प्रधानमन्त्री केपी शर्मा ओलीं सार्वजनिक–निजी साझेदारीया कथं सञ्चालन जुयाच्वंगु गैह्रनाफमूलक ‘काठमाण्डुु इन्स्टिच्युट अफ चाइल्ड हेल्थ’ न बाल स्वास्थ्य ख्यलय् याना च्वनागु ज्याया जानकारी बियादीगु दु।

प्रधानमन्त्री लिसे मन्त्रिपरिषदया कार्यालय, सिंहदरबारय् संस्थाया अध्यक्ष डा भगवान कोइराला, राष्ट्रिय योजना आयोगया उपाध्यक्ष प्राडा शिवराज अधिकारीपिन्स सहलह जुगु ज्याझ्वलय् प्रधानमन्त्री ओलीं इच्छाशक्ति दु सा सुरुइ ध्यवा मदुसा ज्या याये फु धइगु थुगु संस्थां क्यंगु दु धका धयादीगु दु।

वयकलं बिरामीयाके ध्यवा मदुसा याउक उपचार यायेगु वातावरणया निति थुगु संस्थाया बिचाः तसक च्वछाय् बहजू धका धयादीगु खः।

उगु संस्थां झापाया दमकय् सुविधासम्पन्न बाल अस्पताल सञ्चालनय् हये धकुगु दु सा बुढानीलकण्ठ–७, बाँसबारीइ बाल अस्पताल सञ्चालन यायेत ३० दँया निति ४१ रोपनी जग्गा नेपाल सरकारं बालं बिइत्यःगु खः।

नागरिक न्ह्यलुवाः डा. महेश मान श्रेष्ठं  देशभक्त तयेगु मंकाः मोर्चा दयकेमाःगुलि बःबियादीगु दु।

नेपाली कांग्रेस, नेकपा एमाले, माओवादी, समाजवादी लगायत तयेगु मंका मोर्चा थौ मदयक मगाय् धुकुगु दु धका धयादीगु खः। नेवाः ग्वहालि पुचः टोखाय् जूगु छगु ज्याझ्वलय् वयकलं धयदीगु दु नेपालय् भ्रष्टाचारी, राजनीतिक दल दुने विकृत नेता व उगु कथं हे ब्यवहार जुगुलि जनतां स्यकूगु द्धपं बियादीगु दु।

‘बिबिसी, सीएनएन, अलजजिरा, फोक्स न्यूजय् लिपागु इलय् नेपालय् भ्रष्टाचार यक्को जुयाच्वंगु दु धका बुखँ वयाच्वंगु दु धका धयादीसे थुगु कारणं याना नेपाः अन्तर्राष्ट्रिय ख्यलय् बामला च्वंगु दु।’ धका डा. श्रेष्ठं धयादीगु खः। भ्रष्ट नेतातय्गु थासय् इमान्दार, सक्षम व देय् यात मतिना याइपि नेतात माः धका वयकलं धयादीगु दु। नागरिक न्ह्यलुवाः श्रेष्ठं लिपागु इलय् न्हुगु पुस्तां मां भाय् त्वःता वगुलि च्युताः कयादीसे नेपालभाषा क्लब, आदिवासी नेवाः राजनीतिक अभियान व नेवाः ग्वहालि पुचः न भाषा संरक्षण यानाच्वंगु दु धका धयादीगु दु।

उगु ज्याझ्वलय् समाजसेवी श्रीकृष्ण मानन्धरं टोखा नगरपालिका वडा नं. २ व ३ य् स्थानिय पाठ्यक्रमय् नेपालभाषां ब्बकेगु ज्या जुइ धुकुगु दु धका जानकारी बियादीसे स्थानिय सरकार सञ्चालन ऐनं बिउगु अधिकार छ्यला मां भाषां ब्बकेगु ज्या जुगुलि सुभाय् देछानादीगु खः। उद्घोषण, प्रचलित नेपाल लिपि प्रशिक्षण कयादीपिन्त दसिपौ लःल्हायेगु ज्या जुगु खः।

ग्वहालि पुचः न थ्व स्वया न्ह्यः किपू, तारकेश्वर नगरपालिकाया मनमैजु, फुटुङ, धर्मस्थली, ख्वप थिमि, येँया थीथी थासय् उगु ज्याझ्वः जुइ धुकुगु दु।

प्रधानमन्त्री केपी शर्मा ओलीं माओआवादी केन्द्रया अध्यक्ष पुष्पकमल दाहाल प्रचण्डया खँय् आपत्ति प्वकूगु दु।

क्याप्टेन रामेश्वर थापां च्वयादीगु ‘इन टुु द फायर’ सफू प्रधानमन्त्री ओलीं छगु ज्याझ्वः उलेज्या यानादीगु खः। वंगु भदा १० गते प्रतिनिधि सभा बैठकय् प्रचण्डं श्रीलंका व बंगलादेश थे थन न अज्यागु अवस्था वयेफइ धका न्ववागु खः।

उकिया लिसः बिइगु झ््वलय् येँ जूगु छगु ज्याझ्वलय् प्रधानमन्त्री ओलीं नेपाः छु न देय् या फोटोकपी मेसिन मखु धका धयादीसे बंगलादेश व श्रीलंका थे ग्याये माःगु अवस्था वइ मखु धका धयादीगु खः। ‘नेपाःया थःगु हे म्हसिका, सभ्यता व संस्कृति दु। बंगलादेशय् छु जुल, थन अथे जुइके मखु’ प्रधानमन्त्री ओलीं धयादीगु दु, ‘जिमिसं ल्वाना हयागु लोकतन्त्र व संविधान हयागु खः। लोकतन्त्र विरुद्ध ल्वाइपिन्स ख्यायेगु सम्भव मदु।’

प्रधानमन्त्री ओलीं प्रचण्डयात अःखत ख्याच्वः ब्युगू दु। ‘जिमित सयकि धका तसकं हालिपिन्त जिं सयसकि धका धाय्, नेपाः आः बेथिति, अराजकता व हिंसाया राजनीति सम्भव मदु। सम्भव याके बिइमखु’, धका वयकलं धयादीगु दु। देय् हिंसात्मक गतिविधि न्ह्याना च्वंगु इलय् थः हिंसाया विरोध यानाम्ह खः व राजनीतिक समाधानया कुतः यानागु खः।

प्रधानमन्त्री ओलीं छु न गतिविधि व अराजकतायात कानूनी कथं दिकेगु जुइ धका न धयादीगु दु। प्रधानमन्त्री ओलीं प्रचण्डयात न्यकूसे धयादीगु दु ‘जिं १७ हजार मनू स्यानागु दु व ग्यायेगु? लोकतन्त्रविरुद्ध ल्वाइपिन्स जिमित ख्यायेगु?’, प्रधानमन्त्रीं तं प्वकूगु खः।

केन्द्रीय मानन्धर संघं बसन्तपुरय् तःजिक धाःबाजं ब्बज्या ११४४ क्वचाःगु दु।

मौलिक बाजं संरक्षण व प्रवद्र्धन यायेगु आज्जु कथं संघं छु दँनिसे येँ महानगरपालिकानाप सहकार्य याना बाजं ब्बज्या याना वयाच्वंगु खः। ‘मानन्धर समुदायया थीथी त्वाः मध्ये येँ च्वंगु च्याःगु त्वाःया बाजं ब्बज्यागु दुथ्याःगु खः।’ धका ज्याझ्वःया कजि सन्देश मानन्धरं धाःगु दु।

उगु ज्याझ्वलय् लाय्कूसाः मानन्धर समाज, भिंद्यः गुथि कालिमाटी, चस्वांद्व मानन्धर सनाःगू खलः, थँहिटी मानन्धर गुथि, दैसाः टोल मानन्धर समाज, न्यागःमणि फेदी मानन्धर संघ, मानन्धर सनाःगू खलः न्हूसाः व पाक्व पुखूद्यां सनाः खलःया च्याम्ह च्याम्ह कलाकारपि नाप ब्बज्याय् १५ गु व्यावसायिक म्यूजिकल अर्केस्ट्राया कलाकार तय्स ब्बति काःगु खः।

नेपाल आयल निगम पेट्रोलया भाः घटे याउगु दु।थौ शनिवाः चान्ह्यःनिसे लागू जुइगु कथं पेट्रोल लिटरं नितका, मचिकं व डिजल लिटरं छतका घटे जूगु दु धका निगमं धाःगु दु।

अथेहे आन्तरिक हवाई इन्धनपाखे लिटरं न्यातका व अन्तर्राष्ट्रिय हवाई इन्धनपाखे किलोमिटर ३७ डलर भाः घटे याःगु दु। जाः थुइगु एलपी ग्याँसया भाः धाःसा यथावत् हे दु।

न्हुगु भाः कथं आः पेट्रोलया भाः स्वनिगः, पोखरा व दिपायलय् लिटरं १६३ रुपैयाँ याःगु दु। सुर्खेत व दाङय् १६२ व मेमे थाय् १६० रुपैयाँ ५० पैसा कायम याःगु दु।

अथेहे मचिकं व डिजेलया भाः स्वनिगः व दिपायय् लिटरं १५४ तका कायम याःगु दु।