लुँया भाः तोलां थौ प्यसः थहावःगु दु। लुँ तोलां प्यसः थहावना थौं १ लाख १३ हजार रुपैयाँ थ्यःगु दु धका नेपाल सुन चाँदी व्यवसायी महासङ्घं धाःगु दु।

अथेहे, वहः तोलां न नीन्यता थहावःगु दु। वहः तोलां नीन्यतका थहावना १ हजार ४ सय ७५ रुपैयाँ न कारोबार जूयाच्वंगु दु धका महासङ्घं धाःगु दु।

निर्माण व्यवसायीपिन्स डोजर लगायतया निर्माण यन्त्रनापं बालुवाटारये प्रधानमन्त्री निवास न्ह्येन विरोध प्रदर्शन याःगु दु।

उमिसं थौं मंगलवाः सुथय् विरोध प्रदर्शन याःगु दु। प्रहरीं प्रदर्शनकारीपिन्त लँ सिथय् तःगुलि यातायात आवागमन प्रभावित धासा मजू।

विरोध प्रदर्शन ज्याझ्वलय् न्ववासे नेपाल निर्माण व्यवसायी महासंघया अध्यक्ष रवि सिंहं दक्का ठेक्काय् छक्वलं म्याद थप जुइमाःगु लगायतया गुगुं बुँदे माग ज्वना आन्दोलन न्ह्याकगु धका जानकारी बिउसे थःपिनिगु माग सम्बोधन मजूतले आन्दोलन जारी जुइ धका धाःगु दु।

त्यंगः त्वाः मिसा पुचःया दँमुँज्या क्वचाःगु दु। त्यंगः त्वाः खलः गणेद्यः गुथि अन्तर्गतया पुचःया दँुमुँज्याया उलेज्या मूपाहां त्यंगः त्वाः नायः धनबहादुर तिमिलां त्वाःदेवाय् मत च्याकाः यानादीगु खः ।

पुचःया नायः नानीहिरा महर्जनया सभाध्यक्षताय् जुगु उगु ज्याझ्वलय् पुचःया लिउ छ्याञ्जे सुमित्रा महर्जनं वार्षिक प्रगति विवरण व दांभरिं मैयाँ महर्जनं आर्थिक विवरण न्ह्यब्वयादीगु खः ।

अथे उगु ज्याझ्वलय् मिसा पुचलं थीथी इलय् याःगु ज्याझ्वःयात ग्वाहालि यानादीपिं नानीकाजी महर्जन, बालकृष्ण महर्जन, मणिकन्ठ महर्जन, पुष्प महर्जन व राजीव डंगोलयात हनेज्या नं याःगु खः ।

उगु ज्याझ्वलय् त्यंगः त्वाःया न्याम्ह थाकुलि छसिकथं तीर्थनारायण महर्जन, देवनारायण महर्जन, कृष्णनारायण महर्जन, पंचनारायण महर्जन व तिर्थ महर्जनलिसें त्वाः गुरु धर्मरत्न महर्जन, खलःया निवर्तमान नायः कुलबहादुर महर्जन, त्यंगः त्वाः ल्याय्म्ह पुचःया नायः राजीव डंगोल पाहांकथं झायादीगु खः ।

येँ महानगरपालिकाया पुलांम्ह मेयर पीएल सिंह उसाँय् मदया यलया मेडिसिटी अस्पतालय् भर्ना जुयादीगु दु ।

८४ दँ दुम्ह वयकः छुं ई न्ह्यवंनिसें अल्सर ल्वचं पीडित जुयाच्वनादीम्ह खः ।

वय्कःयागु आन्द्राय् हि वःगुलिं अपरेसन यायेमाःगु खः धका वयकःया किजा इन्द्रलाल धयादीगु खः।

अपरेसन लिपा आः अब्जरवेसनय् तयातःगु दु ।

लगातार न्यान्हु लिपा कुहावया च्वंगु शेयर बजाः थौं सोमवाः सामान्य थहावःगु दु। शेयर बजाः परिसूचक नेप्से थौं ५ दशमलव ८४ अङ्कं थहावना २ हजार १ सय ६ दशमलव १८ विन्दुइ थ्यःगु दु।

थौं जलविद्युत्, माइक्रोफाइनान्स व म्युचल फन्डबाहेक दक्को समूहया शेयर थहावःगु दु। नेप्से थहावःसा थौं कारोबार रकम धाःसा २ अर्ब रुपैयाँ स्वया क्वय् कुहावःगु दु।

२ सय ६२ गु कम्पनीया ५५ लाख ३१ हजार कित्ता शेयर १ अर्ब ८५ करोड रुपैयाँया कारोबार जूगु दु। दकलय् अप्पो शिवम् सिमेन्टया ८ करोड ८ लाख रुपैयाँया शेयर कारोवार जूगु दु।

सनराइज ब्लुचिप फन्डया शेयर ७ प्रतिशत स्वया अप्पो थहावःगु दु। समग्र बजाः थहावःसा थौं विन नेपाल लघुवित्त व ग्लोबल आईएमई बैंकया शेयर ४ प्रतिशत स्वया अप्पो कुहावःगु दु।