सञ्चार लिसे सूचना प्रविधिमन्त्री पृथ्वीसुब्बा गुरुङं फेसबुक, इन्स्टाग्राम लगायतया सामाजिक सञ्जाल दर्ता याः मवसा प्रतिबन्ध तयेगु जुइ धका धयादीगु दु।

सञ्चारमन्त्री गुरूङं छगु ज्याझ्वलय् न्ववानादीसे नेपालय् दर्ता मजुल धाःसा सामाजिक सञ्जाल चले मजुइ धका चेतावनी बियादीगु दु। मन्त्री गुरूङं धयादीगु दु, ‘जिमिसं आः दर्ता मजुल धाःसा, प्वाइन्ट अफ कन्टयाक्ट तोके याना च्वंगु आः टिकटक जक दु। जिमिसं मेटायात सःता च्वनागु दु, वइ कि मवइगु स्वयेगु ल्यःदनिइ।

मवसा नेपालय् चले याके बिइ मखु।’ सञ्चारमन्त्री गुरुङं सामाजिक सद्भाव व धार्मिक सहिष्णुता स्यकेगु कथं अभिव्यक्ति बिइगु सामाजिक सञ्जालयात कारबाही यायेगु निति हे सामाजिक सञ्जालसम्बन्धी विधेयक हयागु खः। सामाजिक सञ्जाल अराजक जुया वनाच्वंगुलि व उकियात नियमन यायेमाःगुलि आम नागरिक तयेस हे माग यागु कारणं सामाजिक सञ्जाल सम्बन्धी विधेयक हयागु खः धका धयादीगु खः।

अष्ट्रेलियाया निंतिं नेपाःया राजदूत चित्रलेखा यादवं अनया गभर्नर जनरल साम मोस्टिन न्ह्यःने मङ्गलबाः क्यानबेराय् ग्वसाः ग्वःगु विशेष समारोहय् थःगु ओहोदाया दसिपौ न्ह्यब्वयादीगु दु।

ओहोदाया दसिपौ न्ह्यब्वयादी धुंकाः राजदूत यादवं गभर्नर जनरललिसे नापलानादिगु खः। उगु ज्याझ्वलय् राजदूत यादवं नेपाःया राष्ट्रपति रामचन्द्र पौडेलपाखेंया भिंतुना देछानादीगु क्यानबेराय् च्वंगु नेपाःया राजदूतावासं धाःगु दु।

राष्ट्रपति पौडेल नेपाल भ्रमणया ब्वना राजदूत यादवं गभर्नर जनरलयात बियादीगु खः। नापं गभर्नर जनरल व नेपाःया राजदूत दथुइ नेपाल–अष्ट्रेलिया सम्बन्धया थी थी पक्षय् नापं मंकाः भिं जुइगु व च्यूताया विषयय् बिचाः कालबिल जूगु खः। थवंथः समझदारी, भलसा व ग्वाहालिइ आधारित निगु देय् दथुइ सम्बन्धयात अझ सुदृढ यायेत न्ह्यानाच्वनेगु प्रतिबद्धता राजदूत यादवं बियादीगु दूतावासं पिथंगु विज्ञप्तिइ धयातःगु दु।

ओहोदाया दसिपौ लःल्हायेगु समारोहय् अष्ट्रेलिया सरकारया उच्चपदस्थ अधिकारीत व नेपाःया दूतावासया कर्मचारीतय्सं नं ब्वति काःगु खः।

प्रधानमन्त्री केपी शर्मा ओलीं दक्कोसिया आत्मविश्वासं ज्या यातकि आः नेपाः लिउने वनेमालिगु छु न कारण मदु धका धयादीगु दु।

श्रीपञ्चमीया लसताय् फिनिक्स इस्पिरेसन व इम्प्रेरियल वल्ड स्कुुलपाखे थौ ‘युवा अन्तक्र्रिया कार्यक्रम’ य् प्रधानमन्त्री ओलीं विकासया पूर्वाधार दयका व आधुुनिक गुणस्तरीय शिक्षा बिया ल्याय्म्हतय्त विश्व बजारय् प्रतिस्पर्धी दयकेगु जुइ धका संकल्प यानादीगु दु।

“विदेशय् वना नेपाःमि तय्स मेपिनिगु देय् दयकूगु दु। आः झीसं थःगु देय् थःपिन्स हे दयकेत ध्यान बिइमाः। झीसं छगु करोड ल्याय्म्ह थःगु देशय् दु। उकिइ झीसं झीगु देय् दय्के।’’, विद्यार्थीतय्त इनाप यानादीसे प्रधानमन्त्री ओलीं धयादीगु दु, “थुगु देय्या गरिबी क्वचाय्केमाःगु दु। देशय् स्वाधीनताया ध्वाँय् क्वछिकेगु ज्या यायेमज्यु व देशयात समृद्ध नेपाल दयकेमाः।’’ धका वयकलं धयादीगु खः।

थ्व हे स्वदँय् प्रेस काउन्सिल नेपालय् १ हजार ६ सय ६६ अनलाइन सञ्चारमाध्यम सूचीकरण जूगु दु। न्हुगु दर्तायाःगु अनलाइनया सम्पादक व सञ्चालक तय्त पत्रकार आचारसंहिताया अभिमुखीकरण बिइगु झ्वलय् काउन्सिलं उगु विवरण सार्वजनिक याःगु खः।

थीथी ख्यलं सञ्चार ख्यलय् दुहावइपिन्त पत्रकार आचारसंहिताया दृष्टिकोणपाखे बिइगु थज्यागु कक्षा उपयोगी जुइ धका प्रेस काउन्सिलया अध्यक्ष बालकृष्ण बस्नेतं धयादीगु खः।

प्रेसयात दुगु स्वतन्त्रताया अर्थ यः यःथे अधिकार वा स्वच्छन्दता मजुगु धासे युट्युव नाप सामाजिक सञ्जाल छ्यलेगुलि दक्को सञ्चारमाध्यम जिम्मेवार जुइमाः धका धयादीगु खः।

नेपाः सरकारया प्रवक्ता नाप सञ्चार लिसे सूचना प्रविधिमन्त्री पृथ्वीसुब्बा गुरुङं सत्ता साझेदार निगु तधःगु दल नेपाली कांग्रेस व नेकपा (एमाले) मिले जुगु इलय् तक सरकारयात छु जुइ मखु धका धयादीगु दु।

विपक्षी दलं ताः ईतक सरकार न्ह्याइ मखु धका धयाच्वंगुपिन्त लिसः बिइगु झ्वलय् अथे धयादीगु खः। सोमवाः लमजुङया मस्र्याङदी गाउँपालिका –८ सिमलचौरय् दयका च्वंगु भूमिगत सिँचाइ आयोजनाया उलेज्या यायेगु झ्वलय् सञ्चारमन्त्री गुरूङं अस्थिर सरकार जुगुलि देशय् व्यवस्थाया हे न्ह्यसः वंगुलि निगु तधःगु दल मिले जुइमाःगु खः धका धयादीगु खः।