नेपाल संवतयात सरकारी दस्तावेजय् नं छ्यला यंकेगु धकाः नेपाल सरकारं याःगु निर्णय कार्यान्वयन यायेगु लागिं सरकारं तयारी शुरु याःगु दु ।

थ्व हे झ्वलय् थ्व संवत् गय् यानाः छ्यला यंकेगु धकाः सरकारयात सुझाव बीगु लागिं पञ्चाङ्ग निर्णायक समितिं म्हिगः सहलह यागु दु । नेपाल संवतयात सरकारी दस्तावेजय् छ्यलेगु निर्णय कार्यान्वयन यायेगु नितिं थःपिंत छ्वयाहःगु पौयात कयाः समितिं म्हिगः सरोकारवाला पक्षतनाप सहलह ब्याकूगु खः ।

पञ्चाङ्ग निर्णायक समितिया नायः पं. श्रीकृष्ण अधिकारीया उपस्थितिइ जूगु उगु सहलहय् संस्कृति मन्त्रालयं विक्रम संवत गुकथं छ्यलीगु खः, उकथं हे नेपाल संवत नं छ्यलेगु व थुकिया नितिं माःगु निर्णय यानाः छ्वयाहयेत निर्देशन ब्यूकथं थथे सहलह मुँज्या याःगु खः ।

सहलह मुँज्याय् नेवाः देय् दबूया नायः पवित्र वज्राचार्य, नेपाल संवत् न्हूदँ राष्ट्रिय समारोह समितिया सचिवालय दुजः सुजीव बज्राचार्य व मचाराजा महर्जन, नेपाल संवत तिथिपौया अभियन्ता डा. भगवानदास मानन्धर, राष्ट्रिय विभूति शंखधर प्रतिष्ठानया श्याम मानन्धर, दैवज्ञ ज्योतिष रति ज्योति श्रेष्ठलिसें थीथी ज्योतिषपिनि उपस्थिति दुगु खः । सहलह मुँज्यां नेपाल सरकारया दस्तावेजय् विक्रम संवत् गथे खः अथेहे नेपाल संवत् नं छ्यलेगु नितिं सूचना विभागपाखें नेपाल सरकारं पिथनीगु क्यालेन्डरय् गथे च्वयातःगु खः, अथेहे च्वयेगु खँय् ताःई सहलह जूगु खः ।

सरकारया दस्तावेजय् गथे ‘वि.सं. २०८० मंसीर १० गते आइतवाः’ धकाः च्वइगु खः, अथेहे ‘ने.संं. ११४४ कछलाथ्व चतुर्दशी’ च्वयेगु धकाः मुँज्यां निर्णय याःगु खः । लिसें मुँज्यां नेपाल सरकारया दस्तावेजय् नेपाल संवतया मौलिकता कथं आखलं हे तिथि च्वयेगु सुझाब बीगु निर्णय नं याःगु दु ।

वंगु ने.सं. ११४३ कौलागा अमाई ९ (कार्तिक २७ गते) सोमवाः नेपाल सरकारया मन्त्रिपरिषदं नेपाल संवतयात नं सरकारी दस्तावेजय् च्वयेगु निर्णय याःगु खः ।

नेपाल वेयर हाउजिङ कम्पनी लिमिटेडं थौं आइतवाः निसे सर्वसाधारण तय्त प्राथमिक सेयर (आईपीओ) निष्कासन याइगु जुगु दु।

कम्पनीं प्रतिकित्ता अंकित मूल्य १०० रुपैयाँया ११ लाख ४१ हजार २५० कित्ता सेयर निष्कासन यायेत्यःगु खः। उगु आईपीओ दकलय् कम १० निसे अप्पो ५० हजार कित्तातकया निति आवेदन बिइ फइगु जूगु दु ।

उगु आईपिओ मंसिर १३ गतेतक आवेदन बिइफइगु जुगु दु। उगु इलय् न मागकथं आवेदन मवसां मंसिर २४ गतेतक आवेदन बिइगु ई थप याइगु जूगु दु।

लगानीकर्तां नेपाल धितोपत्र बोर्डपाखे स्वीकृतिप्राप्त सम्पूर्ण सी–आस्बा सदस्य बैंक नाप वित्तीय संस्था व तोके यानातःगु शाखा कार्यालय व मेरोसेयर अनलाइन छ्यला सी–आस्बा प्रणालीपाखे आवेदन बिइ फइगु जुगु दु।

तारकेश्वर नगरपालिकास्थित धर्मस्थलीइ क्षमता अभिवृद्धि तालिम सञ्चालन जुगु दु। स्थानिय मिसा व ल्याय्म्ह तयेत क्षमता विकास यायेत दक्ष जनशक्ति उत्पादन यायेगु उद्देश्यं तालिम यानागु धका धमाथू नेवाः ग्वहालि पुचः न धाःगु दु।

उद्घोषण, संस्थागत संरचना स्यनेगु निति छवाः तक तालिम सञ्चालन यायेत्यःगु खः। तालिम ज्याझ्वःया उलेज्या समाजसेवी श्रीकृष्ण मानन्धरं स्थानिय मिसा व ल्याय्म्ह तय्गु निति सीप, क्षमता व दक्षता अभिवृद्धि यायेगुलि बःबिगु खः।

तालिम ज्याझ्वःया संयोजक रविकुमार डंगोलं अन्तर्निहीत क्षमताया विकासं मनूया वास्तविक म्हसिका स्थापित यायेगु जुइ धका धयादीगु खः।

मौलिक हकअधिकारया विषय, प्रशासनीक व्यवहार व प्रस्तुति शैलीयात मिले याना यकेत थज्यागु तालिम मदय्क मगाः धका धयादीगु खः।

शेयर बजाः थौं बिहीवाः हाकन थहावंगु दु। म्हिगः बुधवाः २० अङ्कं थहावंगु शेयर बजाः परिसूचक नेप्से थौं ९ दशमलव ८७ अङ्कं थहावना १ हजार ८ सय ६० दशमलव २० विन्दुइ थ्यःगु दु।

थौं बैंकिङ, माइक्रोफाइनान्स व मेगु समूहया शेयर सामान्य थहावंगु दु। दकलय् अप्पो थौं बुद्धभूमि नेपाल हाइड्रोपावर कम्पनीया शेयर १० प्रतिशतं थहावःगु दु।

समग्र बजाः थहावंसा थौं दकलय् अप्पो नबिल बैंकया शेयर ८ प्रतिशत स्वया अप्पो कुहावंगु दु। ४४ लाख २० हजार कित्ता शेयर १ अर्ब ३४ करोड ८३ लाख रुपैयाँया थौं कारोबार जूगु दु।

दकलय् अप्पो नबिल बैंकया १३ करोड १० लाख रुपैयाँया शेयर कारोवार जूगु दु।

एमालेया पोलिटब्यरो सदस्य महेश बस्नेतं लोकतन्त्रया विकल्प राजतन्त्र जुइ फइमखु धका धाःगु दु।

एमाले भ्रातृ संगठन युवा संघ नेपालं बिहीवाः येँ जुगु विरोध प्रदर्शनय् सम्बोधन यायेगु झ्वलय् बस्नेतं आः यक्को अराजनीतिक तत्वतय्सं हाकन जुगु हयेगु धका धयावया च्वंगु व उकियात कया एमालें सहयाये फइमखु धका धाःगु खः। बस्नेतं विरोध प्रदर्शन दुर्गा प्रसाईंविरूद्ध मखु धका स्पष्ट याःगु दु।

प्रसाईयात अराजकतावादीया संज्ञा बिउसे थुगु विरोधयात प्रसाई नाप याःगु आन्दोलन नापं स्वाये मज्यु धका धयादीगु खः। वयकलं धाःगु दु, ’जिमिसं महँगी, भ्रष्टाचार, अनियमितता व जनताया सरोकारया मुद्दा याःगु सः ल्ह्वनेगु निति विरोध प्रदर्शन यानागु खः,’ वयकलं धयादीगु खः। नेता बस्नेतं सरकारया ध्यान सालेगु निति विरोध यानागु खः व थुकियात बेवास्तायात धासां सरकारं याःगु निषेधाज्ञा क्षेत्र तोडे यायेत बाध्य जुइगु चेतावनी बिःगु दु।

’जि सरकारयात, अझ विशेष प्रचण्डयात धायेत्यनागु दु। जिमित निषेधाज्ञा तोडे यायेत बाध्य यायेमत।’ धका वयकलं धयादीगु खः।