चाँगुनारायण नगरपालिका–४ खनालचोक सेतोमाइक्रो पार्क नापसं तुँ म्हुइगु झ्वलय् निम्ह मनू सास कुना मदुगु दु।रामेछाप उमाकुण्ड गाउँपालिका–४ छेँ दुम्ह २८ दँ दुम्ह सन्देश सुनुवार व ४६ दँ दुम्ह दीपक सुनुवार थौ बुधवाः मदुगु धका प्रहरीं धाःगु दु।

जिल्ला प्रहरी परिसर ख्वपया प्रमुख राजन कार्कीं तुँ म्हुइगु झ्वलय् अन्दाजी ५५ फिट तल क्वय् थ्यःगु इलय् बेहोस जुगु अवस्थाय् थ्यःगु जानकारी वयेवं प्रहरी उगु थासय् थ्यःगु खः धका धाःगु खः।

घटनाया सम्बन्धय् थप अनुसन्धान यायेगु ज्या जुयाच्वंगु व शव परीक्षणया लागि भक्तपुर अस्पतालय् यकूगु दु धका जानकारी बिःगु दु।

बैशाख २४ गते बागमती प्रदेश सरकारं पारित याःगु भाषा विधेयक लागु जूगु लसताय् जुइगु ज्याझ्वः तःजिक हनिइगु जुगु दु।

बागमती प्रदेश सरकार संस्कृति पर्यटन व सहकारी विकास मन्त्रालयं थौ छगु पत्रकार सम्मेलन याना जानकारी ब्युगु खः। थ्व हे वइगु । बैशाख २४ गते सुथसिया ७ ता इलय् बसन्तपुरं ¥यालि व सुथसिया ९ ता इलय् बसन्तपुरय् भाषा ऐन लागु जूगु लसताय् सभा यायेगु धका थौ जुगु पत्रकार सम्मलेनपाखे जानकारी ब्युगु खः।

येयाँ सांस्कृतिक केन्द्र बसन्तपुरय् विशेष समारोह ज्याझ्वः यायेगु व उगु ज्याझ्वलय् प्रधानमन्त्री पुष्पकमल दाहाल प्रचण्ड मूपाहाँ कथं व बागमती प्रदेशया मुख्यमन्त्री शालिकराम जम्मरकट्टेल विशेष पाहाँ कथं सहभागी जुइगु दु।

बागमती प्रदेशया संस्कृति पर्यटन व सहकारी विकासमन्त्री शैलेन्द्रमान बज्राचार्यपाखें ल्हाःचिं तयाः थौं बुधवाः येँया हिमालय होटलय् ग्वसाः ग्वःगु उगु पत्रकार सम्मेलनय् पितब्यूगु प्रेस विज्ञप्ति मन्त्रालयया छ्याञ्जे हरिशरण पुडासैनीं ब्वनाः न्यंकादीगु खः।

पत्रकार सम्मेलनय् नेवाः देय् दबूया नायः पवित्र बज्राचार्यं लसकुस यानादीगु खःसा बागमती प्रदेशया पुलांम्ह संस्कृति पर्यटन व सहकारी मन्त्री पुकार महर्जनं थुगु विधेयक पारित गुकथं यायेत ताःलात धैगु विषययात कयाः थःगु खँ तयादीगु खः। अथेहे, तामाङ घेदुङया न्वकू सञ्चु ब्लोनं नं ज्याझ्वलय् सुभाय् बिउगु खः।

उगु प्रेस विज्ञप्तिइ नेपाः छगू बहुभाषिक, बहु सांस्कृतिक देय् जूगु खँ न्ह्यथंसें नेपाःया तःधंगु राजनीतिक परिवर्तन लिपा प्राप्त जूगु लोकतान्त्रिक गणतन्त्र व संघीय व्यवस्था पलिस्था लिपा संविधानं यानातःगु व्यवस्थायात व्यवहारय् कार्यान्वयन यायेगु कथं संविधानय् व्यवस्था यानातःगु भाषा आयोगया सिफारिस कथं बागमती प्रदेश सरकारं पारित याःगु प्रदेश सरकारी कामकाजीया भाषा सम्बन्धय् दयेकूगु ऐन २०८० थ्वहे वइगु २०८१ बैशाख २४ गते, नेपाल संवत ११४४ चौलागा त्रयोदसी,  मञ्जुश्री संवत् २८६० या दिं व्यवहारय् लागु जुइत्यंगु खँ न्ह्थनातःगु दु ।

लुँ तोलां थौ नीन्ह्यय्सः कुहावःगु दु। नेपाल सुनचाँदी व्यवसायी महासङ्घया कथं थौ लुँ तोलां नीन्ह्यय्सः कुहावया १ लाख ३४ हजार ५ सय न कारोबार जुगु दु धका धाःगु दु।

अथेहे वहः तोलां न नीतका कुहावःगु दु। वहः तोलां थौ नीतका कुहावया १ हजार ६३० रुपियाँ कायम जुगु दु धका महासङ्घं धाःगु दु।

थौ अन्तर्राष्ट्रिय श्रमिक दिवस ‘मे डे’ ‘इतिहास, उपलब्धि व वइगु लँपु’ नारा ज्वना हनिइगु जुगु दु।

मजदूर दिवसया लसताय् संयुक्त ट्रेड युनियन समन्वय कमिटीं थौ आज भृकुटीमण्डपमा प्रधानमन्त्री पुष्पकमल दाहालया मूपाहासुइ विशेष ज्याझ्वः जुइगु दु।

उगु ज्याझ्वःया निति न्हु सतकनिसे ¥याली न्ह्याइ धका समितिया महासचिव प्रेमप्रसाद खनालं जानकारी बिःगु दु। सन् १८८१ मे १ य् अमेरिकाय् जूगु आम हडतालया लुमन्तिइ मे दिवस हनिइ याःगु खः।

न्युयोर्कय् नेवाः तजिलजि कथं इही मुना ज्याझ्वः जुगु दु। न्युयोर्क नेवाः गुथिया ग्वसालय् दँय्दसं ग्वसाः ग्वया वया च्वंगु मंकाः इही मुना ज्याझ्वः थुगुसिइ नं जूगु दु

थुगुसिइ न्ह्यय् क्वःगु मंका इही ज्याझ्वलय् न्युयोर्क, लंगआइलन व बोस्टनया खुम्ह मिसा मस्तयसं ब्वति काःगु खः।

न्युयोर्कया ज्याक्सन हाइटस्थित धरमा हाउसया हलय् जूगु उगु मंका इहि ज्याझ्वलय् पुरोहित जुया बाशव राजोपाध्यायं पुजा यानादीगु खः। थुगुसिइ जूगु इहि मुना ज्याझ्वलय् १५०म् ह सिबें अप्वःसिनं ब्वति काःगु खः।