स्वनिगः दुने खुसिइ मापदण्ड थप २० मिटर यायेगु सर्वोच्च अदालतया निर्देशनात्मक आदेशयात कया बागमती प्रदेशया मुख्यमन्त्री बहादुर सिंह लामायात ध्यानाकर्षण पौ लःल्हाःगु दु।

नेवाः देय् दबू स्वनिगः विशेष प्रदेशया नायः श्रीकृष्ण महर्जनं बागमती प्रदेशया राजधानी हेटौंडाय् मुख्यमन्त्री नापं मन्त्री परिषदकया कार्यालय हे वना थौं ध्यानाकर्षण पौ लःल्हानादीगु खः। ध्यानाकर्षण पतिइ खुसिया मापदण्ड अप्वयेकूगुलिं लखौं स्वनिगलय् च्वपि पीडित जुइगु खँ न्ह्यथसें सर्वोच्चया उगु फैसलायात कया न्यायीक पुनवरालोकनया नितिं माःगु कथं प्रदेश सरकारं कुतः यायेत माग यानातःगु दु।

थुकिया नितिं देय् दबूपाखें केन्द्रीय सरकारनिसें स्थानीय सरकारयात तकं कुतः यायेत इनाप याये धुंकूगु खँ न्ह्यथसें ध्यानाकर्षण पतिइ संविधानं बियातःगु नागरिकया ब्यक्तिगत सम्पत्ति तकं सुरक्षित मजुइगु अवस्था वःगुलिं इलय् हे समस्या समाधान यायेमाःगु, जनताया मागयात ध्यानय् तया प्रदेश सरकारं भूमिका म्हितेमाःगु खँ न्ह्यथनातःगु दु थुगु विषययात कया मुख्यमन्त्री लामां केन्द्रीय सरकारपाखें नं पुनवरालोकनया नितिं कुतः यानाच्वंगु खँ न्ह्यथनादिसें थःम्हं नं सहलह ब्याका माःगु कथंया कुतः याये धकाः बचं बियादीगु खः।

थुगुसीया बाल दिवसयात उत्सवया रुपं हनीगु जूगु दु । जाउलाख्यःस्थित लभ्ली होम प्रिस्कूलं वइगु भाद्र २९ गते शनिबाः राष्ट्रिय बाल दिवसया दिंयात उत्सवया रुपं हनेगु धाःगु खः ।

मंगलबाः लभ्ली होमं यलय् पत्रकार सम्मेलन यासें थीथी सांस्कृतिक ज्याझ्वः व विद्यार्थीतय् नितिं कासा गतिविधिलिसें यल जाउलाख्यःया खेल मैदानय् बाल दिवस मेला २०८१ या ग्वसाः ग्वयेत्यनागु जानकारी ब्यूगु खः ।

लभ्ली होम प्रिस्कूलया संस्थापक माहेश्वरी अमात्यं थीथी कासा, सांस्कृतिक व मेमेगु गतिविधिलिसें छगू उत्सवया रुपं मेलाया ग्वसाः ग्वयेत्यनागु धयादिल ।

फाडर्स डे, मडर्स डेयात उत्सवया रुप बीपिं मचातय् बाल दिवसयात जक छाय् उत्सवया रुपं महनेगु धकाः नं अमात्यं न्ह्यसः थनादिल ।

‘मांया दिनयात अबुयात दिनयात गुलि नुगः तयाः मचातयसं छगू उत्सवया रुप बी तर, व हे मचातय् दिंयात धाःसा मनूतयसं उलि वास्ता याइमखु । मचातय् बाल दिवसयात जक झीसं छाय् उत्सव कथं महनेगु’ संस्थापक अमात्यं धयादिल ।

ज्याझ्वलय् मेमेगु मनोरन्जनात्मक न्ह्यब्वयालिसें पुस्तान्तरणया माध्यम कथं विद्यार्थीतयसं ज्याझ्वलय् लाखेय्, पुलुकिसिया प्याखं तकं न्ह्यब्वइगु जानकारी लभ्ली होमया डान्स कोअर्डिनेटर सुजन बज्राचार्यं बियादिल ।

उगु हे पत्रकार सम्मेलनय् यल लायकू मिप्वाः लाखय् पुचःया संरक्षक उत्तम रत्न शाक्यं मूल मर्म दुने च्वनाः लाखेय् लिसेंया स्थानीय संस्कृति विद्यार्थीतय् मार्फत पुस्तान्तरण यायेगु बांलाःगु विषय जूगु बिचाः तयादिल ।

‘विद्यार्थीतयसं लाखय् प्याखं ल्हुइबलय् उमिसं लाखयया बारे सीकी, सयेकी, थुइकी । लालाःथाय् प्याखं ल्हुकाः दुरुपयोग जकं यायेमजिल, भविष्यया कर्णधारतयत संस्कृति स्यनेगु ला बांलाःगु खँ खः’ संरक्षक शाक्यं धयादिल ।

ज्याझ्वलय् थीथी सांस्कृतिक गतिविधिलिसें कार्यक्रमया मू आकर्षणया रुपं निशा देसार व रोजमान महर्जनया न्ह्यब्वया नं दइगु जानकारी पत्रकार सम्मेलनय् ब्यूगु खः ।

लिसें थीथी नसा ज्वलंया स्टल, कासा गतिविधिलिसें सुथसिया ११ताः इलंनिसें सनिलया ४ताः ईतक मेला जुइगु जानकारी ग्वसाः खलकं ब्यूगु दु ।

लुँया भाः न थौ न्हुगु रेकर्ड तःगू दु। थौ लुँ तोलां द्धःछि थहावंगु दु। लुँ तोलां द्धःछि थहावना आः तक हे दकलय् थिकय् जूया १ लाख ५३ हजार ४ सय तका थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न झीन्यातका थहावंगु दु। वहः तोलां झीन्यातका थहावना १ हजार ७ सय ८० तका न कारोवार जूगु दु धका महासङ्घं धाःगु दु।

गृह मन्त्रालयं येँया प्रमुख जिल्ला अधिकारी (सीडीओ) सरुवा याःगू दु। येँया सीडीओ जितेन्द्र बस्नेतयात गृह मन्त्रालय सः तूगु दु सा जयनारायण आचार्ययात येँ छ्वया हःगु दु।

थ्व स्वया न्ह्यः आचार्य कारागार व्यवस्था विभागया महानिर्देशक जुयादीगु खः।अथे तु, सिन्धुपाल्चोकय् किरण थापा, सिन्धुलीइ लिलाप्रसाद शर्मा व प्युठानय् रमा आचार्य सुवेदीयात सीडीओ दयकूगु दु।

थ्व स्वया न्ह्यः थापा अध्यागमन कार्यालय भैरहवाय् प्रमुख अध्यागमन अधिकृत जूयादीसे शर्मा व आचार्य गृह मन्त्रालयय् हे।

नेकपा एमालेया तत्कालीन उपाध्यक्ष सुवासचन्द्र नेम्वाङया न्हापागु स्मृति दिवसया झ्वलय् पाटीं स्मृति सभा याइगु जुगु दु।

पार्टी केन्द्रीय कार्यालय च्यासलय् थौ न्हिनय् स्मृति सभा याइगु जुगु दु। स्मृतिसभाय् पार्टीया अध्यक्ष नाप प्रधानमन्त्री केपी शर्मा ओलीं सम्बोधन याइगु दु सा मेपि शीर्ष नेतापिन्स न ब्बति काइगु जुगु दु धका सचिवालयं धाःगु दु।

नेम्वाङ २०४८ व २०५१ सालय् राष्ट्रियसभा सदस्य नाप २०५६, २०७४ प २०७९ सालया संसदीय निर्वाचन २०६४ व २०७० सालय् संविधानसभा निर्वाचनय् इलामं विजयी जुयादीगु खः।