विपक्षी दलपिनिगु अवरोधया कारण प्रतिनिधिसभाया बैठक बाघौंया निति स्थगित जूगु दु ।

प्रधानमन्त्री दयकेत प्रितम सिंह पटक पटक दिल्ली वःगु धका धागु प्रधानमन्त्री प्रचण्डया अभिव्यक्तियात कया प्रमुख प्रतिक्षी दल एमाले, रास्वपा व राप्रापाया सांसदपिन्स विरोध यायेवं सभामुख देवराज घिमिरें बाघौंया निति स्थगित यानागु सूचं बिःगु खः।

एमाले सांसद रघुजी पन्तं थःत प्रधानमन्त्री दयकेत प्रितम सिंह पटक पटक दिल्ली वःगु प्रधानमन्त्री प्रचण्डया अभिव्यक्तिइ आपत्ति प्वकूगु खः ।

शेयर बजाः परिसूचक नेप्से थौं बुधवाः ३९ दशमलव २६ अङ्कं कुहावःगु दु। म्हिगः मङ्गलवाः सामान्य थहावःगु नेप्से थौं यक्को अङ्कं कुहावया २ हजार ४९ दशमलव ४४ विन्दुइ कुहावःगु खः।

थौं दकलय् अप्पो समूहया शेयर कुहावगुलि जीवन बिमा समूहया शेयर ४ सय ९ व निर्जीवन बिमा समूहया शेयर ३ सय १० अङ्कं स्वया अप्पो घटे जूगु दु। नेप्से उच्च अङ्कं घटे जूसा कारोबार रकम धाःसा म्हिगः स्वया अप्पो थहावःगु दु।

म्हिगः २ अर्ब ५७ करोड ६१ लाख रुपैयाँया शेयर कारोबार जूगुलि थौं ३ अर्ब ७ करोड रुपैयाँया शेयर कारोबार जूगु दु। दकलय् अप्पो थौं शिवम् सिमेन्टया १६ करोड ३९ लाख रुपैयाँया शेयर किनबेच जूगु खः। थौं २ सय ७७ गू कम्पनीया शेयर कारोबार जूगुलि १४ गु कम्पनीया भाः थहावःगु दु सा २ सय ८ गु कम्पनीया भाः कुहावःगु दु।

निगु कम्पनीया शेयर भाः धाःसा स्थिर जूगु दु। बीपीडब्ल्यू लघुवित्त व मोदी इनर्जीया शेयर १० प्रतिशतं कुहावःगु खः। मोदी इनर्जीया शेयर थौं न्हापागु कारोबारय् नकरात्मक सर्किट लाःगु दु।

समग्र बजाः घटे जूसा सिटी होटल व रावा इनर्जीया शेयर १० प्रतिशत स्वया अप्पो थहावःगु दु।

गृह मन्त्रालयया शान्ति, सुरक्षा महशाखा प्रमुख जितेन्द्र बस्नेत येँया प्रमुख जिल्ला अधिकारीयात जिम्मेवारी वंगु दु।

आःया प्रमुख जिल्ला अधिकारी घनश्याम उपाध्याय सचिवय् बढुवा जूगुलि मन्त्रालयं बस्नेतयात येँया प्रमुख जिल्ला अधिकारीया कथं छ्वया हःगु खः। बस्नेत च्यादँ न्ह्यः हे सहसचिव जुइ धुकुगु खः।

वयकलं प्रमुख जिल्ला अधिकारीया कथं गोरखा, चितवन, पर्साय् ज्या याये धुकुम्ह खः।

प्रमुख प्रतिपक्षी नेकपा एमालें प्रधानमन्त्री पुष्पकमल दाहाल प्रचण्डं पदय् च्वनिइगु राजनीतिक व नैतिक अधिकार गुमे याये धुकुगु दु धका धाःगु दु।

नापं थुगु विषय संसदया बैठकय् गम्भीर कथं न्ह्यसः तयेगु धका धःगु दु। आइतवाः सफू विमोचन ज्याझ्वलय् प्रधानमन्त्री प्रचण्डं थःत प्रधानमन्त्री दयकेगु निति सरदार प्रितम सिंह यक्को दिल्ली वःगु धका धाःगु खः।

प्रधानमन्त्रीं आपत्तिजनक अभिव्यक्ति बिःगु धका धासे एमालें प्रतिनिधिसभाया बैठक न्ह्यः हे संसदीय दलया आकस्मिक बैठक सःतूगु खः। बैठकं प्रधानमन्त्रीया अभिव्यक्तिले जनादेशया अपमान याःगु ठहर याःगु दु ।

थःत नेपाःया संसदं मखु, दिल्लीं प्रधानमन्त्री दयकूगु अर्थ लागू प्रधानमन्त्रीया अभिव्यक्ति सामान्य मखु धका धाःगु दु।

यल महानगरपालिकां ज्येष्ठ व अपाङ्गता जूपि नागरिकपिनिगु स्वास्थ्य परीक्षण सेवा उपलब्ध याइगु जूगु दु।

थुगु दँनिसे ज्येष्ठ नागरिक (७० दँ स्वया अप्पोपि) व अपाङ्गता जुया च्वपि नागरिकपिनिगु स्वास्थ्य परीक्षण सेवा बिइगु  जुगु दु धका यल महानगरपकालिकाया मेयर चिरिबाबु महर्जनं जानकारी बियादीगु दु ।

वयकःया कथं आधारभूत वासः तक निःशुल्क बिइगु जुगु दु। अथेहे ज्येष्ठ नागरिकपिन्त छेँ छेँय् वना साधारण व विशिष्ठ स्वास्थ्य सेवा उपलब्ध याइगु जुगु । ‘थ्व न्हुगु ज्याझ्वः व टिमवर्क खः, सहकार्य याना न्ह्यावने,’ मेयर महर्जनले धयादीगु दु, ’सेवासुविधा बिइगु निति महानगरपाखे छु न कमी यायेमखु।’

सोमवाः महानगर दुने च्वनाच्वपि ज्येष्ठ व अपाङ्गता जूपि नागरिकपिन्त मुट, जलास्येँ व मिखाँया परीक्षण सुविधा बिइत नेपाल हृदय रोग निवारण, नेपाल नेत्र ज्योति संघ (कीर्तिपुर आँखा अस्पताल) व यल महानगर दथुइ समझदारी पत्रय् ल्हाःचिं तःगु खः।

अथेहे, मिर्गौला जोगाउन व उपचारया निति मेडिसिटी अस्पताल, मिर्गौला बचाउ अभियान व यल महानगर दथुइ समझदारी जूगु खः।