बागमती प्रदेशया झीगु जिल्ला स्वनिगः बाहेक म्हिगः व थौ वा वंगुलि २१ म्ह सीउगु दु। विपदया घटनां २५ म्ह बेपत्ता व ३१ म्ह घाःपाः जूगु दु।

बागमती प्रदेश प्रहरी कार्यालय हेटौंडाया कथं निगुया दुने काभ्रेय् जक झीम्ह सीउगु दु सा झीछम्ह बेपत्ता जूगु दु। अथेहे झीछम्ह घाःपाः जूगु दु।सिन्धुपाल्चोकय् खुसि बा वया खुम्ह सीउगु दु सा प्यम्ह तनाच्वंगु व झींखुम्ह घाःपाः जुगु दु।

दोलखाय् चलखं स्वम्ह सीउगु दु सा छम्ह घाःपाः जूगु दु धका प्रदेश प्रहरी कार्यालयं धाःगु दु। धादिङ व सिन्धुलीइ छम्ह छम्ह सीउगु दु सा छम्ह छम्ह घाःपाः जुगु दु। धादिङय् स्वम्ह तंगु दु।

स्वनिगलय् दुहावयेगु लँ दक्को बन्द जूगु दु। पृथ्वी राजमार्गया थीथी थासय् चलः वया थौ सुथनिसे लँ बन्द जूगु दु। येँ–मुग्लिन–नारायणगढ वनिइगु लँय् चच्छियकं हे बन्द याःगु दु।पूर्वी नेपाः नाप स्वागू विपी राजमार्ग न अवरुद्ध जूगु दु।

अथेहे, हेटौंडा–येँ स्वागु दक्को लँ न बन्द जूगु दु। चलः वगुलि हेटौंडा येँ स्वागु दक्को सतक बन्द जूगु दु। म्हिगःनिसे मदिक्क वा वया हेटौंडां येँ वइगु लँ कान्ति लोकपथ, राजधानी मार्ग (भीमफेदी कुलेखानी सिस्नेरी दक्षिणकाली येँं), कुलेखानी फाखेल, येँ, कुलेखानी मातातीर्थ ये व त्रिभुवन राजपथय् चलः वया लँ बन्द जुगु खः।

अथेहे, अरनिको राजमार्ग तक लँ बन्द जुगु दु धका सडक विभागं धाःगु दु। येँ–धुलिखेल–दोलालघाट–खाडीचौर–कोदारी सतक खण्डय् थीथी थासय् तक सतक अवरुद्ध जूगु दु धका विभागं धाःगु दु।

दकलय् अप्पो असर विपी राजमार्गय् खनेदुगु दु।

यलय् खुसि बा वया फसे जुयाच्वंपि गुम्हेसित हेलिकोप्टरं उद्धार याःगु दु। शनिवाः नेपाली सेनाया हेलिकोप्टरं उमित उद्धार याःगु खः।

यलया मख्खुबेँसी इलाकाय् हेलिकोप्टरं न्याम्हेसित उद्धार याःगु दु धका नेपाली सेनां जानकारी ब्यूगु दु। उद्धार याना उमित येँ हःगु दु।

अथेहे, यलया महानगरपालिका–१४, कान्तिपुर कोलोनीइ निम्हेसित हेलिकोप्टरं उद्धार याःगु खः। यलया हे कुसुन्ती चुकं निम्हेसित हेलिकोप्टरं उद्धार याःगु दु धका सेनां धाःगु दु।

मदिक्क वा वया च्वंगु स्वनिगःया खुसि बा वयाच्वंगु दु।खुसि बा वया थाय् थासय् लँ बन्द जुयाच्वंगु दु।

खुसि बा वया चोभारय् बागमती खुसि खने दुगु किपा ।

किपा सामाजिक संजालपाखे

खुसि वा वया यल जिल्लाय् थी थी थासं गुम्ह मनू सीउगु  दु। जिल्ला प्रहरी परिसर यलया एसएसपी शेखर खनालया कथं गुम्ह सीपि लुगु दु सा झींछम्ह मनू तना च्वंगु दु।

वयकःया कथं आःतक २८१ म्हेसित शकुसल उद्धार याःगु दु। सानेपा क्षेत्रपाखे ७७ म्ह, नख्खु हार्मोनी कोलोनीं १४ म्ह, नख्खिपोट क्षेत्रपाखे १५ म्ह, बुङ्मती क्षेत्रं ७५ म्ह, चापागाउँ क्षेत्रं ५५ म्ह, इमाडोल क्षेत्रं २८ म्ह व युएन पार्क क्षेत्रं छम्हयाना २८१ म्हेसित उद्धार यागु दु धका वयकलं धयादीगु दु।

उद्धार यायेगु निति प्रहरीपि जक ११ सय स्वया अप्पो जनशक्ति परिचालन जूगु दु धका वयकलं धयादीगु खः।