परराष्ट्रबिद नाप बरिष्ठ पत्रकार हिरण्यलाल श्रेष्ठ म्हिगः डिस्चार्ज जुयादीगु दु। निवाः न्ह्यः जँय् नसा च्यापे जुया अस्पतालय् भर्ना जूयादीगु खः।

जँय् नसा च्यापे जुगुलि वयकःयात येँया स्वयम्भुइ च्वंगु मनमोहन मेमोरियल मेडिकल कलेज लिसे शिक्षण अस्पतालय् वासः यायेगु निति भर्ना जुयादीगु खः।

वयकःया काय् नाप मनमोहन मेमोरियल मेडिकल कलेज लिसे शिक्षण अस्पतालया प्रवन्ध निर्देशक डा. मुजः श्रेष्ठ लहनान्युजयात जानकारी बिगु कथं बरिष्ठ पत्रकार हिरण्यलाल श्रेष्ठ याःगु डा. गौरव ढकाल व डा. निराजन सुवेदीया पुचलं सफलता पुर्वक अप्रेशन यानादीगु खः धका धयादीगु दु।

वयकःया आः बुढानिलकण्ठय् थःगु छेँय् आराम यानाच्वनादीगु दु धका डा. श्रेष्ठं धयादीगु दु।

नेपाःया मूर्त व अमूर्त सम्पदाया संरक्षण, संवद्र्धन नाप प्रवद्र्धन मदिक्क ज्या याना च्वंगु नेपाल सम्पदा संघया ३७ क्वःगु दँ मुज्या क्वचाःगु दु।

उगु ज्याझ्वलय् मूपाहाँ यल महानगरपालिकाया मेयर चिरीबाबु महर्जन झायादीगु खः। ज्याझ्वलय् मूपाहाँ महर्जनयात संघया मानार्थ सदस्य न लःहाःगु खः।

अथेहे उगु ज्याझ्वलय् पुरातत्व विभागया महानिर्देशक सौभाग्य प्रधानाङ्ग न झायादीगु खः। ज्याझ्वलय् संघया महासचिव प्रकाश दर्नाल नाप कोषाध्यक्ष चूडादेव सिंह लामां आर्थिक वर्ष २०७९ व ८० या बार्षिक प्रतिवेदन न्ह्य ब्बयादीगु खः।

स्थानिय संघ–संस्थापिन्स येँ थ्व हे वइगु १४ गते क्वांटि पुन्ही व १५ गते सायाः कुन्हु थःथगु थासय् फोहोर ब्यबस्थापन, ट्राफिक ब्यबस्थापन, शान्ती सुरक्षा समन्वय यायेगु निति छगु मुज्या जूगु दु।

लकस म्हालासाला पुचः नं थुगु दँय् न १८ क्वःगु कसिङ्गर मुक्त समाज ज्याझ्वः २०८० अभियान निन्हु हे याइगु जुगु दु।

प्राथमिक उपचार व एम्बुलेन्सया लागि नेपाल रेडक्रस सोसाइटी जिल्ला शाखा येँ न जात्राया इलय् त्वाः त्वालय् परिचालन यायेगु निति उपसभापती अन्जना मास्के याइ जुगु दु।

जनचेतना मुलक सरसफाइ अभियानय् नेपाली सेनापाखे श्री शार्दुल जङ्ग गुल्म व रणभैरब गणय् न ग्वाहालि याइग्ु जुगु दु।

बौद्ध ख्यलय् ऐतिहासिकता कःघाना वयाच्वंगु बैरोचन तीर्थय् थुगु दँया गुंलाया लसताय् बौद्ध धर्मप्रति मन क्वसायका वयाच्वनादीम्ह लोकरत्न शाक्य व संगीता शाक्यपिन्स सत्वपुजा यानादीगु दु।

सत्वपुजाय् मुलाचार्य राजु बज्राचार्यं नाप गुर्जुपिं सजन बज्राचार्य उपाध्याय प्रसन्न बज्राचार्य कर्माचार्य प्रमेन्द्र बज्राचार्य व अरुण बज्राचार्यपिन्स पुजा याकादीगु खः। थुगु दिनय् पुजाया झ्वलय् दाता लोकरत्न शाक्यजुं वैरोचन तीर्थ परिसरय् स्थापना यानातःगु क्वाःपाद्यः व चिभाःद्यःया पुजा नं याना बिज्यागु खः ।

अथेहे नामसंगीतियालिसें थीथी बौद्ध स्तोत्र नं पाठ यायगु ज्या गुर्जुपिन्सं याना बिज्यागु खः । महायान, बज्रयान बुद्ध धर्मयात संरक्षणयायेगु निति बज्रायानी गुरुजुपिन्सं बज्रयानी पुजाय् विशेष ध्यान बियाः वयाच्वंगु दु।

गुंला इलय् थीथी थासय् विराजमान जुया बिज्यापिं बौद्ध द्यःपिनिगु आराधना याना पुजा याना वयाच्वंगु दुसा गनं गनं सत्वपुजा याना धर्म कर्मया ज्यायात प्राथमिकता बिइगु याना वयाच्वंगु दु।

राष्ट्रिय युवा संघ नेपाल येँ महानगरपालिका २४ वटा कमिटीया ग्वसालय् हि दान ज्याझ्वः जूगु दु। हिया अभावं सूना नं अकालय् ज्यान गुमे याये म्वालेमाः धका धासे थुगु कमिटीं येँया मखं त्वालय् छगु हि दान ज्याझ्वःया ग्वसाः ग्वःगु खः।

उगु ज्याझ्वलय् जम्मा ५१ पिन्ट हि संकलन जूगु दु धका कमिटीया अध्यक्ष बिकेश तुलाधरं लहनान्युजयात जानकारी बिःगु दु। हि दाता व पाहाँपिन्त कमिटीया अध्यक्ष तुलाधर व सचिव अजय महर्जनं दसिपौ व मतिनाया चिं लःल्हानादीगु खः। उगु ज्याझ्वलय् नेकपा एमाले येँ जिल्लाया सचिव नापं पूर्व बागमति प्रदेश सभासद् राजेश शाक्य नं हि बिउगु खः।

अथेहे ब्लड डोनर्स एशोसिएसन नेपाल (ब्लोदान) या केन्द्रीय अध्यक्ष सानुबाबु प्रजापति, राष्ट्रिय युवा संघ नेपाल, येँ महानगर कमिटीया अध्यक्ष दिपेश सुधाकरया न उपस्थिती दुगु खः।