लुँ तोलां थौ सच्छि थहावःगु दु। लुँया भाः तोलां सच्छि थहावना १ लाख १० हजार ६ सय रुपैयाँ थ्यःगु दु धका नेपाल सुन चाँदी व्यवसायी महासंघं धाःगु दु ।

अथेहे, वहः तोलां १ हजार ४ सय २५ रुपैयाँ न कारोबार जूगु दु धका महासंघं धाःगु दु।

संसदय् जूयाच्वंगु पंगः चिइकेगु निति जुयाच्वंगु सहलह यायेगु निति राष्ट्रिय दलपिनिगु बैठक सुरु जूगु दु।

प्रधानमन्त्री कार्यालय, सिंहदरबारय् सुरु जूगु उगु बैठकय् नेपाली कांग्रेस, नेकपा एमाले, माओवादी केन्द्र, राष्ट्रिय स्वतन्त्र पार्टी, राप्रपा व जनता समाजवादी पार्टीया नेतापिनिगु ब्बति दुगु खः।

उगु बैठकय् लुँ तस्करीया छानबिन यायेगु लागि उच्चस्तरीय आयोग गठनबारे सहलह जूगु खः। उच्चस्तरीय आयोग गठनया माग यासे एमाले न साउन १० गते निसे संसद बैठक अवरुद्ध याना वयाच्वंगु खः। संसदया बैठक बुधवाः न्हिनसिया ३ बजेया लागि सःतूगु खः।

धादिङयाया गजुरी–२ चालिसे धाःगु थासय् च्वंगू त्रिशूली खुसिइ बस कुतुवना च्याम्ह सीगु दु सा च्याम्ह घाःपाः जूगु दु।

येँपाखे पोखरा वनाच्वंगु प्रदेश ३–०१–००५ ख ९९५२ नम्बरया थौ सुथय् ११ः१५ बजे सतकय् करिब ४० मिटर क्वय् त्रिशूली खुसिइ कुतुवंगु खः।

दुर्घटनाय् निम्ह मिसा व खुम्ह मिजंपि सीगु दु धका जिल्ला प्रहरी कार्यालय धादिङया प्रवक्ता नाप डिएसपी सन्तु जयसवालं जानकारी बिःगु दु। ‘घटना जूगु थासं झीखुम्हसित उद्धार यानागु खः, उकि मध्ये च्याम्ह सीगु दु सा च्याम्ह घाःपाः जूगुलि घाःपाःजूपि स्थानीय अस्पतालय् उपचार जुया जुयाच्वंगु दु,’ डिएसपी जयसवालं धाःगु दु।

घटना जूगु थासय् नेपाली सेना, सशस्त्र प्रहरी व नेपाल प्रहरीया टोलीपिन्स उद्धार यायेगु ज्या जुयाच्वंगु दु।

प्रधानन्यायाधीश विश्वम्भरप्रसाद श्रेष्ठं पदबहाल यायेवं स्वचालित प्रणालीपाखे पेशी व तारिखया व्यवस्थापन यायेगु निर्णय याःगु दु।

मंगलवाः शीतलनिवासय् राष्ट्रपति रामचन्द्र पौडेलपाखे शपथ काये धुकां श्रेष्ठं सर्वोच्च अदालतय् वना पदबहाल याःगु खः। पदबहाल यायेवं वयकलं स्वचालित प्रणालीपाखे तारिख व्यवस्थापन यायेगु निर्णय यानादीगु खः।

असन सेवा समितिं असंभुलु अजिमा द्यःया थाय् क्षमा पुजा यासें देगः मर्मत सम्भारया निंतिं आर्थिक लिसें थीथी कथं ग्वाहालि यानादीपिंत हनेज्या याःगु खः ।

समितिया नायः अरुणलाल श्रेष्ठया सभाध्यक्षताय् जूगु उगु ज्याझ्वलय् मूपाहाँ कथं पूर्वप्रधानन्यायाधीश कल्याण श्रेष्ठ, विशेष पाहाँ बागमती प्रदेशया सांसद् हरिप्रभा खड्गी श्रेष्ठ, पाहाँपिं २७ वडा अध्यक्ष योगेशकुमार खड्गी, होटल अन्नपूर्णया थुवाः श्रृजना राणापिंसं सम्मान लःल्हानादीगु खः ।

उगु ज्याझ्वलय् येँ महानगरपालिकाया पुलांम्ह मेयर विद्यासुन्दर शाक्य, पुलांपिं वडाध्यक्षपिं चिनियामान वज्राचार्य व विजयनारायण मानन्धर, प्रेमहिरा तुलाधर, प्रकाश साय्मि, मूर्ति कलाकार श्याम तुलाधरपिंत नं हना ज्याझ्वः याःगु खः ।

समितिया नायः श्रेष्ठं लसकुस यानाः न्ह्याःगु ज्याझ्वलय् प्रकाश साय्मिं अन्नपूर्ण द्यःया बारे जानकारी बियादीगु खःसा सहकोषाध्यक्ष पुरुषोत्तम रत्न तुलाधरं आम्दानी खर्चया ल्याःचाः न्ह्यब्वयादीगु खः । सहकोषाध्यक्ष तुलाधरं ल्याःचाः न्ह्यब्वयादिसें चन्दादातापिनि पाखें ५७ लाख ७४ हजार ९०८ तका दुहां वःगु व ४३ लाख ७७ हजार २४९ तका खर्च जूगु, सम्मान ज्याझ्वः व भ्वय् लिपा ल्यं दुगु ध्यबा कोषय् मुनाच्वंगु जानकारी बियादीगु खः ।