सगरमाथा आरोही नाप पत्रकार रोजिता बुद्धाचार्य नेशनल एरोनटिक्स एण्ड स्पेस एडमिनिस्ट्रेशन (नासा) य् पूर्ण छात्रवृत्तिइ अध्ययनयाम्ह न्हापाम्ह नेपाःया मिसा जुगु दु।

नासाय् अध्ययनया लागि पूर्ण छात्रवृत्तिइ नां पिकाय््वं बुद्धाचार्यं थौ हे अध्ययनया लागि अमेरिकाया वासिङ्टन डिसीइ च्वंगु नासाय् वःगु दु।

थ्व स्वया न्ह्यः बुद्धाचार्यं अमेरिका मेरिल्याण्डया बाल्टीमोरय् स्पेस टेलिस्कोप साइन्स इन्स्टिच्युटय् छात्रवृत्तिइ अध्ययन याये धुकुगु खः। हलियकं न्यासःम्हेसिगु आवेदक मध्ये १४ म्ह छनौट जुया बुद्धाचार्यं स्पेस टेलिस्कोप साइन्स इन्स्टिच्युटय् अध्ययन यायेगु ह्वतां चुलागु खः।

नासाय् अध्ययन याइम्ह न्हापाम्ह मिसा वैज्ञानिक जुइवं बुद्धाचार्ययात मोतीदेवी स्मृति केन्द्रं साहसिक मिसा, सगरमाथा आरोही नाप युवा वैज्ञानिक कथं सम्मान याःगु खः। बुद्धाचार्र्य अन्तरिक्षयात्री जुइगु आज्जु ज्वना नासाय् अध्ययन यायेगु धका धाःगु दु।

नेवाः पत्रकार पुचः कास्कीया ग्वसालय् व पोखरा महानगरपालिका वडा नं. ९ ग्वहालिइ आधारभुत समाचार च्वयेगु तालीम क्वचाःगु दु। उगु तालिमय् ४०म्हेसिया ब्बति काःगु खः।

ज्याझ्वःया उलेज्या पोखरा महानगरपालिका वडा नं. ९ वडा अध्यक्ष दिपेन्द्र मर्सानीं यानादीगु खः। सञ्चारकःमि तय्त न्ह्यावलये न वडाय् जुइगु थीथी सामाजिक संघसंस्थां याइगु बालागु ज्याझ्वलय् ग्वहालि यानाच्वनागु दु धका धयादीगु खः।

वयकलं वडां याइगु बालागु ज्याझ्वलय् प्रोत्साहन यायेगु व बामलागु ज्याझ्वःया खवरदारी याायेत न पत्रकारतय्त इनाप यानादीगु खः। तालिमय् पत्रकार दिपेन्द्र श्रेष्ठ, सन्देश श्रेष्ठ व सन्जय मल्लपिन्स प्रशिक्षण बियादीगु खः।

तालिमय् ब्बति काःपिन्त वडा अध्यक्ष दिपेन्द्र मर्सानी, नेवा पत्रकार पुचःया अध्यक्ष अनिशा श्रेष्ठं दसिपौ लःल्हानादीगु खः।

नेपाल पत्रकार महासंघया संस्थापक अध्यक्ष सू खः धइगु विषययात अध्ययन याना क्वचायेकेगुलि महासंघया अध्यक्षनापं नेतृत्वपिन्स प्रतिवद्धता व्यक्त यागु दु।

नेपाल आदिबासी जनजाति पत्रकार महासंघ (फोनिज) या अध्यक्ष गजुर्धन राईया नेतृत्वय् थौं महासंघया ज्याकूथि वना अल्टिमेटमनापं स्मरणपौ लःल्हागुलि अध्यक्षनापं पदाधिकारीपिन्स अथे प्रतिवद्धता यानादीगु खः।

महासंघया इतिहास व संस्थापक विषय ताःईनिसे वहस जुया वयाच्वंगुलि याकन हे क्वछिइगु कथं काःगु पलाः ल्ह्वनेगु कथं पदाधिकारीपिन्स प्रतिवद्धता प्वकादीगु खः। महासंघया अध्यक्ष बिपुल पोखरेलं इतिहास सही व गलत छु खः धइगु विषय विज्ञपिनिगु पुचःपाखे अध्ययन याका क्वछिइगुलि न्यायपूर्ण जुइ धका वयकलं धयादीगु खः।

उकिया लागि महासंघं याकन हे पलाः ल्ह्वनेगु जुइ धका धयादीगु खः। ‘संस्थापकया विषय अध्ययन याकन जुइमाः व उकिया लिच्वः याकन हे जुइमाः धका जिमिगु चाहना खः, उकिया लागि एकेडेमिक अध्ययन याना न्ह्याः वनेमाः’ धका अध्यक्ष पोखरेलं धयादीगु खः। महासंघं फागुन १९ गतेय् च्वनिइगु बैठकय् उगु विषय सहलह यायेगु  धका धयादीगु खः।

उकियात कया विधि निर्माणयाना न्ह्यावनेत सकसिगु ग्वहालि माः धका धयादीगु खः। फोनिजया अध्यक्ष गजुर्धन राई न महासंघया इतिहासयात मस्यू थे यानाच्वंगुलि दुःख प्वकादिसे उकियात भिंका न्ह्या वनेगु बाहेक मेगु लँपू मदु धका धयादीगु खः। ‘महासंघया इतिहास व संस्थापकया विषययात खण्डित व विभाजित मयायेगु, थुकिइ समस्या वयाच्वनिइ’ अध्यक्ष राई न धयादीगु खः, “दशी प्रमाणया आधारय् थुकिया अध्ययन याना क्वछिइमाः, इतिहास भिंकेगुलि थ्व छगू नेतृत्वपिन्त अवसर न खः।’

महासंघया वरिष्ठ उपाध्यक्ष रमेश विष्टं फोनिजया सुझाव व माग कथं महासंघं अध्ययन समिति दयका इतिहास व संस्थापकबारे क्वछिना न्ह्यावनेत थःपि तयार दुगुलि दवावया ज्याझ्वः मयायेत वयकलं फोनिजयात इनाप यानादीगु खः ।

महासंघया महासचिव रोशन पुरीं तथ्ययात सू ना नं तोडमोड याये मज्यु उकियात अध्ययन याना न्ह्यावनेगुलि थःपिनिगु प्रतिवद्धता  दु धका धयादीगु खः। अध्ययन समिति दयका थुकिया बारे लिच्वः पिकायेगु निति महासंघ तयार दु धका धयादीसे संघर्षया ज्याझ्वः लितकायेत वयकलं फोनिजयात इनाप यानादीगु खः।

फोनिजया अध्यक्ष राई न महासंघया अध्यक्ष पोखरेलयात न्ह्यन्हुया अल्टिमेटम नापें स्मरण पौ लःल्हानादीगु खः। फोनिजया माग कथं छवाःया दुने संस्थापक विषयया प्रक्रिया सुरु मजूसा केन्द्रनापं देयन्यक महासंघया ज्याकूथि तालाबन्दी यायेगु धका अध्यक्ष राई न चेतावनी बियादीगु खः।

उगु ज्याझ्वलय् फोनिजया पदाधिकारी व नेवाः पत्रकार राष्ट्रिय दबूया नायः नृपेन्द्रलाल श्रेष्ठ, बरिष्ठ न्वकू सुनील महर्जन व न्वकू रचना श्रेष्ठया न ब्बति दुगु खः।

प्रधानमन्त्री पुष्पकमल दाहाल प्रचण्डं वरिष्ठ गायक नापं संगीतकार भक्तराज आचार्ययात श्रद्धाञ्जली व्यक्त याःगु दु।

म्हिगः सोमवाः मदुम्ह आचार्यया शव अन्तिम श्रद्धाञ्जलीया लागि नक्सालस्थित नेपाल संगीत नाप नाट्य प्रज्ञा प्रतिष्ठानय् तयातःगु खः।

प्रधानमन्त्री प्रचण्ड व नेकपा एमालेया अध्यक्ष केपी शर्मा ओली नक्सालय् वना आचार्ययात श्रद्धाञ्जली व्यक्त याःगु खः। आचार्यया पार्थिव शरिरयात प्रधानमन्त्री प्रचण्डं राष्ट्रिय ध्वाँय् फाय्कूगु खः।

जगत सुन्दर ब्वनेकुथिया ३४ क्वःगु बुन्हि छगू ज्याझ्वःया दथुइ हंगु दु। मूपाहां कथं लुम्बिनी विश्वविद्यालयया पुलांम्ह उपकुलपति प्रा.डा. हृदयरत्न वज्राचार्यं त्वाःदेवाय् मत च्याकाः उलेज्या यानादीगु खः।

ब्वनेकुथिइ नीदँतक योगदान यानादीम्ह शिक्षिका सृजना मानन्धरयात सभाध्यक्ष डा. चुन्दा वज्राचार्यं ८० द्वः तकाया चेक व मूपाहां वज्राचार्यं हनापौ लःल्हासें विशेष सम्मान याःगु खः। ब्वनेकुथिइ एसईई दकलय् अप्वः ल्याः हःपिं व नेपालभाषाय् दकलय् अप्वः ल्याः हःपिं प्रेरणा शाक्य व सिजन खड्गीयात मोतिमाया सिरपाः व शान्ति सिरपाः नं लःल्हायेगु ज्या जूगु खः ।

ब्वनेकुथिइ दकलय् उत्कृष्ट स्यनामि चैत्यमाया डंगोलयात दां सिरपाः लिसें हनापौ लःल्हाःगु खःसा ब्वनेकुथियात थीथी इलय् थीथी कथं ग्वाहालि याःपिं सकलसितं सुभाय् पौ लःल्हायेगु ज्या जूगु खः ।

ज्याझ्वलय् मूपाहां वज्राचार्य लगायत विशिष्ट पाहां हिकिभा जापानया सातोसि चियोनो, पाहां शोभना मासोका श्रेष्ठ, शान्ति सिरपाःया दाता ज्ञानेन्द्र मानन्धरपिंसं ब्वनेकुथियात कयाः थःपिनि नुगःखँ तयादीगु खःसा सभानायः पाखें मूपाहां व पाहांपिंत मतिनाया चिं लःल्हानादीगु खः ।

ज्याझ्वः लिपा ब्वनेकुथिया मस्तय्सं थीथी सांस्कृतिक ज्याझ्वः नं न्ह्यब्वःगु खः ।