नेपालगञ्जय् डिजिटल प्रविधि प्रवद्र्धन यायेत कम्प्युटर एसोसिएसन अफ नेपाल (क्यान) महासङ्घ बाँकें ‘क्यान इन्फोटेक’ ग्वसाः ग्वये त्यंगु दु।

नेपालगञ्ज उद्योग वाणिज्य सङ्घया समन्वय व ग्वसालय् थ्व हे माघ १० निसें २२ गते तक नेपालगञ्जय् प्रादेशिक महोत्सवय् ‘क्यान इन्फोटेक’ ग्वसाःग्वयेत्यंगु जिल्लाय् च्वंगु क्यान महासङ्घया नायः यज्ञराज जोशीं धयादिल।

प्रादेशिक महोत्सव ग्वसाःग्वयेत जिल्लाय् च्वंगु क्यान महासङ्घ व नेपालगञ्ज उद्योग वाणिज्य सङ्घ दथुइ सम्झौता जुयाः इन्फोटेकया निंतिं माःगु तयारी जुयाच्वंगु दु। नेपालगञ्ज व जःखःया लागाय् डिजिटल प्रवद्र्धन व प्रविधिया विकास यायेत, थी थी ज्याझ्वः नापं परियोजना सफलताया निंतिं ग्वाहालि यायेगु व प्रादेशिक महोत्सवय् समन्वय व मंकाः ज्या यायेगु कथं सम्झौता जूगु नेपालगञ्ज उद्योग वाणिज्य सङ्घया नायः टङ्कबहादुर धामीं कनादिल।

“प्रादेशिक महोत्सवय् सुचं प्रविधिबारेया जानकारी व सेवा अःपुकेगु ताःतयाः तयारी यानागु दु”, वय्कलं धयादिल, “थ्व इन्फोटेकं प्रदेशय् प्रविधिया ख्यलय् सकारात्मक सुधार वइगु भलसा कयागु दु।” क्यान इन्फोटेकय् सुचं प्रविधिसम्बन्धी दक्व कथंया सेवा व जानकारी लिसेंया स्टल तयाः नेपालगञ्ज व जःखः डिजिटल प्रवद्र्धन व प्रविधिया विकासय् ग्वाहालि यायेगु आज्जु तयातःगु क्यान बाँकेया छ्याञ्जे रमेश बिसीं धयादिल।

प्रधानमन्त्री केपी शर्मा ओलीं सुकेधाराय् निर्माण जूगु मक्र्युर होटेलया थौं उलेज्या यानादिसें पर्यटन लजगाया विकास यायेत सरकारं फक्व ग्वाहालि याइगु प्रतिबद्धता बियादीगु दु।

होटेल बनेज्याया ख्यलय् हलिंन्यंक हे स्वापू दूगु अक्योर कम्पनीया मातहतय् नेपालय् न्हापांखुसी मक्र्युर होटेल सञ्चालनय् वःगु खः। थुगु झ्वलय् प्रधानमन्त्री ओलीं फ्रान्सेली पर्यटकतय्त नेपाः भ्रमण याकेत उगु होटेलं योगदान बिइगु भलसा कयादिल।

वय्कलं होटेल बनेज्याय् मक्र्युरं न्हूगु पहः बिसें थ्व बनेज्यायात हःपा बिइ धकाः नं धयादिल।

बागमती प्रदेशया प्रदेश प्रमुख दीपमप्रसाद देवकोटां भुखाय् नं जुइफइगु क्षति लुमंकाः ग्यायेगुसिबें सुरक्षात्मक उपायत यायेमाःगु धयादिल।

नीन्हय् क्वःगु भुखाय् सुरक्षा दिवस २०८१ या ई लाकाः बियादीगु भिंतुना सन्देशय् वय्कलं भुखाय् सचेतना व सुरक्षाया महत्वयात फुक्कं समुदायतक थ्यंकेमाःगु दु धकाः धयादिल।विसं १९९० माघ २ गते ब्वःगु तःभुखाय्या लुमन्तिइ न्यायेका वयाच्वंगु थुगु दिवसपाखें नागरिकय् सचेतना अप्वोय्केत ग्वाहालि याइगु थःगु विश्वास दूगु प्रदेश प्रमुख देवकोटां थःगु भिंतुना सन्देशय् धयादीगु दु।

थुगुसिया दिवस ‘भूकम्पले सिकाएको पाठ ः बलिया संरचना र सुदृढ पूर्वतयारीका साथ’ धाःगु नारा ज्वनाः न्यायेका च्वंगु दु। सन्देशय् भुखाय् प्राकृतिक प्रकोप जूगुलिं थुकियात पने मफइगु अथे खःसां सुरक्षित संरचना, सावधानी व पूर्वतयारी यानाः थुकिं जुइगु क्षतियात म्ह्वः याये फइगु धयादीगु दु।

“झीसं बल्लागु व सुरक्षित संरचना दयेकेगु पाखे ध्यान बियाः सम्भावित क्षतियात म्ह्वः यायेत न्हापां हे सावधानी प्रतिकार्यया उपायत छ्यलेमाः”, सन्देशय् धयातःगु दु।

ख्वपय् सूर्यमढीइ थौं धार्मिक महत्वया तान्त्रिक विधियुक्त प्रसिद्ध नवदुर्गा देवगणया ‘ङालाकेगु जात्रा’ (न्याँ लायेगु जात्रा) जुइत्यंगु दु।

दँय् दसं ख्वप नगरपालिकाया थी थी २१ गू थासय् प्रदर्शन याइगु नवदुर्गा देवगणया ङालाकेगु जात्रा सूर्यमढीं सुरु यायेगु परम्परा कथं हे जात्रा जुइत्यंगु खः।

सूर्यमढीइ ङालाकेगु जात्रा यायेत वंगु पुस २९ गते ‘वापी पाछाकिगु’ जात्रा याःगु खः धाःसा मङ्गलबाः घ्यः चाकु सँल्हु कुन्हु सनिलय् देवगणत सूर्यमढी त्वालय् चाःहिलाः चान्हय् खःप्याखं न्ह्यब्वयाः च्याम्हासिंह लागाय् ‘मुःवाहा जात्रा’ याःगु खः। ङालाकेगु जात्राय् जात्रा जुइगु थाय्या त्वालय् चाःहिले धुंकाः चान्हय् ङालाकेगु थासय् फुक्कं देवगणतय्गु ‘खःप्याखं’ न्ह्यब्वयेगु, ‘मूःबाहा जात्रा’ व ‘चा प्याखं’ याइगु परम्परा न्ह्यावयाच्वंगु दु।

गुगु कथं बुधबाः सूर्यमढीइ बाराही प्याखं; सिम्ह दुम्हया प्याखं नापं ङालाकेगु जात्रा याइ। न्हिनय् महाकाली प्याखं, सनिलय् महाकाली व श्वेत भैरवया ‘गा तोकेगु प्याखं’ याइ। अनंलिपा सिम्ह दुम्ह व श्वेत भैरवया ‘नाः होलेगु प्याखं’ लिसें श्वेत भैरवया ङालाकेगु जात्रा जुइ।

ङालाकेगु जात्रा क्वचाये धुंकाः सिम्ह दुम्ह व श्वेत भैरवया ‘प्वास्याकेगु प्याखं’; बालकुमारी (इन्द्रायणी) व श्वेत भैरवया ‘मतिना प्याखं’; सिम्ह दुम्ह व श्वेत भैरवया ‘वसः हियेगु प्याखं’ व दकसिबे ल्यूने श्वेत भैरवया प्याखं न्ह्यब्वइगु नवदुर्गा देवगण जात्रा नापं देगः व्यवस्थापन संस्थाया सल्लाहकार नारायण वनमालां कनादिल।

प्रधानमन्त्री केपी शर्मा ओलीं सकल नेपाःमियात मकर सङ्क्रान्तिया व माघीया भिंतुना देछानादीगु दु।

प्रधानमन्त्री ओलीं थौं सामाजिक सञ्जालपाखें भिंतुना देछानादीगु खः। “थौं माघे सङ्क्रान्ति, तराई लागाय् थारू जातिया माघी नखः नं खः, सूद्र्यः धनु राशिं मकर राशिइ सङ्क्रमण जुइगु (दुहाँ वनीगु) जूगुलिं थुगु न्हियात मकर सङ्क्रान्ति नं धाइ”, भिंतुना सन्देशय् धयातःगु दु, “थौं घ्यः, चाकु, तरुल, हाम्वः, खित्रो नापं थीथी कन्दमूल व थारू जाति दुने घुङ्गी नयेगु चलन दु, सकलसित मकर सङ्क्रान्ति व माघीया भिंतुना !!”