शेयर बजाः थौं सोमवाः निगु ल्याखं थहावंगु दु। म्हिगः आइतवाः साढे २१ ल्याखं कुहावंगु शेयर बजाः परिसूचक नेप्से थौं २१ दशमलव ३० ल्याखं थहावना १ हजार ८ सय ४७ दशमलव ५४ विन्दुइ थ्यःगु दु।

थौं दक्को समूहया शेयर थहावःगु दु। दकलय् अप्पो हाथवे इन्भेस्टमेन्ट नेपालया शेयर १० प्रतिशत व सिद्धार्थ प्रिमियर इन्सुरेन्सया शेयर १० प्रतिशत स्वया अप्पो थहावःगु दु।

समग्र बजाः थहावःसा लक्ष्मी लघुवित्त व विन नेपाल लघुवित्तया शेयर ४ प्रतिशतं कुहावःगु दु। ३५ लाख ५५ हजार कित्ता शेयर ९३ करोड ८९ लाख रुपैयाँया बरावबर थौं कारोबार जूगु दु।

दकलय् अप्पो सोल्टी होटलया ६ करोड ४३ लाख व सोनापुर मिनरल्स एन्ड आयल कम्पनीया ५ करोड ६२ लाख रुपैयाँया शेयर कारोवार जूगु खः।

राष्ट्रपति रामचन्द्र पौडेलं युरोप भ्रमण स्थगित याःगु दु।

राष्ट्रपतिया परराष्ट्र मामिला सल्लाहकार सुरेश चालिसेया कथं भुखाय् ब्बया देय्या वर्तमान परिस्थिति अनुकुल मजूलि ज्याझ्वः स्थगित जुगु धका जानकारी बियादीगु खः।

कवि डा. योगेन्द्र प्रधानयात दान्यहिरा जीवंकाछि साहित्य सिरपाः लःल्हाइगु जूगु दु। अथेहे दान्यहिरा जीवंकाछि संगीत सिरपाः गायक जुजुकाजी रंजित व दान्यहिरा विज्ञान प्रविधि सिरपाः डा. जीवनकुमार श्रेष्ठयात लःल्हाइगु जूगु दु ।

थुगु स्वंगुलिं सिरपाः ५० द्वः तकाया खः । थुकिया दाता साहित्यकार यज्ञरत्न धाख्वा खः । थ्व सिरपाः नेपालभाषा एकेडेमिया दान्यहिरा सिरपाः समितिपाखें बीगु खः ।

थ्वहे वइगु शनिवाः यलय् छगू ज्याझ्वःया दथुइ थ्व स्वंगुलिं सिरपाः लःल्हाइगु ग्वसाः दु ।

भाषासेवीनापं न्हूदँ समारोह समितिया पुलांम्ह सचिवालय दुजः देवदास मानन्धर मन्त । वय्कः म्हिगः आइतवाः सनिलय् मदुगु जानकारी वय्कःया किजाः नारायणदास मानन्धरं जानकारी बिःगु दु।

मदुम्ह देवदास मानन्धर म्हिगः आइतवाः सनिलय् नमन केयर सेन्टरय् मदुगु खः। निदँ न्ह्यःनिसे वय्कःयात ब्रेन ह्येमरेज जूगुलिं सुसाकुसा यायेगु नितिं नमन केयर सेन्टरय् तयातःगु खः ।

वय्कःया छम्ह काय् व निम्ह म्ह्याय् लिसें जहान दी। छम्ह तःधिकःम्ह म्ह्याय् अमेरिकाय् च्वनाच्वंगु खः । मदुम्ह मानन्धरया अन्तिम संस्कार वइगु बुधवाः जुइगु खँ वय्कःया छेँजःपिन्सं जानकारी ब्यूगु दु।

मदिक्क निदँ तकया अभियान, संघर्ष व लविङया दथुइ बाग्मती प्रदेशसभापाखें सर्वसम्मत कथं भाषा विधेयक पारित याःगुयात थीथी लागाय् लसकुस यायेगु नापनापं प्रदेश सांसदपिन्त सुभाय् दछायेगु ज्या मदिक्क जुयाच्वंगु दु।

थ्व हे झ्वलय् शनिवाः यलया मंगल बजारय् भाषा विधेयकयात पारित याःगुलिं लसकुसयासें मैनमत च्याकेगु नापनापं प्रदेश सांसदपिन्त सुभाय् देछायेगु ज्या जूगु दु। नेवाः देय् दबू यल जिल्ला समितिया ग्वसालय् जूगु उगु ज्याझ्वलय् प्रदेश सांसदपिं रघुनाथ महर्जन, प्रेमभक्त महर्जन, देय् दबू स्वनिगः विशेष प्रदेशया नायः श्रीकृष्ण महर्जन, देय् दबू यल जिल्लाया नायः रविन्द्र शाक्य, यल नेवाः समाजया नायः विनोद ताम्राकारपिन्सं छप्वाः हे म्हुतुं आः स्थानीय सरकार भाषाया सवालय् प्रदेश सररकारलिसे जाना न्ह्याः वनेमाः धकाः धयादिल।

ज्याझ्वलय् बाग्मती प्रदेया सांसद रघुनाथ महर्जनं आःया अवस्थाय् नेवाःतसें थः मस्तय्त नं थःगु छेँय् नेवाः भाय् स्यनेगु ज्या यायेमाः धकाः बः बियादिगु खः। अथे हे मेम्ह सांसद प्रेमभक्त महर्जनं भाषा विधेयक पारित यायेगु नितिं व अन्तिम इलय् संशोधन यायेत तकं देय् दबू स्वनिगः विशेष प्रदेशया नेतृत्व प्रदेशया राजधानी हेटौंडाय् हे वया सांसदपिन्त थुइकेगु व अन्तक्र्रिया यायेगु ज्या जूगुलिं तसकं बांलाक्क संशोधन जूगु दु धयादिसें आः कार्यान्वयनया नितिं बः बिइमाः धयादिगु खः।

उगु ज्याझ्वःया मूवक्ता देय् दबू स्वनिगः विशेष प्रदेशया नायः श्रीकृष्ण महर्जनं भाषा विधेयक पारित जूगु धइगु संघयाताय नितिं हे छगू बांलाःगु ज्या जूगु खः धयादिसें नेवाः लिपियात नं न्ह्यःने यंकेगु नापनापं नेवाःतय्सं याना वयाच्वंगु नेपाल संंवतया आन्दोलनया भावनायात तकं दुथ्याकाः आः नेपाल संवतयात तकं प्रदेशं कार्यान्वयन याइगु खँ विधेयकय् उल्लेख जुयाच्वंगु दु धयादिगु खः।

वय्कलं भाषाया कारणं विभेद यात धाःसा कानुनी कारवाही जुइगु प्रावधान दुगुनिसें शिक्षा, संचार ख्यलय् तकं नेवाः भाय्यात कामकाजि भाषाया रुपय् लागू याइगु अवस्था दु धयादिल । अथे हे वय्कलं भाषा विधेयक पारित जूगु धइगु नेवाःतसें यानाच्वंगु सच्छिदँ न्ह्यःनिसेंया भाषा आन्दोलनया छगू उपलब्धी खः धयादिसें स्वनिगः विशेष प्रदेशया नायः महर्जनं आः स्थानीय सरकारयात नं भाषा सम्वन्धि कानुन दयेकेगु नितिं अभियन न्ह्याकेगु आज्जु सहित वनेमाः धयादिल ।

यलया मंगल बजारय् जूगु ज्याझ्वय् देय् दबूया दुजःनापं थीथी यलया जातीय समाजया प्रतिनिधिनिसें नेवाः अभियन्ता व थीथी ब्यक्तिपिनिगु सहभागीता दुगु खः ।