थ्यन यल जिल्लाय् असोज १२ गते खुसि बा वया व चलखं याना सीपिनिगु ल्याः ४० म्ह थ्यःगु दु। थौ सुथय् खुम्ह सीपि लुइवं सीपिनिगु ल्याः ४० म्ह थ्यःगु दु।

यल प्रहरीया कथं माहाँकाल गाउँपालिका–२ ठोस्ने खोला ४० दँया राममाया स्याङ्तान, वया काय् १४ दँ दुम्ह अजय, ११ दँ दुम्ह सुवास व गु दँ दुम्ह म्हाय् सलिना मदुगु खः।

माहांकाल गाउँपालिका वडा नम्बर २ लक्ष्यबासय् गुदँ दुम्ह आयुष स्याङ्तान मदुगु खः।अथेहे माहाँकाल गाउँपालिका वडा नम्बर ३ गोटीखेल च्वम्ह ईश्वर तिमल्सिना न सीना च्वंगु लुगु खः।

वःगु असोज १२ गतेनिसे तनाच्वंगु खः।वया मां व जहान न सम्पर्कविहीन जूया च्वंगु खः।प्रहरीया कथं यल जिल्लाय् अझ न झीम्ह सम्पर्कविहीन जूयाच्वंगु दु। थ्व स्वया न्ह्यः न्ह्यय्म्ह जक सम्पर्कविहीन जुयाच्वंगु खः।

सरकारं खुसि बा वया व चलः वया यक्कोे धनजनया क्षति जुगुलि स्वन्हु तक राष्ट्रिय शोक घोषणा याःगु दु।

सोमवाः सरकारी निवास बालुवाटारय् च्वंगु बैठकं थौ मंगलवाःनिसे स्वन्हु तक राष्ट्रिय शोक घोषणा यायेगु निर्णय जूगु दु धका सरकारया प्रवक्ता सञ्चार लिसे सूचना प्रविधिमन्त्री पृथ्वी सुब्बा गुरुङं जानकारी बिउगु दु।

राष्ट्रिय शोकया इलय् सरकारी कार्यालयय् बच्छि ध्वाँय् क्वछुकेगु जुइसा सार्वजनिक बिदा धाःसा जुइमखु। प्रधानमन्त्री ओली म्हिगः सोमवाः बहसन जक अमेरिका भ्रमण सिधय्का लिहावःगु खः।

ओली लिहावयेवं च्वंगु मन्त्रिपरिषद बैठकं प्रधानमन्त्री दैवीप्रकोप राहत कोषय् सरकारं १ अर्ब रुपैयाँ बिइगु निर्णय याःगु दु। उगु कोषय् प्रधानमन्त्री व मन्त्रीतय्स लच्छिया तलब बिइगु जुगु दु।

नेपाल आयल निगमं पेट्रोल, डिजेल, मचिकं व हवाइ इन्धनया भाः कुहावःगु दु।

सोमवाः बहनि च्वंगु आयल निगम सञ्चालक समितिया बैठकं पेट्रोल लिटरं छतका, मचिक नाप डिजेल लिटरं नितका व हवाइ इन्धनया भाः लिटिरं खुतका कुकागु दु।

अथेहे सुर्खेत व दाङय् पेट्रोल लिटर १५७ व डिजेल नाप मतिकं लिटरं १४६ तका कायम याःगु दु सा स्वनिगलय्, पोखरा व दिपायल क्षेत्रय् पेट्रोल लिटरं १५८ तका व डिजल व मटिकं लिटरं १४७ तका कायम याःगु दु।

मदिक्क वा वया सीपिनिगु ल्याः २०५ थ्यःगु दु।

वंगु असोज ११ गतनिसे देय् या थी थी थासय् मदिक्क वाः वया खुसि वा वया व चलः वया सोमवाः न्हिनय् तक सीपिनिगु ल्याः २ सय ५ म्ह थ्यःगु दु।उगु विपदय् लाना स्वनिगलय् ५६ म्ह, कोशी प्रदेशय् १७ म्ह, मधेश प्रदेशय् न्याम्ह, बागमती प्रदेशय् १ सय २५ म्ह, लुम्बिनी प्रदेशय् निम्ह याना २ सय ५ म्ह सीउगु दु धका प्रहरीया केन्द्रीय कार्यालयं प्रकाशन याःगु बुलेटिनय् उल्लेख दु।

अथेहे खुसि वा वया व चलः वया स्वनिगलय् २४ म्ह, कोशी प्रदेशय् १३ म्ह, मधेश प्रदेश च्याम्ह, बागमती प्रदेशय् ८५ म्ह याना १ सय ३० म्ह घाःपाः जूगु दु।अथेहे स्वनिगलय् २ हजार १ सय ५५ म्ह, कोशी प्रदेशय् २ सय ९० म्ह, मधेस प्रदेशय् ३५ म्ह, बागमती प्रदेशय् ७ सय ४५ म्ह व गण्डकी प्रदेशय् ९ सय ९७ म्ह याना जम्मा ४ हजार २ सय २२ म्हेसित उद्दार याःगु दु सा २४ म्ह बेपत्ता जूगु दु।

उमित मालेगु ज्या जुयाच्वंगु दु।

प्रधानमन्त्री केपी शर्मा ओली स्वदेश लिहावःगु दु। झिन्हुया अमेरिका भ्रमण क्वचायेका सोमबार प्रधानमन्त्री ओली स्वदेश लिहावःगु खः।

वंगु असोज ४ गते ओली संयुक्त राष्ट्रसंघया ७९ क्वःगु महासभाय् ब्बति कायेगु निति अमेरिकाय् वःगु खः। संयुक्त राष्ट्रसंघया ७९ क्वःगु महासभाय् ब्बति कायेगु झ्वलय् प्रधानमन्त्री ओलीं असोज ४ गते न्युयोर्क थ्यःगु खः।

प्रम ओलीं असोज १० गते महासभाय् सम्बोधन याःगु खः।