नेकपा एमालें मन्त्री ल्ययेगु जिम्मा अध्यक्ष केपी शर्मा ओलीयात ब्यूगु दु।बुधवाः च्वंगु सचिवालय बैठकय् ओलीयात मन्त्रीया नितिं मापदण्ड क्वःछिनाः मन्त्री ल्ययेगु जिम्मा ब्यूगु खः।

सचिव पद्मा अर्यालं धाःगु दु, “पार्टी अध्यक्ष स्वयं हे प्रधानमन्त्री जुइत्यंगु दु, गुज्वःगु टिम दयेकेगु धयागु खँ वं अझ अप्वः सीके फइ” धकाः सचिव पद्मा अर्यालं धाःगु दु।

अध्यक्ष ओलीं मन्त्री ल्ययेत मेमेपिं नेतातय्के सुझाव फ्वंगु दु। आःतक नेपाली कांग्रेस लगायतया दललिसे मन्त्रालय व मन्त्रालयया ल्याः क्वचाःगु मदुनि।

सामाजिक सुरक्षा भत्ता कायेत राष्ट्रिय परिचयपत्र अनिवार्य यायेगु निर्णय स्थगित याइगु दु।

थौ आइतवाः च्वंगु मन्त्रिपरिषदया बैठकं प्राकृतिक प्रकोपया हुनिं राष्ट्रिय परिचयपत्र दयेकेगुलि थाकुगुलि थुगु इलय् राष्ट्रिय परिचयपत्र लागू मयायेत गृह मन्त्रालययात निर्देशन ब्यूगु दु। सरकारं थ्व सिबें न्ह्यः राजपत्रय् सुचं पिकासें फुक्क कथंया सार्वजनिक सेवाया नितिं राष्ट्रिय परिचयपत्र अनिवार्य याःगु खः।

उगु सुचं कथं सरकारी स्वामित्वया संस्था, संस्था व निजी क्षेत्रं बियाच्वंगु सार्वजनिक सेवाया सुविधा कायेगु वा माग यायेगु नितिं साउन १ गतेनिसें नेपाली नागरिकता प्रमाणपत्रया पलेसा राष्ट्रिय परिचयपत्र बुझे यायेमाःगु आवश्यक जूगु दु।

राष्ट्रिय परिचयपत्र ड्राइभर लाइसेन्स, कम्पनी दर्ता व नविकरणया निंतिं नं अनिवार्य याःगु खः। ज्येष्ठ नागरिक, अपांगता जूपिन्स राष्ट्रिय परिचयपत्र अनिवार्य यात धाःसा भत्ता मवइगु धासें विरोध जूगु खः।

लुँ तोलां थौ च्यासः थहा वःगु दु। लुँ तोला च्यासः थहावना थौ १ लाख ४४ हजार ९ सय थ्यःगु दु धका नेपाल सुनचाँदी व्यवसाय महासंघं जानकारी ब्यूगु दु।

अथे हे वहः तोला न झीन्यातका थहावंगु दु। वहःतोलां झीन्यतका थहावना १ हजार ८ सय ८५ न कारोवार जुगु दु धका महासंघं जानकारी ब्यूगु दु।

नेपाली कांग्रेसया महामन्त्री विश्वप्रकाश शर्मां नेकपा एमाले अध्यक्ष केपी शर्मा ओलीया नेतृत्वय् गठन जूगु सरकारय् थः मवनेगु धका धयादीगु दु।

मुख्यमन्त्री शर्मां थःगु क्षेत्र झापा–१ य् पार्टी कार्यकर्तापिनिगु बैठकय् थः भविष्यया सरकारय् वने मखु धका धयादीगु दु। वय्कलं निगुलिं तःधंगु दल सरकारय् वनेवं विपक्षी दलया शक्ति कमजोर जुइगु चिन्ता गुलिखे मनूतय्सं याइगु स्वाभाविक खः धयादिल। उगु कार्यकर्ता भेलाय् शर्मां धाःगु दु, “निगू तःधंगु दल एकीकरण जुइवं विपक्षी सः कमजोर जुइगु खँय् बौद्धिक ख्यलय् च्युता कयाच्वंगु दु, विपक्षी सः कमजोर मजुइगुनिति हे जि सरकारय् वने मखु।”

असार १७ गते कांग्रेस व एमाले दथुइ ओलीया नेतृत्वय् सरकार गठन यायेलि सहमति जूगु खः। निगू दल दथुइ मन्त्रालय साझेदारी क्वचाःगु मदुनि । कांग्रेसपाखें सु सु नेतृत्व याइ, सरकारय् वनी धइगु खँय् चर्चा जुयाच्वंगु दु, तर आःतक निर्णय धाःसा जूगु मदुनि ।

शर्मां मेम्ह महामन्त्री गगन थापाया नेतृत्वय् सरकारय् कांग्रेस सहभागी जुइगु उपयुक्त जुइगु धका धयादिगु दु।

राष्ट्रिय स्वतन्त्र पार्टीया महामन्त्री पदं बर्खास्त जूम्ह मुकुल ढकालं अध्यक्ष रवि लामिछानेयात छानबिन याये मागु माग याःगु दु।

पार्टीं कारवाही याःगु कन्हय् कुन्ह थौ बुधवाः हे पत्रकार सम्मेलन यासे ढकालं पार्टी अध्यक्ष लामिछानेयात कयाः न्ह्यसः तःगु खः। १९ गतेया बैठकय् म्हुतुइ हाकुगु टेप तयाः च्वनेगु थःगु कमजोरी जुइफुगु खँ वय्कलं कनादिगु दु।

अध्यक्ष लामिछानेयात तसकं असन्तुष्ट जुयाः वय्कलं सहकारी ठगी प्रकरणया छानबिन यायेत माग न यानादीगु खः। वंगु इलय् सर्वोच्च अदालतं लामिछानेयात कयाः छानबिन जुइमाः धकाः धाःगु खः, “थुकियात कयाः रास्वपाया बिचाः छु दु?” पार्टीं छगू स्वतन्त्र छानविन समिति नीस्वनेमाः।

थज्याःगु समितिइ च्वनीपिं मनूत राजदूत ल्ययेगु थेंज्याःगु हे प्रक्रियां च्वनिपि माः धका धयादीगु खः।वय्कलं थम्हं जनताया खँ ल्हायेबलय् कारवाही याःगु व वइगु महिनानिसें प्रस्ताव यात्रा न्ह्याकेगु व जनतायात गुकथं वनेगु धकाः न्यनेगु जुइ धका धयादीगु दु।