महिला, बालबालिका लिसे ज्येष्ठ नागरिकमन्त्री भगवती चौधरीं गुणस्तरीय शिक्षाया लागि स्थानीय तहं समावेशी व लैङ्गिकमैत्रीइ बजेट तयेमाः धका धयादीगु दु।

शिक्षाया लागि राष्ट्रिय अभियान (एनसिई) नेपालं छगु ज्याझ्वः यासे ‘समावेशी व गुणस्तरीय शिक्षा’ सम्बन्धी सम्मेलनया उलेज्या यानादीसे मन्त्री चौधरीं उकिया लागि सङ्घीय सरकारं माःगु सहजीकरण यायेमः धका धयादीगु दु।

वयकलं सामुदायिक विद्यालयया पूर्वाधार निर्माण यायेगु इलये मस्त, लैङ्गिक व अपाङ्गतामैत्री जुइमागुलि बः बियादीगु खः। मन्त्री चौधरीं छेँ व विद्यालयय् स्वस्थ नयेगु, स्वच्छ लः नाप मिस्त महिनावारी जुइगु इलय् सूचूपिचू यायेगुलि ध्यान बिइत इनाप यागु खः।

सम्मेलनय् स्थानीय तहया जनप्रतिनिधि, सरकारी कर्मचारी, शिक्षाविद्, शिक्षक, अभिभावक, समुदाय नाप ज्या यायेगु सङ्घसंस्थाया प्रतिनिधि पिनिगु ब्बति दुगु खः।

राष्ट्रिय सभा उपाध्यक्ष उर्मिला अर्यालं राजीनामा बिःगु दु। अर्यालं थौ बिहीवाः राष्ट्रिय सभा अध्यक्ष नारायण दाहालयात राजीनामा पौ लःल्हागु दु। सत्ता गठबन्धनय् राष्ट्रिय सभा अध्यक्ष माओवादी केन्द्र कायेगु सहमति जुगु खः।

आः राष्ट्रिय सभा उपाध्यक्ष पद सत्ता गठबन्धनया हे मेगु दलयात बिइमागुलि अर्यालं राजीनामा बिःगु खः। थ्व स्वया न्ह्यः सत्ता गठबन्धनय् नेकपा एमाले, माओवादी केन्द्र व राष्ट्रिय स्वतन्त्र पार्टी (रास्वपा) दथुइ जुगु लिखित सहमतिय् राष्ट्रिय सभा उपाध्यक्ष पद एमाले कायेगु उल्लेख जुगु खः।

लिपा हाकन जुगु गठबन्धनय् एकीकृत समाजवादी न दुथ्यागुलि राष्ट्रिय सभा उपाध्यक्ष पदबारे छु न खँ उल्लेख जुगु मदु।

लुँ तोलां थौ द्धःछि थहावंगु दु। लुँ तोलां द्धःछि थहावना १ लाख २७ हजार ९ सय थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न नीतका थहावःगु दु। वहः तोलां नीतका थहावना १ हजार ५ सय १० रुपैयाँ न कारोवार जुगु दु महासङ्घं धाःगु दु।

सक्वय् च्वनाः नेपालभाषाया सेवा याना च्वनादीम्ह नांजाःम्ह साहित्यकार लिसें समाजसेवी इन्जिनियर राजदास श्रेष्ठ थौं विहीवाः सुथय् मंत।

मदुम्ह श्रेष्ठ ७६ दँ दुम्ह खः। वय्कःयात वंगु छवाः न्ह्यवंनिसें सक्वया सुष्मा कोइराला मेमोरियल अस्पतालय् वासः याकातःगु खः थौं सुथय् वासः याकुयाकुं मदुगु खः।

उपप्रधान लिसे गृहमन्त्री रवि लामिछाने न गृह मन्त्रालयया पदभार कायेधुका सार्वजनिक जग्गा संरक्षण यायेगु थम्हेसिया प्राथमिकता तया ज्यायायेगु निर्णय याःगु खः।

उगु निर्णय लिपा थँबहिया भगवान बहाः न्ह्यने च्वंगु ऐतिहासिक कमलपोखरी स्यका दय्का तःगु छायादेवी कम्प्लेक्स विवाद आः छु जुइ धका न्ह्यसः गृहमन्त्री लामिछानेपाखे वनाच्वंगु दु। उगु छायादेवी कम्प्लेक्सया मार्केडिङ डाइरेक्टरया कथं सुमनविक्रम पाण्डे जुयाच्वंगु दु।

पाण्डे गृहमन्त्री लामिछानेया दल राष्ट्रिय स्वतन्त्र पाटीया नेता न खः। वंगु प्रतिनिधि सभाया निर्वाचनय् नुवाकोट–२ पाखे रास्वपाया हे उम्मेदवार जूम्ह पाण्डे कांग्रेसया उम्मेदवार अर्जुननरसिंह केसीनाप पराजित जूम्ह खः। बैंकर पाण्डें थः मां छायादेवीया नामय् उगु कम्प्लेक्स दयकूगु खः। उगु गुठीया जग्गा जालसाजी याना थःगु नामय् हया कम्प्लेक्स दयकूगु धासे न्हापानिसे संस्कृतिप्रेमी, सम्पदाप्रेमी, अभियन्तातय्स बिरोध याना वयाच्वंगु खः।

पाण्डें सार्वजनिक कमलपोखरीया जग्गा २०६५ सालय् अम्बिका राणा व शंकरप्रसाद शाहपाखे न्याना काःगु खः। अथेहे २०७० सालय् थः मांया नामय् छायादेवी कंम्पलेक्स दय्का २०७५ सालनिसे सञ्चालनय् हःगु खः।

गृह मन्त्रालयं सार्वजनिक जग्गा कब्जा याना च्वना च्वपि मनू तय्गु वा समूहविरुद्ध निवेदन बिइत सार्वजनिक कथं इनाप यायेवं वंगु फागुन ३० गते शूरवीर शाह, जगत्प्रकाश राणा, रामसिं केसी, सुशील अर्याल, दलबहादुर लामा व जगत्जंग पाण्डेया नामय् मंकाः कथं उजुरी लाःगु खः।

उजुरीइ तःगुलि सार्वजनिक कमलपोखरी दर्ता याःपि केयुरशमशेर राणा व अम्बिका राणा, सुधा पौडेल, शंकरप्रसाद शाह, वीणा पौडेल, सुरेशाय हाउजिङ कम्पनी (प्रो.अम्बिका राणा), प्रतिमा पाण्डे, छाया सेन्टर प्रालि पृथ्वीबहादुर पाण्डेलगायत ४३ म्हेसित कारबाही यायेमाःगु माग तःगु खः।

उजुरी तःगुलि कि.नं साविक १६७ या हाल कायम २४१२, २४१३, १६१७, २००१९, १०४० तक कित्ता दुगु सार्वजनिक याना उगु जग्गाय् दयका तःगु संरचनायात थुनेमाः धका माग याःगु खः।