प्रधानमन्त्री केपी शर्मा ओलीलिसे राष्ट्रिय फोटो पत्रकार पुचः (एनएफपिजे) नेपाःया नवनिर्वाचित कार्यसमितिं थौं प्रधानमन्त्री निवास बालुवाटारय् नाप लानाः वय्कःयात फोटो पत्रकारतय्गु हकहितया निंतिं गुगू बुँदाया ध्यानाकर्षण पौ लःल्हाःगु दु।

संस्थाया नायः प्रदीपराज वन्त नेतृत्वया टोलीं लःल्हाःगु उगु ध्यानाकर्षण पौ नेपालय् थी थी सञ्चारगृहय् फोटो पत्रकारिता याइपिं फोटो पत्रकारतय्गु हकहितया निंतिं सरकारया पाखें माःगु ग्वाहालि व फोटो सङ्ग्रहालयया निंतिं कुतः याकादीत प्रधानमन्त्री ओलीयात ध्यानाकर्षण याःगु खः।

अथे हे ‘फोटो पत्रकारितापाखें जीविकोपार्जन याइपिं फुक्कं फोटो पत्रकारतय्गु बीमा नापं स्वास्थ्य सुरक्षा, फोटो पत्रकार तय्त व्यावसायिक तालिम बिइत दँय् दसं बजेट व्यवस्थापन, ई कथं ‘अपडेट’ जुयाच्वनेत फोटो पत्रकार तय्त माःगु क्यामेरा न्यायेत सहुलियत दरं त्यासा उपलब्ध याकेत कुतः यानादीत तकं ध्यानाकर्षण याःगु दु।

उगु झ्वलय् प्रधानमन्त्री ओलीं नवनिर्वाचित कार्यसमितियात भिंतुना बिसें पत्रकारिताय् फोटोया महत्व अप्वः जुइगुलिं फोटो पत्रकार तय्गु निंतिं देय्पाखें माःगु ग्वाहालि याइगु भलसा बियादिल।

नेवाः देय् दबूया खुक्वःगु केन्द्रीय समितिया मुज्या क्वचाःगु दु।

नेपालभाषा मंकाः खलःया दबू छेँय् च्वंगु केन्द्रिय समितिया मुज्यां थ्व हे वइगु चैत्र २२ व २३ गते सुदुर पश्चिम प्रदेशया महेन्द्रनगरय् राष्ट्रिय महाधिवेशन यायेगु निर्णय याःगु दु।

रेडियो नेपालया अनलाइन न्युज पोर्टल रेडियो नेपाल अनलाइन डट कमया सम्पादकय् मुख्य संवाददाता प्रमोदकुमार सिंह (दाहाल) नियुक्त जुगु दु।

स्वगू दशकनिसे नेपाःया पत्रकारिता ख्यलय् सक्रिय जुयाच्वम्ह दाहालयात अनलाइन न्युज पोर्टलया सम्पादक यागु जिम्मेवारी ब्यूगु दु। रेडियो नेपालया व्यवस्थापन बैठकं याःगु निर्णय कथं रेडियो नेपालया कार्यकारी निर्देशक अमरध्वज लामां दाहालयात अनलाइन न्युज पोर्टलया सम्पादक जूया ज्या यायेत मेगु अप्पो जिम्मेवारी वःगु दु धका धयादीगु खः।

दाहालं रेडियो नेपालया रिपोर्टिङ शाखा प्रमुखया जिम्मेवारी कःघाना वयाच्वम्ह खः। अथेहे अङ्ग्रेजी भाषाया समाचार सम्पादक पदय् ज्या यानाच्वंम्ह अर्जुन सापकोटायात अनलाइन न्युज पोर्टलया सहसम्पादक याःगु जिम्मेवारी ब्यूगु दु धका निर्देशक लामां धाःगु दु।

ओली प्रधानमन्त्री केपी शर्मा ओलीं जनसङ्ख्याया मुद्दायात आर्थिक, सामाजिक व राजनीतिक रणनीतिया कथं स्वयेमाः धका धयादीगु दु।

खुक्वःगु एसियाली जनसङ्ख्या सम्मेलनया थौं उलेज्या यानादिसें वय्कलं विकास व जनघनत्वया सहसम्बन्धयात ध्यान बियाः सीमान्तकृत नापं विपन्न समुदायतय्त अःपुक म्वाये निंतिं मजिमगाःगु आवश्यकतात चुलाकेत सरकारपाखें थी थी कुतः जुयाच्वंगु धका धयादिगु दु।

प्रधानमन्त्री ओलीं काठमाडौँ मेडिकल कलेजपाखें न्ह्याकाःच्वंगु अस्पतालय् नकतिनि बूम्हं छम्ह मचाया मांम्हलिसे भर्चुअल खँल्हाबल्हा यानाः सम्मेलनया उलेज्या यानादीगु खः। वय्कलं समानता व समावेशी नीति नालाः तःम्हि व चीम्हि दथुइया गाः त्वःपुइमाःगु, आत्मसम्मान नापं मानव अधिकार, स्वस्थ्य व भलसा नापंया हलिं निर्माणय् सकलें छवाः जुइमाःगुली बः बियादिगु खः।

वय्कलं पृथ्वी व मनूतय्गु रक्षाया लागि जुयाजुसें मानवीय विकास, असल जीवनयापनया समस्या व ज्यंकेगु उपायया निंतिं थजाःगु विषयय् जुइगु सम्मेलनं दुग्यंगु न्वाखँ बिइगु अपेक्षा यानादिल। वय्कलं जलवायु ह्यूपाःया मुद्दानाप ल्वायेत विश्वव्यापी साझेदारीयात महत्व बियाः न्ह्याःवनेमाःगु धासें दिगो विकास, सुशासन व सामूहिक कुतः तसकं आवश्यक जूगु धयादिल। प्रधानमन्त्री ओलीं ‘समृद्ध नेपाः, सुखी नेपाःमि’ आकाङ्क्षायात खनेदूगु कथंया उपलब्धिइ हिइके माःगुलिइ बः बियादिल।

नेपाली कांग्रेसया सभापति नापं पूर्व प्रधानमन्त्री शेरबहादुर देउवा, त्रिभुवन विश्वविद्यालयया उपकुलपति प्राडा केशरजङ्ग बराल, एसियाली जनसङ्ख्या एशोसिएशनया अध्यक्ष रेइको हायाशीलिसें सम्मेलनया उलेज्याया झ्वलय् ब्वति कयादीगु खः। सम्मेलनय् थी थी विषयगत सत्रत न्ह्याकिइ। (रासस)

लुँ तोलां थौ गुसः थहावंगु दु। लुँ तोलां गुसः थहावना थौ १ लाख ४९ हजार ६ सय तका न कारोबार जुगु दु धका नेपाल सुनचाँदी व्यवसायी महासङ्घं धाःगु दु।

अथहे वहः तोलां थौ झीतका थहावंगु दु। वहः तोलां झीतका थहावना १ हजार ८ सय ३० तका न कारोवार जुगु दु धका महासङ्घं धाःगु दु।