येँ महानगरपालिकाया उपमेयर सुनिता डंगोलं राष्ट्रिय सभा गृह न्ह्यने वंगु च्यान्हु न्ह्यनेनिसे दनाच्वपि अभियन्ता ईः यात नापलागु दु।

थौं मंगलवाः सुथय् ईः लगायतया अभियन्तापिन्त नापलानां करुणादायी सरकारया अवधारणाप्रति थः प्रतिवद्ध दु धका धयादीगु खः। ‘बःपसः  विस्थापित जूपिन्त वैकल्पिक व्यवस्था सम्बन्धी नीति दय्केगुलि प्रतिवद्ध दु’ धका धयादीसे थःगु अधिकार सीमित जक दु धका धयादीसे वयकलं न्ह्यने धयादीगु दु, ‘थःगु थासं कुतः याये।’

येँ महानगरपालिकां चुनावीय् बचं बिउगु अःखः वैकल्पिक व्यवस्था मयासे बःपसः यानाच्वंपि व्यवसायीपिन्त चिइकूगु विरोधय् ईः वंगु मंगलवाःनिसे राष्ट्रिय सभा गृह न्ह्यने दनावया च्वंगु खः। लगातार दनाच्वंगुलि ईः या तुति मना वये धुकुगु दु।

हनुमानध्वाकाय् थौं यःसि थःगु दु। ञंलाथ्व द्धादशी कुन्हु यःसि थनेवं यँया जात्रा औपचारिक कथं न्ह्याइ ।

नेपाल पञ्चाङ्ग निर्णायक समितिं बिःगु साइत कथं केन्द्रीय मानन्धर संघं ख्वपया सूर्यविनायकस्थित चित्तपोलया जंगलं यःसि हःगु खः।

स्वनिगलय् हनिइगु थुगु यँया जयप्रकाश मल्ल जुजुया इलय् निसे न्ह्याःगु धका धायेगु याना वयाच्वंगु दु।

श्री हल्चोक आकाश भैरव हल्चोकय् एकादशी कुन्हु द्यः छेँय् जुइगु पूजा म्हिगः क्वचाःगु दु।

उगु पूजाय् भूमि व्यवस्था, सहकारी लिसे गरिवी निवारणमन्त्री रञ्जिता श्रेष्ठ न हल्चोकया द्यः छेँय् झाया पूजा यानादीगु खः।

दँय् दँसं यंला थ्व एकादशी कुन्हु जुइगु बिशेष पूजा यायेगु परम्परा दु। एकादशी कुन्हु जुइगु पूजाय् झिम्ह द्यःपिनिगु ख्वाःपा, तिसा व हतियार द्यः छेँय् न्ह्यःने तया पूजा यायेगु याइ। चण्डी, कुमारी व आकाश भैरव यँया इलय् जात्रा यायेगु याइ। 

राष्ट्रपति रामचन्द्र पौडेल थौं जनकपुरधामय् वना जानकी द्यःया थाय् वना पूजा याःगु दु। वयकलं थौं जानकी द्यःया थाय् अखण्ड मत ज्याकेगु नापनापं अखण्ड कीर्तनया दर्शन नाप प्रसाद ग्रहण न याःगु दु।

राष्ट्रपतियात जानकी द्यःया थाय् मूल महन्त रामतपेश्वर दासं लसकुस याःगु खः । राष्ट्रपति पौडेलयात जनकपुर विमानस्थलय् मधेस प्रदेश प्रमुख हरिशङ्कर मिश्र, मुख्यमन्त्री सरोज यादव, पूर्वउप प्रधानमन्त्री विमलेन्द्र निधि, सङ्घीय सांसद, नगरया मेयर नापं सुरक्षा निकायया प्रमुखपिन्स न लसकुस याःगु खः।

मेयर बालेन शाहयात चुनावी बचं लुमंकेगु कथं न्ह्यन्हुनिसे राष्ट्रिय सभागृह न्ह्यने दना वयाच्वंपि अभियन्ता ईः नाप येँ महानगरपालिकां सम्वाद आः तक याःगु मदुनि। निरन्तर दना च्वपि ईः या तुति मना वयाच्वंगु दु।

सोमवाः ईः दना वयाच्वंगु खः। येँ महानगरया छम्ह नगर प्रहरी वया, ‘मेयरसाबं माला च्वंगु दु, दुहा वयेमालं।’ ईः अज्जु चाःगु दु। यदि महानगरं सम्वाद याये चाहे जुगु खःसा सूचं बिया वार्ता यायेफइ। वार्ताय् च्वनेत अभियन्तापि तयार दुगु खः।

वयकलं धयादीगु दु, ‘वार्ता यायेगु खःसा म्हतिइ छ घौ बिइमाः। जिमिगु पक्षपाखे कानुनी जानकार, सहरी विकासया जानकार पासापि वयेमाः।’ नगर प्रहरीं ख्यायेत स्वंगु दु, ‘आः नापलायेगु खःसा नापलायेमाः मखुसा नापलाये थाकुइ।’

अभियन्ता ईः महानगरं वार्ता चाहे जूसा थःपि तयार दु धका धाःगु दु । तर महानगरं नेतृत्व वार्ता यायेगु स्वया वार्ता यायेत सःतागु खः, मवं धका प्रचार जक यायेत स्वंगु धका धाःगु दु।