शेयर बजाः थौं न थहावंगु दु। म्हिगः ३ अङ्कं थहावंगु शेयर बजाः परिसूचक नेप्से थौं ११ दशमलव ७३ अङ्कं थहावना १ हजार ८ सय ५२ दशमलव ७३ विन्दुइ थ्यःगु दु।

थौं व्यापारबाहेक दक्को समूहया शेयर थहावंगु दु। बीमा, होटल व पर्यटन, उत्पादन व प्रशोधन, विकास बैंक नापं जलविद्युत् समूहया शेयर यक्को अङ्कं थहावंगु दु।

अथेहे थौं दकलय् अप्पो त्रिशूली जलविद्युत् कम्पनीया शेयर १० प्रतिशत लिसे समाज लघुवित्त र सीवाईसी नेपाल लघुवित्त शेण्यर झन्डै १० प्रतिशतं थहावंगु दु।

समग्र बजाः थहावंसा थौं ग्लोबल आईएमई लघुवित्तया शेयर साढे ७ प्रतिशत स्वया अप्पो कुहावंगु दु। ९५ लाख कित्ता शेयर २ अर्ब ७९ करोड रुपैयाँया कारोबार जुगु दु।

दकलय् नेपाल रिइन्सुरेन्स कम्पनीया ८६ करोड ८३ लाख रुपैयाँया शेयर किनबेच जूगु खः।

लुँ तोलां थौं निसः थहावःगु दु। नेपाल सुनचाँदी व्यवसायी महासङ्घया कथं लुँ तोलां निसः थहावनां १ लाख १८ हजार ६ सय रुपैयाँ तोके याःगु दु धका धाःगु दु।

अथेहे वहः तोलां थौं नीतका कुहावःगु दु। वहः तोलां नीतका कुहावया थौं १ हजार ४ सय ६० रुपैयाँ न कारोबार जूगु दु धका महासङ्घं धाःगु दु।

थौं च्वंगु मन्त्रिपरिषदया बैठकं खानेपानी तथा महशुल निर्धारण आयोगया अध्यक्ष पदय् रुद्रप्रसाद गौतमयात व सदस्य पदय् यशोदा कार्की व कुलभूषण शर्मायात नियुक्त यायेगु निर्णय याःगु दु ।

अथेहे अर्थ मन्त्रालयया प्रस्तावय् विश्व बैंकपाखे प्रादेशिक लिसे स्थानीय सतक उद्धार ज्याझ्वःया न्हापागु चरणया लागि वंगु ग्वाहालि सम्बन्धी वार्ता यायेगु लागि अर्थ मन्त्तालयया सहसचिवया संयोजकत्वय् वार्ता टोली गठन यायेत अख्तियारी बिइगु निर्णय जुगु दु धका बैठकय् धाःगु खः।

सरकारं एनसेलया ८० प्रतिशत हिस्सेदार कम्पनी रेनोल्ड होल्डिङ्सया शेयर खरिद–बिक्रीया निर्णयबारे अध्ययन यायेत उच्चस्तरीय समिति गठन याःगु दु।

थौं च्वंगु मन्त्रिपरिषद बैठकं पूर्वमहालेखा परीक्षक टंकमणि शर्माया संयोजकत्वय् न्याम्ह सदस्यीय समिति गठन याःगु दु धका सरकारया प्रवक्ता रेखा शर्मां जानकारी बिःगु दु।

उगु समितिइ सचिव फणिन्द्र गौतम, सहसचिव बाबुराम भण्डारी, हृदयेश कुमार शाक्य व आइक्यानया अध्यक्ष सुजन कुमार काफ्ले दुगु खः।

सरकारया प्रवक्ता नापं सञ्चार लिसे सूचना प्रविधिमन्त्री रेखा शर्मां धयादीगु दु, ‘एन्सेलया शेयर खरिदबिक्रीया सन्दर्भय् वयाच्वंगु न्ह्यसः खः, उगु न्ह्यसःयात अध्ययन याना प्रतिवेदन पेश यायेत उच्चस्तरिय समिति निर्माण याना मन्त्रिपरिषदं निर्णय याइ।’ वयकलं धयादीगु दु, समितियात लच्छिया इ बियातःगु दु ।

रत्नकीर्ति महाविहार मखं बहाःत्वा मिसा पुचःपाखें म्ह्याय् मस्त व भौमस्त दथुइ म्हसीका कालविल ज्याझ्वः याःगु दु।

थःगु कुल थाय् त्वःता इहिपा याना याना वने धुंकूपिं म्ह्याय् मस्त, इहिपा मजुनिपिं म्ह्याय् मस्त, कुल छें त्वःता बसाईं सराई कया मेथाय् वने धुंकूपिं म्ह्याय् मस्त भौमस्तयगु दथुइ म्हसिका कालबिल यायेगु कथं उगु ज्याझ्वः जुगु खः ।

मिसा पुचःया नायः रमिता बज्राचार्यया सभाध्यक्षताय् जूगु ज्याझ्वलय् पुचःया न्वकू बिनिता बज्राचार्यं लसकुश न्वचु, रत्नकीर्ति महाविहारया सचिब सागरमान बज्राचार्य व रत्नकीर्ति महाविहार अध्ययन मण्डलया कजि जीतेन्द्र बिलास बज्राचार्यं थःथःगु नुग खँ प्वंकादीगु खः ।

दकलय् ज्याथिम्ह म्ह्याय् मचा कथं तीर्थ कुमारी श्रेष्ठ व भौ मचापाखें जिथिम्ह दानकुमारी बज्राचार्यं मंकाः कथं त्वाः देवाय् मत च्याका ज्याझ्वःया उलेज्या यानादीगु खः । उगु ज्याझ्वलय् ज्याथिपिं म्ह्याय् मस्त तीर्थकुमारी श्रेष्ठ, नानीमैंया बज्राचार्य व मोहनदेवी बज्राचार्यपिन्त हनेज्या याःगु खः सा भौमस्त मध्ये दानकुमारी बज्राचार्य, सानुनानी बज्राचार्य, यमुना बज्राचार्य, मोहनकुमारी बज्राचार्यपिन्त नं हनेज्या याःगु खः ।

अथेहे बिद्याबारिधी यानातःपिं मध्ये भौमचा डा. शिलु मानन्धर बज्राचार्य, म्ह्याय् मस्त डा.ज्वाला बज्राचार्य, डा. कुमुदिनी शाक्यपिन्त नं मखं बहाःया स्वम्हम्ह थाय्पा प्रेम बिलास बज्राचार्यपाखें मतिनाया चिं कथं ससुद्यःया मूर्ति, बिहार संघया नायः बिद्यामान बिलास बज्राचार्यपाखें दोसल्ला न्यय्का हनावना तया हनेज्या याःगु खः।