त्रिभुवन विश्वविद्यालया उपकुलपतिइ प्रा. डा. केशरजंग बराल नियुक्त जूगु दु।

त्रिविया कुलपति लिसे प्रधानमन्त्री पुष्पकमल दाहाल प्रचण्डं थौ बिहीवाः बरालयात उपकुलपति नियुक्त याःगु खः। प्रधानमन्त्री प्रचण्डं उपकुलपति सिफारिसया लागि शिक्षा, विज्ञान लिसे प्रविधिमन्त्री अशोक राई नेतृत्वय् समिति गठन याःगु खः।

समितिं चित्रबहादुर बुढाथोकी, बराल व टंकनाथ धमलाया नां सिफारिस याःगु खः।

प्रधानमन्त्रीं न्हापागु थासय् लाम्ह बुढाथोकीयात त्वःता बरालयात उपकुलपतिइ नियुक्त याःगु खः। सिफारिस समिति स्रोतया कथं थीथी मापदण्डया आधारय् बिःगु ल्याखं बुढाथोकी २ अंकं न्ह्यने खनेदुगु खः।

अन्तर्राष्ट्रिय मातृभाषा दिवसया लसताय् नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबुलिं ‘मातृभाषा पत्रकारिताया महत्व’ विषयस अन्तरक्रिया ज्याझ्वः जूगु दु।

दबूया नायः नृपेन्द्रलाल श्रेष्ठया सभाध्यक्षताय् जुगु उगु ज्याझ्वलय् नेपालभाषं पिहावयाच्वंगु अनलाइन, पत्रिका, टेलिभिजन नाप रेडियोय् ज्या यानाच्वपि पत्रकारपिन्स ब्बति कयादीगु खः।

ज्याझ्वःया मूवक्ता कथं नेपालभाषा टाईम्सया सम्पादक सुरेशकिरण मानन्धरं मातृभाषा पत्रकारिताया महत्वया बिषय न्ववानादीगु खः।

ज्याझ्वःया कजि दबूया ल्युदांभरि तेजनारायण महर्जनं न्ह्याकादिगु उगु ज्याझ्वलय् दबूया पदाधिकारी नापं थीथी मिडियाय् ज्या यानाच्वपिन्स ब्बति कयादीगु खः।

येँ महानगरपालिका २४ वडाया निवर्तमान वडाध्यक्ष बालकृष्ण श्रेष्ठ मन्त।

म्हिगः बहनि ८ बजेय् नर्भिक अस्पातलय् ७९ दँय् मदुगु खः। वयकःया काय् स्वम्ह व म्ह्याय् छम्ह दी।

राष्ट्रिय योजना आयोगया उपाध्यक्ष डा. मीनबहादुर श्रेष्ठ नेतृत्वय् नेपाली प्रतिनिधि मण्डल थाइल्याण्डया बैंकय् प्रस्थान याःगु दु। एशिया प्यासिफिक फोरम अन सस्टेनेवल डेभलपमेन्ट ज्याझ्वलय् ब्बति कायेगु निति उपाध्यक्ष श्रेष्ठ नेतृत्वया बैंककय् वःगु ख।

उपाध्यक्ष श्रेष्ठ नेतृत्वया प्रतिनिधिमण्डलय् आयोगया सदस्य डा. रामकुमार फुयाल, सचिव डा. तोय नारायण ज्ञवाली, सहसचिव महेश भट्टराईपि वःगु खः। बैंकय् संयुक्त राष्ट्र संघया सम्मेलन केन्दय् मंगलवाःनिसे शुक्रवाःतक न्ह्याइगु जुगु दु।

अन्तर्राष्ट्रिय मातृभाषा दिवस दँय् दँसं फेब्रअरी २१ कुन्हु हनावयाच्वंगु खः। अन्तर्राष्ट्रिय मातृभाषा दिवसया लसताय् थौ नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबुलिं नं मातृभाषा पत्रकारिता सम्वन्धि अन्तरक्रिया ज्याझ्वः याइगु जुगु दु।

दबूुलिं थौ ‘मातृभाषा पत्रकारिताया महत्व’ विषयस अन्तरक्रिया ज्याझ्वः यायेत्यंगु खः। ज्याझ्वलय् नेपालभाषां प्रकाशन प्रसारणय् दुगु संचारमाध्यमया प्रतिनिधितयसं थःथःगु खँ तइगु ज्याझ्वः दु। अथेहे मातृभाषा पत्रकारिता शताब्दी दिवसया तयारी कथं नं थ्व ज्याझ्वः यायेत्यःगु खः।

थनिं ९९ दँ न्ह्यः ने.सं. १०४५य् धर्मादित्य धर्माचार्यं नेपालभाषाया पत्रिका ‘बुद्धधर्म’ पिथनादीगु खः । थ्व हे पत्रिका नेपालया न्हापांगु मातृभाषी पत्रिका कथं कयातःगु दु । आः नेपालय् मातृभाषा पत्रकारिताया सुरुवात जूगु सछि दँ पूवनेत्यंगु झ्वलय् पत्रकार दबुलिं मातृभाषा पत्रकारिता शताब्दी दिवस हनेगु तयारी यानाच्वंगु दु ।