Display Style:
Column Style
न्हूदँ राष्ट्रिय समारोह समितिया मुँज्या क्वचाल
लहनान्यूज सम्वाददाता | कौलागा दशमि ११३६ (अक्टोबर २५ २०१६)
न्हूदँ राष्ट्रिय समारोह समिति ११३७ या पुर्ण कार्यसमितिया मुँज्या थौं येँय् च्वंगु दु ।
समितिया नायः भीमसेनदास प्रधानया अध्यक्षताय् च्वंगु मुँज्याय् सकसिनं थःथःगु भालाया तयारी बारे जानकारी बीगु झ्वलय् आर्थिक कवःया कजि अमृत ताम्राकारं प्रस्तावित आम्दानी व खर्च न्ह्यब्वयादिल । ताम्राकारं प्रस्तावित आम्दानी कथं ७,००,००० लख तका व प्रस्तावित खर्च ४,५०,००० तकाया ल्याःचाः न्यंकादिल ।
संचार कजि नृपेन्द्रलाल श्रेष्ठं न्हूदँया ज्याझ्वःयात कयाः थीथी संचार माध्यमय् पिदनाच्वंगु बुखँ, च्वसुया जानकारीलिसें संचार माध्यमतलिसे जुयाच्वंगु समन्वयया विषय कनादिल । व हे कथं सांस्कृतिक कजि पंचनारायण महर्जनं थुगुसी २सः स्वयां आपाः बाजं खलकं र्यालीइ ब्वति काइगु धयादीगु खः ।
क्यालेन्डर कवःया कजि देवदास मानन्धरया कथं थुगुसी न्हूदँया क्यालेन्डर ५द्वःपाः पिदनीगु जूगु दु । समितिया सल्लाहकार समाजसेवी, उद्योगी लक्ष्मीदास मानन्धरं थुगुसी नं न्हापा लिपा थें थम्हं फक्व बांलाक नासः पुजा न्यायेकेगु धयादिल ।
व हे कथं व्यवस्थापन समितिया दुजः राजेश शाक्य, शैलेस शाक्य, मचाराजा महर्जन व रविन श्रेष्ठ, मिसा कवःया कजि नानीमैयाँ महर्जन, व्यवस्थापन समितिया कजि उमेश स्थापित, माइक व मंच व्यवस्थापन समितिया कजि ज्योति शाक्यलिसें नं थःथःगु भालाय् लाःगु ज्याया तयारीया बारे जानकारी बियादीगु खः ।
न्हूदँया पाः काइपिं म्ह्वः जुयावनाच्वन
लहनान्यूज सम्वाददाता | कौलागा दशमि ११३६ (अक्टोबर २५ २०१६)
यलय् न्हूदँ समारोहया पाः काइपिं म्ह्वः जुया वनाच्वंगु धाःगु दु ।
न्हूदँ नेपाल सम्वत ११३७या ज्याझ्वःया जानकारी बीत थौं यलय् ग्वसाः ग्वःगु पत्रकार सम्मेलनय् नेपाल भाषा मंकाः खलः, यलया नायः ऋषिप्रसाद श्रेष्ठं निदँ लिपाया समारोहया नितिं यलय् न्हूदँया समारोहया नेतृत्व काइपिं खने मदनिगु परिस्थितीयात कुलादिल । प्यंगू द मंकाः समाजं पालंपाः नेतृत्व काइगु कथं निदँ लिपा पाः काइम्ह सु धइगु क्वःमज्यूगुलिं आकिवंयात हे समस्या वयेफुगु धयादिल ।
लिपा पाः काइगु संस्थाया प्रतिनिधि वर्तमान कार्यसमितिया छ्यान्जे च्वनीगु परम्परा कथं आकिवंया समारोह समिति गठन जुइबलय् हे निदँ लिपा पाः काइम्ह निश्चित जुइधु्ंकेमाःगु श्रेष्ठं जानकारी बियादिल ।
थुगुसी धाःसा ल्वहँकःमि समाजपाखें मोतीलाल शिल्पकार नायः ल्यःगु खःसा आकिवं नेतृत्वया पाः काइगु संस्थाया ल्याखं स्यस्यः समाजपाखें सुवर्णमान अमात्य छ्यान्जे च्वनादीगु खः ।
- थुगुसीया न्हूदँया ज्याझ्वः सार्वजनिक
थौं यलय् ग्वसाः ग्वःगु पत्रकार सम्मेलनय् थुगुसीया न्हूदँया समारोहया ज्याझ्वः नं सार्वजनिक याःगु दु ।
पत्रकार सम्मेलनय् न्हूदँ समारोह समिति ११३७ या नायः मोतीलाल शिल्पकारं जानकारी बियादीकथं न्हूदँया दिं कछलाथ्व पारु ११३७ या दिनस सुथय् यलया मंगलय् नं बाजंगाजंलिसेंया र्यालि न्ह्याइगु जूगु दु । उगु र्यालीं यलया सापारु रुट चाःहिलाः क्वचाइगु जूगु दु ।
ज्याझ्वःया उलेज्या प्रधानमन्त्री पुष्पकमल दाहालं यानादीगु जूगु दुसा र्यालि धुंकाः सिरपाः इनेगु ज्याझ्वलय् उद्योगमन्त्री नवीन्द्रराज जोशी झाइगु समारोह समितिं न्ह्यथंगु दु ।
समितिं न्ह्यथंकथं र्यालीइ ब्वति काइगु बाजं खलः, त्वाः, संघसंस्था आदियात गोलाप्रथाकथं यल उपमहानगरपालिकापाखें छसिकथं ५द्वः, ३द्वः व २द्वः तका सिरपाः नं बीत्यंगु दुसा हःपाः कथं मेगु १५ ब्वतिमिपिन्त द्वःछि तकाया सिरपाः नं बीत्यंगु दु । व हे कथं व्यानर लिसें र्यालीइ ब्वति काइगु खलःपुचः, मिसा पुचः, संघसंस्थायात नेपालभाषा मंकाः खलः यलपाखें मोतीलाल शिल्पकारया नामं नीस्वनातःगु ५द्वः, ३द्वः व २द्वः तकाया मोति सिरपाः व दसिपौ नं बीगु जूगु दु ।
वयां न्ह्यः, न्हू दँ समारोह समिति ११३७ अन्तर्गत रोट्र्याक्ट क्लब अफ ललितपुरया ग्वसालय् कौलागा आमै ११३६ या सनिलय् सीइता मतयाः जुइत्यंगु दु । व हे कथं न्हूदँया दिनय् कछलाथ्व पारु कुन्हु सुथय् नेपाल विद्यार्थी दबूया ग्वसालय् मोटर साइकल र्याली नं जुइत्यंगु दु ।
अष्ट्रेलियां नेपाःमिया सीम्ह नेपाः हयेत समस्या
लहनान्यूज सम्वाददाता | कौलागा दशमि ११३६ (अक्टोबर २५ २०१६)
ब्वनेगु झ्वलय् अष्ट्रेलियाय् च्वँच्वं अन हे मदुम्ह येँ मरुत्वाःया पिगंननिइ च्वंम्ह विराट ताम्राकारया सीम्ह नेपाः हयेत समस्या जुयाच्वंगु दु ।
उखें मदुम्हेसिया सीम्ह नेपाः हयेत १२द्वः व ५सः अमेरीकि डलरया आवश्यकता जुइ । व धयागु १२,५०,००/– स्वयां आपाः नेपाली धेबा खः ।
परीवारं मदुम्हेसिया सीम्ह नेपाः छ्वया हयाबीत इनाप यायेधुंकाः उखे च्वनाच्वंपिं नेपाःमिपिनिगु संस्था नेपाली एशोसिएसन अफ वेष्टर्न अष्ट्रेलिया (नावा) पाखें पहल न्ह्याकाः १० लख धेबा मुनेधुंकूगु धाःगु दु ।
नावां ताम्राकारया सीम्ह नेपाः छ्वयाहयेत बैंकय् धेबा तयाः ग्वाहालि यायेत सकसितं इनाप नं याःगु दु ।
बैंक खाताया नां : नावा च्यारिटी एकाउन्ट
बिएसबि नम्बर : ३०२१६२
एकाउन्ट नम्बर : ०७२४५४५
- बिराटयात छु जूगु खः ?
येँया मरु पिगंननिइ च्वंम्ह ताम्राकार ब्वनेगु झ्वलय् वंगु झिंखुला न्ह्यः अष्ट्रेलिया वंगु खःसा वंगु अक्टोबर २० या दिनय् आकाझाकां मदुगु खः ।
पर्थया इडिथ कोवान युनिभर्सिटीइ इन्जिनियरिङ बिषय अध्ययन यानाच्वंम्ह ताम्राकार छगू स्थानीय कम्पनीइ ज्या नं यानाच्वंगु खः ।
अक्टोबर २० या दिनय् ज्याय् वनेगु झ्वलय् आकाझाकां सडकय् ग्वारातूम्ह ताम्राकारयात उघ्रिमय् हे वासः यायेत रोयल पर्थ अस्पतालय् यंकूगु खः । अन वासः यायेगु झ्वलय् वयकः मदुगु खः श्र
डाक्टरतयसं ताम्राकारयात हृदयघात वा मस्तिष्कघात जूगु अनुमान याःःगु दु । वयकः छु जुयाः मदुगु खः धइगु खँ पोष्टमार्टमया रीपोर्ट वयेधुंकाः जक सीदइगु डाक्टरतयगु धापू दु ।
अध्ययनया लिपांगु दँय् थ्यनेधुंकूम्ह ताम्राकार मांअबुया याकः काय् खः ।
न्हूदँया लसताय् सुवर्ण शाक्यया सफू
लहनान्यूज सम्वाददाता | कौलागा दशमि ११३६ (अक्टोबर २५ २०१६)
न्हूदँ नेपाल सम्वत ११३७ या लसताय् समाजसेवी प्रा.सुवर्ण शाक्यया सफू ‘मांबौया ख्वाः स्वये’ पिदनीगु जूगु दु ।
वइगु कौलागा चतुर्दशि (अक्टोबर २९) शन्चरबाःकुन्हु ओलम्पस क्लबपाखें छगू ज्याझ्वः यासें उगु सफूया उलेज्या यायेत्यंगु दु । न्हूदँया लसताय् भिंतुना कालबिल ज्याझ्वःया ग्वसाः ग्वयाः उगु हे ज्याझ्वलय् सफूया नं उलेज्या जुइगु क्लबं न्ह्यथंगु दु ।
ज्याझ्वः शन्चरबाः ओमबहालय् ओलम्पस ख्यलय् जुइत्यंगु दु ।
थुगुसी नं मचा ब्वज्या जुइगु
लहनान्यूज सम्वाददाता | कौलागा दशमि ११३६ (अक्टोबर २५ २०१६)
न्हूदँया लसताय् भिंद्यःत्वाःया न्हूपुचःपाखें दँयदसं ग्वसाः ग्वयाच्वंगु मचा ब्वाज्या कासा थुगुसी नं यायेत पुचलं तयारी न्ह्याकूगु दु ।
वंगु २०दँ न्ह्यःनिसें पुचलं न्ह्याका वयाच्वंगु मचा ब्वाज्या थुगुसी नं न्ह्याकेत मयजु रीतु स्थापितया कजिसुइ ५ दुजःया तयारी कमिति नीस्वनेगु ज्या जुल ।
वइगु कौलागा आमै लक्ष्मी पूजाया दिनय् बसन्तपुलिं २०क्वःगु मचा ब्वाज्या न्ह्याइगु न्हू पुचलं न्ह्यथंगु दु । ग्वसाः खलकं सुथसिया ७ः३०ताः इलय् ब्वाज्या न्ह्याकेगु धाःगु दु ।
ब्वाज्या बसन्तपुलिं न्ह्यानाः जुद्ध शालिक, ओमबहाः, लगं, ज्याःबहाः, न्हूघः क्वहिति जुयाः भिंद्यःत्वालय् थ्यंकाः क्वचाइ । कासाय् ५दँनिसें १०दँ तक्कया मचातयसं ब्वति कायेफइगु पुलचं न्ह्यथंगु दु ।
