बागमती सरकारं मन्त्रालयया ल्याः आः १२ थ्यकूगु दु। थ्व स्वया न्ह्यः छगू मन्त्रालय थप यायेगु सत्तारुढ गठबन्धनया दलपिनिगु सहमति कथं मंगलवाः मन्त्रिपरिषदया बैठकं मन्त्रालय ल्याः १२ गु यायेगु निर्णय याःगु खः।

बागमती प्रदेशय् वंगु जेष्ठ ७ गते मन्त्रिपरिषद विस्तार यागुलि मन्त्रिपरिषदया सदस्य ल्याः १२ गु थ्यकूगु खः। तर मन्त्रालयया ल्याः ११ जक दुगु खः। कांग्रेसया नेता रामकृष्ण चित्रकार विना विभागीय मन्त्री दयकूगु खः।

मंगलवाः च्वंगु मन्त्रिपरिषद बैठकं आः मेगु छगू थपे याना उद्योग, वाणिज्य, भूमि लिसे प्रशासन मन्त्रालयया जिम्मेवारी चित्रकारयात बिइगु धका सरकारया प्रवक्ता आन्तरिक मामिलामन्त्री गंगानारायण श्रेष्ठं जानकारी बिःगु खः।

आः बागमती प्रदेशय् मन्त्रालय थुकथं दु

१ मुख्यमन्त्री लिसे मन्त्रिपरिषदया कार्यालय

२ आन्तरिक मामिला लिसे कानून मन्त्रालय

३ आर्थिक मामिला लिसे योजना मन्त्रालय

४ उद्योग, बाणिज्य, भूमि लिसे प्रशासन मन्त्रालय (रामकृष्ण चित्रकार)

५ कृषि लिसे पशुपन्छी विकास मन्त्रालय

६ खानेपानी, उर्जा लिसे सिंचाइ मन्त्रालय

७ संस्कृति, पर्यटन लिसे सहकारी मन्त्रालय

८ भौतिक पूर्वाधार विकास मन्त्रालय्

९ वन लिसे वातावरण मन्त्रालय

१० श्रम, रोजगार लिसे यातायात मन्त्रालय

११ सामाजिक विकास मन्त्रालय

१२ स्वास्थ्य मन्त्रालय

संस्कृति पर्यटन लिसे नागरिक उड्डयन मन्त्री सुदन किराँतीया अबु मन्त।

मन्त्री किरातीया अबु हर्कबहादुर राई थौ सुथय् वीर अस्पतालय् मदुगु धका वयकःया निजी सचिव डाक्टर डिजन भट्टराई न जानकारी बिःगु दु। वयकः ताः ईनिसे प्यारालाइसिस सम्बन्धी समस्यापाखे पीडित जूयाच्वम्ह खः।

मन्त्री किरातीं थः अबु मदुगु धका सामाजिक सञ्जाल फेसबुकपाखे जानकारी बियादीगु खः।

नेपाली कांग्रेसया नेता डा. शेखर कोइरालां कोशी प्रदेशय् सत्ता पक्षं हाकनं मेगु गल्ती याःगु धका धाःगु दु।

विराटनगर विमानस्थलय् पत्रकारपि नाप खँ ल्ह्यायेगु झ्वलय् डा.कोइरालां अदालत भिंकेगु निर्णययात सत्ता पक्षं अटेरी याःगु दु धका धाःगु दु। सभाध्यक्षयात संसदय् मतदान याकूगु गलत खः धका डाक्टर कोइरालां धाःगु दु।

प्रदेश सरकारं न्यायालय याःगु सम्मान मयाःगु धका धासे, ‘अदालतं छु निर्णय याःगु खः, व तसक बालागु निर्णय खः, हाकन झीसं द्धःकूगु दु । सत्ताया लागि, हाकन अदालतं छु निर्णय याइ स्वये । सोमवाः कोशी प्रदेशया मुख्यमन्त्री उद्धव थापां सभाध्यक्ष इस्राइल मन्सुरीयात न मतदानय् विश्वास याःगु मत बिइकूगु खः।

पार्टी व सत्ताया राजनीतिक बिस्क जुइगु धका वयकलं सत्ताया राजनीति गलत जुइगुलि अदालतं भिकिइ धका धाःगु दु। ‘राज्यसत्ता कमजोर जुगु अवस्थाय् थज्यागु खँ जुयाच्वनिइ,’ वयकलं धयादीगु दु, ‘घटना जुयाच्वनिइ, झीपिन्स मखुगु ज्या यानाच्वनिइ, अले अदालतं उकियात छिमिसं द्धकूगु दु धका पुष्टि यानाच्वनिइ।’

राज्यसत्ता कमजोर जूलकि न्यायालय सक्रिय जुइगु स्वभाविक जुइ धका वयकलं धयादीगु खः।

प्रधानन्यायाधीश विश्वम्भरप्रसाद श्रेष्ठं पद व गोपनीयताया शपथ काःगु दु।

थौ मंगलवाः बहनि राष्ट्रपति कार्यालय शीतलनिवासय् राष्ट्रपति रामचन्द्र पौडेलं श्रेष्ठयात पद व गोपनीयताया शपथ बिःगु खः।

राष्ट्रपति पौडेलं श्रेष्ठयात म्हिगः सोमवाः प्रधानन्यायाधीशय् नियुक्त याःगु खः।

बालुवाटारस्थित ललिता निवासय् १४३ रोपनी सरकारी जग्गा हिनामिना प्रकरण जूयाच्वंगु अनुसन्धान क्वचायेका प्रहरीया केन्द्रीय अनुसन्धान ब्यूरो (सीआईबी) न रायनापं अनुसन्धान प्रतिवेदन लःल्हागु दु।

सरकारी लिखत किर्ते व संगठित अपराधया कसुरय् ५७ दिंतक अनुसन्धान याना ब्यूराें निसः स्वया अप्पोसित मुद्दा न्ह्याकेगु सिफारिस याःगु दु धका सरकारी वकिलया कार्यालय, येँ न रायनापं प्रतिवेदन लःल्हागु दु।

प्रहरीं थुगु प्रकरणय् सोमवाः बहनि पूर्वमन्त्री नाप कांग्रेस नेता विजयकुमार गच्छदारनाप बयान काःगु खः।

पूर्वमन्त्री चन्द्रदेव जोशी, पूर्वराज्यमन्त्री सञ्जय साहनाप बयान काये धुकुगु दु सा पूर्वमन्त्री डम्बर श्रेष्ठ धाःसा फरार जूयाच्वंगु दु धका सीआईबी न धाःगु दु।