कोशी प्रदेशया मुख्यमन्त्री हिक्मतकुमार कार्कीं थौ विश्वासया मत काइगु जुगु दु। प्रदेश प्रमुख परशुराम खापुङं कोशी प्रदेशसभाया न्याक्वःगु अधिवेशन थौ सुथय् ११ बजे च्वनिइगु कथं आह्वान जूगु दु।

उनले कोशी प्रदेश सरकार (मन्त्रिपरिषद्) या २०८१ वैशाख २७ गते याःगु सिफारिस कथं नेपाःया संविधानया धारा १८३ या उपधारा (१) कथं अथे आह्वान याःगु खः। थ्व हे वैशाख २७ गते कोशी प्रदेशया मुख्यमन्त्रीइ नियुक्त जुयादीम्ह कार्कीं उगु दिं बहनि पद व गोपनीयताया शपथ काःगु खः।

कार्कीयात नेकपा (एमाले) या ३९, नेकपा (माओवादी केन्द्र) या १३ नाप ५२ प्रदेशसभा सदस्यपिनिगु समर्थन दुगु खः।

थौ बैठकय् नेपाःया संविधानया धारा १६८ या उपधारा (४) कथं कोशी प्रदेशसभा नियमावली, २०७४ (न्हापागु संशोधन नापं) या नियम १२८ कथं कोशी प्रदेशया मुख्यमन्त्री कार्कीं विश्वासया मत काइगु बैठकया कार्यसूचीइ दु।

वांङ्गमय शताब्दिपुरूष लोकसाहित्यविद् डा. सत्यमोहन जोशीया १०५ क्वःगु जन्मजयन्तिया झ्वलय् लोक साहित्य परिषदया ग्वसालय् छवाः यंक्क थीथी ज्याझ्वः जूगु दु।

छवाः यंक्कया ज्याझ्वलय् खुन्हुया दिं कुन्हु सत्यमोहन जोशी मार्गं साइकल रÞ्याली न्ह्याःगु खःसा उगु र्यालि माननीय प्रेम महर्जनपाखें उलेज्या यानादीगु खः। थौ शताब्दि पुरुषया छेँय् सत्यमोहन लोक साहित्य भवनय् १०५ क्वःगु जन्म जयन्ती समापन ज्याझ्वलय् बागमति प्रदेशया संस्कृति, पर्यटन लिसे सहकारी मन्त्री माननीय शैलेन्द्र बज्राचार्य मूपाहाँ कथं झायादीगु खः।

मूपाहाँ माननीय बज्राचार्यं थःगु नुगःखँ तयेगु झ्वलय् राजनीति धइगु राज्यया नीतिलिसे स्वापु दूगु खँग्वः धका धासे झीगु राज्यय् नं सकतां खँलिसे स्वापु दुगु नीति दु तर उकियाबारे आपासिनं मसिउ धका धयादिल। वयकलं राज्यं देयया लोक साहित्य व संस्कृति लिसे स्वापु दूगु नीति नं दयेकातःगु दु धका धासे वहे नीतिया लिधंसाय् लोक साहित्य व संस्कृति या थपु जुइगु ज्याय् थःम्हं फक्वः ग्वाहालियाये धका धयादिल।

उगु ज्याझ्वलय् अष्ट गणेश अनुसन्धान केन्द्रपाखें पिकागु मल्ल के सुन्दरया “लुमन्तिया किचः”, विजयरत्न असंबरेया “संकिपाया न्हायकं”, कृष्णप्यारी श्रेष्ठया “बोदेया नीलबाराही द्यःगं नकेगु परम्परा”, ईश्वरी मैंया श्रेष्ठया “नेपालभाषाया पद्यया किचः” व धर्मकृष्ण श्रेष्ठया “थिमिया स्यस्यः बिनां” नांयागु न्यागु सफूया नापनापं लोक साहित्य परिषदपाखें पिदंगु अणुराज जोशीया “महाकाव्य ख्यः व शताब्दि अभिनन्दन” सफूया नं पितब्वज्या जूगु खः ।

लोक साहित्य परिषदया नायः राजित बहादुर श्रेष्ठया सभाध्यक्षताय् जूगु उगु ज्याझ्वलय् सफू च्वमिपिं अणुराज जोशी व विजयरत्न असंबरे पिन्सं थःथःगु सफूबारे खँ तयादीगु खःसा ज्याझ्वलय् पाहाँ कथं नेपालभाषा मंका खलः यलया नायः हिराकाजी महर्जन या विशेष उपस्थिति दूगु खः।

लुँया भाः थौ तोलां न्यासः थहावःगु दु। लुँ तोलां न्यासः थहावना १ लाख ३८ हजार ४ सय रुपैयाँ न कारोवार जुगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां झीतका कुहावंगु दु। वहः तोलां झीतका कुहावया १ हजार ७ सय २५ रुपैयाँ न कारोबार जूगु दु धका महासंघं धाःगु दु।

राष्ट्रपति रामचन्द्र पौडेलया आर्थिक सल्लाहकार डा. चिरञ्जीवी नेपालं राजीनामा बिःगु दु। सच्छिया नोटय् न्हुगु नक्सा छापे यायेगु मन्त्रिपरिषदया निर्णय विरुद्ध न्ववाना विवाद जुइवं नेपालं थःगु पदपाखे राजीनामा बिःगु खः।

राष्ट्रपति कार्यालयया प्रवक्ता शैलजा रेग्मी भट्टराई न डा. नेपालं बिःगु राजीनामा स्वीकृत जुइ धुकुगु धका जानकारी बिःगु दु। वंगु वैशाख २० गतेया मन्त्रिपरिषद बैठकं कालापानी, लिपुलेक भूभागयात दुथ्याका न्हुगु नक्सा सच्छि वंगु नोटय् तयेगु निर्णय याःगु खः।

डा. नेपालं सञ्चार माध्यमय् प्रतिक्रिया बिउसे भारतनाप वार्ता जुयाच्वंगु इलय् न्हुगु नक्सा नोटय् तयेगु गलत खः धका धाःगु खः

महिला, बालबालिका लिसे ज्येष्ठ नागरिक मन्त्री भगबती चौधरीं शिक्षा ख्यलय् तमाम समस्या समाधान यायेत संघीय शिक्षा ऐन तत्काल वयेमाः धका धयादीगु दु।

एप्पल इन्टरनेशनल स्कुल तीनकुनेय् शनिवाः जुगु छगु ज्याझ्वलय् मन्त्री चौधरीं अथे धयादीगु खः। विद्यालय शिक्षण सय्केगु थाय् खः धका  धयादीसे मन्त्री चौधरीें बालबालिका केन्द्रित शिक्षण सय्केत इनाप यानादीगु खः।

संविधानं शिक्षा क्षेत्र स्थानीययात बिउगु धका धयादीसे आः शिक्षण सयकेगु निति बालबालिकामैत्री जुइ मः धका धयादीगु खः। ’संविधानय् शिक्षायात स्थानीय तहयात बिःगु दु। छु खँ स्थानीय तह कथं बिस्क बिस्क व्यवस्था याये दइगु व्यवस्था दु’, वयकलं धयादीगु खः, ’राज्यया संरचना कथं स्वंगू तहया शिक्षाय् छु भचा छगु कथं जुइमाः।

पाठ्यक्रमय् जीवन उपयोगी, आःयागु टेक्नोलोजी कथं जुइमाः। विद्यालय, माध्यामिक विद्यालय स्थानीय तहय् जुइगुलि छु छु अधिकार स्थानीय तहलय् वःगु दु। बालबालिका केन्द्रित शिक्षण सिकाइ जुइमाः’