Display Style:
Column Style
मचा किपा च्वज्या क्वचाल
लहनान्यूज | थिंलाथ्व त्रयोदशि ११३७ (डिसेम्बर १२ २०१६)
जगतसुन्दर ब्वनेकुथिया ग्वसालय् २० ब्वनेकूया ग्प्न् व ीप्न् या विद्यार्थीपिनि दथुइ किपा च्वज्या ज्याझ्वः क्वचाल ।
ज्याझ्वलय् २० ब्वनेकूया ३८ विद्यार्थीपिन्सं थीथी किपा च्वःगु खः । छुं नं विषय दुने लिमकुंकूगु ज्याझ्वलय् मस्तयसं थः यःयः कथं भौचा, छुँचा निसें कयाः सिमा, क्यब आदि किपात च्वःगु खः ।
धेंधें बल्लाः मयाःसे ज्याझ्वलय् ब्वति काःपिं सकल विद्यार्थीपिन्त खादां न्ययेकाः देछा लःल्हाःगु खः । ब्वतिमि विद्यार्थीपिं लिसें ब्वनेकूयात तकं मू पाहां कलाकार एकाराम सिंहं दसिपौ लःल्हानादिल सा जगतसुन्दर ब्वनेकुथिया प्रिन्सिपल माया मानन्धरं खादां न्ययेकादिल ।
देछा धाःसा किपा च्वज्या कासाया कजि लिसें ब्वनेकुथिया संचालक समितिया दुजः अनाररत्न बज्राचार्यं देछा लःल्हानादिल । सकल ब्वतिमि विद्यार्थीपिन्त ज्वलिंज्वः हे देछा लःल्हाःगु खः ।
मस्तयसं पोष्टर, एक्रलिक लिसें पेन्सिल कलर छ्यलाः किपात च्वःगु ख ।
मिसा पुचलं जिथि नागरीकपिन्त हन
नृपेन्द्रलाल श्रेष्ठ | थिंलाथ्व एकादशि ११३७ (डिसेम्बर १० २०१६)
१३क्वःगु राष्ट्रिय ज्यापु दिवसया लसताय् झी ज्यापु मिसा पुचलं येँय् ज्याथः, जिथि नागरीकपिन्त हंगु दु ।
पुलचं येँय् छगू ज्याझ्वः यासें ज्याथःजिथिपिन्त हंगु खः । ज्याझ्वलय् थःथःगु ख्यलय् योगदान ब्यूपिं ज्याथःजिथिपिन्त खादां न्ययेकेगुया लिसें स्वांमाः कोखायेकाः हनापौ लिसें हंगु खः ।
ज्याझ्वलय् नेवाः न्ह्यलुवा मदुम्ह ई. मोहनकृष्ण डंगोलया लुमन्तिइ छगू मिनेट मौन धारण नं याःगु खः ।
नुगः खँ तयेगु झ्वलय् ज्यापु संस्कृति विकास कोष लिसें झी ज्यापु मिसा पुचःया संरक्षक अले पूर्वमन्त्री तीर्थराम डंगोल, ज्यापु महागुथि येँ महानगर समितिया नायः बाबुराजा महर्जन, श्री ज्यापु महागुथिया नायः सन्तु महर्जन, ज्यापु संस्कृति विकास कोषया नायः मंगल सिंह, कोषया छ्यान्जे सन्तकुमार महर्जनलिसें नं नेवाः संस्कृतिया विकासय् ज्यापु समुदायया तःधंगु योगदान दुगु खँय् बः बियादीगु खः । वयकःपिन्सं थुगुसीया ज्यापु दिवस झःझः धायेक क्वचायेकेगु नितिं ग्वाहालि यायेत सकसितं आव्हान नं यानादिल ।
ज्याझ्वःया मू पाहां संस्कृति, पर्यटन तथा नागरीक उड्डयन मन्त्री जीवन बहादुर शाहिं ज्यापु संस्कृति व ज्यापु दिवसया निरन्तरताया नितिं सरकारं फक्व ग्वाहालि यायेगु प्रविवद्धता प्वंकादिल । ज्याझ्वलय् पुचःया कार्यकारीणि दुजः ज्ञानीमैयाँ महर्जनं लसकुस यानादिल सा न्वकू सुनिता महर्जनं सुभाय् देछानादिल ।
ज्याझ्वः पुचःया नायः छोरि डंगोलया सभानायकय् क्वचाःगु खः ।
राससया प्रधान सम्पादक शाक्य सम्मानित
नृपेन्द्रलाल श्रेष्ठ | थिंलाथ्व एकादशि ११३७ (डिसेम्बर १० २०१६)
१३ वडा ग्वाहालि पुचःया ग्वसालय् थौं येँय् न्हूदँ नेपाल सम्वत ११३७या लसताय् भिन्तुना कालबिल ज्याझ्वः जूगु दु ।
भिंतुना ज्याझ्वलय् १३ वडा दुनेया विशिष्ट व्यक्तित्वपिन्त हंगु खः । उकिया झ्वलय् राष्ट्रिय समाचार समितिया प्रधान सम्पादक राजु शाक्ययात हंगु दु ।
शाक्ययालिसें अन्तर्राष्ट्रिय धावक वैकुण्ठ मानन्धर व समाजसेवी बेदराज शर्मा रुपाखेतीयात नं हंगु खः । सम्मानित व्यक्तित्वपिन्त ज्याझ्वःया मू पाहां जनकवि दुर्गालाल श्रेष्ठं हनापौ लःल्हानादिल ।
ज्याझ्वलय् जनकवि श्रेष्ठया लिसें समाजसेवी प्रा.डा.तुलसीनारायण श्रेष्ठ, आदिवासी जनजाति वकिलपिनिगु संस्था लाहुर्निपया छ्यान्जे शंकर लिम्बु, राजनैतीक विश्लेषक सीके लाल, कृष्णभक्त हाछेथुं राज्यं आदिवासी जनजातिया अधिकार सुनिश्चित यायेमाःगु खँय् बः बियादीगु खः ।
ज्याझ्वःया उलेज्या जनकवि श्रेष्ठं त्वाःदेवाय् मत च्याकाः यानादिल । ज्याझ्वः पुचःया नायः जीतबहादुर मानन्धरया सभानायकय् जूगु खः ।
स्वनिगलय् नेवाःत अल्पमतय् मलाः
लाहुर्निपया छ्यान्जे शंकर लिम्बुं सरकारं देशया जनताया नयेगु नसा, च्वनेगु बाय् व पुनेगु लंया सुनिश्चिता यायेमाःगु अवस्थाय् सडक विस्तारया नामय् राज्य हे स्वनिगःया आदिवासी नेवाःतयगु बाय् लाका कयाच्वंगु धयादिल । वर्तमान संविधानं नेवाःलिसें थारुतयगु अस्तित्वयात संकटय् लाकूगु लिम्बुया धापू खः ।
अथे हे जनकवि दुर्गालाल श्रेष्ठं नेवाःत च्यः बुद्धि जुयाः झं झं ल्यूने लानावनाच्वंगु धयादिल । आः नं च्यः बुद्धि त्वःताः अधिकार प्राप्तिया नितिं न्ह्यज्याःसा थःगु अधिकार कायेफइगु खँ श्रेष्ठं कुलादिल ।
व हे कथं, राजनैतीक विश्लेषक सीके लालं मोहनिया इलय् सकलें थःथःगु छेँय् वनीगु इलय् स्वनिगःया वास्तविक जनसंख्या खनेदइगु धयादीगु खः । भाजु सीके लालं नेपालया जनगणनाया तथ्यांक स्वयेबलय् स्वनिगलय् नेवाःत अल्पमतय् लाःगु खनेदुसां मतदाता नांधलः व नागरीकताया आधारय् स्वयेबलय् नेवाःत अल्पमतय् खनेमदुगु प्रष्ट यानादिल ।
क्षेत्रपाटिइ आपतकालीन उपचार तालीम न्ह्यात
लहनान्यूज सम्वाददाता | थिंलाथ्व षष्ठी ११३७ (डिसेम्बर ५ २०१६)
नेपाल एम्बुलेन्स सर्भिसया ग्वसालय् क्षत्रपाटी निःशुल्क चिकित्सालय (अस्पताल)य् आपतकालिन स्वास्थ्य उपचार तालिम न्ह्याःगु दु ।
अमेरिकाया स्टेन फोर्ड युनिभर्सिटी इमरजेन्सी मेडिकल डिपार्टमेन्टपाखें उगु तालिम ब्यूगु खः । इन्टरनेश्नल मेडिकल कोप्र्सं ग्वाहालि याःगु थुगु तालिमय् न्ययम्हेस्यां ब्वति काःगु खः ।
थुगु तालिम स्वला तक न्ह्याइ ।
गद्यगुरु निष्ठानन्दया १६०क्वःगु बुदिं हन
लहनान्यूज सम्वाददाता | थिंलाथ्व चतुर्थी ११३७ (डिसेम्बर ३ २०१६)
नेपालभाषा साहित्यया गद्यगुरु प. निष्ठानन्द बज्राचार्यया १६०क्वःगु बुदिं थौं येँय् हंगु दु ।
निष्ठानन्द स्मृति गुथिया ग्वसालय् येँया ओमबहालय् छगू ज्याझ्वः यासें गद्यगुरु बज्राचार्यया बुदिं हंगु खः । गुथिया नायः प्रा. सुवर्ण शाक्यया सभानायकय् जूग ज्याझ्वलय् मू वक्ता नेवाः न्ह्यलुवा नरेशबीर शाक्यं गद्यगुरुया नेपालभाषा साहित्य व बौद्ध धर्म ख्यलय् योगदानया बारे चर्चा यानादीगु खः ।
नेवाः न्ह्यलुवा शाक्यं ललितविस्तरलिसें थीथी बौद्ध ग्रन्थयात गद्यगुरुं आम सर्वसाधारणं थुइगु भासं पिकयाः थुकिया शिक्षायात सकसिगु छेँय् छेँय् थ्यंकेत तःधंगु ग्वाहालि जूवंगु धयादिल । ललितविस्तर धयागु वुद्ध लीला खःगु शाक्यया धापू खः ।
ज्याझ्वलय् ओमबहालय् दुगु गद्यगुरुया झ्वाताय् स्वांमाः नं कोखायेकूगु खः । गुथिया नायः शाक्य, नेवाः न्ह्यलुवा शाक्यं गद्यगुरुया झ्वाताय् स्वांमाः देछायेधुंकाः ज्याझ्वmलय् उपस्थित सकसिनं स्वां देछाःगु खः ।
ज्याझ्वलय् लसकुस लिसें सुभाय् न्वचु नं प्रा. शाक्यं तयादिल ।
