लुँया भाः थौं तोलां न्यासः कुहावःगु दु। लुँ तोलां म्हिगः न न्यासः कुहावःगु खःसा थौं न न्यासः कुहावया १ लाख १६ हजार रुपैयाँ न कारोबार जुगु दु धका नेपाल सुनचाँदी व्यवसायी महासङ्घं धाःगु दु।

वहः तोलां झीतका कुहावःगु दु। वहः तोलां झीतका कुहावया १ हजार ४ सय २० रुपैयाँ न कारोवार जूगु दु धका महासङ्घं धाःगु दु।

राष्ट्रिय सभाया विधायन व्यवस्थापन समितिं येँ महानगरपालिका प्रमुख (मेयर) या मर्यादाक्रम घटे यायेगु प्रस्ताव याःगु दु।

आः येँ महानगरपालिका प्रमुखया मर्यादाक्रमय् झीगु थासय् तःगु दु। प्रचलित व्यवस्था कथं येँ महानगरपालिकाया प्रमुखं मर्यादाक्रमया झ्वलय् नेपाल सरकारया सहायक मन्त्री, प्रतिनिधि सभाया सदस्य, राष्ट्रिय सभाया सदस्य, नेपाल सरकारया पूर्वमन्त्री, उच्च अदालतया मुख्यन्यायाधीश, प्रदेश सरकारया मन्त्री, प्रदेश सभाया उपसभामुख, प्रदेश सरकारया राज्यमन्त्री, प्रदेश सभाया थीथी समितिया सभापति, संविधान सभाया सदस्य, पूर्व सांसद, नेपाल सरकारया मुख्यसचिव व प्रधानसेनापति तःगु दु।

राष्ट्रिय सभाया विधायन व्यवस्थापन समितिपाखे पारित ‘राष्ट्रिय मर्यादा सम्बन्धी विधेयक, २०७९’ य् महानगरपालिका प्रमुखयात मर्यादाक्रमय् १७ गु थासय् तःगु दु। प्रस्तावित विधेयक गथे खः अथे राष्ट्रियसभा व प्रतिनिधिसभापाखे पारित जुल धाःसा येँ महानगरया मेयर मर्यादाक्रमय् देयन्यक च्वपि मेयरया धलखय् लाइगु जुगु दु।

म्हिगः आइतवाः शेयर बजाः २८ अङ्कं कुहावःगु खःसा थौं छु भचा थहावःगु दु। शेयर बजाः परिसूचक नेप्से थौं ३ दशमलव शून्य ४ अङ्कं थहावना १ हजार ८ सय ७८ दशमलव ७० विन्दुइ थ्यःगु दु।

थौं होटल, उत्पादन व म्युचल फन्डबाहेक दक्को समूहया शेयर सामान्य थहावःगु दु । अथेहे दकलय् अप्पो पञ्चकन्यामाई हाइड्रोपावर कम्पनीया शेयर झन्डै ८ प्रतिशत व मन्दाकिनी हाइड्रोया शेयर झन्डै ६ प्रतिशतं थहावःगु दु।

थौं दकलय् अप्पो सोनापुर मिनरल्स एन्ड आयल कम्पनीया शेयर १० प्रतिशतं कुहावया नकारात्मक सर्किटय् वःगु दु। बजाः सामान्य थहावःसा थौं २८ लाख २४ हजार कित्ता शेयर ६९ करोड ४२ लाख रुपैयाँया जक कारोबार जूगु दु।

साधना लघुवित्तया प्रमोटर शेयर ३ करोड ६० लाख रुपैयाँया कारोवार जूगु दु ।

आः ट्राफिक नियम उल्लंघन मयासे सवारी चले यायेगु इलय् चेकजाँचय् नागरिक एपपाखे सवारी चालक अनुमति पत्र (ड्राइभिङ लाइसेन्स) क्यने मिले जुइगु दु।

राष्ट्रिय सूचना प्रविधि केन्द्रया कथं मन्त्रिपरिषदया निर्णय कथं नागरिक एपय् चालक तय्सं सवारी चालक अनुमति पत्रयात चेकजाँचया झ्वलय् मान्यता बिइगु जूगु दु। उकिया लागि प्रहरी प्रधान कार्यलयया मातहत ट्राफिक कार्यालय तय्त परिपत्र याये धुकुगु केन्द्रया छम्ह अधिकारीं धाःगु दु।

सरकारं नागरिक एपय् दर्ता जूगु सवारी साधनया विवरणनापं ट्राफिक नियम उल्लंघनय् कारवाहीलय् लागू विवरण तक तयारी जूयाच्वंगु दु। थुकिइ ट्राफिक प्रहरीयात सवारी चेकजाँचय् अझ अपुइगु जूगु दु।

सूचना प्रविधि केन्द्रं थःगु नागरिक एपय् सवारी चालक अनुमति पत्र लिंक यायेत चालक तय्त इनाप न याःगु दु।

राष्ट्रियसभाया विधायन समितिं राष्ट्रिय मर्यादाक्रमसम्बन्धी विधेयक संशोधननापं पारित याःगु दु।

प्रधानन्यायाधीशयात मर्यादा क्रमय् न्यागु थासय् तयेगु विधेयक समितिपाखे आः प्यंगु धलखय् हयेगु संशोधननापं पारित याःगु दु।

समितिं संशोधननापं तयार याःगु प्रतिवेदन राष्ट्रियसभाया मंगलवाःया बैठकय् पेस यायेगु निर्णय याःगु दु।