Display Style:
Column Style
रामशेखरया ग्वाहालिया नितिं ग्वाहालि पुचः नीस्वन
लहनान्यूज | सिल्लागा तृतीया ११३७ (फेब्रुअरी १३ २०१७)
क्यान्सर ल्वयया वासः याकाच्वंम्ह नांजाःम्ह साहित्यकार, कलाकारलिसें निर्देशक रामशेखर नःकमियायात ग्वाहालि यायेत नेवाः जागरण मञ्चं ग्वाहालि पुचः नीस्वंगु दु ।
सांसद भिमसेनदास प्रधान, नेवाः न्ह्यलुवाः मल्ल के. सुन्दर, प्रा.डा. चुन्दा बज्राचार्यया उपस्थितिइ जूगु छगू मुँज्यां निरञ्जनरत्न शाक्यया संयोजकत्वय् ग्वाहालि पुचः नीस्वंगु खः । राजेन्द्रमान शाक्य, सुजीव बज्राचार्य, विजयरत्न असंबरे, अमृत ताम्राकार, सुरेन्द्र तुलाधर व शैलेस शाक्य दुजः दुगु ग्वाहालि पुचलय् सल्लाहकार कथं सांसद भिमसेनदास प्रधान, मल्ल के. सुन्दर, प्रा.डा. चुन्दा बज्राचार्य दु ।
उगु हे मुँज्यां कलाकार नकःमियात ग्वाहालि यायेत १ लख तका ग्वाहालि नं म्हःगु दु । अथेहे, रामशेखर नकःमियात नेपाल सरकारपाखें ग्वाहालि कायेगु भाला सांसद भिमसेनदास प्रधान व शैलेस बरेजुयात ब्यूगु दु ।
उकिया लिसें नकःमियात ग्वाहालि मुंकेत वयकलं हे च्वयादीगु ख्यालः प्रदर्शन यायेगु नं क्वःछ्युगु दु । थुकिया नितिं राजेन्द्रमान शाक्य, विजयरत्न असंबरे व सुरेन्द्र तुलाधरयात भाला ब्यूग दु ।
निरन्तर रुपं आर्थिक ग्वाहालि म्हयेगु नितिं संयोजक निरञ्जनरत्न शाक्ययात भाला ब्यूगु दु । नकःमियात आर्थिक ग्वाहालि याये मंदुपिन्सं ९८६०–६६१३८० मोबाइल ल्याखय् स्वापू तयेत ग्वाहालि पुचलं इनाप नं याःगु दु ।
‘सतक विस्तार स्थानीयया सहमतिया आधारय्’
लहनान्यूज | सिल्लागा द्वितीया ११३७ (फेब्रुअरी १२ २०१७)
थौंकन्हय् तिनि हे यलय् जिल्लाय् नियुक्त जुयावःम्ह प्रमुख जिल्ला अधिकारी दिपक काफ्लें सतक बिस्तारया ज्या स्थानीय सहमतिया आधारय् न्ह्याइगु धयादीगु दु ।
ताम्रकार समाजं ग्वसाः ग्वःगु जातीय समाज, टोल सुधार समिति, स्थानीय प्रशासन व प्रहरी प्रशासनया अधिकृततलिसेया अन्तरक्रियाय् नवासें प्रजिअ काफ्लें शान्ति व सुरक्षाया सुनिश्चितताया लागी सुशासन जुइमाःगु धयादिल । अथेहे पूर्व प्रमुख जिल्ला अधिकारी ऋषिराम शर्मां जनताया अपेक्षा व मनंतुना प्रशासनं पूवंकेमाःगु व जातिय समाजलिसे स्वापू क्वात्तुकेफःसा जकः कार्यकाल सफल जुइगु बिचाः प्वंकादिल ।
ज्याझ्वलय् लसकुस यासें समाजया नायः रबिन्द्रराज ताम्रकारं जनमानसय् थ्व इलय् प्रहरी प्रशासनयात स्वयेगु दृष्टिकोणय् ह्यूपा वःगु सकारात्मक पक्ष खःगु धयादिल । थुकियात निरन्तरता बीमाःगु खँय् नायः ताम्रकारं बः बियादिल ।
उगु हे ज्याझ्वलय् वरिष्ठ प्रहरी उपरिक्षक पिताम्बर अधिकारीयात यल जिल्लाय् शान्ति, सुरक्षा, अपराध नियन्त्रणय् विशेष भुमिका निर्वाह याःगु धकाः सम्मान याःगु खः । अधिकारीयात समाजया नायः ताम्रकारं सम्मान यानादीगु खः ।
ज्याझ्वलय् यल जिल्लाया सहायक प्रमुख जिल्ला अधिकारी कृष्णप्रसाद आचार्य, महानगरीय प्रहरी प्रभाग, मंगलबजारया प्रमुख, प्रहरी निरिक्षक प्रकाश थापा, पुल्चोकया प्रमुख, प्रहरी निरिक्षक गोविन्द पन्थी नापं ज्यापु समाज, बौद्घबिहार संघ, राजोपाध्याय समाज, कपाली समाज, राजकर्णिकार समाज, बाराही समाज, जोशी समाज, बाद्यकार समाज, चक्रवर्ति टोल सुधार समिति, तिच्छुगल्ली टोल सुधार समिति, नेवाः पत्रकार राष्ट्रिय दबूया प्रतिनिधिपिंन्स जिज्ञासाया लिसें सल्लाह, सुझाव ब्यूगु खः ।
रामशेखरया ग्वाहालिया नितिं नेवाः पत्रकारत न्ह्यचिल
लहनान्यूज | सिल्लाथ्व चतुर्दशी ११३७ (फेब्रुअरी १० २०१७)
नेपालभाषा लिसें खस नेपाली भाय तकंया ख्यालः विधाया प्रतिभाशाली कलाकार अले वरिष्ठ साहित्यकार रामशेखर नकःमियात वासः यायेत राज्यपाखें सुविधा बीकेगु ज्याय् नेवाः पत्रकार राष्ट्रिय दबुलिं पलाः न्ह्याकीगु जूगु दु ।
थ्व हे झ्वलय् कलाक्षेत्रय् थःगु जीवन अर्पण याःम्ह राष्ट्रियस्तरया व्यक्तित्व कलाकार नकःमिया वासः यायेत राज्यस्तरं हे ग्वाहालि उपलब्ध याकेत नेवाः पत्रकार राष्ट्रिय दबुलिं जिप्रका ख्वपयात इनाप यासें पौ लःल्हाःगु दु । दबुलिं कलाकार नकःमिया आर्थिक अवस्थायात थुइकाः वयकःयात तत्काल हे राज्यया सुविधा अन्तर्गत जिल्ला जनस्वास्थ्य ज्याकू ख्वपपाखें ग्वाहालि उपलब्ध याकेत इनाप याःगु खः ।
ख्वप जिल्लाया प्रमुख जिल्ला अधिकारी द्रोण पोखरेलयात थौं वयकःया हे ज्याकुथिइ नापलानाः पत्रकार दबूपाखें ब्यूगु इनाप पौ लःल्हानाकासें थःगु अध्यक्षताय् दुगु जिल्लास्तरीय समितिं तत्कालया लागिं १ लख तका उपलब्ध याकेत उजं बियादिल । प्रमुख जिल्ला अधिकारी पोखरेलं फोन मार्फत ख्वप जिल्ला जनस्वास्थ्य ज्याकूया प्रमुख केशव पण्डितयात वइगु आईतबाः च्वनीगु मुँज्यां स्वास्थ्य उपचार सुविधा उपलब्ध याकेगु क्वःछीत कलाकार नकःमिया नां धलखय् तयेत इनाप यानादीगु खः ।
पत्रकार दबुलिं प्रजिअयात लःल्हाःगु पतिइ नकःमिया वासः यायेत आवश्यक च्यूताः, पहलकदमी क्यनेत लिसें अस्पताललिसे समन्वय यानाबीत धयातःगु दु । उगु पतिइ वयकःया वासः यायेगु ज्याय् गुगु नं कथं म्ह्वति जुइके मबीत इनाप यानातःगु दुगु दबूया मू छ्यान्जे सुनिल महर्जनं लहनान्यूजयात कनादिल ।
भक्तपुर क्यान्सर अस्पतालया मेडिकल डाइरेक्टर डा। प्रकाशया कथं वयकःया उसाँय् पायछि खनेदुसा वइगु ८ गते रेडियोथेरापी न्ह्याकेगु धयादिल । ‘दबुलिं इनाप याःकथं मेपिं ईच्छुक व्यक्ति संघसंस्थापिन्सं नं वयकःया वयकःयात ग्वाहालि यायेत अस्पतालय् तप्यंक मुनीगु कथं विशेष खाता चायेकेफइगु व्यवस्था यायेफइ, थ्व बाहेक वयकःया वासः यायेत गुगु नं कथं म्ह्वति जुइके बी मखु ।’ डा। प्रकाशं धयादिल ।
दबुलिं मंगलबारया दुने थुगु खाताया बारे जानकारी मुंकाः सार्वजनिक अपिल योगु तयारी याःगु सीदुगु दु ।
थ्वयां न्ह्यः बिहीबाः पत्रकार दबूया केन्द्रीय नायः श्रीकृष्ण महर्जनलिसें दबूया टोली भक्तपुर क्यान्सर अस्पताल वनाः नकःमि उसाँय् अवस्था उपचारबारे परिवार चिकित्सकपिंलिसे सहलह याःगु खः ।
सम्पदा पुनर्निमाणय् ठेक्का प्रथा विरुद्ध खबरदारी
लहनान्यूज | सिल्लाथ्व चतुर्दशि ११३७ (फेब्रुअरी १० २०१७)
ऐतिहासिक सम्पदा पुनर्निर्माण ठेक्का प्रथां याये दइमखु धकाः खबरदारी यासें स्थानीयवासी व संघसंस्थाया येँया बसन्तपुलिइ तःधंगु सभा याःगु दु ।
येँया हनुमानध्वाखा लागाय् वंगु बैसाख १२या भुखाचं क्षतिग्रस्त ऐतिहासिक सम्पदाया पुनर्निर्माण ठेक्का प्रथां यायेत्यंगु सन्दर्भय् येँय् जूगु सभाय् पुनर्निर्माणया विश्वसनीयताया खँय् न्ह्यसः तःगु खः । सभाय् ठेक्का प्रथां जुइगु पुनर्निर्माणय् आर्थिक चलखेल आपाः जुयाः सम्पदाया बल्लाःगु पुनर्निर्माण धाःसा जुइ मफइगु खँ स्थानीयवासी लिसें विज्ञपिन्सं तकं तःगु खः ।
ज्याझ्वलय् त्रैलोक्य मोहन नारायण देगःया मू पुजारी दिपकप्रसाद श्रेष्ठ, पुरातत्व विभागया पुलांम्ह निर्देशक डा. साफल्य अमात्य, इतिहासविद् प्रा. सुदर्शन राज तिवारी, काष्ठमण्डप पुनर्निर्माण अभियानया कजि बीरेन्द्रभक्त श्रेष्ठ, स्थानीय अभियन्ता गणपतिलाल श्रेष्ठ, पुरातत्व विभागया निर्देशक भेषनारायण दाहाल व न्ह्यलुवा पवित्र बज्राचार्यं थःथःगु नुगःखँ तयादीगु खः ।
ज्याझ्वलय् नवाःपिन्सं सम्पदाया पुनर्निर्माण ठेक्का प्रथां याके बी मज्यूगु धासें स्थानीयया सहभागीता व सक्रियताय् हे सम्पदा पुनर्निर्माण यायेमाःगु खँय् वक्तापिन्सं बः ब्यूगु खः । ठेक्का प्रथाया पुनर्निर्माणय् ज्या याइपिनि आर्थिक लाभय् आपाः ध्यान वनीगु जूगुलिं बल्लाःगु सम्पदा निर्माण जुइमफइगु वक्तापिनिगु धापू खः ।
ज्याझ्वलय् सरकारी निकायपाखें पुरातत्व विभागया निर्देशक दाहालया जक ब्वति दुगु खः । येँ महानगरपालिकाया प्रमूख रुद्रसिं तामाङयात ब्वनागु खःसां वयकः ज्याझ्वलय् मथ्यंगु ग्वसाः खलकं जानकारी ब्यूगु दु ।
ज्याझ्वलय् ब्वति मदुगु खःसां पुनर्निर्माण प्राधीकरणया प्रमूख कार्यकारी अधिकृत गोविन्द पोखरेल धाःसा सम्पदाया पुनर्निर्माण ठेक्का प्रथां जुइमज्यूगु खँय् सकारात्मक हे दुगु ग्वसाः खलकं न्ह्यथंगु दु । वयकःलिसे खँल्हाबल्हा जूबलय् थम्हं सम्पदाया पुनर्निर्माण ठेक्का प्रथां जुइकेमबीत पहल यायेगु धयादीगु ग्वसाः खलकं जानकारी ब्यूगु दु ।
‘शंखरापुरवासीपिनिगु भावना सम्बोधन जुइ’ - पाण्डे
लहनान्यूज | सिल्लाथ्व चतुर्दशि ११३७ (फेब्रुअरी १० २०१७)
ऐतिहासिक पहिचानयुक्त शंखरापुरयात मेगु नगरपालिकाय् समायोजन याये मज्यू धइगु माग यासें शंखरापुर नागरिक समाजया पाखें सङ्घीय मामिला तथा स्थानीय विकासमन्त्री हितराज पाण्डेयात थौं ज्ञापनपौ लःल्हागु दु ।
समाजया संयोजक रुपेशलाल श्रेष्ठं लःल्हानादीगु ज्ञापन पौ लःल्हाना कासें मन्त्री पाण्डें स्थानीय तह पुनर्संरचना यायेगु ज्या तसकं थाकूगु धासें शङ्खरापुरवासीयात छुं नं विरोधया ज्याझ्वः मयायेत इनाप यानादीगु खः । उगु झ्वलय् मन्त्री पाण्डें असन्तुष्टि खँ अध्ययन यानाः सुझावलिसें मन्त्रिपरिषदय् पेश यायेगु प्रतिवद्धता प्वंकादीगु खः ।
ज्ञापनपतिइ करिब ३द्वः दँ न्ह्यः राजा शङ्खदेवं मां बज्रयोगिनीया उजनय् न्हयगू गां कःघानाः द्वःछि खा छेँ अले उकियात माःगु क्यब, चकंगु ख्यः, चुक, ननि, देगः, तुं, हिति, पूखू, दयेकाः शंख आकारया देय् निर्माण यानातःगु ऐतिहासिक व पौराणिक शंखरापुर क्षेत्रयात बिस्कं हे स्थानीय तह दयेकेत माग यानातःगु दु ।
शङ्खरापुरयात सर्वदलीय संयन्त्रपाखें बिस्कं हे स्थानीय तह अथवा नगरपालिका कथं सर्वसम्मतिं पास यानाः जिल्ला प्राविधिक समितिइ सिफारिस याःसां स्थानीय तह पुनर्संरचना आयोगं कागेश्वरी मनहरा नगरपालिकाय् समाजोजन याःगु धासें शङ्खरापुरवासीपिन्सं विरोध याना वयाच्वंगु खः ।
