प्रमुख प्रतिपक्षी नेकपा एमाले लिपागु विवादास्पद अभिव्यक्तिबारे प्रधानमन्त्रीया स्पष्टीकरण न्यनेत तयार जूगु दु।

तर आत्मालोचनासहित संसदय् आश्वस्त मयातले सदन अवरुद्ध जुइ धका धाःग दु। छगु सफू विमोचन ज्याझ्वलय् प्रधानमन्त्री प्रचण्डं थःत प्रधानमन्त्री दयकेत सरदार प्रितम सिंह यक्को दिल्ली वःगु धका विवादास्पद अभिव्यक्ति बिःगु खः।

उगु खँ न संसदया अपमान याःगु धासे एमालें प्रधानमन्त्रीया राजीनामा फ्वंगु खः। सहमतिया निति प्रधानमन्त्री प्रचण्डं आइतवाः एमाले अध्यक्ष केपी शर्मा ओली व नेपाली कांग्रेसया सभापति शेरबहादुर देउवानाप सहलह याःगु खः। 

वंगु मंगलवाः थःगु छेँय् सीनाच्वम्ह गायक नाप अभिनेता रविन तामाङयात थौं अन्त्येष्टि याइ। तामाङ परम्परा कथं स्वयम्भूइ अन्तिम संस्कार याइगु जुगु दु धका रविन व्यवस्थापन समूहया आशिष पराजुलीं जानकारी बिःगु दु।

अथेहे अन्तिम श्रद्धाञ्जलीया लागि रविनया पार्थिव शरीरयात थौं सुथय् नक्शालस्थित संगीत लिसे नाट्य एकेडेमी नक्शालय् तइगु जुगु दु। रविनया निम्ह म्ह्याय्पि दु।

६० दँ दुम्ह तामाङ रविन एण्ड द न्यु रिभोलुसनया गायक न खः । लिपागु इलय् फिल्मय् तक अभिनय यानादीगु खः।

गणेश साय्मी छम्ह इमान्दरम्ह मनू खः धका नेवाः न्ह्यलुवाः मल्ल के सुन्दरं धयादीगु दु।

थौं गणेश साय्मी हने ज्याझ्वलय् नुँगः खँ तयेगु झ्वलय् वयकलं धयादीगु दु, नेपालभाषा मंकाः खलः न नेपाल संवत ११०२ य् बाजं खलःपिन्त समय्बजि नकागु खँ लुमकादील।

उगु ज्याझ्वलय् समय्बजि नके धुका ल्यः दुगु चिं, चिकं, हलु, बजियात तक ल्याःचाः तयादीगु खँ कनादीगु खः। अथेहे, नेपाल संवतया क्यालेण्डर पिकायेगुलि योगदानया खँ न लुमकादीगु दु।

लोकह्वाम्ह कलाकार गणेश साय्मीयात थःगु छगु ज्याझ्वः दथुइ तजिक हने ज्याझ्वः जूगु दु। गणेश साय्मी २०२२ सालय् रेडियो नेपालं नेपालभाषां समाचार लिकाउगु आन्दोलन निसे थौं तक नेपालभाषा ख्यलय् मदिक्क योगदानया कदरयासे हना ज्याझ्वः याःगु खः।

वयकलं नेपाल संवतया आन्दोलनय् न मदिक्क योगदान यानादीगु दु सा नेपालभाषा मंकाः खलःया संस्थापक दांभरी नाप ख्यालय् बिधाय् न कलाकार व निर्देशक जुया यक्को म्हितादीइ धुकुम्ह खः। थौं नेपालभाषा मंकाः खलःया नायः जनकवि दुर्गालाल श्रेष्ठं दोसल्ला न्यय्का हना पौ लःल्हनादीगु खः।

अथेहे नेवाः न्ह्यलुवाः मल्ल के सुन्दर व कजि राजेन्द्र मान शाक्यं बेताली चिकां हनादीगु खः। पत्रकार सुरेशकिरण मानन्धर, येँ महानगरया १७ वडाध्यक्ष नाप प्रवक्क्ता नबिन मानन्धर, ख्यालि जुजु मदनकृष्ण श्रेष्ठ व नेवाः न्ह्यलुवाः मल्ल के सुन्दरपिन्स गणेश साय्मीं नेपालभाषाय् योगदान यानादीगु बारे थःपिनिगु नुगः खँ तयादीगु खः।कलाकार राजेन्द्रमान शाक्यया अध्यक्षताय् हना ज्याझ्वः जुगु खः। थौं जुगु उगु ज्याझ्वलय् थीथी खलः पुचः न हना पौ लःल्हादीगु खः।

वयकःयात छगु लखं न्ह्य्य न्याद्धः नगद कजि शाक्यं लःल्हानादीगु खः। गणेश साय्मी थःत लःल्हागु ध्यवा मध्ये न्ह्य्य न्याद्धः नेपाल संवत ज्याझ्वःयात लःल्हायेगु व छगु लख थःगु वासः यायेगु निति खर्च यायेगु धका धयादीगु खः।

नेपालभाषा आन्दोलनया न्ह्यलुवा लिसें नांजाःम्ह कलाकार गणेश साय्मियात थौं तजिक हने ज्या जूगु दु।

वय्कःयात बाजं थानाः लसकुस यानाः यंकुसें नेपाः ब्यांक्वेटया हलय् हःगु खः। कलाकार राजेन्द्रमान शाक्यया अध्यक्षताय् हना ज्याझ्वः जुगु खः।