येँ महानगरपालिकाया मेयर बालेन साहयात कार्यपालिका सदस्य अनिता कार्की ढोलीं गम्भीर न्ह्यसः तःगु दु। ‘छिं सिंहदरबार च्याकेगु धया च्वगुलि महानगरपालिकां बिगु दरबार दु, व दरबार च्याकलकि अज्यागु अवस्थाय् छु जुइ?’

ढोलीं मेयर साहयात उगु न्ह्यसः तःगु खः। थौ नीति तथा कार्यक्रमय् सहलह यायेगु ज्याझ्वय् वयकलं अथे न्ह्यसः तःगु खः। मेयर साहं सामाजिक सञ्जालय् च्वंगु स्टाटसया खण्डन यासे वयकलं कार्यपालिकाय् सहलह मयासे हःगु नीति तथा कार्यक्रम न्ह्यब्बःगु मेपिगिनु अधिकार हनन जुगु दु धका धयादीगु खः।

कार्यपालिकाय् सहलह मयासे बलजफ्ती नगरसभाय् नीति तथा कार्यक्रम हःगुलि स्वम्ह वडाध्यक्षं हःगु मंकाः संशोधन प्रस्तावय् वयकलं सहमति याःगु दु।

येँ महानगरपालिका २२ नम्बरया वडाध्यक्ष चिनीकाजी महर्जनं मेयर बालेन्द्र साह न फरक मत व विचाःयात निषेध यायेत स्वगु दु धका धाःगु दु।

थौ सोमवाः च्वंगु नगर सभाया १५ क्वःगु अधिवेशनया स्वक्वःगु बैठकय् थःगु खँ तयेगु झ्वलय् महर्जनं फरक मत तगुलि हे मेयर साहया समर्थकतय्स थःत यक्को हे आक्रमण याःगु दु धका धाःगु खः। ‘थन स्वम्ह सिनियर दाजुपिन्त न्ववाय् धुकुगु दु। झीसं निदँ छू बालागु ज्या याये धुनगु दु, गुलि ताःलात।

बामलागु ज्यां सय्केमाः, द्धःगु पाखे गुरु कथं हनेमाः’, वयकलं धयादीगु दु, ‘बजेट खर्चया अनुपात दुःख लगे जू, आःतक ३० प्रतिशत जक खर्च जुगु दु। मेमेगु महानगर व पालिकाया तुलना स्वया थ्व तसक कमजोर खः।’ वयकलं थः एमालेया सदस्य खः धका धयादीसे। ‘जिगु गौरवमय पार्टी नेकपा एमालेया सदस्य खः जि।

थः राजनीतिक आन्दोलनय् वये न्ह्यः २०४२ सालय् न्हुदँया भिन्तुना जुलुसय् वनेगु झ्वलय् कथि नइम्ह खः, वयालिपा जि निरन्तर निरंकुशताविरुद्ध ल्वानाच्वनागु दु’, वयकलं धयादीगु दु, ‘जि थ्व हे चाय् हुर्के जूम्ह मनू खः। थ्व हे चाय् न्हुदँया भिंतुना ज्याझ्वलय् कथि नयेगु बालागु मखु।

उगु इलय् वाक स्वतन्त्र मदु, न्ववाय् मदु, उगु व्यवस्थाया विरोध याना जि थन तक थ्यःगु खः।’ थः वाक स्वतन्त्रयात पक्षम्ह खः धका धयादीसे फरक विचाः तइपिन्त दबे मयायेत मेयर साहयात इनाप याःगु खः। ‘फरक खँ तइपि, मतयात, विचारयात दब मयायेस्य सम्मान याये सयके’, वयकलं धयादीगु दु, ‘आःवनिछे विरोधय् वइगु खँयात न सम्मान यायेमाः।’

येँ महानगरपालिका वडा नं. १५ या वडाअध्यक्ष ईश्वरमान डंगोलं मेयर बालेन्द्र साहं न इलय् ब्यलय् म्वा मदुगु द्धपः बिइ याना वयाच्वंगुलि थःत न्ह्यः तक मवः धका धाःगु दु।

थौ सोमवाः च्वंगु नगर सभाया १५ क्वःगु अधिवेशनया स्वक्वःगु बैठकय् न्ववायेगु झ्वलय् वडा अध्यक्ष डंगोलं थःम्हेसिया मदिक्क ग्वहालि यानाच्वंसा मेयरं म्वा मदुगु द्धपः बियाच्वंगुलि थःत तसकं दुःख जुगु दु धका धयादीगु दु।

‘जिमिसं सुयात विभेद मयाना। अय्न सामाजिक संजालय् थथे म्वामदुगु द्धपः फ्य मागुलि थः दनेत तक थाुकुगु दु’, वयकलं धयादीगु दु, ‘यक्को द्धपः बिया न्ह्यः मवइगु ज्या छाय् यात ? राजनीतिक लेनदेन याना सहमति याःगु द्धपः बिया हल। जिमिसं छु लेनदेन यानागु दु? धया बिइमाल।’ ‘जिपि स्वम्हेसिया मिले जुया छु लेनदेन यानागु दु ?

मेपि नाप छु लेनदेन यानागु दु? जिमिसं गन लेनदेन यानागु दु जिमित धयाबिइमाद’,धका मेयर साहयात धागु खः। अथेहे धाःगु दु, ‘जिपि जनप्रतिनिधि, अबुझ, झोले धका धाइ थुकिइ छु न आपत्ति मदु । अय्सा छु जिपि दक्को जनप्रतिनिधि अथे खःला? जिमिस ग्वहालि यासा छाय् थथे द्धपः बिया वयाच्वंगु खः।

पोषराज पोखरेल नेपाल प्रहरीइ प्रहरी अतिरिक्त महानिरीक्षक (एआईजी) बढुवाय् सिफारिस जूगु दु।

बढुवा समितिइ च्वंगु बैठकं पोखरेलयात एआईजी बढुवाया लागि सिफारिस याःगु खः

पोखरेल प्रहरी प्रधान कार्यालय महिला बालबालिका नाप ज्येष्ठ नागरिक सेवा निर्देशनालय नक्सालय् दरबन्दी जूया काठमाडौं उपत्यका ट्राफिक प्रहरी कार्यालय रामशाहपथय् ज्या यानाच्वंम्ह खः।

नेवाः हाइकु ख्यःया प्यदँ बुदिंया लसताय् छगू तःजिगु ज्याझ्वः जुगु दु। प्यदँ बुदिंया लसताय् जूगु उगु हाइकु मुँज्याय हाइकु ख्यःया विकासय् ज्वःमदुगु ज्या यानादीपिंन्त मूपाहाँ यल महानगरपालिकाया मेयर चिरिबाबु महर्जन हनादीगु खः।

नेवाः हाइकु ख्यःया नायः सुरेश प्रधान यलया सभाध्यक्षताय् जूगु उगु ज्याझ्वलय् हाइकुच्वमि साहित्यकार डा.आनन्द जोशी, लुम्बिनी बौद्ध विश्वविद्यालयया डिन मानिकरत्न शाक्य, अनिता लक्ष्मी सैंजुपिन्त हनेगु ज्या जुगु खः।

ज्याझ्वलय् नेवाः हाइकु ख्यः संस्थाया कानूनी सल्लाहकार किरण शाक्य, साहित्य समालोचक ध्रुब मधिकःमि, डा. ज्योतिप्रभा तुलाधर समालोचक डा. पुष्पराज राजकर्णिकार लगायतया वक्तापिन्सं नुगःखँ तयादीगु खःसा पुष्कर माथेमा, मोक्षबहादुर अमात्य, मानिक उराय्, दिव्या ताम्राकार, बद्रि बेदना, संजयराज शर्मां, मिलन शाक्य, कबिन्द्र लाल प्रधान, रिता महर्जन, ज्ञानेन्द्र बज्राचार्य, राजेश बज्राचार्य, रत्न मन, हिसिलिना शाक्य, तेज हमाललगायत विदेशय् च्वंपि हाइकुच्वमि केशरमान तुलाधर, अन्जना ताम्राकार, रितादेवी प्रधानपिन्सं नं अनलाइनपाखें हाइकु ब्वनाः न्यंकादीगु खःसा समालोचक डा. पुष्पराज राजकर्णिकारं अन न्ह्यब्वःगु हाइकुया बारे समालोचना यानादीगु खः।