शान्तिया अग्रदूत कथं हलियक म्हसिउम्ह सिद्धार्थ गौतम अर्थात् बुद्धया २५६८ क्वःगु जयन्ती थौ तःजिक हनेत्यःगु दु। दँय् दसं वैशाख शुक्ल पुन्हि कुन्हु बुद्ध जयन्ती हनिइगु याइ।

सिद्धार्थ गौतमं विश्व शान्ति स्थापनाया लागि याःगु योगदानयात लुमका थुगु दिं हनिइगु याइ।

नेवाः पत्रकार राष्ट्रिय दबू न थौ सुचना लिसे संचार प्रबिधि मन्त्री रेखा शर्मायात सिहदरवार मन्त्रालयय् नाप लायेगु ज्या जुगु दु। नापलायेगु झ्वलय् मन्त्री शर्मायात नेपालय् मातृभाषाया पत्रकारिता न्ह्यागु सच्छि दँ दुगु लसताय् जुइत्यःगु थीथी ज्याझ्वःया बारे पत्रकार दबूया नायः नृपेन्द्रलाल श्रेष्ठ जानकारी बियादीगु खः।

पत्रकार दबुलि दँच्छियकं मातृभाषा पत्रकारिता शताब्दी दँ कथं हनेत्यःगु जानकारी बियादीसे थ्व हे वइगु बछलागा नवमी व दशमी कुन्हु नेपालय् न्हापागु अन्तराष्ट्रिय मातृभाषा पत्रकारिता सम्मलेन जुइत्यःगु खँ न मन्त्री शर्मायात जानकारी बियादीगु खः। अथेहे थौ मन्त्री शर्मायात धर्मादित्य धर्माचार्य संचार प्रतिष्ठान दयकेमाःगु, हुलाक टिकट प्रकाशन यायेमाःगु छगु ध्यानाकर्षन पौ न लःल्हानादीगु खः।

नेपाल टेलिभिजनय् नेपालभाषाया बुखँ तयेगु माःगु व राससय् न नेपालभाषा बुखँ दुथ्याकेमाःगु धका ध्यानकाषण याकादिगु खः। मन्त्री शर्मा नेपालय् मातृभाषा पत्रकारिता न्ह्यागु सच्छि दँ दुगु खँ न्यना थः तसक लय्तागु धका धयादीसे मातृभाषा पत्रकारिताय् थःम्हेसिया फुगु ग्वहालि यायेगु बचं बियादीगु दु।

अथेहे नेपाल टेलिभिजनय् नेपालभाषाया समाचार तयेगु कार्यबिधि तयार जुइ धुकुगु दु। आः छु ईलिपा हे नेपाल टेलिभिजनय् समाचार वइगु खँ कनादीगु दु। धर्मादित्य धर्माचार्यया हुलाक टिकट न प्रकाशन यायेगु बचं बियादीगु दु।

थौ संचार मन्त्री शर्मायात नापलायेगु निति पत्रकार दबूया नायः श्रेष्ठ नाप बरिष्ठ न्वकु सुनिल महर्जन, न्वकु सुरेन्द्रभक्त श्रेष्ठ, सार्क जनलिस्ट फोरमया नायः राजु लामा नाप पत्रकार उपेन्द्र प्रधानपि मन्त्रालय वःगु खः।

नेवाः पत्रकार राष्ट्रिय दबू यल कचाया ग्वसालय् धर्मादित्य धर्माचार्यया १२२ क्वःगु बुदिं हंगु दु । मातृभाषा पत्रकारिता दिवस नाप मातृभाषा पत्रकारिता १०० दँ क्यंगु लसताय् पत्रकार दबू न थौ बुधवाः छगू ज्याझ्वः जूगु यागु खः।

थौ जुगु उगु ज्याझ्वलय् नेपालभाषाया पत्रकारिता ख्यलय् ज्वःमदुगु योगदान बियाः वयाच्वंम्ह सुगतरत्न सिन्दुराकारयात धर्मादित्य पत्रकारिता सिरपाः लःल्हागु खः। नेवाः देय दबूया नायः पवित्र बज्राचार्य मूपाहाँ कथं झायादीगु खः।

पत्रकार दबू यल कचाया नायः मन्जु बज्राचार्यया सभाध्यक्षताय् जूगु उगु ज्याझ्वलय् केन्द्रिय नायः नृपेन्द्रलाल श्रेष्ठ बिशेष पाहा कथः झायादीगु खः। अथेहे निवर्तमान नायः सुरजबीर बज्राचार्य, सिरपाःया दाता सरिता महर्जन, नेपाल आदिवासी जनजाति पत्रकार महासंघ फोनिजया नायः गजुरधन राई, यल महानगरपालिकाया प्रवक्ता राजु महर्जन लिसे केन्द्रिय सल्लहाकार नाप मूदुजःपि पाहाँ कथं झायादीगु खः।

पूच्वय् च्वंगु धर्मादित्य धर्माचार्यया झ्वाताय् स्वां देछाना न्ह्यागु उगु ज्याझ्वः छगु ¥यालियाना चिकंबहिलय् छगु सभा जूगु खः।  स्वां छायेगु ज्याझ्वः यलया मांभाय् पुचःया ग्वसलाय् जुगु खः।

चीनय् धार्मिकस्थल मानसरोवरया यात्रा सुरु जूगु दु। भगवान महाद्यः च्वनिइगु कथं कयातःगु कैलाश पर्वत व मानसरोवर यात्राया लागि येँ न त्रिशुली धुञ्चे, स्याफ्रुवेँसी जूया उखेपाखे वनिइपि यात्रुया कारण रसुवागढी नाकाय् चहलपहल जूगु दु।

उगु लँ जूया थौकन्ह्यः न्हि ४० म्ह यात्रुपि मानसरोवर वनेगु यानाच्वंगु दु। उगु नाकां मानसरोवर वनेत साढे ९ सय किलोमिटरया लँ वनेमाः।

नेपालं मानसरोवर वनेगु लागि रसुवागढी व हुम्लाया हिल्सा नाका जुया येँ न्ह्यने जुगुलि रसुवागढीइ वनेगु याना वःगु दु। उगु नाकां चिनियाँत न न्हि ५० म्ह नेपाः दुहा वयेगु याना च्वंगु दु।

प्रधानमन्त्री पुष्पकमल दाहाल ‘प्रचण्ड’ न थौ प्रतिनिधिसभाय् विश्वासया मत काइगु जुगु दु।

प्रतिनिधि सभाया बैठक थौ सुथय् ११ बजे सःतूगु दु। नेपाःया संविधान यागु धारा १०० या उपधारा (२) कथं वयकलं प्रतिनिधिसभाय् विश्वासया मत कायेत्यःगु खः।

प्रधानमन्त्रीं प्रतिनिधित्व याइगु दल विभाजन जुगु व सरकारय् दुथ्यागु दलं थःगु समर्थन लितकाःगु लच्छिया दुने विश्वासया मत कायेगु निति प्रतिनिधिसभाय् प्रस्ताव यायेमाःगु सवैधानिकय् व्यवस्था दु।

वर्तमान सरकारय् दुथ्याःगु तत्कालीन उपप्रधानमन्त्री लिसे स्वास्थ्यमन्त्री उपेन्द्र यादवया नेतृत्वय् जनता समाजवादी पार्टी सरकारं पिहावनेवं प्रधानमन्त्री प्रचण्ड प्यक्वःगु विश्वासया मत कायेत्यःगु खः।