लुँया भाः थौं निसः थहावःगु दु। लुँ तोलां निसः थहावना थौं १ लाख १५ हजार ९ सय रुपैयाँ थ्यःगु दु। अथेहे वहः तोलां थौं झीन्यातका कुहावःगु दु धका नेपाल सुन चाँदी व्यवसायी महासङ्घं धाःगु दु।

वहः तोलां झीन्यातका कुहावया थौं १ हजार ३ सय ९० रुपैयाँ न कारोबार जुगु दु धका महासङ्घं धाःगु दु।

मिर्मिरे लघुवित्त वित्तीय संस्थाया एफपीओ इनेज्या जूगु दु। बिक्री प्रबन्धक एसबीआई मर्चेन्ट बैंकिङं छगू ज्याझ्वः दथुइ एफपीओ इनेज्या याःगु दु।

कुल १२ हजार ३८१ म्हेसित कम्पनीया एफपीओ लागू दु। उकि मध्ये खुम्हेसित ११–११ कित्ताया दरं एफपीओ लागू दु सा ल्यः दुगु झीगु झीगु कित्ताया दरं लाइगु जूगु दु धका मर्चेन्ट बैंकिङं धाःगु दु।

लघुवित्तं सर्वसाधारणया लागि असोज २५ निसे ३० गतेतक छगू कित्ताया सच्छिया दरं १ लाख २३ हजार ८१६ कित्ता एफपीओ निस्कासन याःगु खः। मूक्कं १३ लाख २० हजार २०३ आवेदक स्वीकृत जूगु दु।

सर्वसाधारणया लागि बिहीवाः निसे भिजन लुम्बिनी ऊर्जा कम्पनीया प्राथमिक सेयर (आईपीओ) या आवेदन खुल्ले जूगु दु।

कम्पनीं आयोजना प्रभावित क्षेत्रय् च्वपि स्थानीय तयेसं मन्याःगु सेयर तकं थपे याना कुल २० लाख ७५ हजार २८५ कित्ता सेयर सर्वसाधारण तय्त मिइत्यःगु खः। छगू कित्ताया सच्छिया दरं कम्पनीया आईपीओ खुल्ले याःगु खः।

कात्तिक २० गतेतक आईपीआ आवेदन बिइफइगु जूगु दु। थ्व स्वया न्ह्यः आयोजना प्रभावित स्थानीय तय्सं मन्याःगु ४ लाख ८७ हजार ९१० कित्ता सेयर थप याना कम्पनीं सर्वसाधारणतयेत निष्कासन याःगु खः।

आईपीआ म्होतिनं १० कित्ताया लागि आवेदन बिइमाःगु दु सा अप्पो ३ लाख ८० हजार कित्ता सेयरया लागि आवेदन बिइफगु जूगु दु।

स्वन्तिया लसताय् नेपाल राष्ट्र बैंकं थ्व हे वइगु कात्तिक १९ गतेनिसे लुँया असर्फी व वहःया सिक्का मिइगु जूगु दु।

राष्ट्र बैंकं थौं बुधवाः छगू सूचं पिकया १९ गतनिसे २४ गतेतक टक्सार महाशाखापाखे लुँया असर्फी व वहःया सिक्का मिइगु धका धाःगु दु।

लुँया असर्फी छम्हेसिया छगू जक न्याय् दइगु जूगु दु। छगू सेट लुँया असर्फीइ १० ग्राम, ५ ग्राम व साढे २ ग्रामया सिक्का जुइ।

अथेहे वहःया सिक्का छगू सेटय् सा दुगु २५ ग्राम व १० ग्रामया सिक्का, लक्ष्मी, गणेद्यः व लक्ष्मी गणेश दुगु १०÷१० ग्रामया सिक्का जुइ।

शेयर बजाः थौं बुधवाः न कुहावःगु दु। म्हिगः मङ्गलवाः निगु अङ्कं कुहावःगु शेयर बजाः परिसूचक नेप्से थौै न न्यागु दशमलव ८३ अङ्कं कुहावया १ हजार ८ सय ५८ दशमलव ५६ विन्दुइ कुहावःगु खः।

थौं लगानी समूहया शेयर सामान्य थहावःगु दु सा मेगु समूहया शेयर दक्को कुहावःगु दु। दकलयय् अप्पो सोनापुर मिनरल्स एन्ड आयल लिमिटेडया शेयर ८ प्रतिशतं कुहावःगु दु। समग्र बजाः कुहावःसा दकलय् अप्पो सयपत्री हाइड्रोपावर कम्पनीया शेयर साढे ९ प्रतिशतं थहावःगु दु।

थौं ३३ लाख ६४ हजार कित्ता शेयर ८१ करोड २० लाख रुपैयाँया कारोबार जूगु दु। दकलय् अप्पो सोनापुर मिनरल्स एन्ड आयल लिमिटेडया ६ लाख १६ हजार ७ सय कित्ता शेयर १४ करोड ६० लाख रुपैयाँया शेयर कारोवार जूगु दु।