बागमती प्रदेसया संसदं नेपालभाषा व तामाङ भाषायात सरकारी कामकाजि भाषा यायेगु नितिं विधेयक सर्वसम्मतं पारितयाःगुयात कया नुवाकोट जिल्लाया विदुर नगरय् लसकुसयासें सांसदपिन्त सुभाय् देछाःगु दु।

नेवाः देय् दबू नुवाकोट जिल्ला समिति व नेवाः देय् दबु विदुर नगर समितिया मंकाः ग्वसालय् म्हिगः शनिवाः उगु ज्याझ्वः जूगु खः । बटारया पुलांगु बजारय् च्वंगु फल्चाय् जूगु उगु ज्याझ्वःया सभानायः देय् दबू नुवाकोट जिल्ला समितिया नायः रामप्रसाद जोशी जुयादीगु खः ।

देय् दबू बागमती प्रदेश समितिया दुजः नरेन्द्र प्रधानं न्ह्याकादीगु उगु ज्याझवःया मूपाहां देय् दबू स्वनिगः विशेष प्रदेशया नायः श्रीकृष्ण महर्जन जुयादीगु खः। वागमती प्रदेस संसदं सर्वसम्मतं पारित याःगु विधेकय् नेवाः भाय्यात प्रदेशया कामकाजि भाषाया रुपय् लागू यायेगु नापनापं नेपाल संवतयात तकं प्रयोग यायेगु धकाः उल्लेख जुयाच्वंगु खँ न्ह्यथसें मूपाहां महर्जन आः स्थानीय सरकारयात तकं स्थानयि भाषाया ऐन दयेके बिइगु नितिं भूमिका म्हितेमाःगु कनादिल ।

अथे हे भाषा विधेयक पारित याःगु दिं असोज २२ गतेयात आः नेपालभाषा लसता दिं कथं हनेमाःगु खँ तकं कनादीगु खः । अथे हे स्थानीय थीथी खलः पुचःया प्रतिनिधिपिन्सं नं भिंतुना न्वचू तयादीगु खः । शनिवाः हे बहनी हाकनं उगु हे फल्चा मैन मत च्याका धिमे बाजं थाना उत्सव न्यायेकूगु खः ।

दक्षिण एसियाली क्षेत्रीय सहयोग संगठन (सार्क) या नवनियुक्त महासचिव गोलाम सरवरं कार्यभार सम्हाले याःगु दु।

सार्क मन्त्रिपरिषदं वयकःयात नियुक्ति यायेगु लागि अनुमोदन यायेवं वयकलं मंगलवाःनिसे कार्यभार सम्हाले याःगु धका सार्क सचिवालयं शनिवाः जानकारी बिःगु दु।

गोलाम सरवर सार्कया १५ म्ह महासचिव जूगु खः। वयकलं बंगलादेशया प्रतिनिधित्व यासे स्वम्ह म्ह कूटनीतिक कर्मचारी न खः।

सार्क सचिवालयया कथं सन् १९९१ य् बंगलादेशया कूटनीतिक सेवा प्रारम्भ याःम्ह महासचिव सरवर मलेसिया, ओमन व स्विडेनया लागि बंगलादेशी राजदूत जुइ धुकुम्ह खः।

वयकलं क्वालालम्पुर, येँ, याङ्गुन व वासिङटन डिसीइ बंगलादेशया कूटनीतिक अधिकारीया कथं ज्या याये धुकुगु दु।

मोहनिया दकलय् लिपागु दिं कौलाथ्व पुन्हि कुन्हु राष्ट्रपति रामचन्द्र पौडेलं ख्वपया नवदुर्गा भवानीया पूजा यानादिगु दु।

राष्ट्रपति पौडेलं राष्ट्रप्रमुखपाखे मोहनिया दकलय् लिपागु दिं कुन्हु नवदुर्गा द्यःया पूजा यायेगु परम्परा दु।

लुँया भाः आःतक हे दकलय् अप्पो थ्यःगु दु। लुँ तोलां थौं द्धःछि थहावःगु दु ।

लुँ तोलां द्धःछि थहावना थौं आःतक हे दकलय् अप्पो १ लाख १७ हजार रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे, वहः तोलां न थौं झीन्यातका थहावंगु दु। वहः तोलां झीन्यातका थहावना थौं १ हजार ४ सय १५ रुपैयाँ थ्यःगु दु धका महासङ्घं धाःगु दु।

संयुक्त राष्ट्रसङ्घया महासचिव एन्टोनियो गुटरेस प्यन्हुया भ्रमण यायेगु झ्वलय् थौं नेपाः वःगु दु।थौं चान्ह्यः १ बजे त्रिभुवन अन्तर्राष्ट्रिय विमानस्थलय् अवतरण याःगु दु।

वयकःयात परराष्ट्रमन्त्री एनपी साउदं विमानस्थल वना लसकुस याःगु दु। भ्रमणया झ्वलय् थौं आइतवाः राष्ट्रपति रामचन्द्र पौडेलनाप राष्ट्रपति कार्यालय व प्रधानमन्त्री पुष्पकमल दाहाल प्रचण्डसनाप वयकःया कार्यालयय् महासचिव गुटरेसं नापलाइगु ज्याझ्वः दु धका परराष्ट्र मन्त्रालयं धाःगु दु।

वया लिपा गुटरेसं नेपाली कांग्रेसया सभापति शेरबहादुर देउवा व नेकपा (एमाले) या अध्यक्ष केपी शर्मा ओलीनाप सङ्घीय संसद् भवन न्हुगु बानेश्वरय् नापलायेगु ज्याझ्वः तयातःगु दु। अथेहे उपप्रधानमन्त्री पूर्णबहादुर खड्का व नारायणकाजी श्रेष्ठ, परराष्ट्रमन्त्री साउदयात नापलायेगु ज्याझ्वः तयातःगु दु।