नेपाली कांग्रेसं पदाधिकारी बैठक सःतूगु दु। बैठक थौ सुथय् ९ बजे सभापति शेरबहादुर देउवाया निवास बुढानिलकण्ठय् सःतूगु दु।

बैठकय् नेकपा एमालनाप सत्ता साझेदारी जुगु समझदारीयात अनुमोदन याइगु विषय सहलह जुइगु दु धका छम्ह नेतां जानकारी बिःगु दु।

कांग्रेस–एमाले दथुइ सोमवाः चान्ह्यः सत्ता साझेदारी यायेगु व सरकारया नेतृत्व पालंपाः यायेगु समझदारी जूगु दु।

अय्न उगु समझदारीयात पुर्णता बिइगु ल्यःदनिइ। उगु समझदारी पतिइ थौ पुर्णता बिइत निगु दलया शीर्ष नेतातय्स ल्हाःचिं तयेगु तयारी दु।

कांग्रेस व एमाले दथुइ केपी ओली निदँया लागि प्रधानमन्त्री, शेरबहादुर देउवा ल्यःदुगु ईनिसे चुनावतक प्रधानमन्त्री जुइगु समझदारी जूगु दु।

सुरुया इलय् एमाले अध्यक्ष ओलीं, लिपागु चरणय् कांग्रेस सभापति देउवां सरकार चले याइगु जुगु दु। संविधानया धारा ७६.२ अन्तर्गत हे सरकार दयेकिइगु जुगु दु। यलय् एमाले महासचिव शंकर पोखरेल व कांग्रेस प्रमुख सचेतक रमेश लेखक दथुइ छगु समझदारीया खाका तयार याःगु दु।

खाका तयार याये धुका नेतापि सभापति देउवा व अध्यक्ष ओली दथुइ सहलह याइगु जुगु दु। सहमति कथं प्रदेश सरकारय् स्वगु स्वगु सरकार दयकिइगु जुगु दु। मधेश प्रदेशय् धाःसा मधेशकेन्द्रित दलया नेतृत्वय् सरकार दयका बिइगु समझदारी जूगु दु। प्रतिनिधिसभा व राष्ट्यि सभा निगु हे सिट ल्याखय् पुनर्विचार याये फइगु सम्भावनाबारे तक सहलह जुगु दु।

पालिकाया ल्याः ७५३ न क्वकया वडाया ल्याः अप्पोकेत संविधान संशोधन प्रस्तावय् सहमति याइगु सम्भावना दु । संविधान पुनरावलोकन यायेत पूर्वप्रधानन्यायाधीश कल्याण श्रेष्ठया नेतृत्वय् समिति यायेगु तयारी दु धका न स्रोतं धाःगु दु।

प्रदेश सभाय् समानुपातिक चिइका प्रत्यक्ष निर्वाचितपाखे जक तयेगु विकल्पबारे निगु दल दथुइ सहलह जुगु खः। देउवा व ओलीं ल्हाःचिं तये धुका जक सहमतियात पूर्णता बिइगु तयारी दु।

नेपाली कांग्रेस व नेकपा एमाले दथुइ न्हुगु सरकार दयकेगु सहमति जूगु दु।सोमवाः चान्ह्यः निगु दल दथुइ सत्ता सहकार्य यायेगु सहमति जुगु दु धका स्रोतं पुष्टि याःगु दु।

यलय् छगु होटलय् निगु दलया निगु तहया नेतातय्स लिखित सहमति यायेगु निति मस्यौदा दय्का च्वंगु दु। निगु दल दथुइ पालंपाः सरकारया नेतृत्व यायेगु व न्हापागु चरणय् नेकपा एमालेया अध्यक्ष केपी शर्मा ओलीं सरकारया नेतृत्व यायेगु सहमति याःगु दु।

एमालें अर्थ नाप गुगु मन्त्रालय व कांग्रेसं गृहनाप झीगु मन्त्रालय काइगु जुगु दु। निगु दल दथुइ संविधान संशोधनया लागि सुझाव बिइगु निति छगू समिति दयकेगु न सहमति जूगु दु धका स्रोतं जानकारी बिःगु दु।

नेपाली कांग्रेसया नेता जितेन्द्र नारायण देव नेकपा एमाले दुहावःगु दु। एमाले पार्टी कार्यालय, च्यासलय् थौ सोमवाः छगु ज्याझ्वः दथुइ देवनाप मेपि नेता एमालेय् दुहावःगु दु।

सप्तरीया देव ताःईनिसे एमालेया राजनीति यानाच्वम्ह खः। देव मधेसी जनअधिकार फोरम लोकतान्त्रिकपाखे संविधानसभा सदस्य जूम्ह खः।

विजयकुमार गच्छदारया नेतृत्वय् फोरम लोकतान्त्रिक कांग्रेसय् विलय जूगुलि वया नापं वम्ह खः। कांग्रेसपाखे राष्ट्रियसभा सदस्य जुम्ह खः।वंगु २० फागुन २०८० य् कार्यकाल क्वचाःगु खः।

नेपाल पत्रकार महासंघया न्याम्ह पूर्वअध्यक्षतय्स याकन विवाद ज्यका निर्वाचनय् वनेत इनाप याःगु दु।

थौ आइतवाः पूर्वअध्यक्षतय्स छगू मंकाः वक्तव्य पिकया महासंघया वैधानिक संरचना दुन् विवाद ज्यका याकन हे नर्वाचनय् वनेत केन्द्रीय अध्यक्ष बिपुल पोखरेलनाप केन्द्रीय समितियात इनाप याःगु दु।

महासंघया पूर्वअध्यक्षपि किशोर नेपाल, सुरेश आचार्य, तारानाथ दाहाल, विष्णु निष्ठुरी व शिव गाउँले न थौ आइतवाः थथे इनाप याःगु खः।