येँ महानगर २७ वडाय् स्थानीय त्वाःबहाःया नां रञ्जना लिपिं तयेगु अभियान न्ह्याकूगु दु। लिसें अन त्वाःया मौलिक नां तयेगु ज्या नं शुरु जूगु दु ।

बागमती प्रदेश सरकारं नेपालभाषा व तामाङ भाषायात सरकारी ज्याखँया भाषा दयेकेगु कानुन पारित यायेवं उकियात हे तिबः बी कथं येँ महानगर २७ वडाय् त्वाःया मौलिक नां रञ्जना लिपिं तयेगु अभियान शुरु जूगु खः ।

येँ महानगर २७ वडा अध्यक्ष योगेश कुमार खड्गीं आः अन ३५ गू त्वाःया नां नेवाः भासं रञ्जना लिपि छ्यलाः तयेगु ज्या जुइ धुंकूगु दु। नां तयेगु अभियान शुरु जुइवं त्वाःबहाःपिंसं अझ थप नां उपलब्ध याना बिउगुलिं आः हानं मेगु १० गू थप त्वाःया नां तयेगु तयारी जुयाच्वंगु दु धका धाःगु दु।

रञ्जना लिपिया साइनबोर्ड तयेगु ज्या वडाया थःगु हे बजेटं न्ह्याकूगु खः ।

नेकपा एमाले येँ महानगर समितिं नेपाल संवत् ११४४ न्हूदँ तःजिक हनेगु नितिं न्हूदँ ११४४ समारोह समिति नीस्वंगु दु। येँया प्रज्ञाभवनया हलय् छगू भेला यासें येँ महानगर समितिया नायः निर्मल देउवाया नायःसुइ समारोह समिति नीस्वंगु खः।

उगु ज्याझ्वलय् पुलांम्ह सांसद रामेश्वर फुँयाल, येँ महानगरपालिकाया पुलांम्ह मेयर विद्यासुन्दर शाक्य, बागमती प्रदेशया पुलांम्ह सांसद राजेश शाक्यलिसें थीथी व्यक्तिपिनिगु उपस्थित जूगु खः।

एमाले येँ महानगर समितिं थथे नीस्वंगु न्हूदँ समारोह समितिं न्हूदँया लसताय् कार्तिक १८ गते विष्णुमती सुचुपिचु अभियान, तुच्चा ज्याझ्वः, हिदान ज्याझ्वः लिसें थीथी ज्याझ्वः यायेगु निर्णय याःगु खः।

थ्वहे वइगु कछलाथ्व पारु (कार्तिक २८ गते) नेपाल संवत् ११४४ न्हूदँ दँय् दसंथें तःजिक थुगुसि न न्यायेकेगु नितिं नेपाल संवत् न्हूदँ राष्ट्रिय समारोह समिति ११४४ पाखें थीथी कथंया तयारी जुयाच्वंगु जानकारी बिःगु दु।

समारोह समितिया सचिवालयपाखें बिःगु जानकारी कथं न्हूदँ तःजिक हनेगु नितिं थीथी उपसमिति नीस्वनागु जानकारी बिःगु दु। थथे नीस्वंगु उपसमितित प्रचारप्रसार, सांस्कृतिक बाजं, आर्थिक, मिसा परिचालन, स्वयंसेवक ¥याली ब्यवस्थापन, मञ्च व्यवस्थापन, न्हिल्याःपौ पिथना पुचः, नासः पूजा व प्रसाद ग्रहण व्यवस्थापन, संघसंस्था सम्पर्क समन्वय, सुरक्षा निकाय व ट्राफिक समन्वय व्यवस्थापन, देय् न्यंकं न्हूदँ समारोह समन्वय, शंखधर दिवस ज्याझ्वः व थीथी ज्याझ्वःया नितिं उपसमिति नीस्वंगु दु।

अथेहे, समारोह समितिं न्हूदँ तःजिक हनेगु नितिं थीथी भेला, मुँज्या न्ह्याकूगु दु । न्हूदँ समारोह समितिं थुगु दँनिसें न्हूदँया नायः निदँया नितिं ज्या सनेत क्वःछ्यूगु कथं ११४४ न्हूदँ समारोह समितिया नायः प्रा.डा. नरेशमान बज्राचार्ययात सर्वसम्मतिं ल्यःगु खः।

नेपाल आयल निगमं डिजेल व मचिकंया भाः लिटरं प्यतका घटे याःगु दु। भारतीय आयल कर्पोरेसन (आईओसी) पाखे घटे जूया वःगुलि डिजेल व मचिकंया भाः घटे यानागु दु धका निगमया प्रवक्ता मनोजकुमार ठाकुरं जानकारी बिःगु दु।

न्हुगु भाः कथं कन्ह्यः सुथय् बुधवाः १ बजेनिसे लागु जुइ धका धाःगु दु। आः स्वनिगलय् डिजेल व मचिकइ लिटरं १६४ रुपैयाँ  जूगु दु।

संयुक्त राष्ट्र सङ्घया महासचिव एन्टोनियो गुटेरेसं गौतमबुद्ध बूगु थाय् लुम्बिनीइ भ्रमण यागु दु।

महासचिव गुटेरेसयात प्रधानमन्त्री पुष्पकमल दाहाल प्रचण्ड, पर्यटन लिसे नागरिक उड्डयनमन्त्री सुदन किराती, लुम्बिनीया मुख्यमन्त्री डिल्लीबहादुर चौधरी, पर्यटन लिसे नागरिक उड्डयन राज्यमन्त्री सुशीला श्रीपाली, लुम्बिनी विकास कोषया उपाध्यक्ष ल्हारक्याल लामा लगायतपिन्स लुम्बिनीइ लसकुस याःगु दु।