सरकारं सरकारी कार्यालयय् खाजा नयेगु ई ३० मिनेट यायेगु क्वछिउगु दु।

थ्व स्वया न्ह्यः खाजा नयेगु इलय् सेवाग्राहीया ज्या रोके जुगु खँ वयेवं सरकारी कार्यालय खाजा नयेगु ई ३० मिनेट कायम जुगु दु धका प्रधानमन्त्री केपी शर्मा ओलीं सामाजिक सञ्जालं जानकारी बियादीगु दु। प्रधानमन्त्री ओलीं धयादीगु दु, “खाजा नयेमाः, तर खाजा नयेगु नामय् यक्को ई कार्यालयया ज्या दिकेमज्यु, गुलि ई सरकारी कार्यालयय् खाजा नयेगु ई १ घण्टा कयाच्वंगुलि उकियात घटे याना न्हि १ः३० निसे २ बजे तक ई कायम जूगु दु।”

वयकलं कार्यालयया इलय् खाजा नयेगुलि नियमयात उल्लङ्घन जूगु खने दुगुलि हेल्लो सरकारय् यक्कोसिगु खँ वःगु नाप इनाप न याःगु दु।

प्रहरीं छगु हे नम्बरया न्यागः मोटरसाइकल नाप निम्हेसित ज्वंगु दु। मोटर साइकल खुँतयेत नियन्त्रण यायेगु निति खटे जूपि प्रहरी टोलीं येँ महानगरपालिका–३१ स्थित मध्यबानेश्वरये मोटरसाइकल खुँ निम्हेसित ज्वंगू दु।उपि नाप प्रहरीं छगु हे नम्बरया न्यागः मोटरसाइकल जुइकगु दु।

शंकास्पद अवस्थाय् से ७ प ८५६२ नम्बरया न्हुगु मोडलया ३५० सीसीया बुलेट मोटरसाइकल चले याना च्वम्ह अछामया चौरपाटी गाउँपालिका–२ छेँ दुम्ह कोटेश्वरय् च्वना च्वम्ह २८ दँ दुम्ह हिमाल खत्रीयात प्रहरीं नियन्त्रणय् काःगु दु।उगु टोलीं मध्यबानेश्वरय्अछाम चौरपाटी गाउँपालिका–२ छेँ दुम्ह २५ दँ दुम्ह प्रमोद कुँवरयात से ७ प ८५६२ नम्बरया ३५० सीसीया सिइगु रंगया बुलेट मोटरसाइकलनाप नियन्त्रणय् काःगु दु धका काठमाडौँ उपत्यका ट्राफिक प्रहरी कार्यालयया प्रवक्ता प्रहरी उपरीक्षकं धाःगु दु।

वास्तविक नम्बर बागमती प्रदेश ०२–०४७ प १९७५ या उगु मोटरसाइकल रानीबारीं वंगु श्रावण २८ गते तःगुलि रानीबारी च्वना च्वम्ह रुपन्देहीया अनुज पाण्डें काठमाडौँ उपत्यका ट्राफिक प्रहरी कार्यालयय् मालेगु निति निवेदन बिःगु खः। न्यनेकने यायगु झ्वलय् से ७ प ८५६२ नम्बर जूगु मेगु मोटरसाइकल तक खुँइगुलि संलग्न कुँवरपाखे खुल्ले जुगुलि लिपा गाडा वँचुगु रंगया १५० सीसीया एफ.जेड.एस. मोटरसाइकल न छाउनीं नियन्त्रणय् काःगु खः।

अनुसन्धानया झ्वलय् वास्तविक नम्बर बागमती प्रदेश ०२–०३८ प ९२५३ या उगु मोटरसाइकल काडाँघारी च्वना च्वम्हे ओखलढुंगाया उत्तम कुमार पराजुलीया जुगु खुल्ले जुगु दु। उगु मोटरसाइकल यलया बालकुमारीं वंगु असोजं तःगु धका धाःगु दु।

थप अनुसन्धान नाप कारबाहीया निति खुँ ज्याय् संलग्न कुँवरयात बरामद जूगु मोटरसाइकल नाप प्रहरी वृत्त लैनचौरय् व नेपालय् दर्ता मयासे भन्सार छले याःगु आशंकाय् बुलेट मोटरसाइकल नाप खत्रीयात त्रिभुवन विमानस्थल भन्सार कार्यालय, गौचरण छ्वःगु दु धका प्रवक्ता खड्कां जानकारी बिःगू दु।

प्रधानमन्त्री केपी शर्मा ओलीं जनतातय्त याउक सेवा बिया नेपाःयात ‘नन् करप्ट’ राष्ट्रयात म्हसिका बिइत निजामती कर्मचारीतय्त इनाप यानादीगु दु।

नीछक्वःगु निजामती सेवा दिवसया लसताय् सिंहदरबारय् जूगु मूल समारोह समितिया ज्याझ्वलय् प्रधानमन्त्री ओलीं भ्रष्टाचार यायेगु धइगु देयन्यक च्वपि जनताया छक्वल स्यागु थे जुइ धका धयादीगु खः। “छिकपिन्स गुवलय् न छ्यलादीमते। भ्रष्टाचार थे जाःगु पाप व दुुष्कर्मय् ब्बति कयादीमते। छिकपिन्त मछ्यसे नेतातय्स भ्रष्टाचार याये फइमखु । भ्रष्टाचार याइपि नेतातय्गु रेकर्ड तयादीस। भाषणय् छगू व व्यवहारय् मेगु ज्या याइपि नेतातय्स तधःगु खँ ल्हाइगुलि बाहेक मेगु छु यायेमफु धका मुसुुक्क न्हिलादीस।’’,

प्रधानमन्त्री ओलीं धयादीगु दु, “जि चुनौती बिया धाये– जि न भ्रष्टाचार याये मखु, मेपिन्त न याके बिइमखु। नेपाःया समृद्ध दयकेगुलि झीपि सकसिया थः थःगु थासं योगदान यायेमाः।’’

नेपाल पत्रकार महासंघ सिन्धुलीया अध्यक्ष नाप जनपक्षीय पत्रकार कृष्णहरि घिमिरेयात विशाल–कुमार स्मृति पत्रकारिता सिरपा लःल्हागु दु।

सिन्धुलीया आर्थिक सामाजिक सांस्कृतिक व राजनैतिक ह्यूपाः हयेगुलि न्ह्यलुवा कथं ज्या याना च्वनादीम्ह, नेपाल पत्रकार महासंघ सिन्धुलीयका अध्यक्ष नाप मानव अधिकारीकर्मी कृष्णहरि घिमिरेयात २१ क्वःगु विशाल– कुमार स्मृति दिवसया लसताय् उगु सिरपा लःल्हागु खः।

पत्रकार घिमिरेयात प्रेस चौतारी नेपालया संवन्वयय् विशाल कुमार–स्मृति प्रतिष्ठानया अध्यक्ष नाप शेरमान कुवर (विशाल) या जहान निरू दर्लामी व नेकपा (एमाले) या केन्द्रीय सदस्य नाप प्रतिष्ठानया संरक्षक मनोजजंग थापां दोसल्ला न्ययेका दसिपौ व न्याद्धः तका लःल्हाःगु खः।

उगु ज्याझ्वलय् नेकपा एमाले बागमती प्रदेश कमिटी सदस्य शान्तिमान कार्की, जिल्ला अध्यक्ष महेन्द्र देव श्रेष्ठ, प्रतिष्ठानया अध्यक्ष नाप एमाले  केन्द्रिय सदस्य निरु दर्लामी व एमाले बागमती प्रदेश प्रचार विभागया सचिव प्रेम दाहालपिन्स न न्ववानादीगु खः।

प्रधानमन्त्री केपी शर्मा ओलीं पुनः स्थापित शान्ति प्रक्रियायात बालाक्क यकेगु नाप द्वन्द्वकालीन घटनाया पुनरावृत्ति याके मबिइगु कथं वर्तमान सरकार स्पष्ट दु धका धयादीगु दु।

सङ्क्रणकालीन न्यायनाप सम्बन्धित विषयय् थौ नेपाल समाजवादी पार्टीया संयोजक नाप पूर्व प्रधानमन्त्री डा बाबुराम भट्टराई नेतृत्वया प्रमण्डलं १९ बुँदे ध्यानाकर्षणपौ लःल्हाना कयादीसे प्रधानमन्त्री ओलीं नेपाली जनतायात जातीय आधारय् विभाजित याना व सामाजिक कथं घृणा\द्वेष फैलै याना राष्ट्रिय एकतायात कमजोर यायेगु कुतः याइपि ताःलाइ मखु धका धयादीगु दु।

“जनतां न्हापा हे वान्छेगु माःगु राजतन्त्र थःगु हि नाप हिलां जक वान्छय् फत। सङ्घीय लोकतान्त्रिक गणतन्त्रया स्थापना जुगु दु। थ्व व्यवस्थायात अपुक जनताया विकास, समृद्धि व स्थायित्वया चाहना पूरा याये माःगु दु। उकिइ आः छु न अराजकतां थाय् काइगु व सत्ता समीकरणय् थुके उखे जुइगु सम्भावना मदु।”, प्रधानमन्त्री लिसे मन्त्रिपरिषदया कार्यालय, सिंहदरबारय् नापलायेगु झ्वलय् प्रधानमन्त्री ओलीं धयादीगु दु, “म्हतिइ न जि प्रधानमन्त्री व नेकपा (एमाले) या अध्यक्ष जुगु तले आःयागु चर्चा दु। नेपालय् बङ्गलादेश व श्रीलङ्काय् थे जुगु घटना वइगु स्थिति जुइ मखु। जिं आः नीनिलाया कार्यकाल दुने सङ्क्रणकालीन न्याययात क्वछिइ ज्या जुइ।”

संयोजक डा भट्टराई न निगु तधःगु दलया सरकारय् दुगुलि सङ्क्रमणकालीन न्याय क्वछिइगु कथं ज्या यायेगु  अवसर वंगुलि थःम्हेसिया न ग्वहालि याये धका धयादीगु खः। उगु ज्याझ्वलय् उगु पार्टी न उगु विधेयक पारित जूग्ुलि लसकुस यासे वइगु प्रक्रियाय् बृहत् सहमतिया नापं सत्यया अन्वेशण यायेत इनाप याःगु दु। उगु पार्टी न आयोग गठन याइगु इलय् राष्ट्रिय अन्तर्राष्ट्रियं स्वीकार्य याना तम्ह मनू ल्ययेत, आयोगय् पीडिततय्गु प्रतिनिधि तय्त व परिपूरणया विधि व मापदण्डबारे स्पष्ट यायेगु माग तःगु खः।