थ्वहे वइगु बैशाख ४ गतेनिसें न्यान्हुतक न्ह्याइगु जनबहाःद्यःया रथजात्रा न्यायेकेगु लँपुइ गुगु नं कथंया अव्यवस्थित मयायेत जनबहाःद्यः रथजात्रा व्यवस्थापन समितिं इनाप याःगु दु।

समितिया नायः लिसें जनबहाःद्यःया गुरुजु निलकाजी शाक्यं छगू प्रेस विज्ञप्ति पितब्युसें बैशाख ४ गतेनिसें जात्रा न्ह्याइगु जूगुलिं उगु जात्रा न्ह्याइगु लँपुइ अव्यवस्थित मजुइक ज्याखँ यायेत इनाप यानादीगु खः।

शाक्यं पितब्यूगु उगु वक्तव्यय् जात्रा जुइगु लागा जमं, कमलाछि, भोताहिति, असं, न्हायकं त्वाः, भेडासिं, जनबहाः, वंगः, मखं, मरु, चिकंमू, जैसिदेगः, ज्याःबहाः, लगं लिसें थुगु लागाया जःखः हिति कायेगु, धः दयेकेगु, लँ दयेकेगु, पेटी दयेकेगुआदि गुगु नं कथंया ज्या जात्रा न्ह्यः मयायेत इनाप यानादीगु खः।

उगु विज्ञप्तिइ वय्कलं छुं छुं वडां थुगु थासय् विकास निर्माणया ज्या कथं छुं न्हि न्ह्यःनिसें यानाच्वंगु दुसा जात्रा न्ह्यः हे उगु ज्या क्वचायेकेत नं इनाप यानादीगु खः।

समितिया नायः शाक्यं भोताहिति लागाय् धः दयेकेगु ज्या क्वचाःगु व लँपु दयेकेगु ज्या जुयाच्वंगु जानकारी वःगु धासें द्यःया रथ सालेबलय् उगु लँपु पायछि गुलि जू उकिया निरीक्षण येँ महानगरपालिकाया इन्जिनीयरपिंलिसे चैत्र १२ गते सोमवाः यायेगु व मेमेगु वडाय् नं थुकथंया ज्या जुयाच्वंगु थाय् निरीक्षण यायेगु जानकारी बियादीगु दु।

नेवाः पत्रकार राष्ट्रिय दबू नं ११४ क्वःगु अन्तराष्ट्रिय श्रमिक महिला दिवसया लसताय् खुम्ह मिसा पत्रकारपिन्त साधना पत्रकारितापाखे हनेत्यंगु दु

पत्रकार दबूपाखें थ्व हे सोमवाः मूपाहा कथं उपप्रधान लिसे स्वास्थ्य नाप जनसंख्या मन्त्री उपेन्द्र यादवं खुम्ह मिसा पत्रकारिता ख्यलय् योगदान यानाच्वपिन्त हनेत्यनागु धका ज्याझ्वःया कजि पत्रकार दबूया ल्यु छ्याञ्यजे सुनिता महर्जन जानकारी बियादीगु दु।

संचार ख्यलय् मदिक्क मिसा पत्रकारपिनिगु सः थ्वय्का वयाच्वपि भगवति तिमल्सिना, पवन वर्षा शाह, रीता महर्जन, शान्ति तामाङ्ग, सुनी बनेपाली व यलु जोशीयात हनेत्यनागु खः धका कजि महर्जन जानकारी बियादीगुु खः। पत्रकार दबू न वंगु च्यादँनिसे अन्तराष्ट्रिय नारी दिवसया लसताय् मिसा पत्रकारपिन्त अथे हने ज्या याना वयाच्वंगु खः।

दबूया नायः नृपेन्द्रलाल श्रेष्ठ २००८ सालय् महिला लय्पौया सम्पादक साधना प्रधानया नामय् वंगु दँनिसे वयकःया नामय् साधना पत्रकारिता सम्मानपाखे मिसा पत्रकारपिन्त हनेज्या याना वयागु खः धका धयादीगु दु।

अमेरिकाया न्यूयोर्कय् ६८ क्वःगु युएन वुमनया ‘द कमिसन अन दि स्टाटस अफ वुमन’ य् ब्बति कया महिला, बालबालिका लिसे ज्येष्ठ नागरिक मन्त्री भगबती चौधरी स्वदेश लिहावःगु दु।

म्हिगः ४ः२५ या कतार एयरलाइन्सया फ्लाइटं मन्त्री स्वदेश लिहावःगु दु धका मन्त्री चौधरीया स्वकीय सचिब शंकर चौधरीं जानकारी बिःगु दु।

मन्त्री चौधरीनाप मन्त्रालयया सचिब सुमनराज अर्याल, सहसचिव रामकृष्ण लामिछाने, उपसचिव विनोदकुमार दाहाल, समाज कल्याण परिषदया सदस्य सचिब मनोज भट्टपिन्स लसकुस याःगु खः।

स्वदँलिपा नेपालं युएन वुमनया सम्मेलनय् मन्त्रीस्तरीय प्रतिनिधि मण्डलं ब्बति काःगु खः। मिसापिनिगु सामाजिक, आर्थिक, न्यायिक समानता लगायतया विषयय् संयुक्त राष्ट्रसंघं दँय् दँसं विश्व सम्मेलन जुयावया च्वंगु खः।

विश्व कविता दिवसया लसताय् स्वंगू सफू विमोचन जूगु दु। उगु ज्याझ्वलय् गाजलं दाःगु चा, चिन्तनया लँय् जि व अमुलिइ प्यकालँय् जि जि नांया सफू विमोचन जूगु खः।

फू विमोचन  मंकाः कथं नेपालभाषा केन्द्रीय विभागया प्रमुख डा. राजन लाल जोशी, प्राज्ञ ध्रुव मधिकर्मी व साहित्यकार पूर्ण ताम्रकारपिन्स यानादीगु खः। खुगू दसक न्ह्यः नं प्रकाशनय् वयेधुंकूगु डा.आनन्द जोशी व विमल ताम्रकारं सम्पादन याःगु ‘गाजलं दाःगु चा’या निगूगु संस्करण पिदंगु खः।

रुवरिक व कुतः पिकाकया ग्वसालय् जूगु उगु ज्याझ्वलय् गायक सत्यनारायण मानन्धरं नेपालभाषा साहित्यया आदिकवि महिन्द्र मल्लं रचना याःगु कवितायात म्ये हाला न्यंकादीगु खः।

भेपपाखे तस्करी जूगु लुँ संलग्नताय् दुगु द्धपनय् ज्वम्ह पूर्वसभामुख नाप माओवादी उपाध्यक्ष कृष्णबहादुर महरा न्यान्हुलिपा हे रिहा जूगु दु।

केन्द्रीय अनुसन्धान ब्यूरो (सीआईबी) या अनुसन्धान अधिकृतं याःगु सिफारिसया आधारय् सरकारी वकिलया कार्यालयं महरायात हाजिरी जमानतय् त्वःतुगु धका धाःगु दु।

प्रहरीं महरायात वंगु चैत ५ गते कपिलवस्तुया सीमा क्षेत्र न्ह्यने ज्वःगु खः। पूर्वन्यायाधीश डिल्लीराज आचार्य नेतृत्वय् लुँ तस्करी अनुसन्धान जाँचबुझ आयोगं चैत १ गते लःल्हागु प्रतिवेदनय् महरायात मुद्दा न्ह्याकेमाःगु सिफारिस याःगु खः।

सीआईबी न उन्मुक्ति बिउगु महरायात मुद्दा न्ह्याकेगु झीगु आधार दु धका प्रतिवेदनय् उल्लेख याःगु दु। प्रतिवेदनयात कार्यान्वयन यायेगु  मन्त्रिपरिषदं निर्णय यायेवं प्रहरीया केन्द्रीय अनुसन्धान ब्यूरो (सीआईबी) या न्हुगु टोलीं हाकन जाँच याःगु खः।