वाग्मतीइ खुसि बाः वया बल्खुइ च्वंगु तरकारी बजाः डुबे जूगु दु।

बल्खु वाग्मती खुसि सिथय् च्वंगु उगु तरकारी बजारय् खुसि बाःवया अथे डुबे जूगु खः।

तरकारी बजाः खुसि सिथय् च्वंगु बजाः नाप मू बजारय् न लः दुहावःगु दु।

सप्तकोशी खुसि बाः वाःगु दु। थौ सुथय् ६ बजेतक कोशी ब्यारेजय् ३ लाख १६ हजार ८ सय क्युसेक लः मापन जूगु दु।

सप्तकोशी जलमापन केन्द्रया कथं लः थहावयेवं कोशी ब्यारेजय् ४१ गु लुँखा चाय्कुगु दु। सप्तकोशी जलमापन केन्द्रय् जलसतह सतर्कता पार याःगु व अझ न उदयपुर, सुनसरी व सप्तकोशी खुसि सिथय् च्वपिन्त सुरक्षित जुयाच्वनेत इनाप केन्द्रपाखे याःगु दु।

नेपाली कांग्रेस संसदीय दलया बैठक थौ च्वनिइगु जुगु दु। बैठक नयाँ बानेश्वरस्थित संसद भवनया ल्होत्से हलय् न्हिनय् ३ बजे च्वनिइगु जुगु दु धका कांग्रेस संसदीय दलं धाःगुु दु।

बैठकय् समसामयिक राजनीतिया विषय सहलह यायेत्यःगु खः।

नेकपा एकीकृत समाजवादीें प्रेम आलेयात केन्द्रीय कमिटीं चिइकूगु दु। शुक्रवाः सार्वजनिक ९३ म्ह केन्द्रीय सदस्यया धलखय् आलेया नां दुथ्यागु मदु। थ्व स्वया न्ह्यः आले पोलिटब्यूरो सदस्य खः।

पोलिटब्यूरो दुजः तया दयकूगु केन्द्रीय कमिटीइ आले नां दुथ्याका तःगु मदु। पार्टी प्रवक्ता नापं उपमहासचिव जगनाथ खतिवडाया कथं, केन्द्रीय सदस्यय् आलेयात चिइकुगुलि आलेया नां मथ्याकूगु धका धाःगु दु। लिपागु च्यालानिसे थः पार्टी ज्याय् निष्क्रिय जुयाच्वनागु खः धका आलें धाःगु दु । ‘उकिइ थः महाधिवेशनय् न ब्बति मकायागु खः। जि बहिष्कार यानागु खः’, धका आले धाःगु दु।

प्रधानमन्त्री पुष्पकमल दाहाल प्रचण्डं २८ गते विश्वासया मत काइगु जुगु दु। प्रचण्डं संघीय संसदया महासचिवयात पौ च्वया थ्व हे वइगु २८ गते संसदया बैठकय् विश्वासया मत कोगु धलखय् तय्त इनाप यागु दु।

संसदय् निगु तधःगु दल नेपाली कांग्रेस व एमाले दथुइ केपी शर्मा ओलीया नेतृत्वय् न्हुगु सरकार गठन यायेत सहमति जुइ धुकुगु दु।

२७५ सदस्यीय प्रतिनिधिसभाय् बहुमतया लागि १३८ मत माः, उकिइ मध्ये प्रचण्डयाके माओवादी (३२), रास्वपा (२१), एकीकृत समाजवादी (१०) व अशोक राई नेतृत्वय् जसपा (७) याना ७९ मत जक दु।

अथेहे कांग्रेस (८८) व एमाले (७९) याना १६७ मत दु।