पूर्वमन्त्री खेमराज भट्ट ‘मायालु’ मन्त। क्यान्सर ल्वचः पीडित जुयाच्वंम्ह भट्ट बीर अस्पतालय् वासः यायेगु झ्वलय् मदुगु खः।

वयकःया काय् न जानकारी बिःगु कथं म्हि चान्ह्यः १० बजे जूया २५ मिनेटय् मदुगु धका धाःगु दु। वयकःयात थौं पशुपतिया आर्यघाटय् अन्त्येष्टि याइगु जुगु दु।

डडेलधुराय् जन्म जुयादीम्ह भट्ट गणतन्त्रया सः थ्वय्केगुलि न्ह्यलुवाः जुयादी। रामराजा प्रसाद सिंह नेतृत्वया जनवादी मोर्चां गणतन्त्र नेपाःया आज्जु तया २०४२ साल असारय् नारायणहिटी राजदरबार, सिंहदरबारय् बम बिष्फोट याःगु खः।

उगु इलय् मायालु जनवादी मोर्चाया उपाध्यक्ष जुयादी।

सरकार व आन्दोलन यानाच्वीप शिक्षकपिनिगु प्रतिनिधिपि दथुइ थौं औपचारिक वार्ता जुइत्यःगु दु। वार्ता थौं सुथय् ९ बजे सुरु यायेगु तयारी दु ।

थ्व स्वया न्ह्यः म्हिगः बिहीवाः सुथय् व बहनि निगु चरण अनौपचारिक सहलह जुइ धुकुगु दु। थौं सुथय् जुइगु सहलहय् उपप्रधान लिसे गृहमन्त्री नारायणकाजी श्रेष्ठ, शिक्षा मन्त्री अशोक कुमार राई व शिक्षक आन्दोलनया नेतृत्वकर्ता नेपाल शिक्षक महासंघया प्रतिनिधिपिन्स ब्बति काइगु जुगु दु।

म्हिगः बहनि गृहमन्त्री श्रेष्ठ, शिक्षामन्त्री राई नापं सञ्चार लिसे सूचना प्रविधिमन्त्री रेखा शर्मा, अर्थमन्त्री डा. प्रकाशशरण महत व कानुन न्याय लिसे संसदीय व्यवस्थामन्त्री धनराज गुरुङ पि नापं उगु मन्त्रालयया सचिवहरुपि लिसें शिक्षकपिनिगु प्रतिनिधि दथुइ सहलह जुगु खः।

शेयर बजः थौं थहावंगु दु। शेयर बजाः परिसूचक नेप्से थौं ४४ दशमलव ३४ अङ्कं थहावना २ हजार २९ दशमलव ७८ विन्दुइ थ्यःगु दु। थौं दकलय् अप्पो समूहया शेयर थहावंगु दु।

उकि मध्ये जलविद्युत्, फाइनान्स व विकास बैंक समूहया शेयर यक्को अङ्कं थहावंगु दु। नेशनल हाइड्रोपावर कम्पनी, दिव्यश्वरी हाइड्रो, हिमाल दोलखा हाइड्रो, थ्री स्टार हाइड्रो, मन्दाकिनी हाइड्रो, न्यादी हाइड्रो व खानीखोला हाइड्रो नापं स्वाभिमान लघुवित्तया शेयर १० प्रतिशतं थहावंगु दु।

अथेहे खुगु कम्पनीया शेयर ९ प्रतिशत स्वया अप्पो थहावंगु दु । समग्र बजाः थहावंसा थौं दकलय् अप्पो एनआईबीएल ग्रोथ फन्ड व अभियान लघुवित्तया शेयर ४ प्रतिशतं कुहावंगु दु। बजाः नापनापं कारोबार रकमय् तसकं सुधारय् वंगु दु। १ करोड १२ लाख कित्ता शेयर ३ अर्ब २९ करोड ३९ लाख रुपैयाँया कारोबार जूगु दु।

दकलय् अप्पो सन लाइफ नेपाल इन्सुरेन्स कम्पनीया २० करोड १८ लाख रुपैयाँया शेयर खरिद बिक्री जूगु दु।

लुँया भाः तोलां थौं स्वसः कुहावःगु दु। लुँ तोलां स्वसः कुहावया थौं १ लाख १२ हजार ५ सय रुपैयाँ न कारोवार जूगु दु धका नेपाल सुन चाँदी व्यवसायी महासङ्घं धाःगु दु ।

अथेहे, वहः तोलां न थौं न्यातका कुहावःगु दु। वहः तोलां न्यातक कुहावया थौं १ हजार ४ सय १० रुपैयाँ न कारोबार जुयाच्वंगु दु धका महासङ्घं धाःगु दु।

मिसा साहित्यकार मुनाया ग्वसालय् न्ह्यःखाय् च्वंगु जन चिकित्सालयय् चिबाखं प्रशिक्षण ज्याझ्वः जुगु दु। मिसा साहित्यकार मुनाया नायः अञ्जना ताम्राकारया सभाध्यक्षताय् जूगु उगु ज्याझ्वलय् लुम्बिनी बौद्ध विश्वविद्यालय बौद्ध अध्ययन संकायया डीन डा. माणिकरत्न शाक्य मूपाहांकथं झायादीगु खः।

ज्याझ्वलय् मूवक्ताकथं झायादीम्ह साहित्यकारलिसें समालोचक धु्रव मधिकःमिं चिबाखंया थीथी पक्षयात कयाः प्रशिक्षण बियादीगु खः । वय्कलं चिबाखं छु खः ? चिबाखनय् दयेमाःगु विशेषता, तत्वया बारे कनादिसें चिबाखं थुकथं च्वयेगु धइगु बारे प्रशिक्षण बियादीगु खः ।

साहित्यकार मुनाया सल्लाहकारलिसें पूर्व प्राज्ञ लक्ष्मी मालीं मचा, ल्यासे ल्याय्म्हतय्त ब्वने यइगु विषययात कःघानाः साहित्य सृजना यायेमाःगु खँय् बः बियादिल । लिसें वय्कलं झीगु छेँय् मस्तय्सं मेमेगु भासं खँ ल्हाःसां झीसं इपिं नापं नेवाः भासं हे खँ ल्हानाः इमित नं नेवाः भासं खँ ल्हाकेगु स्वयेमाः धयादिल ।

उगु हे ज्याझ्वलय् मिसा साहित्यकार मुनाया सल्लाहकारय् ल्यःपिं लुम्बिनी बौद्ध विश्वविद्यालय, बौद्ध अध्ययन संकायया डिन डा. माणिकरत्न शाक्य, समालोचक प्रा. प्रेमशान्ति तुलाधर, पूर्व प्राज्ञ लक्ष्मी माली, साहित्यकार लिसें समालोचक ध्रुव मधिकःमि, कवयित्री प्रतिसरा साय्मि व साहित्यकार  केशरमान ताम्राकारयात सल्लाकारया दसिपौ नं लःल्हाःगु खः ।