विक्रम संवत्या नापनापं नेपाल संवत् नं छ्यला यंकेगु धकाः नेपाः सरकारं याःगु निर्णययात ग्वाहालि जुइ कथं आः न्हिथं छ्यलीगु कम्प्युटर व ल्यापटपय् हे न्हिंन्हिं नेपाल संवत्या तिथि नं वइगु ’विजार्ड’ तयार याःगु दु।

तिथिमिति डट कमपाखें थ्व विजार्ड डाउनलोड यानाः न्ह्याम्हेस्यां नं थःगु कम्प्युटर वा ल्यापटपय् नेपाल संवत्या थ्व तिथि तये फइ। थौंकन्हय् मनूतय् ल्यापटप व कम्प्युटरय् विक्रम संवत् व इस्वी संवत्या मिति वइगु व्यवस्था यानातःगु दु।

आः उकी तुं नेपाल संवत्या तिथि नं वइगु व्यवस्था थुकिं याइ। अथे वःगु तिथियात कपि यानाः थःगु लेटरहेडय् गन माल अन पेस्ट नं याये फइ । राष्ट्रिय विभूति शंखधर साख्वाः प्रतिष्ठानया आह्वान कथं स्पाइरलोजिक्स इन्टरनेशनलपाखें थ्व विजार्ड दयेकूगु खः ।

प्रतिष्ठानया नायः ज्ञानराम श्रेष्ठं कनादीकथं थ्व विजार्ड आः नेपाल सरकारया कर्मचारीतय् दथुइ प्रस्तुत यानाः सरकारयात तुं लःल्हायेगु तयारी जुयाच्वंगु दु।

शेयर बजाः थौ सामान्य कुहावःगु दु। शेयर बजाः परिसूचक नेप्से थौ १ दशमलव ७६ अङ्कं कुहावया २ हजार ३३ दशमलव शून्य ६ विन्दुइ थ्यःगु दु।

थौ विकास बैंक, फाइनान्स, लगानी, उत्पादन व मेमेगु समूहया शेयर सामान्य थहावःगु दु सा ल्यः दुगु समूहया शेयर सामान्य कुहावःगु दु। ग्रीन लाइफ हाइड्रोपावरया शेयर कूहावया नकारात्मक सर्किटय् वःगु दु।

समग्र बजाः कुहावःसा थौ बोटलर्स नेपाल व समाज लघुवित्त कम्पनीया शेयर १० प्रतिशतं थहावःगु दु। थौ ९३ लाख ४२ हजार कित्ता शेयर ३ अर्ब १३ करोड रुपैयाँया कारोवार जूगु दु।

संघीय व प्रदेश सरकार जक मखु महानगरपालिका न विकास निर्माण व पुँजीगत खर्चय् म्हो खनेदुगु दु।

चालु आर्थिक वर्षया माघतक न्ह्यय्ला दुने खुगु महानगरपालिकां औसत पुँजीगत खर्च २६.३५प्रतिशत जक याःगु दु। महानगरपालिका मध्ये दकलय् तधःगु बजेट हःगु येँ महानगरया पुँजीगत खर्च १४.११ प्रतिशत दु।

येँ महानगर लिपा भरतपुर महानगरया विनियोजित पुँजीगत खर्च करिब १८ प्रतिशत जक खर्च याःगु दु। दकलय् अप्पा् पुँजीगत खर्च यागुलि वीरगन्ज महानगरं ३४.३१ प्रतिशत खर्च याःगु दु। अथेहे विराटनगरं विनियोजित बजेतय् ३४.१५ प्रतिशत खर्च याःगु दु। यल महानगरपालिकां पुँजीगत खर्चय् करिब ३३ प्रतिशत खर्च याःगु दु।

पोखरा महानगरपालिका २५ प्रतिशतय् जक सीमित खनेदुगु दु। महानगरपालिकां आर्थिक वर्षया लिपागु इलय् दकलय् अप्पो खर्च यायेगु प्रवृत्ति खनेदया वयाच्वंगु दु। वःगु तथ्यांक कथं येँ महानगरं चालु आर्थिक वर्षया लागि १५ अर्ब ६ करोड ५० लाख रुपैयाँ पुँजीगत बजेट विनियोजन यागुलि माघतक २ अर्ब १२ करोड २५ लाख रुपैयाँ जक खर्च यायेफुगु दु। ३ अर्ब ७२ करोड ६३ लाख रुपैयाँ विकास बजेट विनियोजन यागु भरतपुरं माघतक ६६ करोड ७२ लाख रुपैयाँ जक खर्च यायेफुगु दु।

पोखरा महानगरं ३ अर्ब ८६ करोड ६० लाख पुँजीगत बजेट विनियोजन यागुलि ९६ करोड ४५ लाख जक खर्च यायेफुगु दु। थ्व धइगु २४.९५ प्रतिशत जक खः। विराटनगर महानगरपालिकां १ अर्ब २६ करोड ८० लाख विनियोजन यागुलि ३४.१५ प्रतिशत जक खर्च याःगु दु। वीरगन्ज महानगरं पुँजीगत खर्च ३४.३१ प्रतिशत याःगु दु। वीरगन्जं ७९ करोड २८ लाख विनियोजित बजेटमध्ये २७ करोड २० लाख रुपैयाँ जक खर्च याःगु दु ।

खुलामञ्चय् नागरिक अधिकारकर्मीतय्सं प्रदर्शन ज्याझ्वः याःगु दु। मुक्त टुँडिखेल अभियान (अकुपाई टुँडिखेलं) नागरिक अधिकारया नितिं अन नागरिक भेला याःगु खः ।

खुला मञ्च सर्वसाधारण जनताया पहुँचय् दयेमाः धइगु माग यासें अन भेला याःगु खः। ताः ई तक येँ महानगरपालिकां खुला मञ्चय् तालं ग्वयातःगु खः।

फुटबल ग्राउन्ड दयेकेगु तयारी कथं डोजर हयाः मैदान सफा यानाच्वंगु इलय् अभियन्तातय्सं सः थ्वयेकूगु खः।

दोलखा केन्द्रविन्दु जूया थौं सुथय् भुखाय् ब्बःगु दु।

थौ सुथय् ४ बजे जूया ५८ मिनेतय् दोलखाया हाटडाँडा केन्द्र जूया ४.१ म्याग्निच्युडया भुखाय् ब्बःगु दु धका राष्ट्रिय भूकम्प मापन नाप अनुसन्धान केन्द्रं धाःगु दु।

भुखाय् धक्का दोलखा नाप जःखः जिल्लाय् तक महसुस जुगु धका धाःगु दु।