यलय् थौं मतयाः शुरु जुगु दु। मतयाः थौं सुथय् ४ बजे सौगलं न्ह्यागू खः।

दँये दसं सायाःया कन्ह्यः कुन्हु यलय् मतयाः सुरु जुइगु याइ । सौगलं शुरु जूगु मतयाः चिकंबहिल, टङ्गं, लगंख्यः, हखबहाः, पूर्णचण्डी, बुबहाः, गाःबहाः, नबहील, श्रीबहाः, नःत्वाः, पुल्चोक, नागबहाः, कोबहाः जुया सौगलय् थ्यकां क्वचाइगु याइ।

अथेहे मतःया कुन्हु यलया पूच्वो, लगंख्यः, ग्वार्कोया नापं प्यंगू थुर चाःहिलिइगु याइ।

चीननाप याःगु उत्तरी नाका तातोपानी नाका थौंनिसे चालिइगु जुगु दु। तिब्बतस्थित नेपाली महावाणिज्य दूतावासया कथं चिनियाँ अधिकारीपि नाप च्वंगु बैठकं उगु नाकापाखे वयेगु वनेगु नितिचायेगु निर्णय याःगु खः।

२०७२ सालय् भुखाय् ब्बःगु व वयालिपा कोरोना भाइरस महामारीया कारण तातोपानी नाका पूर्णरुपं बन्द याःगु खः। थौं शुक्रवाः निसे नाका सञ्चालनय् हयेगु समझदारी जूगु दु धका महावाणिज्यदूत नवराज ढकालं जानकारी बिःगु दु।

समझदारी कथं नाकाय् यात्रुपिन्त वयेगु वनेगु खुल्ला यायेगु धाःसा आःया लागि स्थानीयपिन्त जक चाय्के त्यःगु खः। 

भोजपुर केन्द्रबिन्दु जूया भुखाय् ब्बःगु दु।

राष्ट्रिय भूकम्प मापन लिसे अनुसन्धान केन्द्र लैनचौरया कथं थौं चान्ह्यः १ बजे जूया ११ मिनेटय् ४ म्याग्निच्युटया भुखाय् ब्बःगु खः।

भोजपुरया तुङ्गेछा जःखः केन्द्रविन्दु जूया ब्बःगु भुखाया धक्का भोजपुर जिल्ला जःखः तक महसुस जूगु खः।

नेपाल आयल निगमं पेट्रोल, डिजेल व मचिकंया भाः थकाःगु दु। अथेहे ग्यासया भाः न थकाःगु दु।

थौं बिहीवाः निगम सञ्चालक समितिया बैठकं पेट्रोल लिटरं प्यतका, डिजेल व मचिकनय् स्वतका थकाःगु दु। अथेहे ग्यास सिलिण्डरं २३५ रुपैयाँ थकाःथु दु।

आः येँ पेट्रोल लिटरं १७८ रुपैयाँ थ्यःगु दु। अथेहे डिजेल व मचिकंया भाः १६७ थ्यःगु दु सा ग्यास सिलिण्डरं १८९५ रुपैयाँ थ्यःगु दु।

रविन्द्रराज ताम्रकारं यल उद्योग वाणिज्य संघय् अध्यक्ष पदय् उम्मेदवारी बीइगु जूगु दु ।

यल उद्योग वाणिज्य संघं वि.सं. २०५१ सालय् दुजः जुसां निसें थीथी पदय् च्वनाः ज्या याना वयाच्वनादीम्ह वय्कः अजमान जोशीया नेतृत्वय् दुगु कार्यसमितिया प्रथम उपाध्यक्ष व सविन श्रेष्ठया नेतृत्वय् जूगु कार्यसमितिइ वरिष्ठ उपाध्यक्ष जुयादीधुंकूम्ह खः ।

वय्कःया पुस्तौ पुस्तानिसें सिजः, लीया बसजाः व्यवसाय लिसे संलग्नपिं खःसा वय्कलं नं थःपिनि पूर्खाया ज्यायात निरन्तरता बियाः हस्तकला क्षेत्रया विकास लिसें थीथी सामाजिक ज्याय् महत्वपूर्ण भूमिका म्हिता वयाच्वंगु दु । वय्कः ताम्राकार समाजय् निगू कार्यकाल अध्यक्ष जुयाः समाजमार्फत यलया जातीय समाज, खलःपुचः दथुइ समन्वय यानाः भाय्, संस्कृति संरक्षणया ज्याय् नं निरन्तर लगे जुयाच्वनादीम्ह खः ।

यल उद्योग वाणिज्य संघया तःमुँज्या वइगु असोज १९ व २० गते जुइत्यंगु दु । थःगु जीवनया अधिकांश ई ब्यापार व्यवसायय् लगे जुयाः २८ दँ तक संघय् सेवा यायेधुनागुया अनुवभं संघयात अझ च्वन्ह्याकेगु ताः तयाः थम्हं उम्मदेवारी बीत्यनागु खँ भाजु ताम्रकारं धयादीगु दु ।