स्थापना यायेत राज्य, सञ्चार व बजारया महत्वपूर्ण भूमिका दुगु थौं यलय् जूगु छगू ज्याझ्वःया ब्वतिमिपिन्सं धाःगु दु ।
बौद्ध युवा कमिटी यलं थौं इखाछेँस्थित ऐतिहासिक नापिचन्द्र महाविहारय् ग्वसाः ग्वःगु नेपाल संवत्या व्यावहारिक कार्यान्वयन विषयक अन्तर्क्रिया ज्याझ्वःया ब्वतिमिपिन्सं नेपाल संवत्या सैद्धान्तिक महत्वयात लिनाः राज्यं थुकियात व्यापकता बियाः छ्यलाबुलाय् हःसा जनस्तरय् थुकिया व्यापक प्रभाव लाइगु धाल । लिसें वक्तातयसं सञ्चारमाध्यम व बजारया भूमिकां तँसा विस्तार व थुकिया महत्वबारे थुइकीगु बिचाः नं तल ।
उगु अन्तर्क्रिया ज्याझ्वःया उलेज्या यासें नेवाः पत्रकार राष्ट्रिय दबूया केन्द्रीय नायः श्रीकृष्ण महर्जनं नेपाल संवतयात राष्ट्रिय मान्यता बीकेत नेवाः समुदायया निर्णायक भूमिका दुगु खःसां थुगु सम्वत् नेवाःतयगु जक मखूगु स्पष्ट यानादिल । महर्जनं नेवाः समुदायया भाषिक, जातीय व सांस्कृतिक मुद्दा व नेपाल संवत्या मुद्दा बिस्कं बिस्कं खःगु बिचाः तयादिल ।
नेपाल संवत् ११३७ न्हूँद समारोह समिति यलया नायः अले उद्योगी मोतिलाल शिल्पकारं नेपाल संवत्या सैद्धान्तिक व व्यावहारिक महत्वबारे मेमेगु भाषाभाषी व जातजातियात नं थुइकेमाःगु धयादिल ।
ज्याझ्वलय् नेपाल संवत्या व्यावहारिक कार्यान्वयनबारे ज्यापौ न्ह्यब्वसें सञ्चारकःमि सुरजवीर बज्राचार्यं राष्ट्रिय संवत्या मान्यता ब्यूसां राज्यं थुकियात व्यवहारय् छ्यलेत कञ्जुस्याई याःगु धासें राज्यं थुकिया बारे स्पष्ट दृष्टिकोण न्ह्यःने हयेमाःगु धयादिल । नेवाः पत्रकार राष्ट्रिय दबूया केन्द्रीय न्वकू तकं खःम्ह बज्राचार्यं सांस्कृतिक नखःचखः, बुदिं, जात्रा आदिइ व्यवहारिक रुपं छ्यलाच्वंगु संवत्यात न्हियान्हिथंया जीवनय् छ्यलेत आम जनस्तरय् थुकिया चेतना थकायेगु लिसें राज्यया निर्णायक भूमिका दइगु नं धयादिल ।
ज्यापतिइ टिप्पणी यासें बौद्ध युवा कमिटीया निर्वतमान नायः सुनील महर्जनं नेपाल संवत् राष्ट्रियता, आम नेपाःमिया आत्मसम्मानलिसे स्वानाच्वंगु दुगु धासें थुकिया व्यावहारिक छ्यलाबुलाया नितिं राज्य, बजार व सञ्चारया थःथःगु थासय् महत्वपूर्ण भूमिका दुगु बिचाः तयादिल । नेवाः पत्रकार राष्ट्रिय दबूया केन्द्रीय मू छ्यान्जे तकं खःम्ह महर्जनं थौंया इलय् आम मनूतयसं थुकिया महत्वयात आत्मसात याकाः व्यवहारिक छ्यलाबुलाया दिशाय् न्ह्याका यंकेमाःगु धयादिल ।
बौद्ध युवा कमिटीया नायः अनिल महर्जनं ल्यायम्ह वर्गया सशक्तिकरण व स्थानीय निकायस पहुँच, समुदायलय् शान्ति व सकारात्मक चिन्तन दयेकेत वंगु १९दँ न्ह्यःनिसें ज्या यानाच्वंगु थुगु संस्थां नेपाःमिपिनिगु मौलिकतालिसे स्वानाच्वंगु नेपाल संवत्या महत्व आम जनता दथुइ स्थापित याकेगु आज्जुं ज्याझ्वःया ग्वसाः ग्वयागु धयादिल ।
ज्याझ्वः धुंकाः यल उद्योग वाणिज्य संघ, ताम्रकार समाज, ज्यापू समाज, यलया थीथी विहार व महाविहार, राष्ट्रिय युवा महासंघ यल जिल्ला समिति, महानगरीय प्रहरी प्रभाग मंगलबजार, नेपाल परम्परागत बौद्ध धर्म संघ, युवक बौद्ध मण्डल, कलाका तीन पाईला लिसें सामाजिक, धार्मिक, सांस्कृतिक लिसें थीथी ख्यलय् क्रियाशील संघसस्थाया प्रतिनिधितय् दथुइ चियापान व न्हूदँ व स्वन्ति नखःया भिंतुना कालबिल जूगु खः ।
तिकिझ्याः उलेज्या जुल
लहनान्यूज सम्वाददाता | कौलागा चतुर्दशि ११३६ (अक्टोबर २९ २०१६)
नेवाः मिडिया प्रा.लि.या लुखां नेपालभाषाया न्हूगु वाःपौ ‘तिकिझ्याः’या उलेज्या जूगु दु ।
थौ येँय् छगू ज्याझ्वः यासें तिकिझ्याः वाःपौया विमोचन जूगु खः । उद्योगमन्त्री नवीन्द्रराज जोशी, नेवाः न्ह्यलुवा पूर्वमन्त्री तीर्थराम डंगोल, सांसद रामवीर मानन्धर, गोरखापत्र न्हिपौया प्रधान सम्पादक पुष्कर माथेमा, नेवाः देय् दबूया नायः नरेश ताम्रकार, नेपालभाषा मंकाः खलःया छ्यान्जे नरेशबीर शाक्य, नेवाः पत्रकार राष्ट्रिय दबूया न्वकू नृपेन्द्रलाल श्रेष्ठ, नेवाः मिडिया क्लबया नायः नवीन जोशी, नेवाः मिडिया प्रा.लि.या नायः सन्तकुमार महर्जनलिसें नं मंकाः रुपं पत्रिकाया उलेज्या यानादिल
नुगःखँ तयेगु झ्वलय् उद्योगमन्त्री नवीन्द्रराज जोशीं नेवाः लिसें मातृभाषा पत्रकारीता ख्यः नं व्यवसायिक जुइमाःगुलिइ बः बियादिल । गोरखापत्र न्हिपौया प्रधान सम्पादक पुष्कर माथेमां थौ नेवाः पत्रकारीताया इतिहास १००दँ पुलेत्यंगु इलय् तकं वितरणया समस्यां व्यवसायिक जुइमफयाच्वंगु खँय् च्यूताः प्वंकादिल ।
नेवाः पत्रकार राष्ट्रिय दबूया न्वकू नृपेन्द्रलाल श्रेष्ठं नेपालभाषा टाइम्स न्हिपौ, नेपालभाषा टाइम्स डट कम, लहनान्यूज डट कम लिसें तिकिझ्याः वाःपौ पिदंगु दँ ने.सं. ११३६ नेवाः पत्रकारीता ख्यःया नितिं लुँया दँ जूगु धयादिल । पूर्वमन्त्री तीर्थराम डंगोल, नेवाः देय् दबूया नायः नरेश ताम्रकार, नेपालभाषा मंकाः खलःया छ्यान्जे नरेशबीर शाक्य, नेवाः मिडिया क्लबया नायः नवीन जोशीं नेवाः पत्रकारीता ख्यलय् पिदंगु न्हूगु पत्रिका तिकिझ्याःया सफलताया भिंतुनादिल ।
उगु हे ज्याझ्वलय् कवि शरदकुमार डंगोलया चिनाखँ मुना सफू ‘निध्वः (दुइ रेखा)’ व बखतबीर डंगोलको पुस्तेवारी’ सफूया नं उद्योगमन्त्री नवीन्द्रराज जोशीं उलेज्या यानादीगु खः । उद्योगमन्त्री जोशीं त्वाःदेवाय् मत च्याकाः उलेज्या यानादीगु ज्याझ्वः नेवाः मिडिया प्रा.लि.या नायः सन्तकुमार महर्जनया सभानायकय् जूगु खः ।
थौं खिचापूजा
लहनान्यूज सम्वाददाता | कौलागा चतुर्दशि ११३६ (अक्टोबर २९ २०१६)
नेवाःतय् तःधंगु नखः स्वन्तिया झ्वलय् थौं खिचापूजा याःगु दु ।
थौं कौलागा कृष्ण चतुर्दशिया दिनय् यमराजया दूत कथं नालाः सकसियां छेँय् छेँय् खिचायात पूजा यायेगु याइ । यमपंचक धकाः द्वादशिया दिनय् क्वःयात पुज्यानाः न्ह्याइगु स्वन्तिया निन्हुगु दिनय् खिचा पूजा याइगु खः ।
थौंया दिनय् खिचायात म्हासु सिन्हः, ह्याउँ सिन्हः तिकाः जजंका, स्वांमाः क्वखायेकाः खिचायात यःयःगु मरिचरि नकाः पुज्याइ । नेवाः समाजय् क्वः, खिचा, नाग, सा आदि पशुपंक्षीयात नं पुज्यायेगु, छगू दर्शनं जायाच्वंगु परम्परा खः ।
तता यमुनां थः किजा यमराजयात सःतके छ्वःगु बाखं थुगु नखःलिसे स्वानाच्वंगु दु । तता यमुनां दक्कले न्हापां क्वःयात छ्वयाः किजा यमराजयात सःतके छ्वःगु अले निन्हुगु दिनय् खिचायात छ्वयाः सःतके छ्वःगु किम्वदन्तिया आधारय् यमपंचकया निरन्तरता जुया वयाच्वंगु दु ।
