प्रधानमन्त्री केपी शर्मा ओलीं कार्बन उत्सर्जन याइगु देय् न उत्सर्जन मयाइगु देय् यात क्षतिपूर्ति बिइमाःगु नेपाःया स्पष्ट मान्यता दु धका धयादीगु दु।

नेपाली प्रतिनिधिमण्डलया नेतृत्व यानादीसे संयुक्त राष्ट्रसङ्घया ७९ क्वःगु महासभाय् ब्बति कायेगु झ्वलय् संयुक्त राज्य अमेरिकाया न्युयोर्क थ्यःगु इलय् प्रधानमन्त्री ओलीं स्थानीय ई कथः शनिवाः न्हिनय् जूगु ज्याझ्वलय् जीवाष्म इन्धनमुक्त संसदीय सञ्जाल (पार्लियामेन्टेरियन्स फर फोसिल फ्युल फ्रि) या मू वक्ताया कथं सम्बोधन यायेगु झ्वलय् अथे धयादीगु खः।

प्रधानमन्त्री ओलीं नेपालं कार्बन उत्सर्जनय् शून्य योगदान याना जलवायु ह्यूपाःय् असर जुइगुलि रोके यायेगु उल्लेख यानादीसे विकसित देशं कार्बन उत्सर्जनया कारण नेपालं सगरमाथा व च्वापू नाइगुलि असर जुपिनिगु समुदाययात क्षतिपूर्ति बिइमाःगुलि बः बियादीगु खः।

प्रधानमन्त्री ओलीं पेरिस सम्झौता कथं स्थापित हलिमयया विकसित देशं भविष्यया लागि जलवायु अनुकूलनया निति आर्थिक लगानी अप्पाके माःगुलि बःबियादीसे, “झीगु भविष्य बालां, छाय् धासां झीसं भविष्यया निति लगानी याये।”

प्रधानमन्त्री ओलीया भ्रमण दलय् न्हापाम्ह मिसा राधिका शाक्य, परराष्ट्रमन्त्री डा आरजु राणा देउवा, प्रधानमन्त्रीया मुख्य सल्लाहकार विष्णुप्रसाद रिमाल, परराष्ट्र मन्त्रालयया सचिव सेवा लम्साल, प्रधानमन्त्री ओलीया निजी चिकित्सक डा दिव्या सिंह, प्रमुख स्वकीयसचिव राजेश बज्राचार्य, परराष्ट्र मन्त्रालयया सहसचिव अमृतकुमार राई, शिष्टाचार महापाल विष्णुप्रसाद गौतमपिनिगु ब्बति दुगु खः।

प्रेस काउन्सिल नेपालं ५५ क्वःगु दँ मुज्याया लसताय् थौ लहना वाःपौयात भाषागत सिरपाः लःल्हाइगु जुगु दु।

अथेहे थौ जुइगु उगु ज्याझ्वलय् गोपालदास पत्रकारिता सिरपाः नाप थीथी सिरपाः लःल्हाइगु जुगु दु। प्रेस काउन्सिल गोपालदास पत्रकारिता सिरपाः अन्नपूर्ण पोष्ट न्हिपौया प्रधानसम्पादक अखण्ड भण्डारी व नेपाल प्रेस इन्स्टिच्युट (एनपीआई) यात मंकाः कथं लःल्हाइगु जुगु दु। हनापौ नाप १ लाख ५१ हजार तका लःल्हाइगु जुगु दु।

पत्रकारिता नाप आमसञ्चार ख्यलय् अध्ययन, अनुसन्धान, तालिम नापं प्रशिक्षण संस्थायात गोपालदास पत्रकारिता सिरपा दुथ्याकूगु काउन्सिलया इतिहासय् थ्व न्हापागु खः।अथेहे, प्रेस काउन्सिल सुरेन्द्रबहादुर बस्नेत पत्रकारिता सिरपा पत्रकार बद्री सिग्देलयात हनापौ नाप १ लाख १० हजार तका लःल्हाइगु जुगु दु।

प्रेस काउन्सिल आचारसंहिता सिरपा रातोपाटी यात लःल्हाइगु जुगु दु।काउन्सिलं बिहीवाः व शुक्रवाः च्वंगु बोर्ड बैठकं थीथी सिरपा लःल्हायेगु निर्णय याःगु खः। स्थापना जुगु ५५ दँ थ्यःगु लसताय् थौ असोज ६ गते आइतवाः राष्ट्रपति रामचन्द्र पौडेलया मूपाहासुइ काउन्सिलं थीथी सिरपा लःल्हाइगु जुगु दु।

काउन्सिलं सशक्त सञ्चारकर्मी, क्रियाशील, युवा, समावेशी, भाषागत, साहित्यिक, विधागत सिरपा नाप अग्रज पत्रकारयात हनेत्यःगु खः।

प्रधानमन्त्री केपी शर्मा ओली संयुक्त राष्ट्रसंघया महासभाय् ब्बति कायेगु निति थौ अमेरिकाया न्यूयोर्कय् वनिइगु जूगु दु।

प्रम ओली थौ सुथय् १०ः३० बजे नेपाली प्रतिनिधिमण्डलया नेतृत्व यासे अमेरिकाय् वनेत्यःगु दु। प्रधानमन्त्री ओलीनाप वयकः जहान राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीया प्रमुख सल्लाहकार विष्णु रिमाल, परराष्ट्र सचिव सेवा लम्साल व नेपाल सरकारया वरिष्ठ अधिकारीपि वनेत्यःगु खः।

संयुक्त राष्ट्रसंघया महासभाय् थुगु दँय् ‘सू न लिउने त्वःतेमखु ः वर्तमान व भावी पुस्ताया निति शान्ति, दिगो विकास व मानव मर्यादाया विकासया निति मिले जूया ज्या यायेगु’ विषय सहलह जुइ। प्रधानमन्त्री ओलीं असोज ७ गते कोलम्बिया विश्वविद्यालयय् जुइगु ज्याझ्वलय् ‘नेपाःया प्रजातन्त्र व आर्थिक समृद्धिया यात्रा’ विषयमा सम्बोधन याइगु जूगु दु।

असोज ८ गते महासभाया साधारण बहसया उदघाटनसत्र व असोज ९ गते अमेरिकाया राष्ट्रपति जो बाइडेनं ग्वसाः ग्वगु लसकुस ज्याझ्वलय् ब्बति काइगु जुगु दु। प्रधानमन्त्री ओली असोज १४ गते स्वदेश लिहा झाइगु ज्याझ्वः दु।

नेपालभाषाया महाकवि सिद्धिदास महाजुया १५७ क्वःगु बुदिं तःजिक हंगु दु। येँया भोतिहिति सिद्धिदास चुकय् मुनाः नसंचा उलेज्या यानाः नगर परिक्रमा याःगु खः।

सिद्धिदास महाजुया झ्वाताय् नेवाः न्ह्यलुवाः लिसें सिद्धिदास स्मृति समाजया नायः मल्ल के सुन्दर, बागमती प्रदेश सांसद लिसें पूर्वमन्त्री शैलेन्द्रमान बज्राचार्य, भाषा आयोगया दुजः सुरेश किरण मानन्धर, सिद्धिदास स्मृति समाजया छ्याञ्जे दीपक तुलाधरलिसें थीथी हनेबहःपिं व्यक्तिपिनिगुपाखें स्वां देछाःगु खः।

नसंचा उलेगु ज्याझ्वलय् फणिन्द्ररत्न बज्राचार्य, सुवर्णकेशरी चित्रकारपिं सिद्धिदासया किपाः ब्वयातःगु बग्गीइ आसन ग्रहण याकूगु खः। नसंचा उलेज्या ¥यालि असं, केलत्वाः, मखं, मरु, चिकंमू, लगं, ब्रम्हत्वाः, ह्यूमत, क्वहिति, भिन्द्यःत्वाः जुयाः जनबहालय् थ्यंकाः सभा याःगु खः।

अथेहे, सिद्धिदास महाजुया बुदिंया लसताय् वय्कःया किपाः दूगु बेलुन सिद्धिदास स्मृति समाजया छ्याञ्जे दीपक तुलाधर, निलकाजी शाक्य व बालकृष्ण प्रजापतिं ब्वयेकादीगु खः।

येँयाः पुन्ही कुन्हु थौ रथ थनेपाखे सालिइगु जुगु दु। थौ रथ बसन्तपुरं रथ सालां प्याफल, यटखा, न्यत, टेगल, थाय्मदु, असं, जनबहाः हनुमानध्वाका जूया बसन्तपुरय् थ्यका क्वचाइ।

येँयाः कुन्हु कुमारी रथयात्रा न्ह्याःगु दु। म्हिगः येँया बसन्तपुरं क्वःने याः न्यायेकेगु कथं कुमारी रथयात्रा न्ह्याःगु खः। कुमारी, भैरव व गणेशया रथयात्रा नं न्ह्याःगु खः। उगु रथयात्राय् राष्ट्रपति रामचन्द्र पौडेल, प्रधानमन्त्री केपी शर्मा ओलीलिसें मन्त्रीपिं जात्रा स्वयेत वःगु खः।

येँ महानगरपालिकाया उपप्रमुख सुनिता डंगोलं राष्ट्रपति व प्रधानमन्त्री लिसें थीथी व्यक्तिपिन्त लसकुस याःगु खः ।क्वःने याः कथं येँया चिकंमू, ज्याबहाः लगं, ब्रम्हत्वाः जुयाः ह्यूमत, भिन्द्यःत्वाः जुयाः बसन्तपुर तक रथ सालेगु याइ।