प्रधानमन्त्री पुष्पकमल दाहाल प्रचण्डं २८ गते विश्वासया मत काइगु जुगु दु। प्रचण्डं संघीय संसदया महासचिवयात पौ च्वया थ्व हे वइगु २८ गते संसदया बैठकय् विश्वासया मत कोगु धलखय् तय्त इनाप यागु दु।

संसदय् निगु तधःगु दल नेपाली कांग्रेस व एमाले दथुइ केपी शर्मा ओलीया नेतृत्वय् न्हुगु सरकार गठन यायेत सहमति जुइ धुकुगु दु।

२७५ सदस्यीय प्रतिनिधिसभाय् बहुमतया लागि १३८ मत माः, उकिइ मध्ये प्रचण्डयाके माओवादी (३२), रास्वपा (२१), एकीकृत समाजवादी (१०) व अशोक राई नेतृत्वय् जसपा (७) याना ७९ मत जक दु।

अथेहे कांग्रेस (८८) व एमाले (७९) याना १६७ मत दु।

शेयर बजाः निगु ल्याखं थहावःगु दु। शेयर बजाः परिसूचक नेप्से थौ १५ दशमलव ४६ ल्याखं थहावना २ हजार १ सय १९ दशमलव ६९ विन्दुइ थ्यःगु दु।

थौ फाइनान्स व उत्पादन बाहेक मेमेगु समूहया शेयर थहावंगुलि बीमा, विकास बैंक, होटल समूहया शेयर तसकं थहावःगु दु। थौ आँखु खोला जलविद्युत् कम्पनीया शेयर १० प्रतिशतं थहावःगु दु। समग्र बजाः थहावःगु  दिं मैलुङ खोला जलविद्युत् कम्पनीया शेयर धाःसा ९ प्रतिशत स्वया अप्पो कुहावःगु दु।

कारोबार रकम थौ थहावःगु दु। ३ सय १३ गु कम्पनीया २ करोड २१ लाख कित्ता शेयर ६ अर्ब ४८ करोड रुपैयाँया कारोबार जूगु दु। दकलय् अप्पो एनआरएन इन्फ्रास्ट्रक्चर एन्ड डेभलपमेन्ट कम्पनीया ३० करोड रुपैयाँ बराबरया शेयर कारोवार जूगु दु।

प्रधानमन्त्री निवास बालुवाटारय् वःपि राष्ट्रिय स्वतन्त्र पार्टी (रास्वपा)या मन्त्रीपि राजीनामा मबिउसे लिहावःगु दु। राजीनामा बिइत तयारी याना वःपि मन्त्रीपि बालुवाटारय् वःगु खः।

प्रधानमन्त्री प्रचण्डनाप सहलह यायेवं उपि राजीनामा मबिउसे लिहावःगु खः। प्रधानमन्त्री प्रचण्डं थःत संसदय् विश्वासया मत कायेगु व ग्वहालि यायेत धायेवं राजीनामा मबिउसे लिहावयागु धका प्रमुख सचेतक सन्तोष परियारं जानकारी बिःगु दु।

थौ सुथय् राजीनामा पौ ज्वना मन्त्रीपि प्रधानमन्त्रीयात नापलावंगु खः।

राष्ट्रिय स्वतन्त्र पार्टी (रास्वपा)या निलम्बित महामन्त्री मुकुल ढकालं जनताया खँ खथे खः अथे न्ववानागु इलय् थःत कारबाही जुगु धका धाःगु दु।

अनुशासन व मर्यादा उल्लंघन यागु द्धपनय् म्हिगः बुधवाः रास्वपाया केन्द्रीय समिति बैठकलिपा महामन्त्री पदं निलम्बन याःगु खः। ‘ जनताया खँ खथे खः अथे न्ववानागु इलय् थःत कारबाही जुगु दु’, मुकुलं सामाजिक सञ्जालय् च्वंगु दु।

पद गौण खः व जनताया खँ न्ववानागु इलय् कारबाही जूसा न्ववाय् माः धका थःम्हेसिया न्ववानागु खः धका धाःगु दु। सभापति रवि लामिछाने न देश दयकिइ धका भलसा कया वया छु मखु ज्या याःगु दु सा ल्युल्यु वनागु खः छु खँ पार्टीइ लागू यागु दु धका मुकुलं च्वंगु दु।

राष्ट्रिय स्वतन्त्र पार्टी (रास्वपा) या मन्त्रीपिन्स थौ राजीनामा बिइगु जुगु दु। रास्वपाया प्रमुख सचेतक सन्तोष परियारं थौ सुथय् प्रधानमन्त्री पुष्पकमल दाहाल प्रचण्डयात नापलाना मन्त्रीतय्स राजीनामा लःल्हाइगु जानकारी बिःगु दु।

सरकारय् रास्वपाया सभापति रवि लामिछाने उपप्रधानमन्त्री लिसे गृहमन्त्री, उपसभापति डोलप्रसाद अर्याल श्रम लिसे रोजगार मन्त्री, सुमना श्रेष्ठ शिक्षा मन्त्री व विराजभक्त श्रेष्ठ युवा लिसे खेलकुद मन्त्री जूयाच्वंगु खः।

मंगलवाः च्वंगु रास्वपाया पदाधिकारी बैठकं कांग्रेस–एमाले गठबन्धनया सरकारय् सहभागी मजुइगु निर्णय याःगु खः।