शेयर बजाः थौं बुधवाः न कुहावःगु दु। म्हिगः मङ्गलवाः न्यागु अङ्कं कुहावःगु दु शेयर बजाः परिसूचक नेप्से थौं २ दशमलव ८२ अङ्कं कुहावया १ हजार ९ सय ९० दशमलव ५९ विन्दुइ थ्यःगु दु।

होटल व व्यापार समूहबाहेक मेगु दक्को समूहया शेयर कुहावःगु दु। दकलय् अप्पो सिद्धार्थ इक्विटी फन्डया शेयर ८ प्रतिशत व महिला लघुवित्त वित्तीय संस्थाया शेयर ६ प्रतिशतं कुहावःगु दु।

समग्र बजाः कूहावंसा न सिटी होटलया शेयर झन्डै १० प्रतिशतं थहावःगु दु। बजाः घटे जूसा न कारोबार रकमय् धाःसा सुधार वःगु दु।

म्हिगः साढे ८६ करोड रुपैयाँ न शेयर कारोबार जूगुलि थौं ३८ लाख ३ हजार कित्ता शेयर १ अर्ब १३ करोड रुपैयाँया कारोबार जूगु दु। दकलय् अप्पो माछापुच्छ्रे बैंकया १० करोड रुपैयाँया शेयर कारोवार जूगु दु।

नेकपा एमाले नेतापि च्वनावंगु वुद्ध एयरया जहाज  जनकपुर विमानस्थल न्ह्यने थ्यःसा हाकन येँ हे लिहावःगु दु।

सिरहाय् जुइगु सचिवालय बैठकय् ब्बतिइ कायेगु निति वरिष्ठ उपाध्यक्ष ईश्वर पोखरेल, उपाध्यक्षपि सुवास नेम्वाङ, बिष्णु पौडेल, अष्टलक्ष्मी शाक्य, उपमहासचिव बिष्णु रिमाल, नेता अमृत बोहरापि बुद्ध एयरया विमानं जनकपुर वंगु खः।

तर जनकपुर विमानस्थलय् आकाशय् हे परिचारिकां छू प्राविधिक समस्याया कारण क्यसे जनकपुर दिकेमफइगु जानकारी बिःगु खः। वया लिपा उगु जहाज येँ हे लिहावःगु खः।

थुगु दँय् गुंपुन्हि व सापारु गुकुन्हु हनेगु धकाः नेपालय् जक मखु भारतय् नं अन्यौलता पिहां वयाच्वंगु दु ।

भारतय् राखी गुवलय् चीगु धइगु खँय् विवाद पिहां वःगु दु । अन हिन्दूतय् गुंपुन्हि कुन्हु तता केहेँ नं दाजु किजापिन्त ल्हातिइ राखी चिकेगु परम्पर दु।

तर गुंपुन्हि १४ गते खः लाकि १५ गते खः धइगु विवाद पिहां वः थें अन राखी बन्धन अगष्ट ३० तारिख कुन्हु खः कि ३१ तारिख कुन्हु खः धकाः विवाद ब्वलनाच्वंगु दु ।

अन नं ३० व ३१ तारिख धाइपिं विभाजित जुयाच्वंगु दु ।

ऐतिहासिक व पुरातात्त्विक महत्त्व जाःगु असंया क्वथुननि संरक्षण यायोमाःगु मागयासे भूमि व्यवस्था लिसे सहकारी मन्त्री रन्जिता श्रेष्ठ चौधरीया ज्ञापन पौ लःल्हाःगु दु।

असं क्वथुननि बचाउ अभियानं मन्त्री श्रेष्ठयात सम्बन्धित थासय् निरीक्षण याके धुका ज्ञापन पौ लःहाःगु खः। अभियानं लःल्हाःगु उगु  ज्ञापन पौ कयादीसे मन्त्री श्रेष्ठं क्वथुननिया विषय थःगु ध्यानाकर्षण जूगु दु थुगु विषय सत्यतथ्य थुइका ज्या न्ह्याकेगु भलसा बियादीगु खः।

क्वथुननिइ न्यासः दँ पुलांगु अमिताभ बुद्ध द्यः नाप मेमेगु न यक्को हे पुलागु पुरातात्त्विक महत्त्वया सामग्री दु । उगु थाय् अशोक वृक्ष बिहारया नामं न म्हसिइगु याः। ‘मौलिक सम्पदाया गुठीयारपिनिगु प्रभावय् लाकां छुट गुठीया नामय् निजी रैकर उल्लेख याना नक्कली पूर्जा दयकूगु खः।

लिपागु इलय् अस्थिर राजनीतियात फाइदा कया उगु थासयाःगु मौलिकता स्यकां व्यावसायिक भवन दयकेगु योजना दयकूगु दु।’ अभियानया नमस्ते साय्मि धाःगु दु। वायु देवता गुठी उल्लेख याना ८ आन २ पैसा जग्गाय् छेँ दयका तःगु खः।

चाँगु नारायण द्यःयात म्हिगः येँया हनुमानध्वाखास्थित तलेजु द्यःयाथाय् बिज्याकूगु दु।

दँय्दसं गुंपुन्हिया प्यन्हु न्ह्यः चाँगु नारायणयात तलेजु दर्शन याकेत बिज्याकीगु परम्परा दु । थुबलय् लाय्कू कुमारीयात नं बिज्याकेमाः ।

चाँगुयात दँय् निक्वः तलेजु बिज्याकीगु परम्परा दु ।