जनता समाजवादी पार्टी नेपालया नेता मनिष सुमनं थःगु पार्टीं एमाले–कांग्रेसया सरकारयात समर्थन याइगु जुगु दु।

वयकलं कांग्रेस–एमाले गठबन्धनया सरकारय् वनेगु व मवनेगु धइगु पार्टीया बैठकं क्वछिइगु धका धाःगु दु। संसदय् निगु तघःगु दल कांग्रेस व एमाले संविधान संशोधनया एजेन्डानाप ‘राष्ट्रिय सहमतिया’ सरकार दयकेगु सहमत जूगु खः।

निर्वाचनलिपा निदँ दइगु इलय् माओवादीपाखे पालंपाः सरकार दयकेगुलि धोका बिइगु धका धाःगु दु। आः न्हुगु सरकारय् दक्को दल दुथ्याका सहमतिया सरकार दयकेगुलि न्ह्या वना च्वंगु दु।

शेयर बजाः थौ निगु अङ्कं थहावःगु दु। थौ शेयर बजाः परिसूचक नेप्से ४७ दशमलव ०४ अङ्कं थहावना २१ सय दशमलव ४३ विन्दुइ थ्यःगु दु।

सत्ता समीकरणय् ह्यूपाः वइगु जुइवं उकिया प्रभाव शेयर बजारय् खने दुगु खः। थौ दक्को समूहया शेयर थहावःगुलि बीमा, उत्पादन, व्यापार, विकास बैंक, माइक्रोफाइनान्स, होटल, फाइनान्स समूहया शेयर तधःगु ल्याखय् थहावःगु दु।

थौ हिमालयन डिस्टिलरी कम्पनीया शेयर साढे ८ प्रतिशतं थहावःगु दु। दकलय् अप्पो उपकार लघुवित्त व हिमालयन ऊर्जा विकास कम्पनीया शेयर धासो ६ प्रतिशत स्वया अप्पो कुहावःगु दु।अथेहे थौ कारोबार रकम न थहावःगु दु।

म्हिगः झन्डै ३ अर्बया कारोबार जूगु खःसा थौ ३ सय १५ गु कम्पनीया १ करोड १६ लाख कित्ता शेयर ४ अर्ब ५७ करोड रुपैयाँया कारोबार जूगु खः। थ्व स्वया न्ह्यः निक्वःतक सकारात्मक सर्किट ब्रेक जुइवं छु ईया निति कारोबार दिकेमाःगु खः।

नेकपा एमालेया सचिवालय बैठक सुरू जूगु दु। पार्टी मुख्यालय च्यासलय् एमालेया सचिवालय बैठक सुरू जूगु खः।

बैठकय् नेपाली कांग्रेसनाप सत्ता समीकरण लगायतया विषय सहलह जुइ धका धाःगु दु। नेकपा एमालें नेकपा माओवादी केन्द्रनाप सत्ता समीकरण त्वाःथला नेपाली कांग्रेसनाप सत्ता साझेदारी यायेत्यःगु खः।

सोमवाः चान्ह्यः निगु दल कांग्रेस व एमालें पालंपाः सरकारया नेतृत्व यायेगु लगायतया विषय समझदारी जूगु खः। अय्न उगु समझदारी पौ सार्वजनिक जूगु मदुनि।

सत्ता समीकरण हिलिइगु जुइवं सेयर बजारय् निक्वःतक सर्किट ब्रेक जुगु दु। कारोबार सुरु जुगु १ मिनेटय् बजार परिसूचक नेप्से ४ प्रतिशतं थहावना न्हापागु सर्किट ब्रेक जूगु खः।

२० मिनेटलिपा खुले जूगु बजाः हाकन ५ प्रतिशत (थप १ प्रतिशत विन्दु) न थहावनेवं निक्वःगु सर्किट ब्रेक जूगु खः। वया लिपा ४० मिनेटया लागि कारोबार स्थगित जूगु खः।

नेकपा एमालें सचिवालय बैठक सःतूगु दु। बैठक न्हिनय् ३ बजे सःतूगु दु। बैठकय् नेपाली कांग्रेसनाप सत्ता समीकरणलगायतया विषय सहलह यायेत एमालें सचिवालय बैठक सःतूगु खः।

नेकपा एमाले नेकपा माओवादी केन्द्रनाप सत्ता समीकरण त्वःता नेपाली कांग्रेसनाप सत्ता साझेदारी यायेत न्ह्यने वःगु खः। सोमवाः चान्ह्यः निगु दल कांग्रेस व एमाले पालंपाः सरकारय् नेतृत्व याइगु विषय समझदारी यायेत्यःगु खः।

थ्व हे विषय सहलह यायेगु निति नेपाली कांग्रेसं पदाधिकारी बैठक व रास्वपां सचिवालय बैठक सःतूगु दु।