जनबहाःद्यःया जात्रा न्ह्यःने वयाच्वंगु इलय् जात्रा जुइगु लँपुइ छुं नं कथंया निर्माणया ज्या याये मते धकाः छु दिं न्ह्यः जक जात्रा व्यवस्थापन समितिं इनाप याःगु खः।

आः जात्रा जुयान्ह्याये माःगु लँ भ्याय्चाद्यः, थाय्मरु त्वालय् धाःसा थ्वहे इलय् धःया पाइप लायेगु निति गाः म्हुइगु ज्या यानाच्वंगु दु। छु छु दिं असनय् गाः म्हुइगु ज्या जुगु खःसा आः भ्याय्चाद्यः लागाय् डोजर हयाः गाः म्हुइगु ज्या नं शुरु याःगु खः।

उगु लँपाखे जनबहाःद्यः रथय् तइ कुन्हु द्यःयात खतय् तयाः कुबिया यंकीगु लागा खः। आः डोजरं गाः म्हुयाः अन पाइप लायेगु ज्या क्वचाःसां नं बांलाक चा ल्हाके मफइगु जूगुलिं द्यः जात्रा यानाः हइबलय् वयेत थाकुइफु धाःगु दु।

येँया महानगरीय प्रहरी वृत्त जनसेवाय् न्हूम्ह डीएपी रुकेश तण्डुकारं वःगु दु।

बागबजारय् च्वनादिम्ह डीएपी तण्डुकारं म्हिगः बुधवाः निसें थःगु कार्यभार कयादिगु दु। वयकःयात छगू ज्याझ्वया दथुइ जनसेवा प्रहरी प्रभागय् लसकुस याःगु दु।

अथेहे पुलाम्ह डीएपी भेष राज रिजालयात न बिदाइ ज्याझ्वः याःगु खः।

इलाम–२ य् राष्ट्रिय स्वतन्त्र पार्टी (रास्वपा) पाखे उम्मेदवार जुइत खुम्हेसिया निवेदन बिउगु दु। गोकुलबहादुर राई, जमुना शर्मा, महेन्द्रबहादुर थापा, मानबहादुर घिमिरे, मिलन लिम्बु व डा. भेषरमण न्यौपानेपिन्स निवेदन बिउगु खः।

खुम्ह मध्ये पार्टीया विधान यागु धारा–७१ कथं प्रारम्भिक निर्वाचन जुइ धका रास्वपा केन्द्रीय निर्वाचन आयोगं धाःगु दु।

प्रारम्भिक उम्मेदवारय् दाबी विरोध यायेगु लागि चैत १५ न्हिनय् १ बजेतक ई बियातःगु खः। थ्व हे वइगु वैशाख १५ गते प्रतिनिधिसभा सदस्यया लागि इलाम–य् उपनिर्वाचन जुइत्यःगु खः।

छत्रपाटी निःशुल्क चिकित्सालययात थुगु दँया बेखा नारायण–देवकुमारी राष्ट्रिय प्रतिभा पुरस्कार लःल्हाइगु जुगु दु।

येँ महानगर १७ वडास्थित छत्रपाटी निःशुल्क चिकित्सालय वि.सं.२०१३ सालंनिसें गरिब व असहाय विरामीया सेवा याना वयाच्वंगु व वंगु कोरोना महामारीया इलय् प्रदान याःगु विशेष सेवाया कदरयासें थथे सिरपाः लःल्हायेत्यनागु खँ धका सिरपाः समितिया अध्यक्ष प्रा.डा. जगदिश नारायण मानन्धरं धयादीगु दु।

हनापौ नाप दोसल्ला सहित ५० द्वः तका धनराशीया खः। थ्वहे वइगु शनिवाः स्वयम्भूइ जुइगु मानन्धर स्वयम्भू भ्वजय् लःल्हाइगु ग्वसाः दु।

थगुने थ्व सिरपाः आविष्कार केन्द्रया वैज्ञानिक महाविर पुनयात लःल्हाःगु खः।

ग्वाज्यचा, ह्वान्तांचा, भिन्तुना लगायतया दर्जनं सिबें अप्वः नेवाः संकिपा म्हितुम्ह कलाकार राजु महर्जन जुजुया मां माया महर्जन वंगु चिल्लाथ्व चर्हे होलि कुन्हु आकाझाकां मन्त।

वयकः गुइदँय् मदुगु खः।