थथुपुईं आचार्य गुथि संरक्षण समिति, नामसंगीति स्तोत्र पाठ उपसमितिपाखें सल्हु पतिकं बहाः बहालय् वना मंकाः कथं नामसंगीति स्तोत्र पाठ वाचन याःवनेगु ज्या न्ह्याका नामसंगीतिया महत्वयात उजागर यायगु ज्या याना हयाच्वंगु दु।

थ्व हे झ्वलय् रत्नकीर्ति महाविहार मखं बहालय् सोमवाः नामसंगीति स्तोत्र वाचन जूगु दु। थुगु ज्याझ्वलय् रत्नकीर्ति महाविहारया छ्याञ्जे सागरमान बज्राचार्यजुं ताः हाकयक हे मखं बहाःया म्हसीका बिया बिज्यागु खः ।

थुगु ज्याझ्वः अमर बज्राचार्यया संयोजकत्वय् न्ह्याना वयाच्वंगु दुसा पाठ ज्याझ्वलय् आपालं भक्तजनपिन्सं नामसंगीति वाचन याय्गु ज्या जूगु खः।

नेपालभाषाया साहित्यकार अपर्णा प्रधानया प्यंगू सफू छगू ज्याझ्वः दथुइ पितब्बज्या जूगु दु।

उगु ज्याझ्वलय् साहित्य व समाजसेवी  कृष्णलाल प्रधानं मूपाहाँ कथं झायादीगु उगु ज्याझ्वलय् साहित्यकार हितकरवीर सिंह कंसाकार सभाध्यक्षताय् जूगु खः ।

पिदंगु प्यंगु सफू मध्ये समालोचना मुना सफू ”किपाः”, निबन्ध मुना, क्वाः घासा” व चिबाखं मुना, जीवनया यात्रा” या नापनापं साहित्यकार अपर्णा प्रधान या गुंगू सफूयात कया समालोचक पुर्ण ताम्राकारं च्वयादीगु समालोचना मुना, क्वाति” खः।

भाषाविद् सुन्दरकृष्ण जोशी  समालोक पुर्ण ताम्रकार, साहित्यकार सुलोचना मानन्धर, बाखं च्वमि जलेश्वरी श्रेष्ठपिन्स मंकाः कथं सफू बिमोचन यानादीगु खः।

एबीसी टेलिभिजनय् न्ह्याका वयाच्वंगु नेपालभाषाया ज्याझ्वः ‘झीगु सः’या निगूगु संस्करण (सिजन टू) शुरु जूगु दु ।

उगु ज्याझ्वःया निर्माता निर्देशक विजयरत्न असंबरेया सभाध्यक्षताय् जूगुु ज्याझ्वलय् कार्यकारी निर्माता राजु राजदेव वज्राचार्यं लसकुस यानादीगु खः ।

स्वीदँ न्ह्यः टेलिभिजनय् नेपालभाषाया ज्याझ्वः न्ह्याकागु व थ्व झ्वलय् थौंतकया दुने थीथी टेलिभिजनय् ज्याझ्वः न्ह्याकाः लिपांगु इलय् एबीसी टेलिभिजनय् न्ह्याकागु ‘झीगु सः’ ज्याझ्वः निगूगु संस्करणया रुपय् न्ह्याका भाषा, कला, संस्कृति, साहित्य, संगीत व संकिपा ख्यःयात न्ह्यब्वयेगुु निर्माता निर्देशक असंबरें कनादिल ।

ज्याझ्वलय् नांजाःम्ह कलाकार नारायणदेवी प्रधान, संचारकःमिलिसें नांजाःम्ह कलाकार, निर्देशक रामकृष्ण खड्गी, संचारकःमि नविन जोशी, कलाकार रुपेन्द्र श्रेष्ठ व समाजसेवी अशोक श्रेष्ठं संचार माध्यमय् थुकथं नेपालभाषाया ज्याझ्वलं थाय् कया यंकेफत धाःसा झीगु भाषा, कला, संस्कृति संरक्षण जुइगु विचाः तयादीगु खः ।

थीथी ब्वनेकुथिया मंकाः पुचः “क्यब्व” दि गार्डेन फर लर्नर्सया संयोजन व काठमाडौं मोडेल स्कुलया ग्वसालय् “क्यब्व अन्तर विद्यालय हिज्जे धेंधेंबल्लाः कासा २०८०” जुगु दु ।

उगु कासाय् जुनियर तगिंपाखें काठमाडौं मोडेल स्कुलं न्हाप, टाइम्स इन्टरनेशनल स्कुलं ल्यू, फ्युचर स्टार इंग्लिस स्कुलं लियांल्यू व स्वयम्भू इंग्लिस बोर्डिङ् स्कुलं हःपाः सिरपाः त्याकेत ताःलाःगु दु ।

अथेहे सिनियर तगिंपाखे फ्युचर स्टार स्कुलं न्हाप, काठमाडौं मोडेल स्कुलं ल्यू, टाइम्स् इन्टरनेशनल स्कुलं लियांल्यू व स्वयम्भू इङ्लिस बोर्डिङ् स्कुलं हःपाः सिरपाः त्याकूगु खः । ग्वसाः स्कुलया निर्देशक राजेन्द्र महर्जनया सभाध्यक्षताय् जूगु उगु ज्याझ्वःया उलेज्या “क्यब्व”या संयोजक मनोज कुमार श्रेष्ठ, ग्वसाः स्कूलया निर्देशक राजेन्द्र महर्जन, प्रिन्सिपल रविन महर्जन, क्यब्वया दुजःपिं विनोद श्रेष्ठ, ज्ञानकाजी महर्जनं मंकाःकथं त्वाः देवाय् मत च्याकाः यानादीगु खः ।

त्याःपि कासामिपिंत क्यब्वया संयोजक श्रेष्ठ, ग्वसाः स्कुलया निर्देशक महर्जन व प्रिन्सिपल महर्जन लिसें क्यब्वया दुजःपिं श्रेष्ठ व महर्जनं दसि–पौ, मेडल व ट्रफी लःल्हाःगु खः ।

नेपालभाषाया आधुनिक गद्य कविताया न्ह्यलुवा, वरिष्ठ निबन्धकार कवि पूर्ण वैद्यया निदँया पुण्य तिथिइ ‘नेवाः खँग्वःया पिला’ नांया सफू पिदंगु दु।

नेपालभाषा साहित्य ख्यःया स्वम्ह नांजाःपिं मिसा साहित्यकार मोतिलक्ष्मी शाक्य, मनदेवी ताम्राकार व प्रतिसरा साय्मिं च्वयादीगु छगू उगु सफू छगू ज्याझ्वः दथुइ पिदंगु खः । नेपाल साहित्य मन्दिरया पुलांम्ह नायःलिसें नांजाःम्ह साहित्यकार तिलकप्रकाश कायस्थया सभाध्यक्षताय् न्हू बानेश्वरय् च्वंगु अल्फा हाउसय् जूगु ज्याझ्वलय् उगु सफूया पितब्वज्या जूगु खः ।

उगु ज्याझ्वःया मूपाहांकथं झायादीम्ह वरिष्ठ साहित्यकर हितकरवीर सिंह कसाःलिसें विशेष पाहांपिं नेपाल प्रज्ञा प्रतिष्ठानया उपकुलपति विमल निभाः, नेपालभाषा एकेदेमिया भाइस चान्सलर मल्ल के. सुन्दर, साहित्यकारलिसें समालोचक पूर्ण ताम्राकार, मदुम्ह कवि वैद्यया जहान मीरा वैद्यं उगु सफूया पितब्वज्या यानादीगु खः ।

ज्याझ्वलय् नवानादीपिं वक्तापिंसं छगू बिस्कं विशेषता कुबियाच्वंगु सफू कन्हय्या पुस्ताया निंतिं उपयोगी जुइगु विश्वास प्वंकादीगु दु । ज्याझ्वलय् मूपाहां हितकरवीर सिंह कसाः, विशेष पाहांपिं प्रतिष्ठानया उपकुलपति विमल निभाः, एकेदेमिया भाइस चान्सलर मल्ल के. सुन्दर, साहित्यकार सुलोचना मानन्धर, समालोचक पूर्ण ताम्राकार, साहित्यकार सुवर्णकेशरी चित्रकार, कवि वैद्यया जहान मीरा वैद्यं सफूया थीथी पक्षयात कयाः चर्चा परिचर्चा यासें थःथःगु नुगःखँ तयादीगु खः ।

कवि वैद्यया शिष्य प्रतिसरा साय्मिं न्ह्याकादीगु ज्याझ्वलय् वय्कःया मेम्ह शिष्य मोतिलक्ष्मी शाक्यं सुभाय् देछानादीगु खः ।